THOUSANDS OF FREE BLOGGER TEMPLATES

الخميس، ديسمبر 31، 2009

كل سنه جديده وانتم طيبين





عيد سعيد وسنه جديده يارب تكون احسن من اللى فاتت...عليكم كلكم
وحشتونى كلكم وصدقونى متباعكم كلكم والله ...بس انا مش لاقيه حاجه اكتبها من ساعة ماجيت مصر....




انا لقيتنى بقيت فى غربه اكتر....واتخنقت اكتر واكتر...وحسيت انى فى سجن..




مش عايزة حد يزعل منى ..بس انا مش حاسه بالأنتماء هنا بتاتا البته......




بس انا قررت انى مش هاسافر نهائى لأجل غير مسمى...لغاية ماعرف انا هويتى ايه بالظبط....




ليه انا مش طايقه ااقعد هنا ...؟؟؟ وليه مش قادرة اتأقلم على الناس والحياة هنا ؟؟؟




لدرجة ان ولادى اتأقلموا اكتر منى ...خصوصا مع اهلى واهل الباشا ...




جايز علشان هم لسه صغيرين ...جايز....




أبنى الكبير قالى كلمه وجعتنى قوى ...انتى جنسيتك ايه ياماما ...




مش مصريه برضه ؟؟؟؟؟؟؟




معرفتش ارد وأأقول ايه..ايوة فى البطاقه والبسبور مصريه...




لكن فى القلب ايه ..؟؟؟؟فراااااغ كبير قوى...




علشان كده انا مش هاسافر تانى لأجل غير مسمى زى ماقلتلكم




جايز ..الفراااغ ده يتملى بحاجه مع الاياااام...




معلش برضه خنقتكم بمشاكلى ....بس حبيت اعيد عليكم كلكم




كل سنه وانت طيبين ..




وسنه جديده سعيده على الكل بأذن الله..








33 التعليقات:

احساس طفلة محبة للرومانسية بس واقعية يقول...

سمعت كلمة من واحد اسمة احمد فى برنامج 90 دقيقة قالك المصريين اللى موجودين فى مصر قليلين عجبتنى اوى وكان تفسيرها عندى انالقليلين دول المصريين بجد هم اللى حسين انهم مغتربين فى بلدهم شايفين حاجات كتير غلط ومش قادرين يصلحوها
لانهم عايزين مصر افضل

حمد لله على السلامة نورتى المدونة
و كل سنة وانتى طيبة

دمتى بكل خير
تقبلى مرورى

(Joudy) يقول...

لا متقوليش لإيه ده أنا فضلت أقرر فى الرايدر لحد ما صدقت

حمد الله على السلامة وحشتينا

وبعدين تدويشنا بمشاكل ايه وتخنقينا ايه ده إخنا ما بنصدق انك تيجى وإن كان على التأقلم شوية شوية وكل شئ إن شاء الله هيتعدل

كل سنة وانتى طيبة ويارب تبقى سنة سعيدة عليكى

دمتى بكل الخير والسعادة

shemo يقول...

السلام عليكم...
ازيك يا مخنوقة
الحمدلله ان السنة الجديدة جاية عشان نشوفك ونطمن عليكى
وكل سنة وانتى طيبة والسنادى يارب تكون احسن عليكى وتعرفى باذن الله تتاقلمى كتر مع الناس الى هنا معلش بس هو الجو والتعود
وان شاء الله تحسى بنفسك هنا وترتاحى ........
فى رعاية الله
shemo

ستيته حسب الله الحمش يقول...

كل سنة وانت طيبة
وربنا يبعد عنك الخنقة
يارب السنة الجاية تكون سنة حلوة عليكي

sookra يقول...

يااااااااااااااااه
دا انا ياشيخه مستنياكى من زمان
وحشتينا بجد
كل سنه وانتى بخير

سمكه واحده يقول...

ياااااااااااااااه فينك بس
كل سنه وانتي بخير وسعاده وحب ياستي ربنا يصلحلك الاحوال
متغبيش علينا كده
اهم حاجه تكوني بخير
ومعانا
سنه حلوه ان شاء الله
هابي نيو ييير ياقمر

الجواز و سنينه يقول...

