دى صورة واقعيه جدا لحالتى فى الاسبوعين اللى فاتوا......
وخلوا بالكم انا قلت حالتى .....مش شكلى ....انا بس باوضح....
بقالى فترة منقطعه حتى عن الرد على تعليقاتكم وزيارتكم وده لأنى ماعنديش وقت افتح الكمبيوتر اساسا...
وده علشان 3 اسباب :
1- امتحانات الترم التانى للاولاد....هتقولولى ليه بدرى كده ..؟؟؟ هاقولكم علشان هنا النظام 3 ترمااات فى السنه ...يعنى مش
خنقه واحده .....ولا اتنين .........لالالالالالالالا ......تلاته..
2- انى كنت باعمل شوية انترفيوهات كده على الماشى.....والغريبه انى لما باروح ومعايا الهارد والسوفت كوبى من شغلى
على اساس انى اشتغل فى التصميم .....الاقى الكلاااام اتحول وبقى فى التسوووويق ...؟؟؟؟ ليه مش عارفه...الظاهر مكتوب
على وشى ماركتيج ...وعلى قفايا تسويييييق.......
3-ان الباشا سيادته نزل مصر يومين شغل...ورجع معاه اخوه ومرات اخوه علشان يفسحهم فى دبى ......؟؟؟؟؟؟؟؟؟؟؟؟؟
تخيلوا ....ولادريان بالدنيا ان فى امتحانات لولاده...فعلا يخنننننننننننق هو وعيلته...
علشان كده كنت مشغووله جدا فى الاسبوعين اللى فاتوا دول وكنت باحاول ادخل على النت ..اما الصبح بدرى لما الاولاد
يروحوا المدرسه ....او بالليل متأخر لما كله ينااااام....
لانى لما كنت لما الاولاد ينزلو يروحوا المدرسه ...أبدأ انا فى عمل الغدا بسرعه علشان لما اخوه ومراته يصحوا ..
اخرجهم افسحهم واوديهم المولات اللى عايزينها علشان الباشا فى الشغل....
ده غير ان اخوه ومراته بيشربوا سجاير وانا مابطقيش ريحتها ...والعربيه عندى بقت مدخنه...
ومرات اخوه دى تبقى بنت عم الباشا ...يعنى من العيله الخنيقه نفسها ....وبيقعدوا يتكلموا فرنساوى مع بعض وانا بصراحه باطق منهم وباسيبهم وباقوم اعمل لهم اى حاجه ياكلوها علشان بقهم يتسد .....
اظرف حاجه ان كل اللى فى البلد هنا مابيكلموش غير انجلش بس زى حلاتى ....يعنى ياخدوا الفرنساوى ده ويرموه فى الشارع ...
مالوش لازمه هنا بتاتا البته ....
المهم انى بصراحه زهقت من كتر اللف معاهم ....لانى حسيت انى السواقه بتاعتهم ...فببساطه نزلت تحت بالليل وفصلت بطارية
العربيه ...وتانى يوم نزلت معاهم عادى وطبعا العربيه ماشتغلتش....واضطروا ياخدوا تاكسى ...
احلى حاجه انهم بقوا يغوروا ...قصدى يخرجوا لوحدهم ....من غيرى...وهانت كلها يومين ويمشوا...
نسيت احكيلكم الباشا حصله ايه فى جلسة المساااج .........
ههههههههههههههههههههههههه
كان يوم لاينسى من ذاكرة التاريخ....بصراحه استمتعت بيه جدا ...
الباشا رجع من الشغل ..ودخل اخد شور..وروق نفسه ..وحط برفيوم كتيير
واحنا رايحين الجيم ...وعمال يعينى يمنى نفسه بالمساج الريلاكس اللى
هياخده ...وانه هيرجع ريلاكس على الاخر وهينام مرتااح للصبح...
وهيروح يغيظ اصحابه فى الشغل تانى يوم....
المهم رحنا وغير هدومه ولبسوه روب طويل وخامته زى الفوطه بالضبط علشان
ممنوع اللى بتمسجه تلمس جسمه ...
انا طبعا دخلت معاه علشان اعرف مين اللى هتعمله المساج....
وبعد شويه دخلت الاخت الامورة اللى عملتلى المساج...وده شافها ....اتخض...
وقالى ...مين دى ..؟؟؟؟
انا : دى ياحبيبى اللى خلتنى ريلاكس خاالص..
الباشا: دى ..؟؟؟؟؟؟ دى ست ؟؟؟؟ دى جودزيلااااا....
انا : لا ياحبى ماتاخدش بالمظاهر دى ايديها ناعمه قوى ...
بصلى بنظرة شك ...وبعدين سابها تعمله مساااج ...
