اوضاع تخنق

انا عارفه انى اتاخرت عليكم فى الكتابه --بس بصراحه انا كنت مخنوقه جدا
اليومين اللى فاتوا ...وماحبتش اخنقكوا معايا...بس هاخنقكوا برضه...
احوال البلد اليومين دول مقلقه جدا..واى حد بيفكر يجى دبى او الامارات عموما
بلاش يجى خالص ...البلد حالها واقف من ساعة انهيار البورصه..
ومعظم الشركات بتمشى الموظفين علشان تقلص المرتبات اللى بتدفعها
وبتخلى ااقل عدد ممكن منهم...
او بتقلل المرتبات النص ..واللى مش عاجبه يمشى....
انا كنت مشغوله جدا الاسبوع اللى فات ..وده بسبب ان المدير بتاعى
مشى زميلتى اللى كانت معايا ..وبقيت انا والاخ الفليبينى..
ده غير ان الاخت الاموره اللى كانت ماسكه التسويق ..ماشيه بعد شهر..
والمدير بسلامته عايزينى امسك التسويق مع التصميم..طب ازاى..؟؟؟؟
ده غير ان الباشا لما عرف كده....
اتخانق معايا ..لانه مش موافق على موضوع التسويق بتاتا البته..
وكان رده كالعاده...(انسى...لا طبعا..ومش عايز مناقشه)
وده معناه اما ..أأقعد فى البيت أو أدور على شغل تانى...والاتنين أصعب من بعض
لانى مش هاعرف الاقى شغل بسهوله اليومين دول...ولو لقيت..مش هيبقى بالمرتب ده ولا بالمواعيد اللى انا تعبت علشان اظبطها مع رجوع الولاد من المدرسه..
واكيد ماينفعش أأقعد فى البيت فى الظروف دى ...صحيح الباشا هو اللى شايل البيت
والمصاريف..بس برضه مرتبى بيسند معاه وبيعمل حاجه...
بصراحه انا مش عارفه اعمل ايه ...بس بادور على شغل ..وربنا يسهل لانى ماقلتش
للمدير انى هاسيب الشغل..وهو ادانى فرصه شهر لغاية لما التانيه تمشى..
علشان اقرر...وطبعا الباشا مافيش فايده من المناقشه معاه فى الموضوع ده..
لانه مقتنع تماما ان كل الستات اللى بيشتغلوا فى التسويق بيتبصلهم بطريقه مش كويسه
وخصوصا فى دبى....
عموما انا مقتنعه ان الشغل ده رزق من عند ربنا ..ولو لى نصيب اشتغل فى مكان تانى
..يبقى ان شاء الله هاشتغل..
بس البلد هنا حالها مايطمنش...حتى الباشا عنده مشاكل فى شغله...وبيفكر لو فضل الحال كده على اخر السنه الدراسيه للولاد ..انه ينزل مصر...
تخيلوا ان حوالى 400.000 واحد مشيوا خلال ال3 شهور اللى فاتوا...
البلد هنا غاليه جدا ..واللى بيقعد فيها لازم يكون مرتبه يغطى مصاريفها ويفيض..
الموضوع ده ضايقنى قوى...صحيح اننا مش هنبتدى من الصفر فى مصر
بس لاأنا ولا الباشا لينا شغل فى مصر..نرجع له ...
يمكن انا اخدت على الغربه....زى الباشا مابيقولى...وبقيت مصر بالنسبه لى
اجازة بس...جايز ..
انا مافتكرش انى قعدت فى مصر اكتر من 8 سنين على بعض فى حياتى كلها
اتولدت فى السعوديه وعشت فيها لغاية مادخلت الجامعه فى مصر..
واتجوزت الباشا وقعدت معاه 3 سنين فى مصر...وبس..
بعد كده ..رحت السعوديه تانى مع الباشا ...وبعدين رحت البحرين..
واخر حاجه دبى من اربع سنين...
ابنى سألنى سؤال غريب...وده لأنى سألته لماما من 20 سنه تقريبا
وهو (ليه ياماما مابتحبيش تعيشى فى مصر )....
ماما كان ردها : ان العيشه فى مصر صعبه...ده من 20 سنه..
وللأسف ده كان ردى على أبنى....دلوقتى بعد 20 سنه ..العيشه فى مصر بقت أصعب..
ده مش معناه انى مابحبش مصر....ابدا والله...انا ماجربتش استقر فيها..
جربت فى الغربه 3 بلاد وماكنتش قلقانه...مش عارفه انا قلقانه ليه من الاستقرار
فى مصر...؟؟ يمكن من حكى اخواتى على المشاكل اللى فيها...
او من اللى باشوفه كل مانزل اجازه...مش عارفه صدقونى...
عموما انا سايباها لربنا..والايام الجايه ربنا يعديها على خير والاقى شغل تانى..
ادعولى....ولو نزلت مصر نهائى اخر السنه ..استنونى فى المطار...
خصوصا صبرنى يارب....ومفروسه...
عموما ربنا يسهل واكون مخنوقه من الباشا بس البوست الجاى..وتكون احوالى احسن.....
مخنوقتكم......مخنوقه جدا...

الباشـــــــــــــــــــــــــــا عيــــــــــــــــــــــــــــــان

ايوة الباشا كان عيان اليومين اللى فاتوا دول


وصدقونى دى اصعب حاجه ان الباشا يعي...البيت كله بيتقلب من فوق لتحت


انا ممكن اعى مش مشكله ....العيال برضه .....لكن سياااادته..؟؟؟؟؟


مشكله كبيييييييره جداااااااااااااااااااااا


بتندرج تحت الكوااارث الطبيعيه


فى معلومه صغيره احب أأقولها ولو انها هتزعل الرجال منى


هى ان الستات اكتر تحمل للألم من الرجاله (حقيقه علميه )


وأكبر دليل على كده هو الحمل والولاده الطبيعيه....اى ست خلفت عيال وربيتهم


اكيد اى ألم من اى مرض تانى عمره ماهيجى زى الم الولاده....


من حوالى 3 ايام كده الباشا رجع من الشغل فى معاده عادى بس من غير الجاكت


انا : ايه ياحبى فين الجاكت... انت مش لابسه ليه ...الدنيا برد..


الباشا : انا حران برد ايه؟؟؟ والجاكت فى العربيه تحت..


انا : حبى الجو برد بره وفيه هواا جامد تحت ..انت كده ممكن تاخد برد..


الباشا : برد ايه اللى انا هاخده ؟؟؟ انا راجل رياضى ..وبعدين انت هتقوليلى ألبس ايه ومالبسش ايه ؟؟؟خليك فى ولادك


طبعا الكلمتين الحلوين دول سكتونى وكتمونى ....


وبعد الاكل دخل اخد شور ولبس التريينينج ...بس من غير اى جاكت طبعا...وقبل شعره ماينشف حتى...


الباشا : انا رايح العب بينج مع كيمو....وجايز اتاخر شويه..


