ازيكم كلكم ...وحشتونى قوى قوى...انا دايما متاخره اليومين دول...
معلش اعذورونى ...باظبط احوالى الملخبطه ...بس والله باحاول الاقى وقت
ازوركم واعلق عندكم...
المهم ان تعليقاتكم فى البوست اللى فات كانت اكتر من رائعه وانا فعلا
متشكرة جدا لنصايحكم وأرائكم الجميله...
وبالنسبه لأحوالى دلوقتى ف.........
انا قدمت استقـــــــــــــــــــــــــاله
الحكايه جت بعد ماعملت بنصيحة صبرنى...وصليت استخاره
ورحت الشغل بعدها بيومين...وحصل ..الاتى...
المدير : مخنوقه النهارده هتروحى مع ميار (الاخت الاموره بتاعت التسويق)
تلفى معاها علشان تعرفى العملاء بتوعنا وهتلفى معاها كمان علشان تعرفى
تستلمى شغلها....
انا : يافندم حضرتك اديتنى مهله علشان افكر...وانا بصراحه مش عايزة اشتغل فى التسويق
لانه مش بافهم فيه وكمان ده مش شغلى...وغير كده انا باروح بدرى وحضرتك عارف كده
علشان ولادى...يعنى مش هاينفع...انا اسفه..
المدير : الوضع الحالى للشركه ماينفعش فيه التفكير يامخنوقه ...واذا كان على عدم المعرفه بالتسويق ...فميار هتساعدك لغاية لما تتعلمى ..ويبقى جون (الاخ الفلبينى)
يخلص الشغل المتأخر بتاعك ...وموضوع انك تروحى بدرى ده تنسيه الفترة دى..
انا : انا اسفه يافندم ...انا مقدرش اروح الساعه 5 ....وحضرتك عارف كده
وحضرتك قبلتنى من سنتين كده...وانا عمرى ماقصرت فى الشغل ..ده غير ان الساعتين الفرق دول بيتخصموا من المرتب...
المدير : ماشى ااقعديهم وخدى مرتبك كامل ....انا حتى ماقكرتش انى امشيكى او ااقلل مرتبك فى الوضع الحالى...مع ان معظم الشركات بتعمل كده....بس علشان انت معانا من زمان ..انا مش عايز اخسرك....
انا : انا اسفه يافندم ....ظروفى ماتسمحش...حضرتك ممكن تخلى جون فى التسويق بدالى...
هو ظروفه احسن منى ..
المدير : جون ماينفعش فى التسويق.....وبعدين أنا اللى أقرر مين اللى ينفع ومين اللى ماينفعش فى التسويق...
انا : صح حضرتك معاك حق ....وانا برضه اللى اقرر اذا كانت ظروفى تسمح ولا لأ
بعد اذنك انا هاقدم أستقاله.....
المدير : انت حرة يامخنوقه ...بس خلى بالك انت كده بتخسري وظيفه كويسه
ومش هتلاقى شركه تشغلك فى الوضع الحالى ...
بس وخرجت ومارديتش عليه ....بس كنت مخنوقه جدا....مش علشان ان الباشا
قالى التسويق لأ..بس ...علشان كمان موضوع انى اروح الساعه 5 ده ....
كده حياتى كلها هتتلخبط...
المهم رحت المكتب وقعدت اكتب الاستقاله على الكمبيوتر ....وبعدين الباشا اتصل..
الباشا : ها يامخنوقه عملتى ايه ؟؟؟؟
حكيتله على اللى حصل ولسه ماكملتش انى باكتب الاستقاله ....لقيته هب فى زى المدفع...
الباشا : (بزعيق جامد ) انت مستنيه ايه تانى ؟؟؟دلوقتى حالا تقدمى استقاله
ويعنى ايه انت اللى تنفعى فى التسويق وجون لأ؟؟؟؟؟ده مدير .......(لفظ ابيح )
انا : طيب اهدى ووطى صوتك ....انا باكتب الاستقاله دلوقتى...وهاقدمها حالا..
لو صبرت شويه كنت هاقولك...
الباشا : طيب ...انت قدميها النهارده وخدى موافقه علشان يبقى تاريخها من النهارده وقدامك شهر بس انذار علشان تعرفى تاخدى مستحقاتك ....بس خلال الشهر ده ..تعملى شغلك وبس
مافيش خروج مع ال....... بتاعة التسويق دى ...ولا فى كلام كتير تانى مع المدير ال .....