كل سنه و انتى طيبه يا قمر
اما بخصوص احساسك بالغربه
فده شيئ طبيعى حتى لو انتى ماكنتيش مسافره بره طول عمرك
بقت سمه العصر
بصى الزمن بيداوى كل حاجه
و ان شاء الله تبقى 2010 احلى من اللى قبلها
هابى نيو يير يا عم سعيد
تحياتى يا قمر

م/ الحسيني لزومي يقول...

عام سعيد وكل عام انتم بخير
نحن مقبلون علي لحظات حرجه في تاريخ مصرنا
انتخابات مجلس الشعب 2010
انتخابات الرئاسه 2011
هل اعددت نفسك لتقول كلمتك
هل سجلت نفسك في الجداول الانتخابيه
اذا كنت قد سجلت نفسك ادعو غيرك
الحمله الشعبيه للقيد بالجداول الانتخابيه
باقي من الزمن30 يوم

القدر و انا يقول...

مخنوقة
كل سنة وانت طيبة
ويارب 2010 يخفف من خنقتك شوية
ياريت تملئى فراغك لانه والعياذ بالله سبب لمعظم مشاكل العالم
دعواتى وحبى
ويارب دايما منورانا

blue-wave يقول...

يمكن بس علشات اتعودتى على الغربه
عموما ربنا معاكى
وكل سنه وانتى مش مخنوقه

bos bos بسمه عبدالباسط يقول...

حمدالله على سلامتك

وان شاء الله أحساسك ده يروح

هو أكيد فيه كتير مننا حاسس بغربة هنا لاسباب كتيرة بس ان شاء تزول وكل شىء يبقى تمام

هي وظروفها يقول...

اول زياره ليا عندك وحابب أقولكلو عايز ترجعي انتمائك تاني روحتي بيتكم القديم بيت العيله هتفتكر شارعك وصحابك واول حب واول مره ركبتي عجله واول مره حسيتي انك بقيتي بنوته وبتتعاكسي اكيد هتحني لمصر متخليش الللي حاكمنا يدمروا اجمل ما فينا مشاعرنا وحبنا لاهلنا وصحابنا واخواتنا وكل سنه وانتي مصريه وغصب عن التخين انتي مصريه ولا رفيع عادي نمشيها

كفايـة طيبـة يقول...

اولا كل سنة وانتى طيبة وياريت تبقي السنة دي احلى من اللى فات بجد مش كلمة بنرددها وبس
ثانيا بقي اى حاجة فيها كلام عن الغربة بيشدنى عشان كدة شدنى اسمك فى تعليقك على مدونة تانية وقعدت اسال نفسي ايه حكايتك مع الغربة بقي :)
لانى بمر بنفس حالتك بعد الرجوع لمصر
فحاسة اوى اللى انتى بتقوليه ده
مش عارفة ده توهان ولا عدم تأقلم ولا عشان لسة معملناش حياة لينا هنا .... بجد مش عارفة
عالعموم حمدالله على سلامتك لمصر ويارب تقدرى تتأقلمى بعد فترة
اتطمنت شوية لما لقيت حد حاسس بكدة زيي :)
انبسطت انى عرفت مدونتك والله :)

صبرني يارب يقول...

كتبت تعليق نص متر والنت قطع ومش اتنشر

نقول تاني

ما تقلقيش يا جميل ده عادي
انتى عشتى بره فتره كبيره وكمان اتربيتى بره ده احساس عادي

وكويس اوي ان العيال متاقلمين وفعلا عشان هما اطفال

وطبيعى يحبوا احساس العيله وكده كويس المفروض دي حاجه تبسطك

وما تقلقيش ان شاء الله تتاقلمى بس محتاجه منك بس شوية اقبال واصرار على القرار وما تندميش ابدا

وكمان يا حبيبتى انتى عشان لواحدك ربنا يجمعكم على بعض

وربنا معاكي ان شاء الله

واكتبي يا ستى كل الى يجى على بالك احنا موافقين بس تعالى انتى

عبدالله يقول...

كل سنه و انتي طيبه وحمدلله علي السلامه بقالك فتره طويله قوي مش كتبتي حاجه

الغربه احساس صعب مش بيعرف معناه غير الي جربه انه مرادف للاحساس بعدم الانتماء بس زي ما قولتي النهايه الوقت هوا الي بيزرع فيكي معني الوطن

تحياتي

عاشقة القمر يقول...

كل سنه وانتي طيبه
لازم اتأقلم لانها بلدك هي بتحميك
لانك في بلد تانياهتفضل غريبها

هانى زينهم يقول...

