كل سنه جديده وانتم طيبين

عيد سعيد وسنه جديده يارب تكون احسن من اللى فاتت...عليكم كلكم
وحشتونى كلكم وصدقونى متباعكم كلكم والله ...بس انا مش لاقيه حاجه اكتبها من ساعة ماجيت مصر....

انا لقيتنى بقيت فى غربه اكتر....واتخنقت اكتر واكتر...وحسيت انى فى سجن..

مش عايزة حد يزعل منى ..بس انا مش حاسه بالأنتماء هنا بتاتا البته......

بس انا قررت انى مش هاسافر نهائى لأجل غير مسمى...لغاية ماعرف انا هويتى ايه بالظبط....

ليه انا مش طايقه ااقعد هنا ...؟؟؟ وليه مش قادرة اتأقلم على الناس والحياة هنا ؟؟؟

لدرجة ان ولادى اتأقلموا اكتر منى ...خصوصا مع اهلى واهل الباشا ...

جايز علشان هم لسه صغيرين ...جايز....

أبنى الكبير قالى كلمه وجعتنى قوى ...انتى جنسيتك ايه ياماما ...

مش مصريه برضه ؟؟؟؟؟؟؟

معرفتش ارد وأأقول ايه..ايوة فى البطاقه والبسبور مصريه...

لكن فى القلب ايه ..؟؟؟؟فراااااغ كبير قوى...

علشان كده انا مش هاسافر تانى لأجل غير مسمى زى ماقلتلكم

جايز ..الفراااغ ده يتملى بحاجه مع الاياااام...

معلش برضه خنقتكم بمشاكلى ....بس حبيت اعيد عليكم كلكم

كل سنه وانت طيبين ..

وسنه جديده سعيده على الكل بأذن الله..

كل سنه وانتم طيبيييييين

انا اللى عملت ده كلللللللله

وحشتووونى قوى قوى

عارفه انى مقصرة جدا معاكم كلكم ....بس احوالى كلها كانت ملخبطه

ولأول مرة فى حياتى ..ابقى مش عارفه اعمل ايه...

بس انا اخدت قرار ونفذته وباتحمل توابعه..

على قد ماهو قرار صعب قوى ..بس حاسه انه القرار الصح على الأقل دلوقتى

وهو انى استقريت فى مصر حاليا وباسجل ولادى فى المدارس هنا

والباشا رفض العرض بتاع الرياض لانى مش عايزة ارجع السعوديه تانى..

صحيح انا عشت فيها نص عمرى تقريبا..واتولدت فيها..

بس كفايه غربه علي كده ..انا تعبت...

والباشا حاليا لسه فى دبى ومش عايز يرجع مصر ..

ومدينى السنه دى اجرب فيها العيشه فى مصر..

وهيقرر هو بعد السنه دى يرجع ولا لأ...

يعنى انا قاعده معاكم السنه دى ...وهاتحسوا بيها قوى لما تلاقوا مصر بقت خنقه اكتر ماهى مخنوووقه

وده طبعا واكيد علشان مخنوووقه الخنيييقه وصلت

وقاعده سنه بحااالها

وبعد كده

الله وحده اللى يعلم هاروح فين

عموما ده موجز لأخبارى الخنيقه والتفاصيل هتيجى فى البوستات اللى جايه

ان شاء الله

وكل سنه وانتم طيييبيين علشان العيد

ويارب يعود عليكم الايام بخير

مخنوقتكم ....رجعت تانى

ليه الدنيا بتخنق كده ..؟؟؟؟؟؟

عارفه انكم زعلانين مني قوى ....علشان بقالى اكتر من شهر مابسألش عليكم ...

وشكرا لكل الي سألوا علي....بس أنا بامر بفترة كئيبه فى حياتى ...وانا يظهر اتعودت لما اكوون متضايقه ..

مااتكلمش مع حد خاااالص... وده غلط جدا ...بس دايما باقول ان كل واحد عنده همومه ومش ناقص يشيل

هموم حد تانى ...بس انا تعبت من الوحده قوى ...وتعبت من الغربه كمان ...

الحكايه ببساطه ان البلد هنا قفلت خلاص وماعادش فيها شغل لأى حد ....وبيبه سابتنى وسافرت البحرين نهائى...

علشان جوزها نقل شغله هناك مع مديره...وفجأتن كده الباشا قرر يسافر هو كمان السعوديه تانى ..بس الرياض المرة دى...

مش عارفه ليه انا المرة دى زهقت ..اه والله العظيم زهقت...

حسيت اني بالظبط الشنطه بتاعته..من غير مايقولى ولا يفكر حتى انه يناقشنى ...ولا حتى يقولى انه بيدور على شغل تانى

لالا..اخد القرار وانا علي التنفيذ وأنا ساكته ....

بس المرة دى ماسكتش ...تخيلوا ..حتى انا استغربت من موقفى ده ....

اول مرة مابقاش سلبيه وأأقول حاضر وبس....واتخانقت معاه ..وقررت اني انزل اعيش فى مصر لوحدي...

واخد ولادى ..وهو يروح يتغرب براحته...

طبعا هو رفض الكلام ده ..واستمرت الخناقات بنا ...

جايز تقولوا انى غلطانه ..بس انتم عارفين انا غيرت كام شقه فى حياتى من يوم ماتجوزت...

تقريبا 8 شقق فى بلاد مختلفه ...وغيرت للأولاد يمكن 4 مدارس...

واشتريت عفش وبعت عفش اكتر من 5 مرات .,..

وعرفت ناس كتيرة قوى ..وبرضه سبت ناس كتيرة قوى ....

نفسي مرة احس بالأستقرار فى حياتى ..وأنى مش مضطرة اسيب الشقه تانى ..ولا ابيع العفش ..ولا اغير مدارس الاولاد ..

ولا اغير شغلي..ولا اغير اصحابي ...ولا ابدأ من جديد تانى ...

انا تعبت ...فعلا ..تعبت قوى ....

انا اتكلمت مع صبرنى يارب ..كتيير وكانت نصايحها حلوة بصراحه ...بس برضه صعب قوى تغييرى طريقة تفكير

الراجل...

يمكن هو صح ...ويمكن أنا صح ...صدقونى أنا مش عارفه مين فينا اللى غلط....

المهم ان الموضوع لسه ماتحلش...كل الحكايه انى هانزل مصر اجازة مفتوحه لغاية معاد المدارس....

يكون الباشا قرر فيها ناوى يعمل ايه ...

لانه مش مقتنع بتاتا البته انه يستقر فى مصر ....

وشايف انى خياليه ....وان الوضع فى مصر مايسرش...وانى هاتعب لوحدي هناك...

المهم انى اتكلمت معاكم ..لأنى فعلا كنت هاطق من الخنقه لوحدى ....لأن صاحبتى الوحيده سابتنى

ومشيت ...وخفت يجيلى كأبه بجد من القعده لوحدى من غير ماتكلم مع حد ....

بس انا جاتلى سدة نفس عن الكمبيوتر والنت والخرووج وكل حاجه ....

ومابقتش احب حتى اتكلم مع الباشا او اى حد ....

معلش خنقتكم ..ماتزعلوووش منى ..عارفه ان كل واحد عنده همومه ومش ناااقص....

مش تزعلوااا منى ..

مأنا مخنوقه الخنيقه ....عادى يعنى ....

احلى عيد ميلاد لمخنووقه...وخنقه ..بخنقه...

احلى تورته لعيد ميـــــــــــــــــــــــــــــلاد مخنوووقه

ودى مليااااااااااااااااااااااااانه ورد من اللى بتحبه مخنووووقه

ودى لونها بتمووووت فيه مخنوووقه ....

السلام عليكم الاول....

انا متشكرة جدا جدا لكل اللى هنونى بعيد جوازى ..وبعيد ميلادى ..خصوصا ستيته حبيبتى ..

دى كانت اول واحده تهنينى بعيد ميلادى ..ونونى كمان و..جودى الامورة..

