.JPG)
ازيكم الاول..وشكرا لتهنئتكم كلكم وعقبال عندكم جميعا...واللى ماتجوزززش ...يتجووز بأذن الله ...واللى متجوز......خلااااص امره لربنا ..هيعمل ايه ..قضى ولابد منه....
المهم احنا وصلنا لغاية لما سألت الباشا ..
انا : انت عايز مني ايه بالظبط..؟؟؟؟
لقيته سكت وشكله ماكانش متوقع السؤال وبعدين ابتسم وقال...
الباشا : انا هكلمك بصراحه ..انتى عجبتينى اول مرة شفتك مع مودي ..وكنت فاكرك مرتبطه بيه..بس لما قالى
انك بنت اخته ..مش عارف ليه فرحت ..وكان نفسى اشوفك تانى..
انا : يعني انت عجبك شكلي مش اكتر ...برضه مش فاهمه انت متوقع منى ايه ؟؟؟؟
الباشا : مخنوقه انا عجبنى شكلك اه ...بس كنت عايز اعرفك اكتر ..عايز اعرف اللى ماشوفتوش ...انا ارتحت فى الكلام معاكى
وعجبنى انك صريحه قوى ....وعايزك تعرفينى اكتر...ممكن اتكلم معاكى فى التلفون...؟؟
انا : لأ طبعا ...يعنى ايه تكلمنى فى التلفوون ؟؟؟وليه ؟؟؟؟ انا مابكلمش حد من ورا اهلي..
الباشا : انا ماقلتش من وراهم ..لو عايزة تقوليلهم ...قولي...عادي...وانا كمان عايز اجي اتكلم معاكي فى الكليه كمان ...
ايه المشكله يعني...؟؟؟؟
انا بصراحه كنت مزبهله من اسلوبه ان ااقول لبابا انى معجبه بواحد ..عادي كده وعايزة اتكلم معاه فى التلفون ....
بالظبط ده فى نظري جاي من كوكب تاني.....
انا : انت بتهزر ولا ايه ..؟؟؟؟ احنا معندناش الكلام ده فى عيلتنا ...انسى الموضوع خااالص وشوفلك حد تانى اتسلى بيه...
انا قلت الكلمه دي ولقيت وشه قلب..وحسيت انه هيقوم يضربنى.....
الباشا : مش ملاحظه انك بتجرحي فى كلامك يامخنوقه ....وانك جد زياده عن اللزوووم....؟؟؟؟؟؟
انا : وانت مش ملاحظ ان جريئ زياده عن اللزوووم...
الباشا : طب مش انتى بتكلمي زمايلك فى التلفون ..وممكن تقعدي معاهم فى الكافيتيرا كمان..؟؟؟؟
انا : احيانا لما اكون محتاجه حاجه ..ومابقعدش مع حد لوحدي ..بنبقى جرووب مع بعض..
الباشا : طب اعمل ايه يامخنوقه علشان اقعد اتكلم معاكي....؟؟؟؟
انا : انا معنديش حل للموضوع ده ...انا مش هاقعد معاك فى الكوفى تانى ...ولا هاكلمك فى التلفون ....
الباشا : يعني ده اخر كلام ...؟؟؟؟
انا : ايوة ...
سابنى وقام وهو متضايق جدا ..وبصراحه انا كمان كنت خلاااص هاعيط من الخنقه ...
وبعدين لقيته راجع وبيقولى....
الباشا : انتى مش خلصتى سكاشن ....قومى اوصلك بالعربيه...
انا : اسفه انا مابركبش مع حد ماعرفوش العربيه بتاعته....
الباشا ( بعصبيه ) : انا مش غريب ..ولما تروحي قولي لمودى الباشا وصلنى ...مش احسن من اتوبيس الكليه وزحمته ...؟؟؟
انا :...لأ..لو سمحت امشى..
المهم روحت وانا متضايقه جدا ..ومش عارفه انا كده اتصرفت صح ولا لأ....انا كنت رخمه جدا معاه...وعاملته انه
واحد جاى يتسلى مش اكتر ...بس لما لقيته بيقولى قولي لخالو مودي وهو مش هامه كده ...قلت يمكن ماكانش عايز
يتسلى ولا حاجه ...بس هو جريئ قوى بالنسبه لى ..وتربيته مختلفه جدا عني...
وروحت حكيت لأختى الكبيرة وماقلتش حاجه خالص لخالو مودي....وماشفتش وش الباشا لمدة اسبوعين كاملين...