وهنا الفيلم بدأ....
والمتفرجه الوحيده هى انا ...
و...طبق الاصل العلقه اللى انا اخدتها...
وهى بصراحه زودت جرعة المساااج علشان ده راااجل والمساج بتاعه مختلف شويه ...
وابص الاقى وش الباشا جايب الوان ...
وفى الاول كان مستحمل الألم وساكت ..بس وشه معبر..
الاقى عينه تغمض جامد من الالم ويعض على شفايفه ....وبعد كده بدأ يتأوه
بصوت واطى ...ويبصلى بغيظ ...وانا مبتسمه وباشرب كوفى وباتفرج...
وبعدين لما دخلت على رقبته وطرقعتها ....ههههههههههه
لقيته قام اتنفض واتخانق معاها....
طبعا هى قالتله زى ماقالتلى بالظبط وان ده مساااج عادى بس هو اللى مش عارفه..
وبدأت تشتغل على المعدة و.....صوته علي جامد من الالم ...
وقام مسك ايديها وزقها واتنرفز عليها ....
وخرج اتخانق مع الادارة وعايز يرجع فلوسه تانى ...لان ده مش مساج ...ده
عذااااب...
وطبعا الادارة رجعتله فلوس الجلستين اللى ماعملهمش ورفضت ترجع له
حق العلقه اللى خدها ....
المهم اننا هنروح تمشيه لان الجيم جنب البيت ...وده مش قادر يحرك عضلات جسمه من الالم ...والله صعب علي ..بس يستاهل ....مش هوه اللى عايز
واحده ست تمسجه ...؟؟؟؟ يشرب بقى..
ولما روحنا اخد شور وخرج وجسمه بدأ يلون ازرقااات جميله...
واتخانق معايا ..
الباشا : دى اللى هتخلينى ريلاكس يامخنوقه ..؟؟؟؟ بتخدعينى؟؟؟
انا : ليه ياحبى ..؟؟ دى حتى ايديها حنينه..
الباشا : حنينه ..؟؟؟؟؟ انا اخر مرة اعمل مساااج ...
انا : ليه ياحبى ..؟؟ ماتزعلش .. انا اعملك مساااج وهاخليك ريلاكس على
الاخر....انت عارف ايدي حنينه قد ايه..
الباشا : ااااااه ياضهرى ..انت عايزة تخلصى علي ..؟؟؟انت كنت عارفه شكلها ايه وماقلتليش يامخنوقه مش كده ...عاملالى مقلب ..صح..
انا : انا ؟؟؟؟ ليه الظلم ده ..وبعدين انت جاى تعمل مساااج ولا جاى تتجوز..؟؟؟
انت فاكرنى هاجيبلك مزة تمسجك ولا ايه .؟؟؟؟دى العينه اللى انا اوافق انها تمسجك
ياحبى ...انت فاكرنى هبله ولا ايه ..؟؟؟؟
الباشا : حسبى الله ونعم الوكييييل فى الستااات كلهم ...
يعنى علشان تثبتى وجهة نظرك تدينى علقه ..؟؟؟؟؟
ااااااه ياظهرى .".....اااااااااه يارقبتى ....اااااااه يابطنى ...منك لله ....
فعلا مامى كان عندها حق لما قالتلى ..(بكرة تشوف زمانى من زمن غيرى)
الله يرحمك يامامى...متي وسيبتينى لمخنوقه تعذب في...
انا:حبى ماتزعلش قوى كده....لو مامى واحشاك قوى كده ..خدلك 5 جلسات
كمان ..وانت تروح تسلم عليها....
ههههههههههههههههههههههههههه
بجد بجد رجااااااله تخننننننننننننننننننننننننق....انا مش عارفه اعمله
ايه اكتر من كده...كل الدلع ده ومخنوووووق برضه..
حاجه غريبه................
مخنوقتكم...........بتعتذر عن التأخير فى الرد علىيكم كلكم...
نظرا للظروووف الخنيقه اللى عندها....
وهاستكمل الرد عليكم تاتا تاتا...
مش يزعل حد.....
سلالالالالالالالالاموووووووووووووووووززززززززززززززز
62 التعليقات:
هههههههههههههههههههههه
ههههههههههههههههههههههه
يستاهل بجد ال عاوز موزة تمسجه ال
اه منك يا شريرة انا قلت مش هيروح والموضوع هزار بهزار هههههههههههههههه
لكنه اكل المقلب وخلاص هههههههههههههههههه
شرررررريرة موووووووت
ههههههههههههههههههه
قلقتينا عليكي لما اتاخرتي وقلنا لتكون تعبانة ولا حاجة
ربنا يعينك على امتحانات العيال و الضيوف الي عندك ^ـ^
فعلا إن كيدهن عظيييييييييييييييم
متخيلتش وانتي بتقولي انك هتعمليها فيه فعلا
ايه الافترا ده وهان عليكي وانتي شايفاه يا ولداه بيتقطع قدامك؟
ارحمو الازواج في الارض يرحمكم من في السماء.