وماتزعلووش اذا ماكنتش رديت على تعليقاتكم الجميله قوى دى ..لانى بصراحه ..ردودى هتبقى شبه بعضها

وانا مش بحب كده ..بس ليكم كلكم الف مليوووون شكر ياعساسييييل..ونردهالكم فى الافراااح بأذن الله....

وغير كده كان نفسى ااقولكم خبر حلو ..وهو انى اشتغلت ..بس للأسف ماكملتش فى الشغل غير 5 ايام بس..

وده بسبب ان الشغل اللى جالى كان فى منطقه اسمها ..جبل علي..ودى بعييد عن البيت بحوالى ساعه وشويه

بالعربيه...وطبعا الباشا رفض فى الاول ..بس انا اصريييت..

قالى ماشى يامخنوقه ..روحى وجربي..

وياريتنى سمعت كلامه من الاول....بس انا خنيييقه اعمل ايه ....ماقدرتش اكمل غير 5 ايام بالعافيه

وتعبت من السواقه ..ساعه رايح ..وساعه جاى كل يووووم....

ومانابنى غير انى اخدت مخالفة رادار....حاجه تخنق بجد...

انا بصراحه اتشائمت وقلت ااجل موضوع الشغل ده لغاية لما ارجع من اجازة الصيف فى مصر

ونشووف لينا عيش فى البلد دى ولا لأ....

المهم نرجع بقى لعيد ميلادى الجمييل علشان اكييد عايزين تعرفوا حصل ايه ....

بصراااحه الباشا يومها صحانى من غير مخده ..وقالى كل سنه وانتى طيبه يامخنوقه...

ولقيته راجع بالليل وجايب معاه تورته حلوة قوى ...وقالى البسى ...هاوديك مكان اول مرة تروحيه...

انا بصراحه فرحت قوى .وقلت ايه الهنا اللى انت فيه ده ياقلبى...

ولبست واتشيكت كده وخرجت انا وهو برضه من غير الاولاد ...ورحنا مطعم شيك جدا وفيه كاريوكى...

ودى فعلا اول مرة اروح مكان زى ده ..

وشويه لقيت كيمو وبيبه جم ...وقعدوا معانا ...والمكان ملياااان مزز رايقه قوى ...وانا وبيبه تقريبا ...

اللى لابسين هدووووم.....اما الباقى تحسوا كده انهم نسيوا يلبسوا اللى فوق او اللى تحت ..

واحياناااااا الاتنين....

وفجأتن كده لقيت الامورة اللى بتاخد الاوردر عارفه الباشا وكيمو كويس قوى...

وبتساله زى كل مرة يافندم ...؟؟؟؟

يعنى الباشا وكيمو مقيمين هناك وانا مااااعرفش .....

قلت فى بالى يابت عديها وبلاش خنقه ...ليكى بيت اخنقى امه فيه.....

بس واحنا قاعدين ..لقيت كل الموجودين بيغنوا كاريوكى ..والميك فى ايديهم وهم قاعدين ...

يعنى مش ضرورى يطلعوا على اللستيج....

واصوات مايعلم بيها الا ربنا ....بس علشان مزز رايقه ..كله بيسقف....

المهم قعدنا واتعشينا هناك ...

وشويه لقيت بيبه بتقولى ...

بيبه : مخنوقه ..هى الساعه كام ؟؟؟؟ مش 9 برضه.؟؟؟

انا : تقريبا ...ليه ..؟؟؟ وراكى حاجه ..؟؟؟

بيبه : لأ اصل لقيت كل شويه كيمو بيقول للباشا ...بص.الساعه 3 ..وبعدين لأ الساعه 6 ..وشويه الساعه 12

ومش عارفه ايه موضوع الساعات دى ....

قعدت اراقبهم شويه كده ...,بعدين للأسف الشديد فهمت قصدهم ايه ....

واكيييد اكيييد معظم الرجاااله اللى بيقرواا فهموا قصدهم ايه ....مش كده ...؟؟؟؟

والظاهر ان الباشا نسي ان خلانى كلهم ظباااط واكيييد المعلومه المهمه دى انا عارفاااها ....

وهى ياسيدااات يامحترمااات ..انهم بيبصوا على المزز من خلال وضع ارقام الساعه...

يعنى الساعه 3 يبص ناحية اليمين ...والساعه 9 يبص ناحية الشماال ...

والساعه 12 يبص قدامه ....والساعه 6 يعنى ورااه ..وهكذاااا ....فهمتم..علشان لو اتعملت فيكم تبقوا عارفيين..

وانا فهمت بيبه الحكايه ...وقبل ماتعملنا مشكله ..قلتلها نردها لهم ...

وعملنا زيهم بالظبط ...( بس بأمانه ربنا ماكناش بنبص على حد )..عملنالهم قلق وخلااااص...

وكل شويه ..تقولى على ساعه ..وابص ..وااقولها ...يااااه دى ساعه حلوة قوى ...

واحياانا دى ساعه طوييييييله قوى ..لغاية لما البهوااات خدوا بالهم ....وسألوونا ...

الباشا : ساعة ايه اللى طوييييله دى يامخنوووقه..؟؟؟؟

انا : ساعة ايه ياحبى ..انت ودنك معانا ولا أيه ...؟؟؟ده انا وبيبه بنهرج..ههههههههههه

الباشا : بتهرجواااا..؟؟؟؟ ازاااى يعنى ..؟؟؟ احنا اتاخرنا قوى ..ياله نروووح.....

انا : ليييييييييييييييه ..؟؟؟ ده حتى القعده احلوووت قوى ...مش كده يابيبه؟؟؟

بيبه : قوى يامخنوووقه ..خصوصا الساعه 10 ..ماحصلتش..ههههههههه..

الباشا : لأ القعده بقت صداااع قوى ...ياله يامخنوووقه نروووح..

وروحنا ..بس بصرااحه فرحت انه طول السكه عماال يلف ويدووور ويعرف انا وبيبه كنا بنبص على مين ؟؟؟؟ومش راضى يسألنى بصراحه..علشان مايغلطش نفسه....

او يبدأ خناقه...بس برضه ماريحتووش...علشان يعرف الموضووع ده بيضايق قد ايه...وعلشان يفهم بعد كده انى مش هبله ...وممكن احرق له دمه بمنتهى الهدووووووووووووووووووووووء....

بذمتكم مش التورته دى احلى لعيد ميلادى ...............

بداية الخنقه....قصدي تكملة الحكايه

ازيكم الاول..وشكرا لتهنئتكم كلكم وعقبال عندكم جميعا...

واللى ماتجوزززش ...يتجووز بأذن الله ...واللى متجوز......خلااااص امره لربنا ..هيعمل ايه ..قضى ولابد منه....

المهم احنا وصلنا لغاية لما سألت الباشا ..

انا : انت عايز مني ايه بالظبط..؟؟؟؟

لقيته سكت وشكله ماكانش متوقع السؤال وبعدين ابتسم وقال...

الباشا : انا هكلمك بصراحه ..انتى عجبتينى اول مرة شفتك مع مودي ..وكنت فاكرك مرتبطه بيه..بس لما قالى

انك بنت اخته ..مش عارف ليه فرحت ..وكان نفسى اشوفك تانى..

انا : يعني انت عجبك شكلي مش اكتر ...برضه مش فاهمه انت متوقع منى ايه ؟؟؟؟

الباشا : مخنوقه انا عجبنى شكلك اه ...بس كنت عايز اعرفك اكتر ..عايز اعرف اللى ماشوفتوش ...انا ارتحت فى الكلام معاكى

وعجبنى انك صريحه قوى ....وعايزك تعرفينى اكتر...ممكن اتكلم معاكى فى التلفون...؟؟

انا : لأ طبعا ...يعنى ايه تكلمنى فى التلفوون ؟؟؟وليه ؟؟؟؟ انا مابكلمش حد من ورا اهلي..