وكنت متضايقه جدا ..مش عارفه اذا كنت حبيته ولا لأ...وقلت لنفسي اكيد مش هيجي تانى لاننا مش هننفع
لبعض من اصله ....
المهم رجعت من الكليه في يوم ولقيت خالو مودي عصبي جدا وعايز يكلمنى لوحدى ...
خالو مودي : مخنوقه انتي ليه ماقلتليش ان الباشا جالك الكليه ...؟؟؟؟؟
انا (وانا برتعش من الخوف ) : انا اسفه ياخالو ..بس انا قلت الموضوع مش مستاهل ...انا قلتله اللى عندى وخلاااص...
وبعدين هو مش صاحبك ..ماقلكش ليه ..؟؟؟ هو قالك ايه ..؟؟؟
خالو مودي : قالى اللى حصل كله ..وطلب مني رقم باباكي فى السعوديه ...علشان عايز يخطبك منه ..بس انا قلتله لما باباكى يجي احسن
علشان انت لسه صغيرة قوى على الارتباط دلوقتى يامخنوقه ...
وبعدين انا وانتى اصحاب قبل مابقى خالك ..وحاجه زى دى لازم اعرفها ...الباشا لو ماكانش قالي ..كان بقى ليه حساب تانى
معايا ....بس انتى حاجه تانيه ..انتى اختى الصغيرة ..وانا عمرى ماهازعل منك ...انا عايز اعرف منك اللى حصل ...
المهم حكيتله على كل حاجه ...وقلتله بصراحه انه عجبنى قوى بس طباعنا مختلفه تماما ..وانى مش هاخبي عليه حاجه تانى
المهم قعد يكلمنى على الباشا وازاى اتعرف عليه وعيلته وطبعا علشان اكبر منى ب8 سنين ..وده كتيير ...وكل الكلام اياه
ده ....وانا كل اللى شاغل تفكيري ..ليه الباشا استنى اسبوعين بحالهم علشان يكلم خالو مودى .....المهم خالو مودي قالى انه هو والباشا جايين لى الكليه بكره علشان الباشا يعرف رأي ايه قبل مايكلم بابا والموضوع يبقى رسمى...
وانا بصراحه موضوع الارتباط الرسمى ده قلقنى ..لانى ماكنتش عايزة اتخطب قبل ماخلص الجامعه...
المهم تانى يوم جم هما الاتنين ..وخالو مودى قعد معانا شويه وبعد كده راح يكلم صاحبته....
الباشا : برضه لسه مش عارف رأيك ايه ...موافقه ولا لأ..؟؟؟؟
انا : انا عايزة اسألك الاول ...انت ليه استنيت اسبوعين علشان تكلم خالو مودى ...كنت بتفكر يعنى ..؟؟؟
الباشا : بصراحه ..لأ..انا كنت عايز اعرف اذا كنت مرتبطه بحد من الكليه ولا لأ....وسألت وعرفت انك مش
مرتبطه ...فكلمت مودي...
انا ( بخنقه جامده ) : يعنى ايه سألت وعرفت دى ...؟؟؟؟ انا لو مرتبطه هاقولك فى وشك ....وبعدين انت بتعمل تحريات عني...
انا مش عايزة ارتبط دلوقتى اصلا ...استنى لما اخلص الكليه ...
الباشا : انتى زعلتى ليه ؟؟؟ انا قلت جايز تكونى مرتبطه ومش عايز حد يعرف ..علشان كده بتقفلى علي...انا بصراحه
ماتوقعتش انك بتتكلمي بجد ....وماتزعليش خلي مودي يعملك كل التحريات عني...
انا : بص ياباشا انا مش هاقدر اديك اي رد غير لما اهلي ينزلوا اجازة...ولازم تعرف انى مش هارتبط رسمي غير لما اخلص جامعه
واكيد مش هاتخطب قبل اختى الكبيرة...يعنى الموضوع متأجل ...وبرضه ماقدرش اكلمك فى التلفون ولا ااقابلك..
الباشا : لا انتى بجد متعبه جدا ...وبجد خنيقه....
انا فعلا كنت خنيييقه قوى وقتها .....ومازلت الحقيقه ...وفضلنا على كده ..باشوفه بس لما يجي عند خالو مودى
وكلمتين وخلاص....وبطل يجيلى الكليه...
ولما بابا ( الله يرحمه ) نزل فى الاجازة ...اختى الكبيرة خطبها ابن ابن عم بابا ...وطبعا الباشا ماتكلمش خالص قبلها ..
لكن يوم خطوبة اختى لقيته فى الحفله...وواقف جنب خالو مودي...وانا بالف مع البنات حوالين اختى وخطيبها ...