ده ...مفهوم ..اه وترجعى فى معادك ويتحرقوا ...مفهوم ..
انا : حبى ده اللى هايحصل من غير عصبيه ...الله يخليك انا مش ناقصه ...انك انت كمان تتعصب على ...خلاص الموضوع انتهى...سلام
وبس ..قفلت معاه حتى قبل مايرد على ..لانى فعلا كنت جايبه اخرى ...ومش متحمله كلمه زياده من اى حد ...ومضيت الاستقاله وخلصت شغلى وروحت وانا فعلا متضايقه جدا
لان بحب شغلى قوى ...بس قدر الله وماشاء فعل ...
وربنا يسهل والاقى شغل تانى ....
تانى يوم كلمتنى البت بيبه ...
بيبه : مخنوقه ..لما ترجعى النهارده ماتعمليش غدااا ...كيمو جايب معاه دعوة ل4 اشخاص على العشاا فى الشيراتون ...اجهزى الساعه 7 ماشى ..واكلى العيال اى حاجه لغاية العشاا
انا : يابنتى انا ولادى مابيعرفوش ياكلوا كويس فى الاماكن دى ...انا هاغديهم عادى
علشان اعرف ااقعد هناك براحتى ....وااكل براحتى...
بيبه : وماتجيش منكده ...انا مش عايزه نكد ...يتحرق الشغل واللى فيه..انا مش
عارفه انتى واجعه قلبك ليه وعايزة تشتغلى ؟؟؟
مانا قاعده اهو من غير شغل وااخر روقااان ...واللى انا عايزاه باجيبه ..غصب عن عين ام كيمو ...امال انا متجوزاه ليه؟؟؟
..انا : طيب يارايقه ...ادينى هاقعد خلاص ...ونبقى نتعلم حاجه من سيادتك .
المهم انى غديت العيال ورحنا عند بيت كيمو نستناهم لما ينزلوا ....
الباشا : مخنوقه انا بقولك اهو من اولها ....بلاش ضحك لما كيمو ينزل...
انا : ليه ياحبى ؟؟؟هو كيمو فيه ايه يضحك؟؟؟
الباشا : اصل عمليه زرع الشعر دى كانت مؤلمه بالنسبه له ...فركب شعر بطريقه جديده
وبصراحه هو مش باين خالص انه متركب ...بس مش لايق خالص عليه ..
انا : هههههههههههه لا ياراجل ماتقولش ...ولزقه بغراا عادى ولاسوبر جلو ..
وياترى دفع فيه كام ؟؟؟؟ وامتى حصل ده ؟؟؟
الباشا : بلاش تريقه يامخنوقه ....ده نوع جديد من التركيب ومابيتخلعش خالص وكمان يقدر ياخد شور بيه عادى....
بس المشكله انه مش لايق عليه خااالص...وانا ماحبتش ااقوله علشان مايزعلش
بس بلاش ضحك فاهمه ....
انا : حاضر مش هاضحك ....بس هاضحك فى البيت ..ماشى ..
بس ونزلوا ....وشفت كيمو ....بصراحه ماعرفتوش ...شكله متغير تماما
طول بعرض ....بكرش ...مع شعر بقصه...تركيبه صعبه قوى....
طيب لما تنقى حاجه نقيها مناسبه لسنك وشكلك ....لازمتها ايه القصه الطويله دى؟؟؟؟
بصراحه شكله يضحك جدااااااااااا .....
بس زى ماوعدت الباشا ...كتمت الضحكه لغاية لما وصلنا المطعم ...ومش قادره ابص لكيمو حتى علشان ماضحكش.....
بيبه : (فى ودنى ) شفتى كيمو المنيل عامل ايه ؟؟؟؟شفتى الشعر الجديد بتاعه ؟؟
انا (كاتمه الضحكه بالعافيه ): ايه ياعنى يابيبه ؟؟؟من نفسه اشمعنى انت ؟؟؟
بيبه : مخنوقه انا مش ناقصاكى ...يعنى ده منظر ..لازمتها ايه القصه دى ؟؟
ماكنش ينفع يعمل شعر عادى وخلاص؟؟؟
انا : كبرى دماغك ...بس انت ليه ماقلتلوش ..خليه يقص الشعر ده شويه وهو هيبقى احسن
بس من غير ماتزعليه...بالراحه كده
كيمو : ايه رايك يامخنوقه ...مش ملاحظه ان الباشا شعره بدأ يبقى فيه ابيض كتيبر
ده غير انه بدأ يخف من قدام ...