الباشا : انا ماقلتش من وراهم ..لو عايزة تقوليلهم ...قولي...عادي...وانا كمان عايز اجي اتكلم معاكي فى الكليه كمان ...

ايه المشكله يعني...؟؟؟؟

انا بصراحه كنت مزبهله من اسلوبه ان ااقول لبابا انى معجبه بواحد ..عادي كده وعايزة اتكلم معاه فى التلفون ....

بالظبط ده فى نظري جاي من كوكب تاني.....

انا : انت بتهزر ولا ايه ..؟؟؟؟ احنا معندناش الكلام ده فى عيلتنا ...انسى الموضوع خااالص وشوفلك حد تانى اتسلى بيه...

انا قلت الكلمه دي ولقيت وشه قلب..وحسيت انه هيقوم يضربنى.....

الباشا : مش ملاحظه انك بتجرحي فى كلامك يامخنوقه ....وانك جد زياده عن اللزوووم....؟؟؟؟؟؟

انا : وانت مش ملاحظ ان جريئ زياده عن اللزوووم...

الباشا : طب مش انتى بتكلمي زمايلك فى التلفون ..وممكن تقعدي معاهم فى الكافيتيرا كمان..؟؟؟؟

انا : احيانا لما اكون محتاجه حاجه ..ومابقعدش مع حد لوحدي ..بنبقى جرووب مع بعض..

الباشا : طب اعمل ايه يامخنوقه علشان اقعد اتكلم معاكي....؟؟؟؟

انا : انا معنديش حل للموضوع ده ...انا مش هاقعد معاك فى الكوفى تانى ...ولا هاكلمك فى التلفون ....

الباشا : يعني ده اخر كلام ...؟؟؟؟

انا : ايوة ...

سابنى وقام وهو متضايق جدا ..وبصراحه انا كمان كنت خلاااص هاعيط من الخنقه ...

وبعدين لقيته راجع وبيقولى....

الباشا : انتى مش خلصتى سكاشن ....قومى اوصلك بالعربيه...

انا : اسفه انا مابركبش مع حد ماعرفوش العربيه بتاعته....

الباشا ( بعصبيه ) : انا مش غريب ..ولما تروحي قولي لمودى الباشا وصلنى ...مش احسن من اتوبيس الكليه وزحمته ...؟؟؟

انا :...لأ..لو سمحت امشى..

المهم روحت وانا متضايقه جدا ..ومش عارفه انا كده اتصرفت صح ولا لأ....انا كنت رخمه جدا معاه...وعاملته انه

واحد جاى يتسلى مش اكتر ...بس لما لقيته بيقولى قولي لخالو مودي وهو مش هامه كده ...قلت يمكن ماكانش عايز

يتسلى ولا حاجه ...بس هو جريئ قوى بالنسبه لى ..وتربيته مختلفه جدا عني...

وروحت حكيت لأختى الكبيرة وماقلتش حاجه خالص لخالو مودي....وماشفتش وش الباشا لمدة اسبوعين كاملين...

وكنت متضايقه جدا ..مش عارفه اذا كنت حبيته ولا لأ...وقلت لنفسي اكيد مش هيجي تانى لاننا مش هننفع

لبعض من اصله ....

المهم رجعت من الكليه في يوم ولقيت خالو مودي عصبي جدا وعايز يكلمنى لوحدى ...

خالو مودي : مخنوقه انتي ليه ماقلتليش ان الباشا جالك الكليه ...؟؟؟؟؟

انا (وانا برتعش من الخوف ) : انا اسفه ياخالو ..بس انا قلت الموضوع مش مستاهل ...انا قلتله اللى عندى وخلاااص...

وبعدين هو مش صاحبك ..ماقلكش ليه ..؟؟؟ هو قالك ايه ..؟؟؟

خالو مودي : قالى اللى حصل كله ..وطلب مني رقم باباكي فى السعوديه ...علشان عايز يخطبك منه ..بس انا قلتله لما باباكى يجي احسن

علشان انت لسه صغيرة قوى على الارتباط دلوقتى يامخنوقه ...

وبعدين انا وانتى اصحاب قبل مابقى خالك ..وحاجه زى دى لازم اعرفها ...الباشا لو ماكانش قالي ..كان بقى ليه حساب تانى

معايا ....بس انتى حاجه تانيه ..انتى اختى الصغيرة ..وانا عمرى ماهازعل منك ...انا عايز اعرف منك اللى حصل ...

المهم حكيتله على كل حاجه ...وقلتله بصراحه انه عجبنى قوى بس طباعنا مختلفه تماما ..وانى مش هاخبي عليه حاجه تانى

المهم قعد يكلمنى على الباشا وازاى اتعرف عليه وعيلته وطبعا علشان اكبر منى ب8 سنين ..وده كتيير ...وكل الكلام اياه

ده ....وانا كل اللى شاغل تفكيري ..ليه الباشا استنى اسبوعين بحالهم علشان يكلم خالو مودى .....المهم خالو مودي قالى انه هو والباشا جايين لى الكليه بكره علشان الباشا يعرف رأي ايه قبل مايكلم بابا والموضوع يبقى رسمى...

وانا بصراحه موضوع الارتباط الرسمى ده قلقنى ..لانى ماكنتش عايزة اتخطب قبل ماخلص الجامعه...

المهم تانى يوم جم هما الاتنين ..وخالو مودى قعد معانا شويه وبعد كده راح يكلم صاحبته....

الباشا : برضه لسه مش عارف رأيك ايه ...موافقه ولا لأ..؟؟؟؟

انا : انا عايزة اسألك الاول ...انت ليه استنيت اسبوعين علشان تكلم خالو مودى ...كنت بتفكر يعنى ..؟؟؟

الباشا : بصراحه ..لأ..انا كنت عايز اعرف اذا كنت مرتبطه بحد من الكليه ولا لأ....وسألت وعرفت انك مش

مرتبطه ...فكلمت مودي...

انا ( بخنقه جامده ) : يعنى ايه سألت وعرفت دى ...؟؟؟؟ انا لو مرتبطه هاقولك فى وشك ....وبعدين انت بتعمل تحريات عني...

انا مش عايزة ارتبط دلوقتى اصلا ...استنى لما اخلص الكليه ...

الباشا : انتى زعلتى ليه ؟؟؟ انا قلت جايز تكونى مرتبطه ومش عايز حد يعرف ..علشان كده بتقفلى علي...انا بصراحه

ماتوقعتش انك بتتكلمي بجد ....وماتزعليش خلي مودي يعملك كل التحريات عني...

انا : بص ياباشا انا مش هاقدر اديك اي رد غير لما اهلي ينزلوا اجازة...ولازم تعرف انى مش هارتبط رسمي غير لما اخلص جامعه

واكيد مش هاتخطب قبل اختى الكبيرة...يعنى الموضوع متأجل ...وبرضه ماقدرش اكلمك فى التلفون ولا ااقابلك..

الباشا : لا انتى بجد متعبه جدا ...وبجد خنيقه....

انا فعلا كنت خنيييقه قوى وقتها .....ومازلت الحقيقه ...وفضلنا على كده ..باشوفه بس لما يجي عند خالو مودى

وكلمتين وخلاص....وبطل يجيلى الكليه...

ولما بابا ( الله يرحمه ) نزل فى الاجازة ...اختى الكبيرة خطبها ابن ابن عم بابا ...وطبعا الباشا ماتكلمش خالص قبلها ..

لكن يوم خطوبة اختى لقيته فى الحفله...وواقف جنب خالو مودي...وانا بالف مع البنات حوالين اختى وخطيبها ...

لقيت اللى مسك ايدي ...وقالى كفايه رقص وااقعدي....بابص لقيت الباشا هو اللى بيكلمنى ...

شفتم قد ايه جريئ....ولا همه بابا ولا ماما ولا خالو مودى ولا حد ....وستر ربنا ان ماحدش خد باله فى الزحمه غير ماما ...