انا : ماشى ياحبى ..براحتك ...بس ممكن تنشف شعرك ...انت هتاخد برد كده...


الباشا : افففففف ....تانى ....انت فاكرانى بيبى صغيير...انا نازل ....اوروفوااار


والله انا احترت مع الباشا ...انا متأكده انه هياخد برد كده ...بس هو عنييييييد جدا ...انا مش عارفه ايه الغلط فى اللى انا قلته ؟؟؟؟؟


حد يفهمنى؟؟؟؟؟؟؟؟؟؟؟؟؟؟؟؟؟


وبعد ساعتين لقيت الباشا راجع....وحالته صعبه ..عماال يكح ويعطس.....ولابس الجاكت...........


انا : حمدالله على السلامه ياحبى....مين اللى كسب انت ولا كيمو ؟؟؟؟


الباشا (وهو مش عارف يتكلم من الكحه ) : متعادلين ....مخنوقه قومى اعمليلى ينسون احسن الظاهر ان داخلى برد


طبعا ماتكلمتش خااالص ..وقمت عملتله ينسون ..وشربه وبرضه ماتحسنش....وبعدها بساعه دخل نام


بس طول الليل مش عارف ينام من الكحه والعطس.....قمت اديتله حبيتين بنادول ..نيموه لغاية الصبح


وأول مرة من فترة طويلــــــــــــــــــــــــــــــــــه أأقوم من النوم من غير المخده ماتنضرب فى وشى


انا : حبى انت لسه نايم ؟؟؟؟انت أتأخرت على الشغل.....يانهار ابيض انت سخن جدا....


الباشا : انا هاقوم ...هاتيلى حبيتين بنادول عقبال ماخد شور ...علشان اعرف اروح الشغل.


انا : شغل ايه ؟؟؟؟؟ حبى انت درجة حرارتك عاليه قوى ...بلاش شغل النهارده ..وانا كمان مش هاروح


الباشا : انت حره تروحى ماتروحيش شغلك مش هيحصله حاجه ..لكن انا الشغل مايمشيش من غيرى ؟؟انت فاكرانى زيك؟؟؟

انا : تقدر تقولى هتسوق ازاى وانت تعبان كده؟؟وأيه المشكله لما تاخد النهارده اجازه؟؟

الباشا :مالكيش دعوة أنا بقالى 20 سنه باسوق.....هى السواقه مشكله؟؟؟

راح شغله وانا كمان رحت شغلى والولاد راحوا المدرسه ...وعلى الساعه 10.30 الباشا كلمنى ...

الباشا : مخنوقه ..روحى البيت علشان انا تعبان جدا ومش شايف قدامى ...البرد زاد على قوى..

انا : طيب بلاش تسوق وخلى حد من أصحابك يوصلك...وانا مروحه حالا...

الباشا : لأ طبعا ...انا كويس ..وهاروح لوحدى...

طبعا روحت البيت قبله ...وقعدت مستنيه وقلقانه ..وجه بعد ساعه حالته وحشه جدا ...واترمى على السرير ومش قادر حتى يغير هدومه

ولقيت درجة حرارته عاليه جدا...اديته خافض حراره وقعدت اعمله كمادات لغاية ماعرف ينام شويه ..ونزلت جبتله انتى بيوتك ..

وحاجات للبيت علشان اعمله غداا مخصوص لسيادته..

الباشا : انت فين ده كله انت مش عارفه انى تعبان قوى؟؟؟؟بقالك ساعه بره..

انا : حبى انا بقالى نص ساعه بس ..وبعدين انا مانزلتش غير لما اطمنت عليك انك نمت اخيرا..وحرارتك بقت كويسه

وبعدين انت مافطرتش ...ومش عايز تاكل يبقى لازم اعملك شوربه....وجبتلك انتى بيوتك ..

الباشا : المفروض ماتنزليش وتسيبى جوزك عيان ومحتاج اللى يراعيه ..

انا : طيب ياحبى حقك على ...تحب اعملك ينسون ولا تفطر الاول

الباشا : انا ماليش نفس افطر ..ادينى الانتى بيوتك الاول

انا : حبى لازم تفطر الاول ...هتاخد الدواا كده من غير فطاار؟؟؟

الباشا : مانا اصلى مش متجوز ....لو كنت متجوز كانت مراتى عملتلى فطار مش تنزل وتسيبنى..

انا : تانى ؟؟؟؟حقك على ياحبى ...عايز تفطر ايه؟؟؟

الباشا : انا مش هاقدر اكل حاجه ناشفه ...اعمليلى شوربه...لحمه مش فرااخ..

طبعا دخلت المطبخ وانا هاطق من الخنقه ...بس عملت له شوربه وحطيت له الاكل...

الباشا : بقالك ساعه بتعملى شوربه؟؟؟ ليه يعنى؟؟؟ اصلك مش حاسه انا تعبان قد ايه...

انا : حبى انا متاخرتش كتيير ..انت كنت عايز شوربة لحمه ودى اخدت نص ساعه ...عادى يعنى..

الباشا : ومالها سخنه كده ليه ؟؟؟؟مش تبرديها شويه

قعدت ابردهاله شويه واكلته علشان هو مش قادر ياكل لوحده زى مابيقول...واديته الدواا ...وخافض حرارة وعملتله كمادات تانى

ونااام ....فضلت قاعده جنبه لغاية ماتأكدت انه ناام ..وقمت اروق البيت واحضر اكل الاولاد...

الولاد رجعوا من المدرسه ...ودخلوا بيكلمونى كلهم مع بعض كالعاده...وانا بحاول اهديهم علشان ابوهم ناايم ..لكن الصغير لما عرف ان ابوه هنا ..جرى عليه وباسه..

وده قام من النوم بيتخانق ويزعق ..هديته وخدت الولاد بره وقفلت عليه الباب...علشان الدوشه ....

الباشا : مخنووووووووووووقه ......انت فين ؟؟؟

انا : ايوة ياحبى .. انا هنا ..عايز حاجه ؟؟؟؟

الباشا : انت بتقفلى على الباب ؟؟؟ايه خلاص مت ؟؟؟بتسيبينى لوحدى وتقفلى الباب؟؟؟

انا : لا ياحبى بعد الشر ..انا مش عايزه الولاد يعملولك ازعاج...

الباشا : طبعا مانت مش حاسه انا تعبان قد ايه ؟؟؟ وبتسيبينى لوحدى ...اتحرق مش مشكله..

انا : لا ياحبى انا هاقعد جنبك ماتزعلش ...بس ممكن تستنى لما أأكل الولاد الاول؟؟؟

الباشا : هم صغيرين ؟؟؟ مايكلوا لوحدهم ...طب ماتتأخريش....

وفضلنا على الحال ده طول النهار ...وماعرفتش حتى اذاكر للولاد ...وباحاول اسكتهم بأى طريقه ...وشويه اروح أأقعد مع الباشا

وشويه أروح للولاد ....(المهم أنا مش باعمل أى حاجه للباشا ..بقعد جنبه وخلاص ..بس مايقعدش لوحده وهو عيان )

لغاية الساعه 8 معاد دواا الباشا ...اخد الدواا ولقيت كيمو جه علشان يطمن عليه ...