انا : نعم .؟؟ايه يعنى ..ده احلى حاجه فى الباشا شعره ..وخصوصا شوية الشعر الابيض دول ...عاملين زى الهاى لايت ومنورين وشه ...وبعدين مافيش شعر بيقع ولا حاجه
ده شعره ااتقل من شعرى....
انا مش عارفه كيمو ده ايه ؟؟؟؟عايز يولع الدنيا ليه ؟؟؟هو مابيبصش لنفسه فى المرايه ولا ايه ؟؟؟؟
وليه الرجاله شاغله نفسها بموضوع الشعر ده قوى ؟؟؟؟
المهم تانى يوم لقيت الباشا رجع ومعاه شنطه مليانه مستحضرات خاصه بالشعر
معظمها انا عمرى ماستعملتهاش ...
انا : ايه ياحبى ..كل ده علشانى ؟؟؟شكرا ياجميل
الباشا : لاطبعا يامخنوقه ...ده علشانى انا ...ماشفتيش كيمو لاحظ ازاى ان شعرى بيقع
انا : ياعم ده غيران منك ...انت صدقت ولا ايه ؟؟؟
وبعدين ايه كل ده ....
1-لوريال لتثبيت الشعر
2- لوريال مصل للشعر
3- زيت تونيك للشعر
4- سبراى مش عارفه ايه
5- بخاخ للكثافه
6- موووس للتثبيت
7- حاجه اسمها ليفون مع فيتامين E
8-ده غير شامبو مثبت للون
9- وبلسم مكثف
10-وكريم مغذى ومرطب
ايه ده كله ....دا انا عمرى ماستعملت الحاجات دى ...
الباشا : انت حره ...انا لازم احافظ على مظهرى ...وبعدين زعلانه ليه
استعمليهم معايا ..
سيبته وخرجت من الاوضه وانا بصراحه مش عارفه اضحك عليه ولا على سعيد صالح
لما قال :
(هو اللى بنعمله فى الناس هيطلع علينا ..ولا ايه )
فعلا ماكانش لازم اتريق على كيمو ....اهو طلع على فى الاخر...
فى مثل بيتقال على الشعر بس مثل ابيح شويتين ...انا هاقول اوله وانتم كملوه
لو كان الشعر عزيز ......مكانش ...............................
سورى ياجماعه ...بس الخنقه قلبت معايا بضحك .......
سورى مره تانيه
هههههههههههههههههههههههههههههههههههههههههههههه
مخنوقتكم ..........مش مخنوقه قوى
62 التعليقات:
اولا قدر الله و ما شاء فعل
وطالما استخرتي زي ما صبرني قالتلك يبقى ده الخير
ثانيا واضح قوي شخصية كيمو
اللي يخلي مراته تلعب في خلقة ربنا علشان بوسة من اليسا
عادي جدا انه يلزق شعر و يركب لانسيز كمان
بجد الناس اللى من العينة القشرية دي الواحد بيتخنق منهم اخر حاجة
و ربنا يهديلك جوزك
مع انك اديتي لكيمو بوقين حلوين لصالح جوزك
بس برضه من عاشر السعيد يسعد
واضح ان جوزك اتعدى من كيمو
و بالنسبة للمثل
لو كان الشعر عزيز ما كانش لزق في البرابريز صح؟؟؟
ان شاء الله ربنا يعوضك الوظيفه دى يا مخنوقه
واهو برضه ارتاحيلك يومين بلا وجع قلب وخلى الباشا يجيبلك كل اللى نفسك فيه واعملى زى بيبه صاحبتك
بس ابعدى الباشا عن كيمو ده شكله كده غيران من الشعرتين البيض وعايز يخلص على شعره كله
حرصى منه
تحياتى
لسه بسألك عن الشغل عندي لقيتك كاتبة
يالا قدر الله وماشاء فعل
ان شاء الله اللي جاي يكون احلى واحسن
واعتبريها اجازة لصحتك وبشغتك يا اوختشي
الحقيقة كل بوست الاقي كيمو ده يستاهل قلم والا انتي بتبالغي؟
الباشا عندك عنيد جدا وكان الله في عونك
نص المستحضرات اللي انتي كاتباها في حياتي ما سمعت عنها وعلى فكرة الرجالة بتترعب اكتر من الستات لو حد قال انت كبرت
تحياتي
قدر الله وما شاء فعل يا مخنوقة