ربنا يعينك على الامتحانات والعالم الخنيقه.
تحياتي .......
هاهاهاهاهاهاهاهاها
دا انتى عملتيها بجد يا مخنوقة
مش قلتلك انتى شريرة ومصدقتنيش
بس الباشا يستاهل برضو مش أخذ بالة خالص من امتحانات الاولاد لا وجايبلك 2 كمان عليهم تفسحيهم بس حركة العربية دى جامدة اخر حاجة :)
بصى انتى خديهم يعملوا مساج وبكدا تفكى خنقتك شوية
ربنا يكرمك وتلاقى شغل بسرعة والاولاد يخلصوا امتحانات وترتاحى شوية
تقبلى مرورى
ازيك يا مخنوقة وحشانى
ربنا يعينك على امتحانت الاولاد وربنا يوفقهم
وبجد الازواج بيخنقو جدا لما يكونو مش حاسين بمعانتنا مع الاولاد في الدراسة وبعدين كمان جايبلك ناس بيتكلمو فرنساوى انا متعقده منه اصلا وبعانى معاناه عظيمة مع بنتى بسببه مع انه عندها مش اللغة الاولى في المدرسة بس بردو معقدنى
وضحكتينى اوى بجد على الباشا وتخيلت منظره وهو شايف جودزيلا دا خل يعمله مساج وحسيت بتحطم اّماله وهو اللى كان فاكر ان كتكوتة حلوة زى اللى في الافلام هاتدخل تعمله مساج ههههههههههه
بس صعب عليا بردو .
ودلوقتى بفكر جديا ابعت حماتى تعمل المساج على ايدى جودزيلا الرهيبة
هع هع هع
ازيك يامخنوقه
انا كنت هموت واعرف اخبار المساج ايه
ههههههههههههههههههههه
بس في حاجه كنت عايزه اسئلك عليها
تفتكري ياحبي لو جوزك شاف هذه المدونه
هيعمل فيكي ايه؟؟
ولا هو عارف ؟؟؟
اة يا اختي علي راي المثل اللي عايز موزة تمسجة ياخد علقة تموتة
ههههههههههه مدوباهم اتنين ههههههههههههه
ربنا يكون في عونك
دمتي بالف خير
انت شيطان يا عم الحج ولا ايه
يخرب بيت كده تخلي جوزك حبيبك روح قلبك يروح عند الولية المفترية فتكات بنت عطية حراااام عليكي هو عملك حاجة وبعدين لو لازم موزةو يعني تمسجه مسجيه انتي بقا يمكن ينعدل حاله وانتي عارفة بقا
بس بجد تحفة
وربنا يكون في عونك على اخوه ومراته سجاير اخيييييييييييييييه عليهم سجاير بكره يشوفه هيفضلوا يدخنوا لغاية اما صدرهم يطرقع ويبقى شبه المدخنة
تحياتي
انتي فين يا شريرة :D
وربنا وحشاني وعماله اقول هي فين فين ومش عارفه اوصلك ازاي
ربنا يعينك يا اوختشي ع قرايب الباشا وكمان بيدخنوا يع
اوحش حاجه انه يجيلكناس قمرات كده ع سهوة :D
ربنا يريحك منهم ياااااااارب :D
وبالنسبه للمساج .. يستاااااااااااااهل
جدعه والله يا مخنوقة
عقبال ما اطبق دروسك دي يااارب
منورة ياحببتي تاني
وربنا يعينك
هههههههههههههههههههههه
ههههههههههههههههههه
حرام عليكي جوزك يامفتريه
يهون عليكي كده
هههههههههههههههههههههههه
وبعيدن ايه الخنقه بتاع اخوه ومراته دي
مراته بتشرب سجاير....!!!!!!!
ياحلاوه ياولاد
هههههههههه
يعينى خد العلقة برده D:
تخيلة منظر عينيك والعلقة شغالة ومن جوالك بتقولى
نياهاهاهاها ( ضحكة متصلة شريرة )
بس اهو معلش تلك الايام ندوالها بين الناس ..
والله يكون فى عونك على الضيوف بيبقى دايما وقت طوارئ ..
وبعدين مرات اخو جوزك بتشرب سجاير ليه ان شاء الله ..
ربنا يهديها ..
ويعدى الولاد على خير ويجعلهم من الناجحين ..