وسالتنى ...مين ده ..وبيعمل كده ليه ..؟؟؟....وحكيتلها ...

وبعد ماروحنا ..الساعه 1.30 صباحا ...لقيت اخو الباشا الكبيير بيتصل ب بابا ...وبياخد منه معاد علشان يكلمه تانى يوم

وطبعا بابا استغرب قوى من اللى بيتصل بينا اول مانروح ده ...بس وافق واداله معاد بعد يومين...

وخالو مودي حكى لبابا كل حاجه ..وبابا ..بصراحه ماكانش موافق فى الاول...علشان اختلاف التربيه والعيله...

بس ماتفهموش الباشا اقنعه ازاى ....وساعتها بابا وافق...واتخطبنا سنتين ..وكان فاضلى لسه سنه ونص..واخلص الجامعه

واول اختى ماتجوزت ...الباشا اصر اننا نتجوز ...وانا رفضت طبعا علشان الكليه بتاعتى صعبه وعمليه ....

وقالي انا هاساعدك ...وماتخافيش..ووعد بابا انى هاكمل الكليه ...وطبعا بابا رفض نهائى.....

بس الحب وسنينه بقى ...انا فضلت اتحايل على بابا ...وبرضه مارضيش...

قام الباشا الخبيث اقنعه اننا نشترى العفش...واشترناه ....واقنعه اننا نجيب الرفايع وكل حاجه على اساس ان كل حاجه

بتغلى ..وبابا اقتنع ...وفرشنا الشقه كلها والسجاد كمان ...

وفى يوم لقيت الباشا بيعدي علي فى الكليه ...

الباشا : مخنوقه تعالي افرجك على كام قاعه اخترتهم علشان الفرح ....ونقى اى واحده فيهم ...

انا : ؟؟؟؟؟ فرح ايه ياحبى ...؟؟؟ هو بابا وافق اصلا ...؟؟؟

الباشا : خلي بابا علي...انتى شوفى اى قاعه انتى عايزاها ...

المهم اخترنا القاعه ..وراح عدى على بابا وقعد يتكلم معاه تانى ....وجابله اخوه الكبير وخالى مودى ..واخيرا بابا وافق...

الحمد لله وقتها ماكانش عندنا اى مشاكل ماديه سواء من ناحية الباشا او من ناحيتى ...

واتجوزت ..وانا فى الكليه ..قبل ماكمل 20 سنه بأسبوع ....

يعنى ياحضراات عيد ميلادى يوم الخميس الجاى ......وكله يجي ومعه الهديه لو سمحتم .....

بس ..وكملت الكليه فعلا ..بس كانت متعبه جدا بالنسبه لي لانى حملت فى ابنى الكبيير..بس ماما وحماتى الله يرحمها ساعدونى جامد ...

وفى مشروع التخرج ..انا تقريبا ماكنش باشوف ابنى ده خااالص...كانت ماما على طوول واخداه....

فنصيحه لأى واحده ..ماتتجوزيش غير لما تخلصي الجامعه .....الرجاله بيغيروا كلامهم بعد الجواز.....

الباشا ماساعدنيش نهائى فى اى حاجه ...ماما وحماتى (الله يرحمها ) هما اللى تكفلوا بي......

المهم الخميس اللى فات بقى ...طبعا صحيت كالعاده بمخده فى وشى .....بس ضحكت وقلتله ..

انا : كل سنه وانت طيب ياحبى ..

الباشا : ليه ؟؟؟ هو فى ايه النهارده ....

انا : انت ناسي ..؟؟؟ طيب انا مش هاقولك وانت افتكر براحتك فى الشغل...

الباشا : ايه يامخنوقه بجد مش عارف ...ماتقولى ....هو احنا كام النهارده ..؟؟؟

انا : انسى مش هاقولك ...

وتبعا لكلام صبرنى يارب....ان الواحده لو جوزها مافتكرش ..انها هى اللى تفكره من غير ماتديله مطوة فى كرشه

او تخبطه بشاكوش فى دماغه علشان تبقى علامه يفتكر بيها بعد كده ....

قررت انى اتصرف ...عملت الغدا بسرعه بعد مارجعت من الجيم ...ورحت اشتريتله كرافت حلوة مع زرارين حلوين

من كرستين ديور..ورحت للكوافير..وحجزت لينا عشاا بالليل فى مطعم حلو قوى فى الدرو ال25 وعبارة عن مطعم بيلف

وكله شموووع ورومانسي قوى ...وخمس نجوووم ...

والاولاد رجعوا وغديتهم وذاكرتلهم ..وفين بقى على الساعه 4 العصر اتصل الباشا ...

الباشا : عامله ايه على الغداا يامخنوقه ..انا جعااان ...

انا : حبى انت هترجع تاخد شور وهنخرج..ومالكش غدااا......انا عازماك بره النهارده ...

الباشا : ليه ؟؟؟ اه انت قلتلي النهارده ايه ..؟؟؟؟؟

انا : بجد لسه مش فاكر ...؟؟؟؟؟ طيب ياحبى لما ترجع هافكرك ....

بزمتكم مش لى حق اتخنق...؟؟؟ بس برضه ماتخانقتش معاه ...

ورجع من الشغل على الساعه 7ولبسنا ورحنا المطعم ...وفعلا كان يووم رومانسي جدا ..واتعشينا لوحدنا من غير الاولاد ...وقضينا سهرة جميله ..وفكرته من غير خناق ....

وتانى يوووم ...

انا : حبى انا اخدت 500 درهم منك دلوقتى ..

الباشا : ليه ..؟؟؟ عايزة تشترى حاجه ..

انا : لا ياحبى ده حق الكوافير وعشااا امبارح ...المطعم لوحد كان 350 درهم ...

الباشا : ايه.؟؟؟؟؟؟؟؟؟؟ ليه ..؟؟؟؟؟؟؟ احنا الاتنين بس ب350 درهم...؟؟؟؟؟

وبعدين مش انتى اللى قلتى عازماك....؟؟؟؟

انا : اه ياحبى عازماااك لما تفتكر ان النهارده عيد جوازنا ...بس انت مافتكرتش...كده بقى مش هتنساااه تانى ...

مش كده احسن من الخناااااق ....ولا ايه ؟؟؟؟؟

وكده اكيييييييييييييييد مش هتنسى عيد ميلادى امتى .....ولا تحب افكرك ...؟؟؟؟

هههههههههههههههههههههههههههههههه

ماردش بس لقيت المخده ....طراااااااااااخ فى وشى ...ومشى وهو بيبرطم بالفرنساوى ....

انا مش عارفه هو زعلاااان ليه ...

حد فيكم يعرف....

النهارده ..عيد جوازى ال..12...كتيير مش كده

اولا وقبل اى كلام ..وحشتووونى قوى قوى ....وطبعا عرفتم ظرووفى اللى بعدتنى عنكم المدة دى كلها ....

والحمد لله احتلال التتار خلص ..واعلنا الاستقلال ....

النهارده عيد جوازى ال12 ....فعلا السنين بتمر بسرعه غريبه....ومن غير مانحس...

سنين قضيتها معاه...كان فيها الحلو و....اللى مش حلو برضه....

واحياانا كتيييير بتخنق منه .....لكن مانكرش انى لسه باحبه.......

مع اننا عكس بعض فى حاجات كتيرة قوى ..وتربيتنا مختلفه تماما ....وجايين من عالمين مختلفين....لكن سبحان الله ..

حبينا بعض واتجوزززززنا....وخلفنا 3 عيااال مطلعين عينى ....والحمد لله ...

النهارده هاخنقكم وهاحكيلكم حكاية معرفتى بالباشا....ودى من حوالى 15 سنه تقريبا...

والحكايه فيها رغى شويه ..فاللى عنده حاجه يعملها ومستعجل ...يقوم ومايخنقش امى ...

المهم ....نرغى ..