وان شاء الله ربنا هيعوضك
بصراحة كيمو دا شكلوا ناوى يوقع شعر الباشا ويقولوا على طريقة الزرع الجديدة
ساعتها ابقى خلى الباشا يختار حاجة تليق علية
هاهاهاهاهاهاهاهاهاها
خلى بالك بقى
تقبلى مرورى
هههههههههههههههههههههههههههههههههههههههههههههههههههههههههههههههههههههههه
بت يا مخنوقه حرام عليكى وربنا انا عملت فيكى حاجه
ايه يا اختي الرجاله الى مخها تعبان دي
لا بصي فى في كلمه واقفه فى بؤي بش مش عارفه اقولها هنا
بت يا مخنوقه انتى لازم تيجى عندي الاميل عشان انا لو ما قلتهاش ممكن تقف فى زوري واتخنق واموت ههههههههههههههه
وبالنسبه للشغل بيبه عندها حق هههههههههههههههه
بصي لو علىالاقل مش بتعينى نص مرتبك فى حساب خاص بك اقعدي يا بت بلاش دوشه
خليه يصرف هو علىا لبيت بدل ما يجيب علب لشعره زي .... ولا بلاااااااااااش اهو قريبنا
و وبعدين عشان تعرفي تقولي المثل الى ما يعجبكيش لازم يكون عندك مفردات لغويه معقوله
يعنى مثلا خليها لو كان الشعر عزيز ما كانش طلع للمعييييز ههههههههههههههههه
ابو رياض يا حبيبى يا جمالك وانت اقرع ومنور القاعده
قال زرع شعر قاااااال والله كنت خلعته
اه نسيت اقولك
هو حتى البشوات بيقولوا الفاظ قبيحه ؟؟؟
على كده انا بقى بنت الخدوى بقى بذات نفسه
انا لازم احاسب بابا على انه طلعني مؤدبه ما اعرفش اقول كلام قليل الادب
مش عارفه اعيش على فكره كده
شعب قليل الادب صحيح
لا حول ولاا قوة الا بالله
ربنا يعوض عليكى بشغل افضل
بس اختيارك صح بيتك واولادك بمليون وظيفه
الاسره واستقرارها لا تعوض
شغل ايه وهم ايه اللي انتي جايه تقولي عليه
الشغل ده لحاجتين اولا حبا في الشغل
وبالنظام اللي كان معروض عليكي ده علي رأيك جوزك في المدير مش هاكرر كلامه
يامحتاجه الفلوس وعلشان كده بتشتغلي بس طالما جوزك مكفيكي اقعدي في البيت خلي بالك من ولادك لحد مايجي الشغل المناسب
انا عايزه اعرف المثل الاخير ماليش دعوه
اهئ اهئ
حبيبتى وحشتينى وحشتينى مووووت والله
وحشنى كلامك قوى
اكيد ربنا له حكمه فى انك تسيبى الشغل ده
وعسى ان تكرهوا شيئا وهو خير لكم
اما كيمو ده فاحسن حل له تسلطى عليه بيبه
والله مش خساره فى طيبه قلبه اللى بتعمله فيه
شوفى قدر يقنع جوزك ازاى انه محتاج لكل المستحضرات دى
لا الباشا ما صدق
والله فعلا هم يبكى وهم يضحك
ماتغيبيش علينا بقى علشان بتوحشينا قوى
الحمد لله علي كل شئ
اهه انت استخرت و ربنا عملك اكيد اللي فيه الخير
ااما بخصوص الباشا
فهي موجة كده
و هترجع الماية لمجاريها تاني
و هتقولي موني قالت
اصل الرجالة ملولين بطبعهم
و الحاجات ديه عايزة مواظبه بأه و كده
ربنا معاكي يا جميل
هههههههههههههههه صحيح هم يضحك وهم يبكي ومعلش بالنسبه للشغل وان شاء الله تلاقي الي احسن منه يارب وربنا يعوضك
و الله يا مخنوقه انا كنت داخله اقولك انى اتحطيت فى موقف زى بتاعك كده
و لما الباشا بتاعى قالى اقعدى يا سكيننه فى البيت بدل ما ابج بطنك بجيج
طبعا قعدت سكيننه فى البيت و الحمد لله انهم بيخافوا علينا دى تحسبلهم الصراحه