زما تغيبش عنا تانى علشان بتوحشينا ..
دمتِ بخير ..
مخنوقة
وحشتينا جدا
مبروك مساج الباشا
ويارب عقبال رجالة مصر كولاتهم
فكرة بطارية العربية دى تجنن
حاهملها فى الصيف مع اللى بيخنقونى وعايزين يتفسحوا يوميا على شواطئ الاسكندرية المختلفة
تحياتى
جدعة
برافو عليكي
راجل من ضهر راجل
ادفع الف جنيه واشوفه تحت ايد جودزيلا بيستغيث ههههههههههههههههههههههههههههههههههه
واستحمى وهيأ نفسه وحط برفيوم
احسن يا جوز مخنوقة
وبعدين يا حلوة ايه فرنساوي دي
علي النعجة اللي يتكلم لغة لا أفهمها وانا قاعدة ابيته على بسطة البيت هو وأهله
دي قلة ذوق اعذريني يعني
حتى لو هم زفت هو مفروض يقولوا اتكلموا عدل علشان حبة القلب مخنوقة تشاركنا الحديث
شوبنج في عينهم
وغدا في عينهم برضه
ربنا يسهل في الأمتحانات وولادي في السعودية كانوا في الباكستنية ودي امتحاناتها 3 مرات برضه فأنا عارفة انتي في ايه ربنا معاكي
ونتوجك ملكة جمعية المرأه المتوحشة بجدارة
تحياتي
ههههههههههههههههه
كويس انه عم مساج مع نفس البنت
كنت خايفه لتجيله واحده تانيه
وكان طمعان فى 3 جلسات
ههههههههههههههه
يستاهل
وكمان جايب اخوه يتفسح
بس جدعه انك فصلتى البطاريه
ايه الحركات الجامده دى
ربنا يوفق الاولاد ان شاء الله
هههههههههههههههههههههههههههههههههههههههههههههههههههههههههههههههههههه
يخرب عقلك يخرب عقلك يخرب عقلك
عارفه انا ضحكت ضحك كنت هاتفرط فى الارض من الضحك
ما تخيلتش انك هاتخليه يروح بجد وانه كمان هايصدقك وانتى تمسكي نفسك وتقعدي تتفرجي عليه
بصي رضا جه على صوت ضحكي من جوه وقعد يقرا معايا وانا خلاص كنت هافطس من الضحك بجد
ويقولي كلكم مفتريين
ده طبعااسقاط للي حصله هو لما راح مساج بس كان راجل الى بيعمله بس راح مع ميييييييييييييييين
مع ميييييييييييييين
مع صديقه صينيه يا عنيه اصلها عزمته
هابقى احكيلكم بالتفاصيل المتفنصله عندي ذات يوم
وبعدين الناس الى عندك دول اكرشيهم من فضلك
وارزعيهم درس فى الدين والفضيله انهم ما يتكلموش فرنساوي قدام حد ما بيعرفش فرنساوي
او خديلك كورس فرنساوي ده اسهل من الانجليزى
والمره الجايه لما يتكلموا فرنساوي ردي عليهم عربي وعرفيهم انك فاهمه كلامهم
اووووووووووووو
قوليلهم فيس تو فيس اتكلموا لغة اهاليكم يا ابن سلطح بابا انت وهي وبلاش مسخره وانعره كدابه
وانا لو منك كنت قلتلهم فيس تو فيس مش نازله مش فااااااااااضيه البلد قدامك اهي
قال يروح الشغل وانتى تفسحي
قسما عظما دول عايزين كلهم العيله دي يتفسحوا فى القرافه على ايدى
ياعين امك يااخويا
ادى اخرة اللى يعذب مراتة ويجيبلها اخوة ومراتة بالشقة
لكل ظالم نهاية
باينك مفترية اوى
بس بينى وبينك يستاهل
مدونتك حلوة اوى تحياتى
يامفتريه :)
ياريت تكتبي عنوانها لكل ست عايزه تروق زوجها اي تعمل له ريلاكس كده علي الماشي
حرام عليكي دة مقلب تعمليه في الراجل بس على فكرة في حاجةانت مش واخدة بالك منها هو ممكن يسأل على جيم تاني وتكون المساجير مزة بجد
هههههههه
تحياتي ليكي
هههههههههههههههههههههههههههه
عسل يامخنوقه
وبنا انتي زي العسل
بلاهم ياشيخه ده انتي زي السكر ايوه كده هو مينفعش معاهم غير كده
ربنا يصلح احوالك
بس تعرفي حركاتك عجبتني
انا زيك كده والله