من حوالى 15 سنه كده كنت لسه مخلصه ثانويه عامه فى السعوديه....اللى اتولدت اصلا فيها ..واتربيت فيها

طووول عمرى....هى صحيح بلد منغلقه شويتين تلاته كده ....بس انا كنت فى مدينة الخبر..ودى بلد حلوة قوى

على الخليج العربى .....وكان لي اصحاااب كتيير قوى فيها وكنت مبسووطه...

المهم خلصت ورحت مصر وقعدت عند بيت تيتا (ام ماما )..وكانت اختى الكبيرة هناك ..سابقانى بسنتين...

وماما وبابا (الله يرحمه) فضلوا قاعدين فى السعوديه علشان شغلهم..وعلشان بقية اخواتى فى مدارس لسه..

المهم بيت تيتا انا باحبه قوى علشان اخواات ماما (كلهم ظباط )..كانوا بيفسحونى انا واختى كتيير قوى..

واكتر واحد كنت باحبه هواصغر واحد ( خالو مودى )...

لانه كان اكبر منى ب 9 سنين بس..وكان ظريييف قوى ودايما يهزر معايا انا واختى وكان دايما زى اخويا

الكبيير بالظبط....

واول يوم رحت فيه الكليه رااح معايا وفضل مستنينى لغاية ماخلصت...وبعد كده بقيت اروح فى اتوبيس الجامعه ..

لان اختكم ساعتها كانت خايبه ومابتعرفش تسوق....

وبعد حوالى 3 شهوور كده فى الكليه لقيت واحده معايا فى السكشن بتاخدنى على جنب وبتسألنى....

: مين يامخنوقه الواد المزة اللى بيجيلك الكليه ده..؟؟؟ الواد بتاعك ..؟؟؟؟

انا : ايه ..؟؟؟؟ ايه قلة الادب دى ....ده خالو موودى...

: هههههه انتى هتضحكى علينا ولا ايه ...؟؟؟ بقى الظابط الامووور ده ابو عيون خضراا يبقى خاالك..؟؟؟؟

انا : مين الامووور ده ..؟؟؟ خالو مودى امووور..؟؟؟؟..جايز ..انت عايزة ايه بالظبط..؟؟؟

: عايزة اتعرف عليه ...قوليله ..وشوفى هيقولك ايه .....

انا : حاضر هاقوله ....علشان تصدقى انه خااالى ..والله خاااالى ...

وزى الهبله رحت قلتله ...وده ماصدق...اصل الكليه عندنا تقريبا ..كل البنات اللى فيها حلوين ومدلعين على

الاخر....ده غير ان اللبس ...اخر روقااان ماقولكوووش....فى الزمالك بقه...

وتانى يوم لقيته عندى فى الكليه ...وعرفتهم على بعض....طبعا عارفه ان كده غلط..بس كنت صغيرة وهبله..

وقلت جايز يتجوزها ...ماهو فعلا كان ظبوووط صغنن وعنده 26 سنه....

وخالى بقى يجي الكليه عندى كتييير ...واحيانا من غير ماعرف علشان يقابل الاخت الامورة اياها ...

وفي يوم جه الكليه وجاب معاه الباشا....لانهم كانوا اصحاااب....

وكان خالو مودى راجع من الشغل وعدى علي بالعربيه ودخل هو والباشا علشان يكلم صاحبته...

ودخل الباشا معاه ...وعرفنى عليه ......

وانا بصراحه ....اول ماشفت الباشا تنحنا لبعض شويه ...ليه مش عارفه ..

بس قلت فى سري اكيد ده زى خالو مودى ..جاي يتفرج على بنات الكليه ..وجايز عايز يعلق واحده..

فسلمت عليه و سيبته ومشيت... وخالو مودى سابنى وراح يكلم صاحبته..

لقيت الباشا جه ورايا وكلمنى...

الباشا : هو مافيش كوفى عندكم فى الكليه ولا ايه؟؟؟

انا : لا فيه فى الكافتيريا هناك ....

الباشا : انتى الكوفى بتاعك ايه ...؟؟؟؟بلاك ولا بحليب..؟؟؟

انا : ميرسي مش عايزة ( بمتهى الرخااامه )..

الباشا : طيب تحبى تشربى ايه ؟؟؟

انا : مش عايزة حاجه ..انا هاستنى خالو مودى لما يخلص كلام وهارووح...

الباشا : تعرفي انا اول مرة شفتك مع مودي افتكرتكم مرتبطين ....وماكنتش اعرف انك بنت اخته...

انا : يعنى ايه مرتبطين ...؟؟؟؟ وبعدين انا اول مرة اشوفك ..انا اول مرة اشوف حد من اصحاب خالو مودى

انت ظابط زيه ؟؟؟؟

الباشا : لا..احنا اصحاب من النادى ...انتى مابتروحيش النادى خاالص مش كده ...انا اعرف مودى من سنتين

وعمري ماشفتك معاه فى النادى...

انا : انا مش باحب ارووح هناك ..وبعدين ماكنتش فى مصر اصلا...

المهم قعدنا نتكلم كلام عادى خااالص...وحسيت انه بيكلمنى باحترام قوى ومش بيحاول يعاكس اساسا..والمواضيع

جابت بعضها ..لغاية لما جه خالو مودى وروحنا ...

وبعد كده قعدت اسأل خالو مودى عليه ..وخالو دايما بيبعد عن المووضوع...ودايما مسميه الباشا ...

وفي يوم كده وانا فى الكليه لقيت الباشا فى وشى...

اتخضيت جدا لما لقيته وكلامى بقى ملخبط....

انا : اهلا ..امال فين خالو مودى...؟؟؟؟

الباشا :انا جاي لوحدى ...ممكن اتكلم معاكى شويه...؟؟؟ لو فاضيه ..؟؟؟

انا : خير فيه حاجه ...؟؟؟

الباشا : انتى قلقانه كده ليه؟ انا عايز اتكلم معاكى بس...ممكن نشرب كوفى مع بعض..؟؟؟

وبرضه قعدنا فى الكافتيريا واتكلمنا كتيير قوى ....وعرفت عنه كل حاجه تقريبا....وعن عيلته ..

كان عالم تانى بالنسبه لي...تربيه مختلفه تماما عنى ..وتعليم مختلف ....

مانكرش انى ماكنتش عايزة ااقوم اروح ....وكنت فرحاانه جدا بالكلام معاه....

بس انا كنت متضايقه من الوضع نفسه....انا عمرى ماتكلمت مع حد ماعرفووش...

وماكنتش كلمة الارتباط دى فى قاموسى اصلا...

وكلمته بمنتهى الصراااحه .....

انا : انت عايز منى ايه بالظبط ...؟؟؟..........

وكفايه عليكم كده ....اكملكم المرة الجايه علشان انا زهقت من الرغى ....

وكل سنه وانا طيبه ....

سلاااااااااااااااااااااااااااامووووووووووووووووزززززززززززز

مخنوقتكم بتسلم عليكم واحد واحد ....وفضيت لكم خلااااص...

وهارد عليكم كلكم ...

امتحانات تخنق تخنق تخنق

دى صورة واقعيه جدا لحالتى فى الاسبوعين اللى فاتوا......

وخلوا بالكم انا قلت حالتى .....مش شكلى ....انا بس باوضح....

بقالى فترة منقطعه حتى عن الرد على تعليقاتكم وزيارتكم وده لأنى ماعنديش وقت افتح الكمبيوتر اساسا...

وده علشان 3 اسباب :

1- امتحانات الترم التانى للاولاد....هتقولولى ليه بدرى كده ..؟؟؟ هاقولكم علشان هنا النظام 3 ترمااات فى السنه ...يعنى مش

خنقه واحده .....ولا اتنين .........لالالالالالالالا ......تلاته..

2- انى كنت باعمل شوية انترفيوهات كده على الماشى.....والغريبه انى لما باروح ومعايا الهارد والسوفت كوبى من شغلى

على اساس انى اشتغل فى التصميم .....الاقى الكلاااام اتحول وبقى فى التسوووويق ...؟؟؟؟ ليه مش عارفه...الظاهر مكتوب

على وشى ماركتيج ...وعلى قفايا تسويييييق.......