كيمو : ايه ياعم انت عجزت ولا ايه؟؟؟شوية برد يعملوا فيك كده ؟؟؟ يالا قوم تعالى نروح القهوة نشيش..

انا : شيشة ايه ياكيمو ده عنده احتقان فى الزور...وبعدين يخرج ايه ده تعبان ...

كيمو : ههههههه هو الراجل علشان عيان هتتحكمى فيه ولا ايه يامخنوقه...هتكتفيه فى السرير ولا ايه ؟؟؟

الباشا : لأ طبعا ...تتحكم ايه ؟؟؟ انا هالبس فى 5 دقايق انا بقيت كويس خلاص...حضرى لى لبس يامخنوقه...

انا (فى سرى ) : طيب ياكيمو ..بقى كده بتقوم الباشا على ؟؟؟؟ليك ست يترد عليها ...اما نيمتك النهارده على الكنبه فى الصاله

مابقاش انا مخنوقه ....

المهم خرجوا وانا كلمت بيبه وحكيت لها على موضوع المظاهرات الرايقه دى ..وبعتيلها الايميل علشان تشوفه..وحكيتلها جوزها عمل ايه

بيبه : نهاره ..... هى دى بقى المظاهرات اللى توجع القلب؟؟؟ طيب انا اللى هاوجع قلبه النهارده ...

انا : بلاش يابيبه كبرى دماغك ....ايه ياعنى لما يكتب (جتنا نيله فى حظنا الهباب )...

بيبه : ايه يعنى ؟؟؟؟؟ خلى الدماغ الكبيرة ليكى ...انا هافرجه ....

انا : بس كده هايعرف انى انا اللى بعتلك الايميل ...والباشا هيعرف انى شفته ...

بيبه : اه صحيح ...طب اعمل ايه ؟؟؟

انا : بسيطه ..افتحى الملف بتاع (تهريج )اللى هو عامله ..واعملى ملف جديد جواه..وسميه (مظاهرات رايقه)..وانسخى الصور كلها

وحطيهم فيه ...واعملى نفسك انك كنت تتفرجى على ملف (تهريج ) ولقتيهم بالصدفه..

بيبه : يعنى هو مش هايعرف اتعمل امتى الملف ده ؟؟؟

انا : طبعا ممكن يعرف ..بس خليك ذكيه وسريعه ...ازعلى و اتنرفزى وامسحيه ..وبسرعه فضى الRecycle bin

وكده مش هايلحق يعرف اتعمل امتى ..وهايفتكر انه هو اللى كان ناسيه....وتبقى لبسته رسمى..

( اى خدمه ياكيمو ....انا بس باحب اهدى النفوس - من اعمالكم ..سلط عليكم )

وبصراحه هو يستاهل اكتر من كده وهاكملكم ليه؟؟؟

بعد ساعه ونص لقيت الباشا وكيمو راجعين ...والباشا حالته أسوأ من الأول وبدأ يرجع.....وتعبان جدا..

انا : ايه اللى حصل ياكيمو ؟؟؟ ده كان كويس لما خرجتم ..

كيمو : مش عارف احنا شيشنا الأول وبعد كده رحت أكلته لحمة راس فى عجمان....

انا : أكلته ايه ؟؟؟؟ ده الباشا عمره مأكلها....وليه تروحوا عجمان أصلا...ومطعم ايه ده اللى بيعمل لحمة راس هنا ؟؟؟

الباشا : انا تعبان جدا ولازم اروح المستشفى..

طبعا مش عايزة أأولكم كان نفسى أعمل أيه فى كيمو....وبسرعه لبست وأخدت الباشا على الطوارئ...

وكيمو قاعد ساكت ومستغرب ليه انا زعقت له كده ...دى مخنوقه عمرها مكان ليها صوت اصلا...

المهم بعد الدكتور ماكشف عليه ..وعرف أكل ايه ...سأل كيمو ..

الدكتور : انت كمان اكلت من نفس الأكل ؟؟؟ وماحصلكش حاجه..

كيمو : ايوة أكلت معاه ..وماحصلش حاجه ...ليه ؟؟؟ هو انا هايحصلى زيه ؟؟؟

الدكتور : لا مش ضرورى ..بس لو حصل ياريت ترجعلى ..مدام مخنوقه ..انت لسه متجوزين جديد ؟؟؟

انا : لا طبعا يادكتور بقالنا 12 سنه ..ليه ؟؟

الدكتور : يظهر ان الباشا حب يدلع عليك شويه ...الموضوع انه عنده برد فى المعده ..وماستحملش الأكل ده ..

فرجع ..انا هاديله الدواا ده وياريت ياكل شوربه بس لمدة يومين مع حاجات خفيفه..

انا : يعنى نروح ؟؟ هو مش محتاج يبات هنا ولا حاجه ؟؟؟

الدكتور : لا الموضوع مش مستاهل ..هو هيبقى عنده شويه ارتفاع فى الحرارة ..والدواا والكمدات هتنزلها وخلاص ..

بكره ان شاء الله هيكون كويس..

روحنا البيت وانا بصراحه تعبانه جدا من اليوم المتعب الغريب ده ....وكيمو روح لمصيره ...(اللى يستاهله )...

وقعدت اعمل كمادات للباشا واديته الدواا لغاية لما أخيرا نااام ..وحرارته بقت عاديه ..

وتانى يوم برضه صحيت من غير المخده ....ياسلاااااااااااام ..احساس جميل كنت مفتقدااه ...ولقيت الباشا لسه نايم

سيبته وكلمت الشغل اللى شكلى هاترفد منه ..واخدت أجازه تانى ...بس المرة دى بالخصم ...مش مشكله ..الباشا اهم ..

عملتله فطار خفيف وقومته وفطرته واديته الدوااا ..والحمد لله بقى احسن ..

انا : اخبارك ايه النهارده ياحبى ؟؟ مش أحسن ؟؟

الباشا : لسه تعبان ..انا مش عارف ليه جرى لى كل ده ؟؟؟اشمعنى انت مابيحصلكيش كده ؟؟؟

انا : حرام عليك ياراجل ..انت عايزنى اعى ليه ؟؟؟طيب مين اللى هياخد باله منى لو جرى لى حاجه ؟؟؟

ومن ولادك ومنك انت كمان ؟؟؟ هو انا قصرت معاك فى حاجه ؟؟؟

الباشا : (كح كح كح ) انا لازم ابطل الشيشه ..

انا : وانت الصادق لازم تبطل كيمو...

الباشا : نعم انت هتدخلى فى اصحابى كمان ؟؟؟ هو يعنى كيمو عمل ايه ؟؟تقدرى تبطلى بيبه انت كمان ؟؟

وفجاة الموبيل رن والأستاذ كيمو بيطمن على الباشا .وفهمت من الكلام انه اتخانق خناقه رايقه جدا امبارح

وحكى للباشا على السبب وانه الظاهر نسى يمسح الصور من على الكمبيوتر ...بس للأسف نام فى اوضة العيال..