بصراحة مهما قولت مش هوفيكى حقك كفاية انى قرأت مدونتك وبجد كانت دموعى مغرقة خدودى بس والله بجد وأنا بقرأها مش عارفة ازاى نسيت السبب اللى خلانى أعيط وضحكت بجد أشكرك على الضحكة دى كنت بجد محتجاها..... جزاك الله عنى خيرا وعنا جميعا وربنا يكون فى عونك ده بيكون الامتحان ترمين وبنتجنن مابالك تلاتة بصراحة ساعتها هرمى أخويا من الشباك لأنه هو اللى بتعب معاه أيام الامتحنات.... ويارب الولاد ينجحوا بدرجات عالية تخليكى فخورة بيهم بس الفضل يرجع أكيد بعد توفيق ربنا ليكى بجد انت تستاهلى تكونى الأم المثالية .... انما للزوجة انت ماشية على ومن أعمالكم سلط عليكم يارب يوفق ويسعدك ويخف عنك الخنقة شوية ولا أقولك خليها شويا بس ما يحرمنا من دمك الخفيف ولا قلبك اللى أكيد طيب ....تقبلى مرورى كزيارة أولى
مخنوقة ليك تاج عندى
ياريت تيجى تخدية
:)
ههههههههههههههههههههههه
تحفه خطه شريرة بالفعل
اية الجمال دة
عايزة اتعلم منكم نستفيد
ربنا يعينك فى امتحانات الاولاد
لا بس عجبتينى اوى لما فصلتى البطارية عقلية جبارة
ربنا معاكى
نياهاهاهاها
انتى بجد ايقظتى فيا الروح الانتقامية يا مخنوقة
وباذن الله يطلع على اى حد تسول له نفسة يضايقنى فى البيت
هعع هع هع
بس مخنوق يستاهل المزاش.. قصدى العلقة المعتبرة دى
آل شكلها آل
هو احنا بنلعب وللا ايه
تحياتى يا عثل وربنا معاكى ومع الولاد فى الامتحانات ان شاء الله
انا مش قلت لك مش خساره فى طيبه قلبه
خليه يشرب بقى
عجبتينى يامخنوقه
خليه يتعلم ان الله حق ويقول توبه
بس بصراحه يستاهل علشان خنقك وفاقع مرارتك بتصرفاته
هههههههههههههههههههههه
كل مره وهو طيب
يعيش وياخد غيرها
ههههههههههههههههه
وربنا يعينك على قريبه
هى العيله كلها كده؟
ربنا معاكى ياحبيبتى
ههههههههههههههههههههههههههههههههههخلاص هموت من الضحك
إنت كنت فين من زمان ...مبسوطه قوي إني عرفتك ..أصل حالنا من عض ..أنا كمان عايشه في السعوديه وقعده في البيت مع إني دكتوره ومخنوقه على الأأأأأأأأأأأأأأأأأأأأأأأأأأأأأأأخر
مدونتك زي العسل
وبالنسبه للخنقه إللي إنت فيها ممكن تعملي حاجات كتير وخاصة إنك فنانه ..على فكره أنا كمان بحب الرسم وبرسم بالرصاص ورسوماتي في المدونه
مستنياك نشرب شاي مع بعض ونتبادل أحاديث الخنقههههههههه
سلام
مبروووك يا اشرس عضوة ف الجمعيه
هههههه
ستيته توجتك ملكه يا استاذه
ذنبه ايه المسكين ده يتمسكج بالشكل ده
كل ذنبه انه يبقى ريلاكس
الله يسامحك
فكرتنى با البت صحابتى اللى عملتلى مساج
والله على قد ماهو يستهل بس انا مجربه
واش حال انتى مجربه انتى كمان ،
لو مافهاش مضايقه رقم جودز هاحتاجه لواحد صحابنه
هههههههه بجد مقلب حلو فى الباشا هاااايل هو ده الكلام يابنتى يعيش يا ياعيش يااااا
اما موضوع بقا الامتحانت والاخ العزيز اخو الزوج ومراته فربنا يعينك ان شاء الله
ويارب ربنا يكرمهم بحد يفكرهم بالمثل القائل انه الضيف الخفيف مايطولش وميزهقش الناس فعيشتها خاصة لما يكونوا ولادها بيمتحنوا
اما بالنسبة لموضوع الفرنساوى ده اسمبوسييبل سى ترووو بيفقع مرارتى اخر عهدى بيه ايام المدرسه وكفى الله المؤمنين شر القتال
تحياتى ليكى ومتغيبيش علينا
ايه الشر ده يا مخنوقه ؟ انتى بتعانى اوى كده من الباشا ؟
بس والله يستاهل العلقه السخنه دى عشان هوا خانقك اوى كده
بس صعبان عليا والله العظيم