غيرهم بينفض و يعمل نفسه مش واخد باله
انتى قلتى الرزق بتاع ربنا و ان شاء الله ربنا يوفقك فى شغل يناسبك
اما بخصوص كيموا فضحكتينى جدااااا عليه
و ضحكنى اكتر رد فعل الباشا
تحياتى و اديكى فضيتى اهه و عايزه كل يوم بوست
برافو عليك
من مود الاستقاله و حرقة الدم الي مود مغاير و سعادة و فرحه
هي دي الستات المصريه الجامدة صاحبة المبدا
وفقك الله لكل الخير
تحياتي
السلام عليكم
ازيك يامخنوقه
واحشاني جدا
ايه يابنتي اسيبك يومين اجي القيكي سبتي الشغل
قدر الله وماشاء فعل
اما بخصوص شعر جوزك الباشا
مش عارفه اقولك ايه ههههههههههههههههههههه
ربنا يهدي
ابقي سلمي علي بيبه
اقرأ نص اتفاقية منع تهريب السلاح لغزة
وادعوا الله ان يثبت مصر في عدم التوقيع عليها
www.moatnondedelsh3ab.blogspot.com
ياريت ما ننساش التدوينه السوداء بكره حدادا على ضحايا غزه
http://osamalife.blogspot.com/2009/01/blog-post_9457.html
مخنوقه .... ازيك ؟
قدمتى الاستقاله خلاص ؟ انا من رأيى تريحيلك فى البيت شويتين كويسين وتفكرى كويس جدا انتى ممكن تعملى ايه بعد كده
بس انتى شكلك بتحبى الشغل اوى
انا عارف احساس الفضا وعدم الشغل ساعت بيكون احساس جميل ورائع جدا وساعات تلاقى احساسه منيل شويتين
وبعدين سلى نفسك شويه واستعملى الكريمات والمستحضرات اللى الباشا جايبهم . مهو انتى لو حبيتى تستعملى كل الانواع دى هيعدى عليكى تلات اربع ساعات على ماتخلصى الجرعه اليوميه من العلاج على كام تليفون لبيبه وتقريلك بوستين وتعلقى عليهم وتحضرى الغدا يكون اليوم خلص خلاص ومش هتلاقى وقت حتى للخروج او الشغل وربنا يكون معاكى . اما بالنسبه للشعر فربنا عايز الراجل بشكل معين لو هوا غير من شكل خلقته اكيد مش هيكون احلى من الخلقه اللى ربنا خلقه عليها يعنى لو هوا اصلع اكيد ربنا كاتب عليه ده عشان الصلعه هتكون لايقه عليه ولو شعره ناعم اكيد ده ستايله اللى ربنا خلقه بيه . يعنى ينفع تشوفى واحد هندى او فلبينى شعره مجعد ؟؟ او سودانى شعره ناعم واصفر مثلا ؟؟ اكيد مش لايق
طبعا انا باتكلم من منطلق فكر حقيقى عشان انا من اصحاب الرؤوس النضيفه
ههههههههههههههههههه
أنا بجد مت من الضحك متقعديش جوزك مع كيمو ده تانى
و إن شاء الله ربنا يعوضك بشغل تانى أحسن
ربنا يعوض عليكي في موضوع الشغل بشغل افضل
بالنسبة لمستحضرات الباشا فالراجل بيتعب وبيشقي ومن حقه يدلع نفسه
وانا مش شايف اي مشكلة من مستحضرات التجميل اللي هو مشتريها دي
احنا بنشتغل علشان ندلع نفسنا
وياستي زي ماقالك ابقي استخدميها معاه
دمت بكل الخير والود
ههههههههههههههههههههههه
دا كيمو ليه تاثيره برده هههههههههه
بصي كان قرار صح الاستقاله قدر الله وماشاء فعل
وربنا يوفقك يارب
أختى المخنوقة : دى اول مره اعلق معاكى ولكن انتى ليه مخنوقة
من الرجاله
هناك ملايين من الستات مبسوطه وبرضه من الرجاله
المهم الرجل هو ذلك العصفور مسافر حيث سافر ...كم تغنى ...كم تمنى ...ثم أرقه الانين . أنا قطرة الماء التى طافت عل الانهار تلقى نفسها للموج حينا ثم تدفعها الشواطىء للسقين.