لقيت اللى مسك ايدي ...وقالى كفايه رقص وااقعدي....بابص لقيت الباشا هو اللى بيكلمنى ...
شفتم قد ايه جريئ....ولا همه بابا ولا ماما ولا خالو مودى ولا حد ....وستر ربنا ان ماحدش خد باله فى الزحمه غير ماما ...
وسالتنى ...مين ده ..وبيعمل كده ليه ..؟؟؟....وحكيتلها ...
وبعد ماروحنا ..الساعه 1.30 صباحا ...لقيت اخو الباشا الكبيير بيتصل ب بابا ...وبياخد منه معاد علشان يكلمه تانى يوم
وطبعا بابا استغرب قوى من اللى بيتصل بينا اول مانروح ده ...بس وافق واداله معاد بعد يومين...
وخالو مودي حكى لبابا كل حاجه ..وبابا ..بصراحه ماكانش موافق فى الاول...علشان اختلاف التربيه والعيله...
بس ماتفهموش الباشا اقنعه ازاى ....وساعتها بابا وافق...واتخطبنا سنتين ..وكان فاضلى لسه سنه ونص..واخلص الجامعه
واول اختى ماتجوزت ...الباشا اصر اننا نتجوز ...وانا رفضت طبعا علشان الكليه بتاعتى صعبه وعمليه ....
وقالي انا هاساعدك ...وماتخافيش..ووعد بابا انى هاكمل الكليه ...وطبعا بابا رفض نهائى.....
بس الحب وسنينه بقى ...انا فضلت اتحايل على بابا ...وبرضه مارضيش...
قام الباشا الخبيث اقنعه اننا نشترى العفش...واشترناه ....واقنعه اننا نجيب الرفايع وكل حاجه على اساس ان كل حاجه
بتغلى ..وبابا اقتنع ...وفرشنا الشقه كلها والسجاد كمان ...
وفى يوم لقيت الباشا بيعدي علي فى الكليه ...
الباشا : مخنوقه تعالي افرجك على كام قاعه اخترتهم علشان الفرح ....ونقى اى واحده فيهم ...
انا : ؟؟؟؟؟ فرح ايه ياحبى ...؟؟؟ هو بابا وافق اصلا ...؟؟؟
الباشا : خلي بابا علي...انتى شوفى اى قاعه انتى عايزاها ...
المهم اخترنا القاعه ..وراح عدى على بابا وقعد يتكلم معاه تانى ....وجابله اخوه الكبير وخالى مودى ..واخيرا بابا وافق...
الحمد لله وقتها ماكانش عندنا اى مشاكل ماديه سواء من ناحية الباشا او من ناحيتى ...
واتجوزت ..وانا فى الكليه ..قبل ماكمل 20 سنه بأسبوع ....
يعنى ياحضراات عيد ميلادى يوم الخميس الجاى ......وكله يجي ومعه الهديه لو سمحتم .....
بس ..وكملت الكليه فعلا ..بس كانت متعبه جدا بالنسبه لي لانى حملت فى ابنى الكبيير..بس ماما وحماتى الله يرحمها ساعدونى جامد ...
وفى مشروع التخرج ..انا تقريبا ماكنش باشوف ابنى ده خااالص...كانت ماما على طوول واخداه....
فنصيحه لأى واحده ..ماتتجوزيش غير لما تخلصي الجامعه .....الرجاله بيغيروا كلامهم بعد الجواز.....
الباشا ماساعدنيش نهائى فى اى حاجه ...ماما وحماتى (الله يرحمها ) هما اللى تكفلوا بي......
المهم الخميس اللى فات بقى ...طبعا صحيت كالعاده بمخده فى وشى .....بس ضحكت وقلتله ..
انا : كل سنه وانت طيب ياحبى ..
الباشا : ليه ؟؟؟ هو فى ايه النهارده ....
انا : انت ناسي ..؟؟؟ طيب انا مش هاقولك وانت افتكر براحتك فى الشغل...
الباشا : ايه يامخنوقه بجد مش عارف ...ماتقولى ....هو احنا كام النهارده ..؟؟؟
انا : انسى مش هاقولك ...
وتبعا لكلام صبرنى يارب....ان الواحده لو جوزها مافتكرش ..انها هى اللى تفكره من غير ماتديله مطوة فى كرشه
او تخبطه بشاكوش فى دماغه علشان تبقى علامه يفتكر بيها بعد كده ....