مش مهم ..المهم انى نكدت عليه ..زى مانكد على امبارح ...

انا : خير ياحبى كيمو زعلان ليه ؟؟فى حاجه ؟؟

الباشا : صاحبتك بيبه مخها طاقق - اتخانقت معاه علشان صور هايفه ..

انا : صور ايه دى ؟؟؟

الباشا : هاتى اللاب توب وانا اوريهالك ...

جبتلوا اللاب وفرجنى على الصور بس طبعا مش على التعليق بتاع كيمو ...

انا : اه دى صور مظاهرات عاديه ...مالها ؟؟دى حتى قديمه قوى ..

الباشا : مش كده ؟؟ شفتى انت مخك كبير ازاى ؟؟فهمى صاحبتك تكبر مخها هى كمان ...

انا مش عارفه هافضل مكبره دماغى كده لغاية امتى ؟؟؟ احتمال دماغى تفرقع من كبرها ...بس كيمو يستاهل ...

المهم كلمت بيبه ..وقلتلها تهدى اللعب مع كيمو ...والموضوع اتحل ..

وتانى يوم .....صحيت على .....طرااااااااااااااااااااااااااااااااااااااااخ بالمخده فى وشى.....الحمد لله

البـــــــــــــــــــــــــاشــــــــــــــــــــــا خف من البرد.......

ورجع يخنق كالعاده زى كل يوم.......

مخنوقتكم : مخنوقه جدا

مظاهرات تخنق

دى صورة من صور المظاهرات فى مصر .......... شايفين الظابط بيزق الناس ازاى ............ولا كأنه بيلعب رياضه

انا مش عارفه الناس ذنبها ايه تتهزأ وتتهان كده لمجرد انهم عاملين مظاهرة سلميه احتجاجيه على وضعنا الميؤوس منه؟

ايوة ميؤووووووس منه للأسف...كلنا عبد المأمور.....والمأمور بيقولك ...اخرس واسكت ماتتكلمش....كل ونام بس....

وارضى بالأمر الواقع ...يعنى صوتك هيعمل حاجه؟؟؟؟؟؟

الخنقه النهارده تخنق بجد ...لو حد ضغطه عالى او عنده القلب بلاش يقراها.....اللهم قد بلغت...........

الخنقه بدأت واحنا الأربعه (انا والباشا وكيمو وبيبه ) سهرانين يوم الخميس اللى فات فى فندق فى البحرين

والباشا وكيمو بيلعبوا طاوله .....وانا وبيبه بنتفرج على نشرة الاخبار...........

الباشا : ايه اللى انت جايباه ده يامخنوقه ؟؟؟الاخبار ؟؟ شوفيلنا حاجه تانيه نتفرج عليها

انا :لا طبعا انا عايزة اشوف ايه اللى بيحصل فى غزة - الوضع سيئ جدا هناك

بيبه: كله من ولاد ال......... الامريكان اللى سايبين اليهود يدبحوا فى اهل غزه

انا :وليه جايبه الغلط على الامريكان بس ؟؟؟امال احنا فين؟؟؟؟

بيبه : معاك حق شفتى ازاى الوزيرة بتاعتهم كانت عندنا وتانى يوم يضربوا غزة

منظرنا كان زى ال.........قدام العالم كله

انا : وليه ماتقوليش ان ده مخطط كله علشان يوقعوا مصر مع الدول العربيه..ويخلونا

احنا المسؤولين قدام اهل غزة على اساس ان الوزيرة بتاعتهم كانت عندنا واكيد

اداتنا فكرة انهم هايضربوا غزة تانى يوم.....نظام فرق تسد....

بيبه : جايز يكون اللى بتقوليه ده صح ....بس برضه احنا لازم نحارب معاهم ولازم مصر تعمل حاجه

انا : اشمعنى مصر بس هى اللى اهلها لازم يحاربوا ؟؟؟؟ليه مش كل الدول العربيه؟؟

كل دوله تبعت جيش من عندها ..ونسميها الجيوش العربيه...زى ماعملنا مع الكويت

ولا علشان الكويت كانت بتدفع فلوس كتيرة؟؟؟؟؟

طب هم العرب ناقصهم فلوس؟؟؟؟شوفى اللى بيدفع للمطربات علشان يغنوا فى حفله ..او

للراقصات علشان يرقصوا فى عيد ميلاد مثلا....او اى حاجه تانيه .....................

بيبه : لا بس مصر وضعها مختلف ....لانها هى اللى كانت دايما فى الصدارة فى الازمات اللى

بين الفلسطينين واليهود.... ومافيش دوله تانيه كانت بتتدخل زى مصر...

انا :ماشى ياستى مصر ام الدنيا ..بس مصر مش ناقصه حروب...اهلها مطحونين من جوه وبيحاربوا علشان

لقمة العيش كل يوم.....وفى ناس فى دول تانيه مش عارفه تصرف الفلوس فين؟؟؟؟؟

انا ماقولتش نسيب اهل غزة ومانعملش حاجه ...انا راى كلنا نعمل حاجه مش مصر بس

بيبه : طب الدنيا كلها مقلوبه على مصر ليه ؟؟؟؟؟؟ ليه مصر ماتفتحش المعابر مع غزة؟؟؟

انا : يعنى هو فتح المعابر هو اللى هايحل المشكله ؟؟؟ واليهود هايبطلوا ضرب فى غزة؟؟؟

الموضوع عايز وقفه جامده من كل العرب علشان الضرب يقف....

مش بس نشجب وندين ونتنيل........و......

وفجأة لقيت الباشا قام واخد منى الريموت كنترول وقلب القناه وجاب ميلودى عربى

الباشا : شايف ياكيمو الستات عامله ازاى ؟؟؟؟؟ مش زى الرجاله اللى عندنا؟؟؟

انا وبيبه (فى صوت واحد ) : رجاااااااااااااااااااااااااله؟؟؟؟؟؟؟؟؟؟؟؟؟؟؟

الباشا : اه طبعا امال ايه ؟؟ هى الست لما تتكلم زيكم كده فى السياسه تبقى ايه ؟؟؟

راااااااااااااجل طبعا وبشنبات كمان هههههههههههههههه

انا : هى الست ماتبقاش ست لو اتكلمت فى السياسه وقالت رأيها؟؟؟؟ ده ينقص من انوثتها فى ايه؟؟؟؟

الباشا : كتيييييييييييييييييييير قوى ..... عمرك شفتى ست حلوة بتتكلم فى السياسه؟؟؟؟

كلهم ستات ................. ولاواحده فيهم عدله...الستات دول لو كانوا حلوين مكانوش وجعوا دماغهم فى حوارات

السياسه دى علشان يلفتوا الانظار ليهم ..........