اختى : الايام تمر ويمضى العام بعد العام بعد العام وتسقط بيننا الايام ويصبح عمرنا سدا ويصبح حبنا قبرا وحلم بين ايدينا رمادا وانتى فى عينى بقايا من حريق ثار
ويمضى العام بعد العام بعد العام فلا انتى التى كنتى ولا انا فارس الاحلام
اختى تعالى نشهد الدنيا بان الحب اصبح فى مدينتنا حرام
وان الصبح اصبح فى ماثمنا ظلام
وان الخوف يخنق فى حناجرنا الكلام
اليس هذا الرجل او ذاك هو من اختيار مشترك للحياه
ام ان الناس تتزوج بلا تراض او قبول
من هنا مشاكل ومتاعب الحياه هى من تضغط على الرجال
وفى النهاية عليكى ان تعلمى اننا مسيرون ولسنا مخيرون تروح وظيفة ان شاء الله يجى احسن منها
وربنا يفك خنقتك وخنقة كل الستات
انتى صدمتينى ف الاول الصراحه
بس قدر الله و ماشاء فعل
بس واضح انها قلبت معاكى سخريه و دم خفيف بصراحه مت من الضحك
خليكي بقى من غير شغل افضل ده من مصلحتنا احنا
و بعدين حد يسمع كلام صبرنى !!!!! دى مشكله ف حد ذاتها.....
يلا بس طيبه و بنت حلال
اهى قعدتك ف البيت اهو
بوست عسل اوى
و ان شاء الله ربنا يفرجها
مخنوقه
انا اول مره هنا :)
بما انك استخرتي الله ... اكيد اللي عملتيه في ان شاء الله الصالح لكي ولبيتك
اما عن كيمو كان ودي اشوفه بالشعر الطويل والقصه من كلامك شكله تحفه :)
خليكي حلوه مع الباشا احسن يتهور و يعمل عمليه تجميل وتكبير شفايف ههههههه
مدونتك خفيفه دم يا عسل
وضعنا ولا هنشتريه .. تدوينة حلوة لمست الوضع الحالي لينا .. متشكرين
انا اول مره في مدونتك مخنوقة وان شاء الله هاكون دايما من متابعينك .. مدونة بجد دمها زى العسل
بالنسبة للشغل اكيد اللى حصل دا فيه خير لكى طالما انتى استخرتى وان شاء الله ربنا يعوضك بشغل احسن
اما بالنسبة للباشا جوزك ففكرنى بجوزى والله والظاهر الرجالة اهتماماتهم اتغيرت عن رجالة زمان انا فؤجئت بجوزى جايب مستحضرات تجميل للبشرة تخيلى ؟
المهم يكونو بتجملو لينا احنا مش لاى حد تانى مع انى اشك في دا
ربنا يوفقك وتحياتى لكى
ريم
قدر الله ماشاء فعل
ان شاء الله تلاقى وظيفة زى الفل
استاذ احمد
معاك حق والله ..وانا نفسى قوى الباشا يبطل كيمو ..لكن مافيش فايده ..
لكن بصراحه غير انه عقله على قده ...انسان جدع فى مواقف كتييير
ومراته كمان مش لئيمه وطيبه..
ودى حاجات صعب تلاقيها فى الغربه بسهوله...
تحياتى ليك ولزوجه
Bondoka
شكرا لزيارتك ياقمر
وهارتاح حاضر بالعافيه اهو
مع انى مش بحب قعدت البيت..
ومش عارفه ابعد الباشا عن كيمو بتاتا البته...