قررت انى اتصرف ...عملت الغدا بسرعه بعد مارجعت من الجيم ...ورحت اشتريتله كرافت حلوة مع زرارين حلوين
من كرستين ديور..ورحت للكوافير..وحجزت لينا عشاا بالليل فى مطعم حلو قوى فى الدرو ال25 وعبارة عن مطعم بيلف
وكله شموووع ورومانسي قوى ...وخمس نجوووم ...
والاولاد رجعوا وغديتهم وذاكرتلهم ..وفين بقى على الساعه 4 العصر اتصل الباشا ...
الباشا : عامله ايه على الغداا يامخنوقه ..انا جعااان ...
انا : حبى انت هترجع تاخد شور وهنخرج..ومالكش غدااا......انا عازماك بره النهارده ...
الباشا : ليه ؟؟؟ اه انت قلتلي النهارده ايه ..؟؟؟؟؟
انا : بجد لسه مش فاكر ...؟؟؟؟؟ طيب ياحبى لما ترجع هافكرك ....
بزمتكم مش لى حق اتخنق...؟؟؟ بس برضه ماتخانقتش معاه ...
ورجع من الشغل على الساعه 7ولبسنا ورحنا المطعم ...وفعلا كان يووم رومانسي جدا ..واتعشينا لوحدنا من غير الاولاد ...وقضينا سهرة جميله ..وفكرته من غير خناق ....
وتانى يوووم ...
انا : حبى انا اخدت 500 درهم منك دلوقتى ..
الباشا : ليه ..؟؟؟ عايزة تشترى حاجه ..
انا : لا ياحبى ده حق الكوافير وعشااا امبارح ...المطعم لوحد كان 350 درهم ...
الباشا : ايه.؟؟؟؟؟؟؟؟؟؟ ليه ..؟؟؟؟؟؟؟ احنا الاتنين بس ب350 درهم...؟؟؟؟؟
وبعدين مش انتى اللى قلتى عازماك....؟؟؟؟
انا : اه ياحبى عازماااك لما تفتكر ان النهارده عيد جوازنا ...بس انت مافتكرتش...كده بقى مش هتنساااه تانى ...
مش كده احسن من الخناااااق ....ولا ايه ؟؟؟؟؟
وكده اكيييييييييييييييد مش هتنسى عيد ميلادى امتى .....ولا تحب افكرك ...؟؟؟؟
هههههههههههههههههههههههههههههههه
ماردش بس لقيت المخده ....طراااااااااااخ فى وشى ...ومشى وهو بيبرطم بالفرنساوى ....
انا مش عارفه هو زعلاااان ليه ...
حد فيكم يعرف....
58 التعليقات:
عيد زواج سعيد وعيد ميلاد سعيد وطبعا اكيد الباشا زعلان ان ما افتكرعيد زواجكم مش عشان 500 درهم لا سمح الله ولا حاجة
تحياتى
عقبال 10000 سنة و عقبالى انشاء اللة
السلام عليكم
كل سنة وانتم بخير
عيد زواج جميل وسعيد
وان شاء الله متجمعين تحت غطاء الحب وعباءة السعادة
وان شاء الله تكملوا المشوار سويا
والذرية الصالحة
ويسعدكم ويوفقكم ان شاء الله
هاهاهاهاهاهاهاها
مش عارفة هو زعلان لية
مش قلتلك انتى مش سهلة
بس الباشا يستاهل برضو
وصبرنى دائما كدا نصيحها بتنفع وقت
الزنقة هاهاهاهاهاهاهاهاها
عسل يا مخنوقة كدا ضمنتى هدية عيد
ميلادك كل سنة وانتى طيبة
عقبال 1000 سنة يا قمر
صحيح الباشا كان جرئ جدا
عشان كدا دخل قلبك يا قمر
ربنا يديم سعادتكم
وبخليكم لبعض
ابقى قوليلى حصل اية فى عيد ميلادك
تقبلى مرورى
عيد ميلاد سعيد عليكم وربنا يهديه ويصلحة تعرفى انا زيك بالظبط مخنوق جدا بس من مراتى ويمكن اعمل مدونه كده زيك واسميها مخنوق جدا من مراته ربنا يصلح احوالنا وعلى فكره انا ساكن قريب من العليا اللى كنتى ساكنه فيهاعلى خريص كده ويجعله عامر
الاول كل سنة وانتم فى اتم صحة وسعادة.. ويبعدين كل سنة وانتى طيبة مقدما على عيد ميلادك.