3-ان الباشا سيادته نزل مصر يومين شغل...ورجع معاه اخوه ومرات اخوه علشان يفسحهم فى دبى ......؟؟؟؟؟؟؟؟؟؟؟؟؟

تخيلوا ....ولادريان بالدنيا ان فى امتحانات لولاده...فعلا يخنننننننننننق هو وعيلته...

علشان كده كنت مشغووله جدا فى الاسبوعين اللى فاتوا دول وكنت باحاول ادخل على النت ..اما الصبح بدرى لما الاولاد

يروحوا المدرسه ....او بالليل متأخر لما كله ينااااام....

لانى لما كنت لما الاولاد ينزلو يروحوا المدرسه ...أبدأ انا فى عمل الغدا بسرعه علشان لما اخوه ومراته يصحوا ..

اخرجهم افسحهم واوديهم المولات اللى عايزينها علشان الباشا فى الشغل....

ده غير ان اخوه ومراته بيشربوا سجاير وانا مابطقيش ريحتها ...والعربيه عندى بقت مدخنه...

ومرات اخوه دى تبقى بنت عم الباشا ...يعنى من العيله الخنيقه نفسها ....وبيقعدوا يتكلموا فرنساوى مع بعض وانا بصراحه باطق منهم وباسيبهم وباقوم اعمل لهم اى حاجه ياكلوها علشان بقهم يتسد .....

اظرف حاجه ان كل اللى فى البلد هنا مابيكلموش غير انجلش بس زى حلاتى ....يعنى ياخدوا الفرنساوى ده ويرموه فى الشارع ...

مالوش لازمه هنا بتاتا البته ....

المهم انى بصراحه زهقت من كتر اللف معاهم ....لانى حسيت انى السواقه بتاعتهم ...فببساطه نزلت تحت بالليل وفصلت بطارية

العربيه ...وتانى يوم نزلت معاهم عادى وطبعا العربيه ماشتغلتش....واضطروا ياخدوا تاكسى ...

احلى حاجه انهم بقوا يغوروا ...قصدى يخرجوا لوحدهم ....من غيرى...وهانت كلها يومين ويمشوا...

نسيت احكيلكم الباشا حصله ايه فى جلسة المساااج .........

ههههههههههههههههههههههههه

كان يوم لاينسى من ذاكرة التاريخ....بصراحه استمتعت بيه جدا ...

الباشا رجع من الشغل ..ودخل اخد شور..وروق نفسه ..وحط برفيوم كتيير

واحنا رايحين الجيم ...وعمال يعينى يمنى نفسه بالمساج الريلاكس اللى

هياخده ...وانه هيرجع ريلاكس على الاخر وهينام مرتااح للصبح...

وهيروح يغيظ اصحابه فى الشغل تانى يوم....

المهم رحنا وغير هدومه ولبسوه روب طويل وخامته زى الفوطه بالضبط علشان

ممنوع اللى بتمسجه تلمس جسمه ...

انا طبعا دخلت معاه علشان اعرف مين اللى هتعمله المساج....

وبعد شويه دخلت الاخت الامورة اللى عملتلى المساج...وده شافها ....اتخض...

وقالى ...مين دى ..؟؟؟؟

انا : دى ياحبيبى اللى خلتنى ريلاكس خاالص..

الباشا: دى ..؟؟؟؟؟؟ دى ست ؟؟؟؟ دى جودزيلااااا....

انا : لا ياحبى ماتاخدش بالمظاهر دى ايديها ناعمه قوى ...

بصلى بنظرة شك ...وبعدين سابها تعمله مساااج ...

وهنا الفيلم بدأ....

والمتفرجه الوحيده هى انا ...

و...طبق الاصل العلقه اللى انا اخدتها...

وهى بصراحه زودت جرعة المساااج علشان ده راااجل والمساج بتاعه مختلف شويه ...

وابص الاقى وش الباشا جايب الوان ...

وفى الاول كان مستحمل الألم وساكت ..بس وشه معبر..

الاقى عينه تغمض جامد من الالم ويعض على شفايفه ....وبعد كده بدأ يتأوه

بصوت واطى ...ويبصلى بغيظ ...وانا مبتسمه وباشرب كوفى وباتفرج...

وبعدين لما دخلت على رقبته وطرقعتها ....ههههههههههه

لقيته قام اتنفض واتخانق معاها....

طبعا هى قالتله زى ماقالتلى بالظبط وان ده مساااج عادى بس هو اللى مش عارفه..

وبدأت تشتغل على المعدة و.....صوته علي جامد من الالم ...

وقام مسك ايديها وزقها واتنرفز عليها ....

وخرج اتخانق مع الادارة وعايز يرجع فلوسه تانى ...لان ده مش مساج ...ده

عذااااب...

وطبعا الادارة رجعتله فلوس الجلستين اللى ماعملهمش ورفضت ترجع له

حق العلقه اللى خدها ....

المهم اننا هنروح تمشيه لان الجيم جنب البيت ...وده مش قادر يحرك عضلات جسمه من الالم ...والله صعب علي ..بس يستاهل ....مش هوه اللى عايز

واحده ست تمسجه ...؟؟؟؟ يشرب بقى..

ولما روحنا اخد شور وخرج وجسمه بدأ يلون ازرقااات جميله...

واتخانق معايا ..

الباشا : دى اللى هتخلينى ريلاكس يامخنوقه ..؟؟؟؟ بتخدعينى؟؟؟

انا : ليه ياحبى ..؟؟ دى حتى ايديها حنينه..

الباشا : حنينه ..؟؟؟؟؟ انا اخر مرة اعمل مساااج ...

انا : ليه ياحبى ..؟؟ ماتزعلش .. انا اعملك مساااج وهاخليك ريلاكس على

الاخر....انت عارف ايدي حنينه قد ايه..

الباشا : ااااااه ياضهرى ..انت عايزة تخلصى علي ..؟؟؟انت كنت عارفه شكلها ايه وماقلتليش يامخنوقه مش كده ...عاملالى مقلب ..صح..

انا : انا ؟؟؟؟ ليه الظلم ده ..وبعدين انت جاى تعمل مساااج ولا جاى تتجوز..؟؟؟

انت فاكرنى هاجيبلك مزة تمسجك ولا ايه .؟؟؟؟دى العينه اللى انا اوافق انها تمسجك

ياحبى ...انت فاكرنى هبله ولا ايه ..؟؟؟؟

الباشا : حسبى الله ونعم الوكييييل فى الستااات كلهم ...

يعنى علشان تثبتى وجهة نظرك تدينى علقه ..؟؟؟؟؟

ااااااه ياظهرى .".....اااااااااه يارقبتى ....اااااااه يابطنى ...منك لله ....

فعلا مامى كان عندها حق لما قالتلى ..(بكرة تشوف زمانى من زمن غيرى)

الله يرحمك يامامى...متي وسيبتينى لمخنوقه تعذب في...

انا:حبى ماتزعلش قوى كده....لو مامى واحشاك قوى كده ..خدلك 5 جلسات

كمان ..وانت تروح تسلم عليها....

ههههههههههههههههههههههههههه

بجد بجد رجااااااله تخننننننننننننننننننننننننق....انا مش عارفه اعمله

ايه اكتر من كده...كل الدلع ده ومخنوووووق برضه..

حاجه غريبه................

مخنوقتكم...........بتعتذر عن التأخير فى الرد علىيكم كلكم...

نظرا للظروووف الخنيقه اللى عندها....

وهاستكمل الرد عليكم تاتا تاتا...

مش يزعل حد.....

سلالالالالالالالالاموووووووووووووووووززززززززززززززز

مساااج يخننننننق

السلاااام عليكم .....

ازيكم ياجماعه ...عاملين ايه ...؟؟؟؟؟

اوعوا تكونوا مخنوقييييين زى..........