وعلى فكره موضوع التسويق والماركتينج ده مش جاى من فراغ .. ده بيدل على ان البلد مفيش حد فيها بيشترى حاجه واللى عندهم حاجه مش عارفين يبيعوها ومش لاقيين مشتريين سواء كانت الحاجه دى شقه او فكره او مشروع . يعنى البضاعه موجوده بس مفيش مشتري وده موجود فى كل البلاد حتى شركة GMC بتاعة العربيات الامريكيه كانت ارباحهاعاليه جدا بس دلوقتى الارباح حوالى عشرين فى الميه بالمقارنه بخمس سنين فاتو وتقريبا بتعلن افلاسها ومشى من موظفينها كتير جدا جدا ده غير اللى مشيو من دبى والمنشآت اللى اشهرت افلاسها وصفت البزنس بتاعها عندكم
يعنى مفيش رواج اقتصادى فى اغلب المجالات
ههههههههههه ربنا يعينك يا قمرايا
وبصراحة الباشا يستاهل المقلب ده اشمعنى انتي يعني :))))
زوجه
ليكى عندى تاج تعالى خديه
ههههههههههههههههههههههههه يا عيني ده انتي مفتريه حرام عليكي هههههه بالنسبه للضيوف الخنيقين ربنا معاكي هههههههه
هههههههههههههه
ايه يا مخنوقة ده
انتي فشفشتي الراجل علي الاخر
طب كنتي انت عملتي الواجب وعملتيلو مساج من الاخر
بس يستاهل علشان يحرم يحلم بأي موزة تعمله مساج تاني
ههههههههههههه
وكلو كوم ومرات اخوه اللي بتشرب سجاير كوم تاني
لاء وايه وبتتكلم فرنساوي
ايه الخيبة ديه
ربنا معاكي
ويصبرك
سلام
انا دخلت علي طول كده
بس عاوزة اقولك مدونتك تحفة
عجبتني جدا
تقبلي مروري
ويارب اكون ضيفة خفيفة
سلام
يا باشا يا باشا لما تنزل مصر عليك و على النادى الصينى الصحى اللى فى المعادى و هناك بقى مش حتنسى اللى حصل لك على أيد أمنا الغوله اللى ضحضحتك لأ ده أنت حتنسى اٍسمك كمان :))
بالعند بقى يا مخنوقه و تضامنا مع قوى الأزواج الغلابه اللى بيشوفوا العجايب :))
تعرفى انتى فظيعة بجد
فطستينى على نفسي من الضحك
كل الابتسامات دى ومخنوقة
امال الناس التعبانة تعمل ايه
ربنا يزيد ابتسامات وانبساطات وسعادة
بس عندى اقتراح صغنون قد كده
غيرى اسم مدونتك
من يوميات زوجة مخنوقة
الى يوميات صانعة الابتسامة
تقبلى تحياتى
ههاهاهاها نفس التصرف الى ممكن اعمله فى جوزى لما يجى يعنى هههههههههههههههههههههههه
يوقلى عاوزه اتمسج
بصى بجد اسسلوبك تحفه بس فى طلب سخييف مش عرفت اقرا اى حاجه من المواضيع الاولاتيه جبت النضاره والمنظار وقربت اجيب تليسكوب من الالوااااااان رافه بعينى غيرى الالواااااااان ههههههههههههههههههههههه
السلام عليكم.......
ازي يا مخنوقة....انا اول مرة ادخل المدونة عندك بس والله الخنقات الكتير دى حلوه اوىىىىى هههههههههههههه.......بجد الباشا شكل عيلته خنيقة فعلا الله يكون فى عونك ......وحلو اوى المساج الجامد دا والله فعلا يستاهل الى حصيله .........يلا اسيبك باه واجيلك فى خنقة تانية .......وعوزة اشوفك عندى ان شاء الله فى المدونة .........سلامووووز امووواه.
ههههههههههه ده بتهيلي جلسة المساج خدت لك حقك مسبقا من عزومة العائلة الكريمة ههههههههههه تحياتي ومودتي
ههههههههههههههههه
ههههههههههههههههههههههههه
هههههههههههههههههههههههههه
يستاهل.. كدا هو اتعقد ومش هيفكر يعمل مساج ابدااااااااااااً
ايه يابنتي انت فين خير مش برتاح لغيبتك دي
بترجعي بقصه اغرب من اللي قبلها يارب خير اللهم اجعله خير
ده حتي ماردتيش علي الناس
حقيقى مدونه جميلة وتصميمها غاية في الرقة والروعة وكلامها جميل رغم انى لم اكمل القراءة.
شكرا لك
مساج الخير ....