ثانيا بقى.. هو دة الكلام علشان يحرم ينسى المناسبات السعيدة دى تانى
ههههههههههههههههههه
كل سنة وانتم طيبين يا مخنوقة
ربنا يخليلك الباشا بتاعك يارب
ويسعدكم ببعض
امل حاجة في الدنيا انك تفتكري اللحظات الحلوة ديه
ماشاء الله ذكريات روووعة
وكل سنة وانتي طيبة وعقبال1253684795205سنة ان شاء الله
عاوزين جاتوه وتورتة بقي
اوكي
سلام
اولا عاجبنى اسلوبك فى سرد القصه بجد ربنا يكرمكوا يارب وعاجبنى اسلوبك فى ردك عليه هو اى حد كده يجى يكلمك تكلميه هما مش بيجوا غير كده ههههههههههههههههههههههههههههههههههههههه ثانيا كل سنه وانتى طيبه ياقمر وتعيشى كل حياتك هنا وسعاده يارب
زوجة مخنوقة
بجد رائعة
وهى دى ذكاء وعبقرية الانثى الحقيقية
مش الخانق والنكد
ضربتى كل العصافير برشة واحدة
قضيتى امسية جميلة وانبسطى وفكرتيه بطريقة يحرم معها ينسى تانى
كل سنة وانت وعائلتك بالف صحة وسعادة
وعيد ميلاد سعيد انشاء الله
هههههههههه
كل سنه وانتوا طيبين يامخنوقه
بجد قصة حلوة وعجبتني وبحلم ف واحد اخنق عليه عيشته دلوقتي ههههههههههه
ربنا يديمها سعاده عليكوا ياااارب
كل سنه وانتي طيبه ياقمره
بس انتي قلتي الخميس الجاي الي هو بعد بكره يعني ؟
كل سنة وانت طيبة يا أحلى مخنوقة فى الدنياوهقولك عيد ميلاد سعيد Happy Birth Day to you هى جاية بدرى شويتين بس يومها أنا ناوية انى أقولهالك بشكل مختلف بس طريقة الغرامة دى أحسن من الخناق كتيييييييير هيزعل ساعتين أو حتى يوم بس أكيد هيشكرك على اليوم الرومانسى ده وكل سنة وانت طيبة وبخير وبسعادة ومش مخنوقة أبدا
فى حاجة عايزة أقولهالك عجبتنى جدا هى علاقتك بخالك أنا كمان علاقتى كده بخالو بس الروابط ضعفت شوية علشان مريوم بنوته فكان لازم يعطيها اهتمام أكب يالا ربنا يفرحه بيها
تقبلى مرورى دمتى بكل ود وخير
هههههههههههه عثل يامخنوقه انتى والباشا ههههههه مش بعاكس والله احسن الباشا بتاعى يخنقنى لووووووول بس كنتى خليهم 1000درهم قوليله هجيب هديه كمان ليا ياحبى كانك انت اللى جبتهاهههه كل سنه وانتى طيبه ياقمر ومستنين يوم عيد ميلادك
ههههههههههههههههههههههههه
جدعه يا بت يا مخنوقه
رااااااادل يا بت
بس صحيح هو ليه زعلان ؟؟؟
بس حلوه حكايه لو كنت افتكرت دي حلوه موت يعنى
هههههههههههههههههههههه
يا بت انتى بداتي تتعلمي
هانضمك خلاص للجمعيه بجداره
وحشااااااااااني
ما اعرفش زعلان من ايه..؟
حاجة غريبة فعلا
دا حتى كتر خيرك
كل سنة وانتى طيبة
ياللا
سلاااام
مصيبه سوده يامخنوقه
عسل والله
احسن تصرف عملتيه
عسل والله
هههههههههههههههه
لأ فعلا ملوش حق يزعل خالص
ههههههههههههه
بس فعلا 20 سنة سن صغير أوى للجواز
بس يالا بقى الحب اعمى
كل سنة وانتى طيبة وعقبال 10000000سنة
كل سنة وانتى بخير
وذكاوة منك برضه
ياسلام .. أما قصه جميله
ولذيذه بشكل
إكتبيها عشان ولادك يقروها .. ويفتكروها.. ويعرفوا قد إيه ماما وبابا بيحبوا بعض..
حلوه حكاية العشا على حسابك دي...