انا باشكر كل الستااات اللى افادونى فى البوست اللى فاات واقترحوا على اقتراحاات كلها مفيده

والحمد لله باحاول انفذ شويه منها ...جايز خنقتى من القعده تروووح....

الاسبوع اللى فات اختكم راحت الجيم علشان تشترك فيه...

ومحدش يقولى يامخنوقه انتى وزنك كام ....؟؟؟؟؟ من اولها كده هاخنق امه....واقوله اخف من وزنك ..

الواحد طول عمره رشييييق.....لولاش الحمل والخلفه .....كان الواحد اشتغل مانيكاان...

المهم انا رحت الجيم واشتركت هناك ودفعت اشترااك شهر...

علشان اجبر نفسى اروح على طول...ولعبت معاهم ايروبك .....وااااااه من اول مرة .....

كانت عذاب بالنسبه لى ...لانى بقالى كتيير جدا مالعبتش رياضه....بس انبسطت قوى تانى مرة..

لان المدربه رأفت بحالى وبقت تخلينى اشتغل ااقل شويه من الباقين على أساس انى مستجده...

وبقت تشغل موسيقى مع التدريب ...فعجبتنى الحكايه قوى ....

وكلمت البت بيبه تيجى هى كمان تلعب معانا ......صحيح هى رفيعه ...بس اهى رشاقه وخلااااص..

والرياضه صحة اولا واخيرا ....

المهم جات البت بيبه وقعدت تلعب معانا واقترحت نعمل مساااج بعد اللعب....

انا قلت وماله ....اهى كلها فايده.....

رحت دفعت زى الشاطرة كده ...300 درهم مساج للرجلين ومساج كامل ....

والاخت الامورة سألتنى عن نوع المساج الكامل .....؟؟؟؟؟؟

واختكم مش فاهمه قصدها ايه ؟؟؟؟؟

فسألتها ....

قالتلى ...يعنى عايزاه RELAX .......OR.....FAT BURNER

اختكم بصتلها كده باسبهلاال شويه .....وقلت خلينى اجرب الريلاكس الاول ....والواحد لاعب رياضه وتعبان ومحتاج يرتاح...

وقعدت انا وبيبه على كرسيين مريحين قوى ... وجت بنتين امورين كده علشان مساج الرجلين....

وماقولكوش مساج الرجلين مرييييح قد ايه ....

بيحطوا رجليكم فى ميه دافيه ومعاه انواع مختلفه من الورد وزيووت عطريه...ده غير نوع معين من الملح...

والجهاز نفسه اللى انت حاطط رجليك فيه بيعمل مساج للرجلين...

بصرااحه ااخر روقااان ......الواحد مادلعش نفسه ليه كده من زماااان......

وأخدت اتخيل بقى المسااج الكامل هيبقى ازاااى......

اكيييد احلى من كده .......

اكيد يستاهل المبلغ ده .....

بس للأسف اللى حصلى ..........................غير كده تماما...............

بعد ماخلصنا مساج الرجلين ....بيبه قالت لى انها مش هتعمل مساج كامل ...وهتستنانى بره لما اخلص.....

دخلت اوضه جميله قوى كده ومددت على سرير المساج ومستنيه الاخت الاموره لما تيجى ....

وخير اللهم اجعله خير ....دخلت واحده عريضه قوى وعضلات وشكلها يخض....

انا قمت مخضوضه كده وبصتلها كويس ...احسن تكون رااجل ولا حاجه ...

بس المقدمه والمؤخره بتاعتها ...استحاااله تكون لرااجل....

بس شكلها الهم اجعله خير .....يخض...

انا فكرت جديا انى انسحب......وربنا يكفينا الشر.....بس لقيت صوتها نااعم قوى ....وقالتلى انى هاقوم ريلاكس خااالص...

المهم اقتنعت ....وياريتنى مااااااقتنعت.....

انا دلوقتى حسييت احساس هنيدى فى فيلم سور الصين العظيم وهو بيتفعص من لاعب السومو.......

تقريبا ده اللى حصلى بالضبط .....لقيتها بتفعص فى عضلات جسمى ..لدرجة انى مابقتش حاسه بظهرى ....

وبعدين دخلت على رقبتى وسمعت طرقعه..وصوت جامد ..

قالتلى ماتخافى مدام ..انتى استرس جدا ...

اختكم صوتها علي جامد من اللألم ....بس قلت استحملى يابت ...اكيد انتى هتحسى بالريلاكس بعد كده ....

وبعد كده قلبتنى وعملتلى مساج على بطنى ....حسيت انها بتعمل عمليه جراحيه من غير بنج......

او الظاهر بتشيلى الزايده.....بس الظاهر انها فقعتلى المرارة......

اختكم لغاية هنا وماقدرتش....بقيت أتألم بجد......وقمت واتخانقت معاها.....

قالتلى ان ده هو المساج وانى الظاهر مش بافهم فيه ........؟؟؟؟؟؟؟؟؟؟؟؟؟؟؟؟؟

وانى هاحس بانى ريلاكس جدا بعد كده .............

انا مش عارفه ده مساج ريلاكس ازااااى امال لو FAT BURNER ............

كانت عملت في ايه ؟؟؟؟؟؟؟؟؟؟؟؟؟ كانت ولعت في بقه ..............

خرجت من أوضة المساااج وأنا مش عارفه أمشى من الألم .....

ومنظرى بالظبط زى القط الامووووور ده..............

وطبعا انا مش قادرة امشى لغاية البيت.......مع ان بين البيت والجيم

شارع واحد بس......

فقلت للبت بيبه توصلنى ...

وبيبه ياجماعه لسه واخده الرخصه جديد....وماعرفش تحديدا

هى خادتها ازااااى ؟؟؟؟؟ بس امري لله ......اخدنا فى الشارع ده ربع ساعه ........علشان فيه يو تيرن..وهى مش

عارف تلف اليو تيرن....لما خنقتنى زياده ....ووقفت الشارع لغاية مالفت .......وماقولكوش على الكلام اللى سمعناه من الناس

اللى كانوا فى العربيات اللى ورانا .........

وأنا بانبه اى حد ساكن فى دبى لو شاف عربيه هوندا زيتى بتسوقها واحده مرتبكه شويه يبعد عنها تماما......

لأن المرور هنا مابيغلطش الستات بتاتا البته.........

المهم روحت وانا مش قادره افتح باب الشقه....وتعبانه جدااا....مش عارفه حتى انااام على الكنبه...

ظهرى بيوجعنى ورقبتى مموتانى وجسمى كله بدأ يزن..........

ده غير ان فى الوان بدأت تظهر على بطنى ...درجاات الازرق كلها....من الكدمات....

والباشا كلمنى فى التلفووون.........

الباشا : اخبارك ايه ياكابتن مخنوووقه.........عملتى ايه فى الجيم......

انا : (وصوتى مش طالع ) عملت مساج ياحبى النهارده .......

الباشا : يابختك ....انا نفسى قوى اعمل مساااج زيك كده ....انا حاسس انى استرس قوى...ومحتاج ابقى ريلااااكس...

انا : بس كده ....انا هاحجزلك فى الجيم علشان تعمل ريلاااااكس ياحبى ....

الباشا : معقوله ...؟؟؟ انت كنتى مش راضيه علشان اللى بتعمل المساج ست ....ايه اللى غير رأيك ؟؟؟؟

انا : انا قلت حرااام انا انبسط كده فى المساااج وابقى ريلاكس قوى كده .....وانت لأ....

انت لازم تجرب الريلاكس ده ....هتنبسط قوى....

الباشا : ربنا يهديك يارب....ايه الروقااان ده ....طب احجزيلى بقه جلسه...خلينا نجربها بكره...

انا : جلسه واحده بس...؟؟؟ ماينفعش ياحبى ...انا هاحجز لك 3 جلسات...علشان تاخد الكورس كله ...ويجي بفايده..