اولا انا مديكى عذرك جدا فى حكاية الخنقة دى لان اللى هنا وانا اولهم مش طايق حاجة ومش طايق حد ولولا النت والمدونة دى الواحد كان اشتغل جاسوس ؟! فما بالك بيكى انتى وانت اصلا ما اتعودتيش تعيشى هنا . بس فى نقطة مهمة انتى قلتيها فى كلامك وهى اولادك . تفتكرى هتستحملى ان حد فيهم يحس بمشاعرك دى فى يوم من الايام لو رجه مصر واكيد هيرجع ؟ احنا ما دام خلفنا بنهمش ذواتنا على اد ما نقدر عشان اولادنا وبنستحمل عشانهم حاجات كتير من ضمنها الخنقة دى . اكيد وجودك هنا هيخليكى تدورى على حاجة تشغلك وليكن اولادك ومدارسهم واحوالهم فى الاول زى ما تتنقلى لمكان جديد بتقعدى شوية على ما تطبعى وانتى متعودة على كدة من زمان . قرارك بعدم السفر سليم على الاقل عشان الاولاد . كل سنة وانت طيبة .

أحــوال الهـوي يقول...

شوفي اللي انتي بتقوليه صحيح

الموضوع محتاج منك وقت
و ترجعي علاقتك باصحابك او تتعرفي علي ناس جديده
لان في فترة غيابنا الناس بتاقلم نفسها علي عدم و جودنا و الوقت كفيل باننا نرجع لمكانتنا بينهم تاني

و رتم الحياة في مصر مختلف

اصبري
انا مريت بالموضوع ده قبلك و قدرت اتاقلم مع الوضع
بس بعد 7 سنين اتغربت تاني و مش قادر اعيش في الغربه



تحياتي

أبو العريف يقول...

اولا ازيك يا ست الكل

وكل سنه وانت طيبه

ويارب سنه سعيده عليكي وعلي كل حبايبك

المشكله دي اللي مخوفاني شخصيا

خايف بعد ما اتعودت عالعيشه هنا

واللي انا اصلا مش طايقها

اما ارجع احس بالفراغ ده

عشان كده انا هرجع مصر ومش هرجع هنا تاني

وربنا يوفقك واكيد فتره وهتعدي


تحياتي

aMr tA3LaB يقول...

معلش اصلها بلاد عجيبة وانتي بعيدة قربية وتقربيلي تلاقيها غريبة معلش بتوحشنا واحنا بنره بنرجع لحضنها ترمينا

احلام جوليا يقول...

بجد قلقت عليك رغم انك متعرفنيش لكن انا كنت متبعاك وحسه بك لاني زيك عشت في الغربة وكنت على وشك اني اخد قرار العودة لمصر لكن تراجعت والحمد لله عارفة ليه لاني فهمت حاجة حاولت اشرحها لك لما كنت بتفكري ترجعي المشكلة مش في البلد ولا المكان الولاد حيتاقلموا مع الحركة وحياه الحركة في مصر بس مع الوقت اسمحي لي بيتوهوا في الزحمة وبينسوا اهم انتماء انتماءهم لابوهم لانهم ببساطة مع الوقت بيخلوه يخرج من حياتهم يبقى بس ممول وهو كرجل بياقلم نفسه على بعادهم وبعادك بطريقته طريقة الرجال يقفل قلبه بمفتاح بكل ما فيه لكن انت الي تعبت ولسه حتتعبي عارفة ليه وطنك الحقيقي في قلب الباشا في اي مكان يكون موجود فيه حتتوجد الحياة والوطن لاتكوني عنيدة فقط لتثبتي وجه نظرك وروحي له مش غلط ان الانسان يرجع عن قراره لكن الغلط انك تسيبي المشكلة تتراكم وتتسبب لك وله بالبعاد النفسي عن بعض حاليا لو رجعت حتقدري تداركي فترة الفراق بس كل ما بتبعدووا اكتر حتتغربي عنه اكتر اوعي تسيبي الموضوع لاجل غير مسمى مكانك معاه مطرح ما يكون مش في مصر

MaNoOoSh يقول...

حمدا لله على السلامة
ويارب تلاقى السلام مع نفسك

barbie girl يقول...

طب متدورى على شغل وتملى الفراغ دا وساعتها هتلاقى حاجة تشغلك ومش هيبقى عندك وقت تزهقى

محمد عتلم يقول...