أمنياتي
وكل سنه وأنتم جميعا بخير وصحه
كل سنه وانتم طيبين
شوف يا ناس الدنيا لسه فيها ناس محترمه اهو ومش بيمشوا مع شوباب
ربنا يكرمك يارب ويهديلك الباشا
وربنا ده انا كنت ظالم الباشا تعرفي انا لو مكانه وفي واحدة بتعمل كده اقل واجب اروح قايم من وشها واقولها هو حضرتك فاكرة نفسك مين
واروح سايبها وماشي
بس الحمد لله اني مكنتش مكانه
وربنا يتمم بخير عقبال مليووووووووون سنة
يستاهل في حد ينسي عيد جوازه
دا يوم لا ينسي على الاطلاق
اليوم اللى الواحد بيفقد حريته و سعادته و استمتاعه بحريته
يلا اهو اخذ جزائه
بس نفسي يبطل ضرب المخده ده الا بقي لو كان بيضرب على سبيل الهزار
مبرووك يا ستي و عقبال مليون سنه
و مبرووك عضويه الجمعيه صبرنى صدقت على انضمامك ......لك الله يا باشا
حلو قوى جو البراءه ده
وعموما لما جيوبه توجعه احسن ما تسمعى كلام صبرنى وتديله مطواه فى كرشه
هههههههههههههههه
اهو يبقى قضا اخف من قضا
ههههههههههههههههههههههههههه
كل سنه وانتى طيبه يامخنوقه
وان شاء الله عيد ميلادك يعدى من غير خنقه
كل لحظه وانتى بخير ياقمر
كل سنة وانتم طيبين
عارفة انتى بتفكرينى بقصتى
بس لانها طويلة جدا
يمكن افكر احكيها لكم فى يوم من الايام
بس بعتقد لسة مخدش القرار
شوفى يا مخنوقة يمكن احنا كرجالة ممكن ننسى حاجات مهمة اوى بالنسبة لكم
بس فى اساسيات
1- الجواز الى اتبنى على حب مهما حصل يكفى انك لما بتحطى راسك على صدرة بيحس بيكى وبتحسى بية
2-مهما حصل هتلاقية حنين وشايل لك حب وعشرة وحاجات كثير
3-لما تقعدى وتفكرى شوية هتلاقيكى برضة خنقاة ى حاجات كثير بس لانك انتى المشتكية مش هتشوفى بس غير اخطائةمع انك لو فتشتى شوية هتلاقى حاجات كثير بديقة من غير ما تقصدى وعلشان هو بيحبك قوى بيفوت ويقول كفاية عليها العيال والسترس النفسى
4-انتى بتطلعى همك فى مدونتك وهو بيطلع همة فى الشيشة يبقى خالصين متزعليش لما ينفخ ف الشيشة احسن ما يطلعة فيكى
هههههههههههه
كل عيد حب وانتم طيبين كل عيد جواز وانتم دايما متكاتفين كل عيد لم شمل واولادكم دايما نايمن هههههههههههه
علشان يبقى عيد جواز وحلال عليكى رومانسية السهرة ومش خسارة فيكى ال 500 درهم وكفاية انك انتى الى فكرتى وخططتى بس برضة مقلتناش اية كانت هديتك ولا خايفة من ان حبايبك يعرفوا انة طيب وانتى الى بتفترى علية
كل عيد جواز وانتو طيبين يارب
وكل عيد جواز والباشا بيدفع بس يكون فاكر بعد كدا مش ناسي
بس صحيح هو زعل ليه ؟ هو في حاجة تزعل اصلا ؟ مش هو اللى نسي ؟ يستاهل يدفع
انتى عسولة جدا بجد ومواقفك معاه لذيذة
انا عيد ميلادي الشهر اللى جاي وهاتبع نفس اسلوبك لو جوزى نسي
يمكن نقدر نخلى الذاكرة ترجع للرجالة بئى
ربنا يخليكو لبعض وعقبال عيد الجواز ال 1000
هههههههههههههه
والله انتى سكرة ودمك خفيف موت
وحكاة جوازكم حلوة طحن
الله يوفقكم ومتزعليش على المخدة اللى خدتيها فى وشك هههههه ما انتى كمتن خدتى حقك وعاقبتيه بذكاء هههاى هههاى
السلام عليكم ........