كيمو : اه صحيح عمرك شفت نانسى ولا اليسا ولا هيفااء بيتكلموا فى السياسه؟؟؟؟؟

بيبه : والنبى تسكت انت ....طبعا مين هيشهدلهم غيرك ؟؟؟؟؟؟؟؟

انا : يعنى انت رأيك الست الحلوة هى اللى تبقى حلوة وتسكت وخلاص مش مهم مخها ايه ؟؟؟؟

الباشا : ايوة طبعا ...الست يعنى انوثه ....مش مخ ...ولا سياسه...

انا : معنى كده اننا بنرجع لورااا ...الست تقعد مالهاش دعوة بالدنيا واللى فيها ...كفايه انها حلوة وخلاص

البنات والسيدات دلوقتى بينزلو فى المظاهرات واحيانا هم اللى بيعملوها.....

الباشا : اتحداكى لو واحده فيهم كانت حلوة ...او شايفه نفسها حلوة.....طبعا هتخاف على نفسها

حد يضايقها او يتحرش بيها.....

انا : طب مالمظاهرات ماليه لبنان ......وكل بناتها تقريبا حلوين...ودايما بيخرجوا فى المظاهرات

كيمو : اه صحيح بس مظاهرات عن مظاهرات تقرق.....ابقى فكرنى ياباشا ابعتلك ايميل مهم

عن المظاهرات دى ...

بيبه : ايميل ايه ده ؟؟؟

كيمو : ده ايميل قديم عن مظاهرات علشان حزب الله ...جاجات توجع القلب ..ربنا يكون فى عونهم

بس والموضوع اتقفل على كده وانا طبعا طبعا مش مقتنعه بتاتا البته برأى الباشا...............

ورجعنا دبى فجر السبت ...ويومها بالليل الباشا كان قاعد على اللاب توب كالعاده .....

وفجأة رن الموبيل بتاعه ....

الباشا : ايوة ياكيمو نازلك حالا ..بس باحمل الايميل اللى انت بعتهولى.....

مخنوقه ...ان مضطر انزل ..لما الايميل يتحمل على الكمبيوتر اطفيه واشحنيه ..اوك

انا : حاضر ..

الباشا : وبلاش ارجع الاقيك لسه بتتفرجى على الاخبار....بلاش نكد...

انا : حاضر ياحبى ...هتلاقينى باتفرج على قناة هى او سيتيرس او ميلودى ..اى حاجه رايقه كده....

المهم نزل وانا هاطق من الخنقه ...حتى القنوات هينقيلى اتفرج على ايه؟؟؟؟؟؟؟؟؟؟؟؟

المهم الايميل اتحمل على اللاب ..وطبعا قلت لما افتحه واشوف ايه حكاية المظاهرات اللى توجع القلب دى

على راى كيمو ..............وياريتنى ماشفت .........

واستاذ كيمو الخنيييييييييييييييق كاتب فى اخر الايميل (جتنا نيله فى حظنا الهباب )

بالذمه لى حق اتخنق ولا لأ...............فعلا مظاهرات توجع القلب .....جالك وجع فى قلبك انت والباشا....

ياربى هو انا لو جرى لى حاجه من الخنقه ....ذنبى هيبقى فى رقبة الباشا وكيمو .............

مخنوقه جدا جدا

كل سنه وانتم طيبين

النهارده مفيش خنقه -هو فيه بس هاحكيلكم عليها السنه الجايه -انا حبيت اعيد عليكم بس

يارب السنه الجايه تبقى احسن من السنه اللى فاتت عليكم كلكم......................وعلى انا كمان وتكون ااقل خنقه

ويارب اللى كان مزعل حد السنه اللى فاتت يايصالحه.................يايفضها سيرة ومايوجعش دماغنا...............

تحياتى ليكم كلكم وكل سنه وانتم طيبين

HAPPY NEW YEAR

بيبه الجديده ---- حلوه لكن عجيبه

انا كنت ناويه اكتب البوست ده من 5 ايام بس السيرفر بتاع النت كان فى مشكله كبيييره هنا فى دبى

معرفش اخبار النت كان عندكم فى مصر ايه؟

وبما انى باكتب لكم .......... يبقى اكيد فيه خنقه...........عادى يعنى ......بس مش من الباشا.....

يوم الاربع الى فات كنت خلاص باجهز الاولاد للنوم ..وفجاه اتصلت بيبه....

بيبه : مخنوقه هو انت لازم تروحى الشغل بكره

انا: ايوه ...ليه فى حاجه؟؟

بيبه : اصلى هاروح افك بقية الغرز بكره .. وكيمو مش فاضى يودينى وطلب من اخته تودينى

وانت عارفه انى باعتبرها فى مقام ضرتى بالضبط....

انا : طيب ياحبيبتى ماتزعليش ..انا اصلا عندى برد جامد ومش راضى يخف ممكن اخد بكره مرضى

انت عايزانى اعدى عليك الساعه كام ؟؟

بيبه : ربنا يخليك ..انا هاكون جاهزه الساعه 11 وطبعا اخت كيمو هتقابلنا هناك

انا : ماشى ياجميل هاعدى عليك بالعربيه بس مش هاطلع ...اوك

وتانى يوم اخدت اجازه .. وربنا يستر وماتتخصمش من المرتب ..وعديت على بيبه

والبرد كان مموتنى علشان كده اخدت انتى بيوتك ومالحقتش افطر ولا اى حاجه ونزلت

بسرعه لانى اتأخرت على بيبه - لقيت عربية اخت كيمو واقفه ...وانا بصراحه مش

باستلطف اخت كيمو خاالص .. بس نزلت وسلمت عليه

اخت كيمو : ازيك يامخنوقه ..انت عندك برد ولا ايه

انا : ايوه برد جامد شويه - انت عامله ايه واخبار شغلك ايه؟

اخت كيمو (بعد مابعدت عنى شويه): الحمد لله ...رنى لصاحبتك خليها تنزل هو

احنا تحت امرها ولا ايه؟

انا: طيب خلاص رنتلها ..لو انت مستعجله روحى وانا هاوديها للدكتور

اخت كيمو : لاعلى ايه بعدين تقول لكيمو اختك سابتنى وصاحبتى هى اللى وديتنى للدكتور

انا بصراحه اتخنقت منها على الصبح كده ..وطنشت كلامها التقيل قوى ده ونزلت بيبه وركبت معايا

بس انا قلتلها تركب مع اخت كيمو علشان ماتزعلش وانا هاجى وراهم

ووصلنا المستشفى كلنا وطبعا الدكتوور الرايق لسه ماجاش... وبعد ساعه وصل بسلامته والضحكه

على وشه وبيسألنا

الدكتور : اهلا اهلا انت بقالكم كتير

انا : تقريبا ساعه وشويه

الدكتور : مش كتير قوى ههههههه -- ياله يامدام بيبه علشان نشيل بقية الغرز

بيبه : مخنوقه تعالى معايا انا مش عايزه افكها لوحدى انت عارفانى جبانه

اخت كيمو : كلنا هنيجى معاك يابيبه علشان نتفرج على فك الغرز (بغلاسه متناهيه)