تعبت من المحاوله وسلمت امرى لله
تحياتى ياقمر
ستيته حبيبتى
انا مش بابالغ خااالص فى حق كيمو
هو يستاهل قلمين مش قلم واحد
بس الباشا بيحبه وفاكره اخر الرجال المحترمين...
والمستحضرات دى انا نصها ماسمعتش عنها انا كمان....بس اعمل ايه
الرجاله بتكبر وعقلها بيصغر
تحياتى ياقمر
احساس طفله محبه للرومانسيه
مرورك نورنى ياحبيبتى
وربنا يخليك لى ياقمر...وموضوع الشغل ده انا سايباه لربنا .....وربنا كريم
وربنا يستر والباشا مايتهفش فى دماغه زى كيمو...احسن ساعتها هتلاقونى رحت اعمل عملية تغييير صواميل مخ..
تحياتى ياجميل
صبرنى ياحبيبتى ياروح قلبى من جوه
انا بصراحه مش عارفه اعمل معاه ايه
انا خايفه لعقله يخف زى كيمو
وحبيبتى قولى اللى انت عايزاه ماتخليش حاجه واقفه فى زورك...
انا اخدت ايميلك عندى وهاعملك دعوة قريب ان شاء الله بس لما ولادى والشغل يعتقونى....وهانقعد نرغى انا وانت براحتنا على الاخر
هانت فاضلى 17 يوم فى شهر الانذار بتاع الشغل واسيبهم واخدمستحقاتى
وهاحاول اتأقلم على قعدة البيت ..مع انى خايفه مالاقيش حاجه اعملها
اختك خدت على الشقى بعيد عنك...
وخايفه ترتااااح....
والباشا صحيح باااشا ومدارس لغات و..قصه كده
بس بعيد عنك لما بيتعصب بيبقى عنده قاموس الفاظ راااايق بالعربى والانجليزى والفرنساوى
شفتى الهنا اللى اختك فيه....
معلش ياحبيبتى خنقتك معايا..
تحياتى ليك ولابو رياض ياقمر..
محاسن ياحبيبتى
ربنا يخليك لى يارب
وربنا يعوض على وعليك...
انا بصراحه مابحبش قعدة البيت ..بس ولادى اهم من الشغل ولو رجعت الساعه 5.30 زى المدير ماهو عايز هيتبهدلوا قوى..وانا مارضاش بكده ابدا..
وربك كريم يعوض عليا بشغل تانى
تحياتى ليك ياقمر
عاشقه وغلبانه
اول حاجه غيرى القلب المقطوع الحزين اللى متلبس بالبلستر ده
ده الفلنتين قرب اهو...غيريه وخليه قلب جميل زيك كده...
ومعاكى حق المدير ظهر على حقيقته لما شركته انضرت...
بس المشكله انى بحب شغلى قوى مش اكتر وكمان مش بحب قعدة البيت بتاتا البته....
وبقية المثل ماقدرش ااقوله ليك
انت لسه صغيرة...
ههههههههههههههههههههههههه
تحياتى ياقمر
مش هقولك غير لايفر احدكم من رزقه حتي يدركه كما يدركه الموت
واللي نصيبك فيه هتلاقيه
عاشقة الرومانسيه ياحبيبتى
انا فعلا لما كيمو بيجيب اخرى باسلط عليه بيبه ...تربيه شويه
وفعلا الحاجه الغريبه انى لقيت الرجاله ياختى بيغيروا من بعض مش عارفه ليه؟؟؟
ربنا يخليك ياحبيبتى وان شاء الله مش هاغيب كتيير
تحياتى
مونى ياحبيبتى
ربنا يهدى الرجاله كلها ياختى
احسن بعد كده يغنولى الدور الدور
موعوده ياللى عليك الدور
ربنا يستر
نورتينى ياحبيبتى
حاسوباتيه
نورتينى ياقمر
ربنا يخليكى ياحبيبتى
وان شاء الله الاقى شغل تانى قريب
تحياتى
الجواز وسنينه
طب كويس لقيت لى زمل فى الخنقه
انت كمان الباشا بتاعك قعدك فى البيت زى ؟؟؟
ربنا يكتر من خيراتهم ياستى
ماش حاجه تحسبلهم ...ماهم مطلعين عين اهلنا...ومستحملينهم
ليه مافيش حاجه بتحسب لنا ؟؟؟؟؟
حاجه تفرس
تحياتى ياقمر
احوال الهوى
شكرا قوى لسيادتك على رايك فى الزوجات المصريات الغلبانات المطحونات والمخنوقااااات جدا..