ازيك يا مخنوقة ........كل عيد جواز وانتى بخير والباشا كمان بخير وبسعادة ربنا يوفقكم وتحفلوا بيه بسعادة ورمنسية يارب..........بس ايه المخدات الكتير الى بتتحدف فى وشك دى انتى متعودة على كده ولا ايه يارب متكون المخده تقلية هههههههههههههه.......كنت مسنية بقيت الحكاية اوى كويس انك متتاخرتيش اكتر من كده علشان فضولى ميقتلنيش هههههههههه .........يلا سلامووووز.......اموووووووواااااااااه. shemo
مالوش حق يزعل
هوا انتى عملتى حاجه؟:))
برغم انى هموت من النكد والاكتئاب
الا انى بجد مش عارفة ااقولك انتى عسوولة ازاى
بجد والله
زى السكر
عارفة انانفسي اوى اتخطب عن حب بالمنظر دة
لكن مش عارفة اية اللى بيحصل
وخصوصا انى منظرى هدبس فى خطوبة هتنكد عليية دنيا واخرة
ونفسيتى فى النازل
بجد مدونتك حلوة اوى
واما دخلت عليها مرة دورت عليها ولسة لاقياها بالصدفة بس بجد انتى مسكرة جدا جدا
والله
وهتلاقينى كل يوم بخبط عليكى المدونة
وسورى على الرغى بس قلت اما افضفض شويتين معاكى
هابي بيرثداي تو يو
هابي بيرثداي تو يو
هابي بيرثداي تو مخنوقة هانم
هابي بيرثداي تو يو
قلت اكون اول واحده اغني لك الساعة واحده قبل ما الكل يلحق يقولها
كل سنة وانتي عسولة زي ما انتي بالضبط
هابى بيرث داى يلا حالا حالا هنوا مخنوقه الليله عيد ميلادها ربنا يجعله اسعد الاعياد والباشا يفتكره ويظبطهااااااااااا
كل عيد زواج وانا طيبه
عقبالي يارب
وحشاني يامغتربه هانم
كل سنة وأنت والباشا والأولاد بخير حال .. جدعة جدا ف موضوع ال 500 درهم @ تحيتي @
كل سنة وأنت والباشا والأولاد بخير حال .. جدعة جدا ف موضوع ال 500 درهم @ تحيتي @
والله انت عسل يا مخنوقة واكيد الباشا مش حينسى تاني ابدا اي مناسبة وواضح انك زي حالاتي مغتربة بانتظار جديدك يا قمر
كل سنه وانتى طيبه يا مخنوقه
وعقبال 54875426 سنه وتشوفى عيال عيال عيالك
النهارده الخميس كل سنة وانتى طيبة وعقبال 10000سنة يا مخنوقة اطلعى جرى انتى والباشا على برج العرب احتفلي بعيد ميلادك هناك ، 500 درهم دى كانت زمان لازم 5000 علشان مينساش تانى 0
كل سنة وانتو في سعادة 0
النهارده الخميس كل سنة وانتى طيبة وعقبال 10000سنة يا مخنوقة اطلعى جرى انتى والباشا على برج العرب احتفلي بعيد ميلادك هناك ، 500 درهم دى كانت زمان لازم 5000 علشان مينساش تانى 0
كل سنة وانتو في سعادة 0
يييييييييييييه اتأخرت بس معلش النت كان فاصل عندى كان نفسى أكون أول حد يقولك كل سنة وانتى طيبة وبخير وبسعادة ويارب يارب يارب عقبال 100 مليون سنة تعيشيهم فى سعادة وهنا بلاش تزعلى منى بليييييييييييييييز علشان اتأخرت
المهم منتظرين تحكى لنا ايه اللى حصل فى عيد ميلادك وياترى مين افتكر ومين عمل انه ناسى علشان يفاجئك
دمتى بكل ود وسعادة
عيد جواز سعيد يا جميلة
بصى أنا جاية أسلم عليكى بس لكن بصراحة البوست مش كملته كله عشان مش فاضية دلوقتى :(
اخلص اللى ورايا و آجى أكمل انا قلت بس ممشيش إلا لما أسلم و أقولك كل سنة و انتى طيبة :))
برغم ان البوست طويل اوى الا انى حبيت اتابعه لاخره من خفة الاسلوب والصياغة وجمال الحكاية . وبعدين لما الحكاية جميلة كدة جاية منين الخنقة ؟ كل ما تتخنقى افتكرى الذكريات الحلوة دى والخنقة تروح على طول . كل سنة وانتى طيبة .
اولامليون الف مبروك لاختك يا مخنوقه انا اتبسطت قوى قوى قوى ان الدنيا اخيرا قدرتها وبدأت تضحك فى وشها
ربنا يسعدها ويكتبلها السعاده فى كل خطوات حياتها الجديده
بجد انا مبسوطه قوى قوى ليها
وعيد زواج سعيد عليكى يا جميله عبال ما تعجزوا وتتسندوا على بعض
بجد اخبارك كلها فرحتنى يا جميله
ومتنسيش سلامى لاختك ولو موصلتهوش هزعل
ياتري ايه اللي مأخرك علي الردود
ياتري جرالك ايه يامخنوقه
ربنا يستر وميكونش ردلك الذنبه الحلوه باعتك بذنبه احلي منها
طمنينا عليكي
فكرة جــــــامدة كييييييك بصراحة أحيكى عليها
أعتقد الباشا مش هينسى تانى عيد جوازكم.....أكيد هيعمل نوت فى الموبايل علشان يفكره السنة الجاية أكيد النوت دى أوفر
ربنا يخليكو لبعض......بس أنا قلقان ما فيش أخبار خالص عن الشيشة و رفيق الشيشة كيمو أبو كر.....