وطبعا كاننا رايحين حفله دخلنا اوضة الكشف مع الدكتور والنييرس وانا وبيبه واخت كيمو

(زحمه قوى)من غير مناسبه

المهم فك الغرز لبيبه وشال الشاش كله و.....بيبه مش مصدقه نفسها من الفرحه

بيبه القديمه مش موجود منها غير وشها بس..........كل حاجه تانيه اتغيرت....فعلا

عمليات التجميل دى بتعمل البدع ....بيبه مش قادره تبطل بص فى المرايه الى فى العياده

وطبعا اخت كيمو كمان عماله تبصلها بغل شويتين كده

الدكتور : ايه رايك يامدام مخنوقه ؟؟....مش هتفكرى انت كمان تعملى حاجه

انا: لا يادكتور انا الحمد لله عجبانى خلقة ربنا

الدكتور : مقلناش حاجه ياستى بس برضه فى شوية دوفهات كده مطرح الحمل والولاده

انا ( بصيت فى المرايه وبعدين بصتله ) :الدوفهات دى عاجبانى قوى واهى برضه حاجه تدفى فى البرد

اللى ضايقنى قوى انه خلانى ابص فى المرايه وخلانى شكيت فى ثقتى فى نفسى ..دى الطريقه الى

بيصطادوا بيها الدكاتره زباين لعمليات التجميل.. لانهم بياخدو نسبه على كل عمليه يعملوها وكل

زبون يدخلوه المستشفى غير اجرة ايده وغير مرتبه (اللهم لاحسد )

الدكتور : عموما لوفكرتى انت عارفه مكانى وده الكارت بتاعى

اخت كيمو : طب وانا يادكتور انت مش شايف فى حاجه ولا ايه

الدكتور : يعنى فى شوية دوفهات هنا وهنا وشويه هنا ومحتاجه تصغيير للمناخير شويه

اخدت بيبه وخرجنا من الاوضه وسبت اخت كيمو تتفق معاه على عمرة كامله ليها...المهم ان بيبه كويسه

وفرحانه قوى و....انا بدأت اجووع قوى..لانى ماكنتش فطرت خالص

خرجنا كلنا ورحنا مول قريب من المستشفى وفطرنا وبعدين لاحظت ان الناس بتتفرج علينا ..وعلى

بيبه بالذات وانا مش عارفه فى ايه لغاية ماخدت بالى وقلتلها فى ودنها علشان

اخت كيمو ماتسمعناش وتعملها مشكله بعد كده

انا : بيبه ياحبيبتى انت مش ملاحظه ان هدومك بقت ضيقه عليك شويه من تحت و

شويتين تلاته من فوق؟؟

بيبه : اه صحيح انا لازم اجيب هدوم جديده ...اممممممممممم دلوقتى

انا : ماشى قومى مع اخت كيمو هاتى اى حاجه دلوقتى وانا هابقى الف معاك يوم

يوم تانى احسن انا البرد تاعبنى قوى

بيبه : اوك انا معايا الكردت كارد بتاع كيمو وهاشترى بيه وانت هتعملى ايه؟

انا : انا هاقعد على النت شويه فى الكافيه لغاية ماتخلصى ....اوك

المهم قامت مع اخت كيمو وانا قعدت ارد على تعليقاتكم على البوست اللى فات ...والحمد لله البرد راح شويه وفقت حبتين

بعد ساعة ونص تقريبا لقيت بيبه راجعه وشها مقلوب و شكلها هاتطق من الغيظ وتقريبا ماشترتش غير بلوزه

ولقيت اخت كيمو بتسلم على وماشيه علشان ولادها ....وطبعا انا قعدت مع بيبه علشان اعرف فى ايه

بيبه : انا اتخنقت من الوليه دى كل مانقى حاجه تقولى غاليه او مش سنك او وحشه ...هى مالها ومالى بالضبط؟

انا : طب ماتزعليش انا هاقوم الف معاكى ..انا بقيت كويسه والحمد لله

و.....ياريتنى ماقلتلها كده ....قعدنا نلف فى المول من اوله لاخره واشترت حاجات كتيرة والساعه بقت 3

وانا ولادى بيرجعوا 3.30 يعنى يادوب الحق اروح البيت

انا : كفايه كده يابيبه علشان الاولاد زمانهم راجعين البيت ومفيش حد غيرى يفتحلهم

بيبه : طب خلاص انا عندى فكره ايه رايك نعدى نجيب ولادك وبعدين ولادى ونروح مول الامارات

انا : ايه ؟؟ ليه يابنتى ما كفايه شوبينج كده النهارده --وبعدين مول الامارات ده بعييد قوى عن هنا دى لفه

جامده قوى وزحمه كمان

بيبه : متبقيش وحشه يامخنوقه انا بصراحه عايزة اخلص ام الكرديت كارد بتاع كيمو وهاخلص يعنى هاخلصه

انا : انت عايزه تخلصى 5000 درهم فى يوم واحد ليه ؟؟؟؟؟؟؟؟؟ انت اتجننتى؟؟؟؟؟؟؟

بيبه : هاقولك بعدين لما اخلصه

انا مش عارفه الدكتور عملها العمليه فى جسمها بس ولا دخل كمان على صواميل مخها؟؟؟ البت اتجننت تماما

ومش عارفه اقنعها ...وامرى لله رحت جبت ولادى وبعدين عديت جبت ولادها والشغاله طبعا... والعربيه

ماقولكوش شكلها بقى عامل ازاى..........عربيتى صغيرة وهاتش باك -ونص عمر كمان..............

ومعايا 6 عيال وبيبه والشغاله ..(متخيلين المنظر )..ده غير السواقه فى عز الزحمه ..مع دوشة العيال

بصراحه ..العربيه صعبت عليا .....

المهم وصلنا المول بعد عذاب وطبعا العيال كانوا جعانين فغديناهم الاول وسيبناهم فى البلاى كورد مع

الشغاله ...وطبعا معاها موبيل علشان الطوارئ لان دول 6 عيال على شغاله واحده (ربنا يكون فى عونها )

ولفيت مع بيبه وبرضه نازله شوبينج كتييير ...والكارد مش راضى يخلص علشان حظها الحلو كان فيه

sale فى المول كله ...وعديت ساعتين ... وانا تعبت قوى والشغاله كلمتنا مرتين .. والبرد رجع تانى اكتر

من الاول وخلاص عينى احمرت من التعب ...وبرضه لسه بيبه بتقيس وتجرب وتلف وتشترى .....