جايز ..الفراااغ ده يتملى بحاجه مع الاياااام...
كلام مش منطقى طبعا يا بنت الغربه
انا حاسس بيكى جدا جدا لأن حياتى تشبه حياتك من حيث النشأه والغربيه والتربيه والعيشه واللى عايشينها واكتر من كده ربنا بيزيح
الموضوع ده معقد جدا ومركب تركيبه منيله بستين نيله ومتخليش الواحد يقول كلام خارج عن ارادته يا حجه ... سيبينى ساكت والنبى
انتى عامله ايه واخبارك الجديده ايه
بتغيبى كتير اوى وبنبقى عايزين نطمن يا حجه مش اكتر
ايام العمر معدوده يا بنت الغربه والعمر قصير جدا والأيام بتفوت هوا
متخليهاش تتملى وتمشى بمزاجها وحسب الظروف . اعملى خطه وامشى عليها وحاولى تستمتعى بالحاجه الموجوده اللى متاحه ليكى وسيبك من الدوشه ووجع الدماغ . ولو مفيش حاجه كويسه عندك حاولى على الأقل تمارسى طقوسك وعاداتك اللى انتى بتحبيها . هوايه مثلا خروج زيارات لأماكن انتى بتحبيها . حاجات انتى كنتى بتحبى تعمليها من ايام الدراسه وبطلتى تعمليها ارجعى اعمليها تانى لو حتى مع نفسك . اسمعى مزيكا مثلا . تأملى فى كل حاجه حواليكى . اقرأى .
انتى ممكن تملى فراغك بأيدك وبشخصيتك طالما قررتى البقاء فى مصر
اعملى مشروع ولو كان صغير الغرض منه انه يشغل مخك وتركيزك

من غير عنـــوان يقول...

إزيك زكل ما عندك
ميزه إن الواحد يغيب ويرجع يلاقيكي لسه مخنوقه

تحياتي

همس الاحباب يقول...

كل سنة وانتى طيبة
سعدت بزيارتك وتواصلك
تحياتى

زهرة(جنى)الاسلام يقول...

السلام عليكم
ندعوكم لمشاركتنا حملة إصلاح الجيل من أجل التحرير .
(حملتنا حملة أفعال مش بس كلام )

ونرجو منكم وضع لوجو الحملة فى المدونة

والتفاعل مع الحملة

ونفع الله بنا وبكم الأسلام والمسلمين
http://forelaqsa20.blogspot.com/

عاشقه الرومانسيه يقول...

فرحت انك لسه فاكرانى يابنت الغربه
وحشتينى قوى ونفسى اشوف بوست جديد على مدونتك
ولو كنتى موجوده فى مصر اتمنى انك تحضرى لقاءالمدونين فى اسكندريه يوم 29 مايو

ابو فارس يقول...

اتمنا ان تقبلي مروري
مدونة ممتازه

تحياتي

ابو فارس يقول...

اتمنا ان تقبلي مروري
مدونة ممتازه

تحياتي

aMr tA3LaB يقول...

اولا اولا يارب يوصلك تعليقي بصي بقا ان مليش في الحجج والكلام ده يعني ايه بقا في غربة والحركات ديه بجد محتاجين نسمع كلامك ونقرا ونتمذج بيه وباسلوبك في الكتابة
الكاتب بيبطل كتابة
لما ايده تنقطع
لما دماغه تتوقف

والحمد لله انتي زي الفل لا ده ولا ده وفي حكاوي كتيير عندك بس بخلانة عليها عموما اسبوع واحد من تعليقي ده لو ملقتش بوست هفجرلك المدونة بالي فيها

E73 يقول...

بسم الله الرحمن الرحيم
السلام عليكم ورحمة الله وبركاته

فينك يا مخنوقة بجد وحشتيني جدًا

يا رب المانع يكون خير

ربنا يهدي سرك ويصلح حالك ويهديكي للخير يارب

بجد وحشتيني ومستنياكي تطمنينا على آخر أخبارك انتي والباشا والأولاد

وإيه أخبار الغربة الداخلية خلصت ولا لسة؟

غير معرف يقول...

بنت الغربه يا جميل
انا مش عارفه انتى بتدخلى المدونه بتاعتك و لا لاء
بس انتى وحشانى كتير
و كل سنه و انتى طيبه
الجواز و سنينه