ســـــــــــــــــلام و كل عيد جواز و أنت مخنوقة :)
Wow
ما شاء الله ..
باقية القصة حلوة جدا ..
واكتر حاجة عاجبتنى الحتةالرومانسية الاخرنية ..
وهى صحيح غالية حبتين بس تستاهل كفاية الذكرى اللى هتسيبها ..
ربنا يديم عليكم الهنا ويبارك لكم فى بعض ..
ويصب عليكم الحب صبا ويجعل المودة بينكما ابدا ..
دمتِ بخير حبيبتى ..
كل سنه وانت طيبه يافلبي
عيد جواز سعيد وعيد ميلاد يارب اسعد
بس بجد هو الباشا زعلان من ايه
؟؟؟؟؟؟؟
بجد رجاله تخنق
ربنا يخليكو لبعض وما يفرقكوش ابدا
انت بجد عسل قوي قوي
ههههههههههههههههههههههههههههه
انتى حكاية يا مخنوقة انتى و جوزك الباشا
هههههههههههههه
كل سنة و انم طيبين و بخير و يارب يديم عليكم السعادة و يديم عليكي المخدات
ههههههههههههههههههه
و ثانيا كل سنة و انتى طيبة و بخير و عقبال 100 سنة
نس يا مخنوقة الصراحة المفروض مش انتى اللى تتخنقى خااالص
ههههههههههههه
من بعد الحلقتين دول...ديه و اللى قبلها
الواضح ان الباشا مخنوووووووووووووووووق
هههههههههههههههههه
ربنا يخليكو لبعض
تحياتي
كل سنه و انت طيبه و جامده مووووووووت حركة المطعم هههههههههههههههههههه
خالص التهانى وعقبال ميه سنه مليانه سعاده وحب وخفه دم
البوست رائع
تحياتى
عيد زواج سعيد وان شاء الله عقبال العيد المئوي
ههههههه
ياريت تشرفيني في مدونتي المتواضعة
http://nakadxnakad.blogspot.com/
ههههههه
طب الحمد لله مسمعتيش النصيحه بتاعت المطوه والشاكوش
وبالنسبه لتصرفك في بداية العلاقه أحييكي عليها موقفك كان صح الصح
وكل سنه وأنتي طيبه وعقبال ميه وخمسين سنه وعقبال ميه وتلاتين سنه زواج
وبالسعاده الدائمه
في أمان الله
عيد جواز وعيد ميلاد سعيد يا مخنوقة وعقبال مليون سنه طيب تعملى ايه بقى فى الباشا اللى مابيفتكرش المواعيد وكمان مش بتعرفى تاخدى منه الهوا الطاير ولا حتى ربع درهم
ياريت تقولى لى على الحل
تحياتى لك وتقبلى مرورى
هههههههه حلوة اوى الاحداث دى وكل سنه وانتم طيبين
وبجد انتى عملتى الصح احسن من الخناق بكتييير
وبعدين الرجال مش بينسوا موضوع الفلوس ده ابدااااااا
بحييك على عقلك والله
عاجبنى قوى الباشا خالص
الراجل ما كدبش خبر ومسك ايدك وقالك كفايه بقى تنطيط .. اقعدى بقى وبلاش خنقه وعلى طول راح خلى اخوه يكلم ابوكى فى التليفون الساعه 1.5 بالليل
وما نيل المطالب بالتمنى ولكن تؤخذ الدنيا غلابا ... ايوه كدا هى الرجاله كدا
تحياتى
ههههههههههههههههههههههههههههههههه
عثثثثثثثثثثل بجد
فعلا الجواز قسمة ونصيب
بس ملوش حق يزعل
وفعلا علامة مميييييييييزه هيفتكرها طول عمره
انتى طلعتى جامده جداً .. أنا اعز الستات اللى ليها شخصيه حاسمة ، انا اول مرة اتابعك بس واضح ان الموضوع بادئ من قبل كده فهقرا البوستات القديمة بقى
هو انتو ف انهى بلد ؟
عاجبنى المطعم اللى بيلف ده
إرسال تعليق