المهم الباشا كلمنى

الباشا : انت فين ده كله ؟؟لسه مع بيبه ؟؟

انا : ايوه بس انا تعبانه قوى ..البرد مبهدلنى.. احنا فى الامارات مول

الباشا : ايه اللى وداكم هناك كده ؟؟ ده زحمه قوى ...طيب انا هاعدى على كيمو وهاقبالكم هناك

انا : ياريت بسرعه لانى خلاص تعبت وعايزه اروح

الباشا : انسى بسرعه دى ده انا قدامى ساعه عقبال ماجى انا وكيمو ...وكمان لسه هانتغدى

طبعا الكلام نزل على زى الدش الساقع قوى لانى كان نفسى اروح البيت واخد البطانيه فى حضنى واناااام

بس بيبه لسه ماخلصتش ...والعيال زهقواا قوى ..

بيبه : على فكره كيمو كلمنى وقال انه جاى هو والباشا كمان ساعه ..يعنى قدامنا وقت لسه ..

انا (وصوتى مش طالع من التعب ): هو لسه فاضل حاجه فى الكارد

بيبه : ده كارد محجب مش راضى يخلص فاضل لسه الف ونص

انا : طب ياحبيبتى كفايه كده انا تعبت نكمل يوم تانى ..واوعدك انى هاوديك مول تانى يخلص على ام الكارد

بيبه : انسى انا مش مروحه غير لما اخلصه

انا : يابنتى كيمو هايزعل منك وممكن يتخانق معاكى

بيبه : ماتخافيش عليا ... وخليه يزعل شويه ..جايز يحس هو زعلنى قد ايه ...وتانى مره لما تيجى اليسا او غيرها

تبوسه يبقى يفتكر ان يقولها انه مابيتباسش غير من مراته......

مش بقولكم البت اتجننت...يعنى هو ده الى هايمنع كيمو من انه يتباس او يتنيل...لو خوفه من ربنا مامنعهوش ..

يبقى عمر الفلوس ماهتمنعه...... ربنا يهدى....

وفجاتن الباشا كلمنى...

الباشا : انا مش هاعرف ااجى لان فى حادثه على طريق الامارات فى المرواح ..لكن الرجوع سالك ارجعى لوحدك

وانا هاروح اتغدى مع كيمو وهاقبلك عند بيته ....

يانهار طحححححححححن .......هى كده كملت ...........واخدت بيبه والعيال والشغاله تانى فى العربيه ....بس المرة دى

كنت بانهار من التعب ..والعيال اتخانقوا مع بعض ...والسكه زحمهههههههههههه ............عملت غرز كتيرة بالعربيه

علشان اخلص من الزحمه واروح...برضه مافيش فايده والزحمه مابتخلصش....وفجاتن ابن بيبه عايز بيبى

شوفتوا الهنا الى انا فيه ...وطبعا خرجت برة الطريق ووقفنا علشان البيه الصغيير ...وكملنا تانى وربنا وحده يعلم انا

كنت سايقه ازاى ...لغاية ماوصلنا بيت بيبه ....

بيبه : شكرا ياجميل معلش تعبتك معايا ..اطلعى شوية اشربى حاجه انا حاسه بالذنب ..شكلك تعبان قوى

انا : لا شكرا انا عايزة اروح اخد الانتى بيوتك واناااااااااااااااام الساعة بقت 8 وكويس ان بكره الجمعه

بس بكره الغدااا عندك ..عقابا ليك على اللف ده كله ..

بس وروحت ولقيت الباشا اتغدى وروح وغير هدومه ونازل تانى مع كيمو علشان يشيشواا على القهوة

(واخر روقاان )

الباشا : انت هتنامى ولا ايه مش هتروحى تسهرى عند بيبه النهارده

انا : لالالالالا كفايه على قوى كده النهارده ...بس الغداا بكره عندهم

الباشا : بس كيمو مقليش

انا : لسه المعلومه ماوصلتلوش معلش بيبه عملاله مفاجاه

المهم نمت و...نمت كمان كتيير ورحنا اتغدينا عند بيبه ...وكانت عامله غداا sea food كتيير قوى

سمك وجمبرى وسبيط وكلامارى واستاكوزا .............ده غير السلاطات

انا : تسلم ايديك يابيبه لازمته ايه التعب ده ؟؟؟ اى حاجه وخلاص ليه ده كله؟؟انت عملت ده كله امتى؟؟

بيبه : وحياتك كله جاهز ولا عملت حاجه ..ربنا يخلى الكرديت كارد...

وتصدقى برضه لسه ماخلصش .....مش قلتلك محجب....

قولولى بقه لى حق اتخنق ولا لأ؟؟؟؟ بجد اتخنقت من مخها الى صغر قوى كده....دى محتاجه عملية ظبط زوايا للمخ

او الظاهر كهربة المخ عايزة تتغير ولا بينى انا الى هاتجنن..............

بس دى صاحبتى الى انا بحبها ...ومش ممكن ازعل منها ....والخنقه ممكن نسميها

خنقه نص نص ...........

على فكرة هى عارفه انى باكتب لكم كل حاجه ...وبتسلم عليكم وناويه تعمل لها بوست بس اول ماتشطب

الكرديت بتاع كيمو ....وعلى فلوسه كلها

حاجه تخنق مش كده........................

خنقة العيد --- قصدى هدية العيد

كل سنه وانتم طيبين

انا عارفه انى اتاخرت عليكم بس كان عندى برد جامد جدا - والمدارس بدأت تانى ورجعت الشغل تانى

والدنيا بقت سقعه الصبح وحر قوى الضهر وربيعى العصر وخريفى المغرب وتلج بالليل

يعنى جو جميل جداااا يخلى اى حد يجيله التهاب رئوى مش انفلونزا بس

المهم نرجع لمضوعنا وهو هدية العيد الرايقه بتاعتى - لأنها لغاية دلوقتى فى الدرج ماتلبستش غير مره واحده)

قبل العيد بأسبوع نزلت انا والباشا مع بيبه وجوزها ورحنا مول اسمه (فيستيفال سيتى ) ده مول حلو قوى

وفيه العاب ولبس اطفال - وقعدنا هناك 3 ساعات لغاية ماجبنا حاجات العيال كلها

وفجأتن الباشا اقترح ان العيال يروحوا مع بيبه وجوزها وانا وهو نفضل علشان هيجبلى هدية العيد

انا بصراحه فرحت (مش علشان الهديه - لا علشان اقترح انى انا وهو هنتمشى لوحدنا زى زمان )

والعيال بيحبو ولاد بيبه ومش هيعملوا مشاكل لغاية لما نرجع

المهم بيبه وكيمو اخدوا العيال وروحوا - وانا والباشا فضلنا فى المول بنتمشى وبنتكلم

الباشا: ايه رايك اجيبلك ساعه حلوة - المحل ده عنده ساعات حلوة قوى وكلاس

انا : اشمعنى ساعه يعنى مانا عندى ساعات كتير

الباشا : ولا واحده فيهم كلاس كلهم اى كلام وكبار قوى وفيهم استراس بيلمع كده غريب

انا : يعنى ايه مش كلاس ؟؟ انا بحب الساعات الكبيرة اللى فيها لعب شويه ايه المشكله؟؟ وبعدين انا عندى اتنين ماركة سواتش