الباشا : غريبه ...؟؟؟ طب احجزى دلوقتى قبل ماترجعى فى كلامك ....هى اللى بتعمل المساج شكلها ايه ؟؟؟؟

انا : عادى ..فليبينيه عاديه ....صغيرة كده بس ايديها ناعمه قوى ...وبتخليك ريلااااكس على الاخر ..

ده انا نمت وهى بتعملى المساج ....

انا هاحجز لك معاد بكره ....هو انا عندى اغلى منك ياحبى .....

ههههههههههههههههههههههههههع وش ساحرة شريرة.....

مخنوقتك......مزرقه من الخنقه....

مخنوقه من قعدة البيت

ازيكم كلكم عاملين ايه؟؟؟؟

احوال الدنيا كلها ملخبطه اليومين دول مش عارفه ليه؟؟

كل واحد طبيعى انه عنده مشاااكل ..بس اليومين دول مش عارفه ليه المشاكل بتزيد....

وبتتطور للأسوأ...للأسف....

عموما الحمد لله عل كل شيئ...وربنا يصلح الاحوااال ....

الموضوع النهارده مش بخصوصى انا ....أبدا ..

لكن بخصوص واحده معرفه ...كانت دكتورة للأولاد وبعدين اتصاحبنا على بعض...

ومش عارفه أأولكم هى قد ايه حنينه....وقد ايه مخلصه فى شغلها ...

يمكن اخلاصها ده ..جه فوق دماغها....

هى دكتورة باطنه شاطرة قوى ....ومعاها دكتوراه من جامعه عالميه ...

وهى اللى جابت جوزها دبى ...وهى اللى شغلته معاها فى المستشفى ...

فى الحسابات ....لانه مش دكتووور....

وبعدين اترقت فى المستشفى وبقت مدير طبى ...

وطبعا المستشفى المحترمه ...قعدتها فى كمبوند محترم جدا .....

وطبعا جابت شغاله عندها علشان ظروووف شغلها ...مع ان اولادها

يعنى كبار شويه ( اعدادى وثانوى )

بس بد ات تلاحظ ان جوزها المحترم (48 سنه ) بدأ يقعد كتيير فى البيت على غير العاده

وأوقات هى بتكون فيها فى المستشفى والاولاد فى الدروووس...

وبدأت تشك فى تصرفاته ونظراته مع الشغاله ....مع انى بأكد ان الشغاله .....مش حلوة بتاتا البته..

بس هى مش عارفه ليه جوزها بيتصرف كده ....؟؟؟؟ والله وانا كمان ؟؟؟الشغاله فعلا مش حلوة .....

وزى الافلام العربى بالضبط اكتشفت ان الشغاله ....حاااااااااامل..

ولما واجهتها ....اعترفت ان جوزها ....متنيل معاها.....

يعنى مش غلطه مرة واحده وبس .........

ولما واجهته ......توقعوا عمل ايه ؟؟؟؟؟

قال لها مش انتى دكتورة .....اتصرفى .......سقطيها .....

انا راااجل ضعيييف وانت معظم الوقت بره البيت ....والشيطاااان شاااااااطر....تخيلوا ...

طبعا هى رفضت وخلته اتجوزها....اه والله اتجوزها .....

وتقريبا طردته من البيت هو والشغاله.....وقعد مع الشغاله فى شقه تانيه ...وبيجي يشوف ولاده كل اسبوع....

وطبعا ولاده عرفوا باللى حصل لانهم مش صغيرين ....تخيلوا منظره ايه قدام ولاده ...

خصوصا ابنه الكبيير الل هايدخل الجامعه .....

وهى ...ماتتخيلوش حالتها عامله ازاااى ......عايزة تتطلق ...وخايفه من المحاكم وبهدلتها ..وهى دكتورة ليها اسمها...

ومعروفه فى دبى ....

انا اقترحت عليها تخلعه.....لأن ده الحل الوحيييد مع بنى ادم زى ده .....

يمكن انا ماشوفتوش غير مرة واحده ....بس بصرااااحه قرفانه منه قوى........

ونفسى تخلص منه....تخيلوا وصلت بيه البجاحه انه بيطلب منها فلووووس علشان مرتبه مش مكفى ايجار الشقه والمصاريف...؟؟؟؟؟؟؟؟

شوفتوا واحد اوطى من كده ....؟؟؟؟؟؟؟؟؟

وده طبعا عرفته لما قعدت فى البيت ومش لاقيه حاجه اعملها .....

فقلت يابت يامخنوقه قومى كلمى اصحابك القدااام اللى بتشوفيهم كل شهرين مرة ....

واهو اتسلى معاهم شويه ...وكمان بصى على الجيران وكلميهم ....لانهم بصراحه كانوا جدعان معايا قوى لما اتعورت فى عينى ....

وجالى كمية حلويات كتيرة قوى .....

المهم ان الدكتورة دى كانت من ضمن اللى انا ماكلمتهمش من فترة طويله ...

وكانت زعلانه منى وبتقولى مابشوفكيش غير لما ولادك يعيوا .....

وطبعا كالعاده رأى الباشا فى الموضوع ده ان الدكتورة هى اللى غلطانه علشان أهملت جوزها ....

وسابته مع الشغاااله لوحدهم (مع ان الشغاله بييييييييييييييييب خااااالص)...

وان المفروووض ان الزوجه ماتقعدش فى شغلها كتييير كده و.....................الكلام المتكرر اياه

بس الحاجه الوحيده اللى ماختلفناش عليه احنا الاتنين انه ......

رااااااااااااااجل وااااااااااااااااطى جدااااااااااااااا جدااااااااااااااااااا......

وانا بصراحه قررت انى ماجيبش شغاله مقيمه عندى بتاتا البته .....حتى لو كانت ماتتشافش من وحاشتها....

لان الظاهر ان الرجاااااله نفسهم حلوة وبيحبوا اى طعم تانى وخلااااص...

واختكم بقالها 3 ايام قاعده فى البيت ...وبرضه باصحى بدرى .....ومش باعرف انااااام تانى ....

وباقعد الف فى البيت على حاجه اعملها .....

وفى ا3 ايام دول عملتلهم سى فوود ومحشى ومكرونه فرن وريش مشويه ....ده غير الحلوياااات ...

كل ده من الزهق.....وبرضه حاسه انى زهقاااانه جدا جدا .......

وبافكر اشترك فى الجم .....اهو نخس شويه ونطلع بحاجه من القعده دى ......

ونروح زى الستات المحترمه نعمل نيو لوك كده حلو .....واهو تغييييير برضه ....

وأدينى بادور على شغل تانى وربنا يسهل .....بس صعب فى الظروووف دى لان العرض اكتر من الطلب....

والظاهر ان الباشا فرحااان قوى بقعدتى دى و...كل يوم بيطلب اكل شكل ....

وراااح جابلى اسكتش والواان باستل وزيت وبوستر...وقالى ارجعى ارسمى تانى ....

انت بقالك سنين مارسمتيش .....كله كمبيوتر وبس....

وبصرااحه الخطوة دى عجبتنى منه قوى .....وحسيت انه فعلا بيفكر في .....

انا فعلا بقالى سنين مارسمتش حاجه .....لان ماكانش عندى وقت خاااالص....

بس دلوقتى هاحاول ارجع ارسم تانى ....وجايز افرجكم .....

المهم انى النهارده مش مخنوقه من الباشا .....بالعكس انا فعلا مبسوطه منه ...والحمد لله ...

انا مخنوووووووقه من قعدة البيت

وبأقول لكل الستااات اللى قاعدين فى البيت ........اعمل ايه فى الفراااغ ده كله ....

بتعملوا ايه فى البيت ......من الساعه 7 لغاية الساعه 3.30 لما الاولاد يرجعوا من المدرسه.....

وقت طوووووويل قوى .....

مخنوقتكم بتناشدكم .....

الللى تعرف تقولى .................

مخنوقتكم مخنوقه من الزهق......