ياريتك تدينى عنوان الست الامورة دى علشان نبعت لها شحنة ازوج تخنق
كل مساج وانتى بخير ياقمر
انتى فين ؟؟
مختفية ليه ..
هم لسه عندك ؟؟
طمنينا عنك ..
انتى فين يامخنوقه يااختشى؟
هما قرايب الباشا لسه كابسين على انفاسك ولا ايه؟
واحشني بوستاتك
قصصك جميله
ربنا ينجحلك أولادك
ويسعدلك الباشا
ويفك خنقتك
آمين
ماتغيبيش عننا
أبوك وأخوك وصديقك اللي من غير عنوان
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
مش ممكن والله
ان كيدهن عظيم
ده بس عشان كانت نيته حاجة تانية
ده انتقام ربانى والله
ههههههههههههههههههههه
خالص ودى يا قمر
سالى
شكرا على زيارتك
واعذرينى لو كنتى أفترضتى سوء النيه فى مدونتى الغلبانه
-----------
عندى سؤال او فضول
هو جوزك يعرف ان لك مدونه فعلا؟
انا لو مكانك كنت أفيرسك
هههههههههههههههههه
ربنا يهديه ليك ويهديك له ويهدينا كلنا لله
فرصة سعيده
وربنا يفك خنقتك
ههههههههههههههههههه
بجد بجد انتى دمك زى العسل
مش عارفة اقول الله يكون فى عونك ولا فى عون جوزك
بصراحة بعد جلسة المساج دى المفروض انك تسامحيه على اى حاجة عملها فيكى
ههههههههههههههههه
ربنا خادلك بحقك تالت ومتلت
ههههههههههههههههه
اولا اعتذر عن الانقطاع
وثانيا انتي المفروض يعطوك وزنك دهب
:)
حبيبتي
ربي يحفظك انتي والي تحبيهم
ويخليك لبيتك يا احسن زوجة في الدنيا
:)
هههههههه ان كيدهن عظيم
بس انت ست كده يستاهل ال مساج ال ايوة كده وريه :))
انا باعتذر لكل اللى علقوا عندى لعدم الرد عليهم كلكم وده بسبب ان الامورين الحلوين اللى كانوا عندى مدوا اقامتهم 10 ايام كمان .....
وليكم ان تتخيلوا انى بنام فى اوضة الاولاد انا وجوزى بقالنا 20 يوم....
وطبعا سايبه لهم اوضتى لانها ماستر (اوضه + حمام )
والظاهر الاقامه عجبتهم ...اوفر من الفندق...بجد حاجه تخنق جدا....
وبكرر اسفى ومش تزعلوا منى ..انا فعلا فعلا مش لاقيه وقت ارد عليكم كلكم ..بس قريت كل تعليقاتكم الجميله وبجد حسيت قد ايه انتم كلكم زى العسل والله....
وايك حد فيكم يبطل يزورنى ..علشان ماردتش عليه...
انا ان شاء الله هاكتب بوست تانى قريب وهاقعد ارد على كل تعليقاتكم الجميله ...لانهم خلاص مشيوا من يومين كده وانا لسه باظبط البيت مطرحهم...
ولقيت انكم وحشتونى قوى فبقيت ازوركم واعلق عندكم وبعدين مالاقيش وقت ارد على تعليقاتكم عندى...
وانا بكرر تانى مش عايزة حد يزعل بتاتا البته..
سلالالالالالالالالالالالالالاموووووووووز
السلام عليكم ورحمة الله ، ياااه قرأت البوستات لحد يناير ، أنا مستغرب من طول البال اللي جالي ده بس أكيد ده بسبب الدفء اللي ف كلامك وخفة دمك ربنا يسعدك و يسعد الباشا و ينجح أولادكم و يبارك لكم فيهم ويبارك لهم في عمركم ، صحيح إن كيدهن عظيم ده اللي كان على لساني أول ما قولتي موضوع بطارية العربية استغربت جدا بس الآية دي هي اللي فهمتني ... بس أنا شايف من خلال البوستات دي كلها اللي قريتها إنك طيبة جدا و بتحبي ولادك والباشا جدا جدا بس فيكي طباع الست المصرية تحبي المناكفة وجر الشكل و مش سهلة ،، من حقك طبعا إن الباشا يحيطك برعاية شاملة ف تعبك بس لازم تكوني متسامحة أكتر من كدة ،، و إن شاء هتلاقي شغل أحسن من الأول .. كمان لي ملحوظة :( اخشوشنوا فإن النعمة لا تدوم .. الحديث) ده عشان الأولاد ياريت تحافظي على الموضوع ده عشان معظم الآباء والأمهات بيهتموا بتوفير أفضل حياة لنا كأولادكم بس مش بتراعوا الحديث ده معانا .. ده مش معناه نشفوا ريقنا لأ بالعكس بس علموا الولاد إنهم يخشوشنوا يدركوا أهمية الأشياء فيتعلموا الحفاظ عليها وحمايتها ... أنا آسف طولت ولسة عاوز أقول بس مش عاوز أجهد عينك @تحياتي@
السلام عليكم
يا زوجة يا مخنوقة ؟؟؟!!!!