يعنى مش اى كلام

الباشا : هى دى ماركه تتلبس؟ ياشيخه ارتقى بذوقك شويه

انا : ارتقى بذوقى (بخنقه لسه فى بدايتها ) حاضر ياحبى ورينى الساعات الكلاس علشان ارتقى بذوقى

المهم دخلنا المحل وكان بصراحه شيك قوى وكله ساعات ماركات عالميه متنوعه - انا رحت طبعا على الساعات الكبيرة

اللى فيها لعب لانى بحبها قوى - وده شافنى عملت كده راح مسكنى واخدنى عن ماركة اسمها سيكو ( ماركه قديمه قوى )

بس غاليه قوى مش عارفه ليه ؟؟ اذواقها كلاسيك زياده عن اللزوم - وكل الساعات الحريمى صغيره او شكلها

سيمبل قوى (مش النوع اللى بيعجبنى) واختار واحده غريبه كده وقالى جربيها

الباشا : ايه رايك شفتى حلوة قوى ازاى

انا : حبى هى حلوة بس انا عايزة واحده اكبر شويه دى صغيرة قوى

الباشا : انا عايز افهم صغيرة ازاى يعنى هى لازم تبقى واخده ايدك كلها علشان تبقى حلوة

انا : لا ياحبيبى بس انا مش بحب النوع الرفيع ده وبعدين دى سمبل قوى ومفيهاش اى لعب وعاديه قوى على سعرها

الباشا : مالكيش دعوه بسعرها - انا باختارلك الحاجه الكلاس الى ذوقها حلو - بلاش ذوقك البيئه ده

كل الحوار ده كان قدام الاموره الى واقفه تفرجنا الساعات وطبعا قصرت واتكتمت لما قال على ذوقى انه بيئه

والظاهر صعبت على الاموره الى بتبيع فعرضت علينا ماركات تانيه - اشكالها (فى رأى البيئه) انها احلى

بس مفيش فايده برضه مصر على الساعه الى اختارها هو - ولما لقانى ساكته ومابتكلمش اتقمص منى وقالى خلاص هاتى اللى انت عايزاه

انا : انا عايزه الى انت نقتيها لى حبيبى خلاص اقتنعت بيها

الباشا : بجد ولا برضه مش عاجباكى

انا : لا عاجبانى خلاص اهو الواحد لازم يغير استايله شويه

الباشا : ايوه كده ارتقى بذوقك شويه

انا : حبى انا ارتقيت بذوقى من 12 سنه لما اتجوزتك ( وانا باحاول اكتم الخنقه الى ممزوجه بالتريقه )

الياشا : اه طبعا امال ايه

المهم اشتراها بحوالى 2000 درهم الا شويه وروحنا عند بيبه علشان ناخد العيال من عندها واول ماطلعنا راح موريهم الساعه

طبعا عجبت كيمو جدا لانه من نفس الذوق الراقى بتاع الباشا - اما بيبه راحت بصه للساعه وبعدين بصتلى وقالتلى

بيبه: حلوة الساعه يامخنوقه هو انت اللى نقتيها

الباشا : اكيد هى اللى منقياها مش هديتها

بيبه : غريبه انت من ساعة ماعرفتك عمرك مالبستى ساعه صغيرة كده

انا : انا قلت اغير الاستايل شويه يابيبه ( وانا مخنوقه جدا)

بيبه : طيب ياحبيبتى مبرووك - تعالى اما نعمل شاى فى المطبخ

المهم هى خدت بالها انى مخنوقه ودخلنا المطبخ علشان نعرف نتكلم لوحدنا وحكيت لها على اللى حصل كله

بيبه : المفروض بعد ماقالك ذوقك بيئه تسيبيه وتمشى وماتشتريش حاجه

انا : انا مش بحب النكد يابيبه وبعدين ده بيجيبلى هديه ليه ازعله - وبعدين الساعه غاليه فعلا يعنى هو مش بخيل

بيبه : انا عارفه انها غاليه بس ماتعودوش انه يتريق على ذوقك

انا : خلاص الموضوع انتهى و الساعه اشتراها خلاص وانا هابقى كويسه بكره مش مشكله

بيبه: بصى انا هاروح معاك بعد العيد لما افوق من العمليه كده ونروح نغيرها - مش الفاتورة والضمان معاك

انا: لا يابيبه كده الباشا هيزعل وانا مش ناويه اغيرها خلاص

بيبه: بلاش خيابه دى موديلها مش حلو ومش ذوقك ومش هتحبى تلبسيها - عموما فكرى براحتك ونشوف نعمل ايه بعد العيد

المهم بعدها بيومين الباشا جه وقالى اجهز نفسى الساعه 8 علشان عندنا عشاء عمل فى فندق الحياة بلازا تبع الشغل

وكل واحد معاه مراته

المهم لبست وجهزت وخلصت قبله كالعاده وبصلى وقالى : انت مش لابسه الساعه ليه؟

انا: اه صحيح نسيت البسها اصلى كنت مخلياها للعيد

الباشا : ليه البسيها النهارده وابقى البسيها فى العيد ايه المشكله ؟

المهم لبستها وبعدين ودينا العيال عند بيبه ورحنا العشاء - كان المطعم حلو قوى والقعده دمها مش تقيل -وكنت المصريه الوحيده فيهم

كانو خلطة من الاجانب على لبانين

واحنا بنتعشى لقيت مراة مديره تيم (بريطانى) لابسه ساعه شبه ساعتى قوى مع اختلاف بسيط

وطبعا نفس الماركه - قلت فى سرى ايه المصادفه الغريبه دى ؟

واحنا مروحين قلتله

انا : السهره كانت حلوه - ومرات تيم ظريفه - تخيل دى لابسه ساعه شكلها قريب قوى من ساعتى

ونفس الماركه

الباشا : شفتى بقه ذوق جوزك - انا كنت مع تيم وهو بينقيها لها - وعجبتنى قوى

انا : علشان كده جبتهالى

الباشا : ايه هى مش عاجباك ولا ايه - ده مرات مديرى لابسه زيها - علشان تعرفى انا مابستخسرش فيك حاجه

انا : عارفه ياحبيبى انت زعلت ليه انا باسأل بس - ربنا يخليك لى

بس ................... وروحت البيت وأول حاجه عملتها انى قلعت الساعه وحطيتها فى علبتها

وقفلت الدرج عليها ........................

ومانمتش طول الليل من التفكير - ياربى انا مخنوقه ليه الساعه غاليه وهو مش بخيل و فى رجاله غيره

كتير مابيجبوش لمراتتهم حاجه اصلا فى العيد - وبعدين هو فعلا مابيستخسرش فى حاجه -

بس ليه انا كل لما ابص للساعه احس انها مش بتاعتى

المهم انا من ساعتها مالبستهاش وهو ماخدش باله انى مالبستهاش فى العيد وبعده ولغاية النهارده برضه ماخدش باله

ان الساعه لسها فى علبتها من يوم العشاء اياه

بذمتكم مش حاجه تخنق............................

مخنوقه جدا