مش عارف ليه مش عاوز اقول مخنوقة دى
ياستى غيريها بقي مش لايقة عليكى
اكتبى يوميات زوجة سعيدة - فرحانة - اى حاجة من الحاجات اللى تفرح دي
ههههههههههههههه
انا قريت تعليقك عندى
وجيت ارد على سؤالك هنا
انا ياستى متزوج
وعندى
عبدالرحمن 7 سنين
نوران 4.9 سنة
محمد 1.6 سنة
وان شاء الله هتشوفيهم قريب
اما بخصوص الابتسامة
دي بقي ياستى سر الحياة عندى
عارفة ليه
اصل انا لو بصيت لكل الامور اللى تخنق اللى بالى بالك دى
وفلانة عملت وفلانة سوت
وماما قالت ومش عارف ايه
انا عاوزة ايه ومش عاوزة ايه
وطلبات الستات اللى مش بتخلص ابدا
يبقي مش هابتسم 100 سنة قدام
فيه سر بجد اسمه الابتسامة وهى سر الاحتواء
وبها باقدر احقق اللى انا عاوزة
ابتسامة حقيقية مش مصتنعة
انا بازعل وافرح واتضايق واتخنق
وحاجات كتير
لكن بارجع فى النهاية لابتسامتى
اللى انا باعشقها
وبعدين ياستى
ماهو انتى شكلك كده فظيعة فى الابتسامة
كفاية اسلوبك اللى يجنن فى الكلام الكوميدي ده
اكيد زوجك اسعد رجل بالعالم
مبدئيا
تقبلى تحياتى
سلاموووووووووز
بصراحة لو مكانك
ما اعرفش كان ممكن اعمل ايه
بس عموما
انتى رقيقة جدا
^_^
تحياتى
بصراحه يامخنوقه انت عندك حق تتخنقى من قرايب الباشا وخصوصا ان عندك تيرم ومزنوقه مع العيال وكمان مزنوقه مع الباشا فى المساج.
الله يكون فى عونك وعون الباشا وعونكم انتم الاثنين على بعض.
هههههه
تحياتى
بس يا مخنوقه من خنقتك من الباشا ضحكت عليه وودتيه للمساج عشان ياخد علقه وتتفرجى عليه
انا كنت قلقت عليكي وكنت داخله اعملك نداء
عودي يامخنوقه بقى وحركات
قريت التعليق بتاعك واطمنت انك والحمدلله عايشه بس ربنا معاكي يفك خنقتك ياختي
10 ايام؟؟؟؟؟؟؟؟؟؟؟ ربنا معاكي
كنت داخلة اطمان عليكي وعلى غيابك الطويل
بس عذرت ياربي شو هالاقرايب
يناموا بغرفتكم هيك عادي ولا همهم لو اموت مستحيل اخلي حد ينام بعش الزوجية بتاعي ^ـ^ ههههههههه
ربنا يصبرك ياقلبي
اشتقتلك كتيرررررررر
يا جميله
معلش ربنا يعينك والحمد الله ان ربنا سهل الحال بجد اي حد زياده في البيت بيدربك الدنيا ربنا يكون في عونك بس هو في الاسلام المفروض مش اكتر من 3 ايام بس احنا عندنا في مجتمعنا 3 مين يابا اوعي ال 3 ال بس كمان سبتلهم الاوضه يا ده حاجه تخنق والله معلش بقي ربنا يجعله في ميزان حسناتك والله وحشتينا
ارجعلنا بسرعه بقي
انا ببقي مبسوطه لما باجي عندك بتوحشينااااااااا
تحياتي يا جميله
مدونة رائعة والاسم ممتاذ ... انشاء الله مش مخنوقة ... بس يا ريت تعدلى فى الوان النصوص بس وشكرا جزيلا
عرب بس http://arabbas.blogspot.com
تعليم كمبيوتر تعليم انترنت دين ممتع ثقافة لذيذة برامج هامة للنساء فقط من هو؟ سياسة وصراحة أجهزة حديثة تكنولوجيا غريبة كلام أبكانى وأحيانى شاهد ولن تندم إضحك من قلبك
إرسال تعليق