مشرفنى بزيارتك دايما
تحياتى
زوجه ياحبيبتى
منورانى ياقمر
كنت فين المده دى كلها
يارب تكومنى بخير ومش زعلانه
كويس انى ضحكتك
هى الدنيا كده
هم يبكى و...هم يضحك
ربنا يجعل كل همومك ...تضحك
وبلاش زعل
تحياتى
م/الحسينى لزومى
حاضر هاقراها وهادعى ربنا يعميهم ساعة التوقيع
هى الدنيا جرى فيها ايه ؟؟؟
اسامه عبد العال
انا قلتها مرة ل...ابى
انا مش باحب التدوينه البيضاء ولا السوداء
وباعتبرها مشاركه سلبيه مش ايجابيه
لانها ببساطه مابتعملش حاجه خااالص
تحياتى
محمد عتلم
منورنى ياستاذ محمد
الحمد لله خلاص قدمت استقاله بس لسه هامشى كمان17 يوم بالضبط علشان اخلص شغلى وااخد مستحقاتى
وهاقعد كده كل يوم اجرب نوع من الحاجات اللى جابها الباشا...
جايز تعمل حاجه مع شعرى الجامد جدا ده.......انا باتكلم من منطلق انى من اصحاب الشعور الناعمه جدا طبعا
ههههههههههههههههههههه
وحضرتك دايما منور ...
المدونه اوعى تفتكر حاجه تانيه
ههههههههههههههههههه
سلام لمراتك
وتحياتى ليك
انا ودماغى
نورتينى ياقمر
مش عارفه ازاى افصل بين الباشا وكيمو انتيمو ده
بجد تعبت
وربنا يسهل واشوف شغل تانى
مصطفى ريان
هو انت تعرف الباشا ولا حاجه
اصلك بتدافع عنه قوى
ولا علشان الرجاله لبعضها؟؟؟؟
ماشى خليه يدلع نفسه بس بلاش يزودها قوى لتبوظ.....
تحياتى ليك
كيارا حبيبتى
منورانى ياقمر
ايوة كيمو له تاثيره للأسف
الرجاله بتبوظ بعضها ده اكييد
تحياتى ياعسل
Hosam4u2004
اولا نورتنى فى اول زيارة
وتعليقك حلو قوى مع انى مافهمتش نصه
بالراحه على يااخ حسام
اختك فى النحوى مااااافيش خاااالص
كلمنى مصرى الله يخليك
وشكرا مرة تانيه
تحياتى
بيبرس
نورتنى يااستاذ
كويس ان النكد قلب معايا بضحك والا كنت طقيييت
ولازم اسمع كلام صبرنى علشان هى دايما جدعه ونصايحها فى الجون
تحياتى لبسبسه
وليك
سارة حبيبتى
نورتينى ياجميل
ان شاء الله هاصور كيمو وانزل صورته فى صفحة الحوادث قريب جدا
تحياتى ياعسل
سيادة الرئيس
ايه الاسم الجامد قوى ده
العفو يافندم ...ده سيادتكم تأمر
بس يارب يكون وضعك احسن من وضعى
تحياتى
ريييم
نورتينى ياقمر
والله الستات دول غلابه قوى
مستحضرااات تجمييييل؟؟؟؟؟؟؟؟؟؟
ليه؟؟؟؟؟؟؟؟؟؟؟
ربنا يكون فى عونك انت كمان ....
والظاهر انها شوطه فى الرجاله كلها
ربنا يهدى
تحياتى
هبه سيد
نورتينى فى اول زيارة
وربنا يسهل والاقى وظيفه تانيه
تحياتى
شمس النهار
نورتينى ونورتى المدونه كلها
كلامك اوجز لكن قال كل حاجه
فعلا الشغل ده رزق من عند ربنا
ونصيبى ماحدش هاياخده غيرى
الحمد لله
قدر الله وماشاء فعل
تحياتى
وكأنك أختي...بنتي....
قاعدين بنسمع مغامراتك في الغربة..
دايما باضحك.. وباشوف شقاوتك ..
أما الإستقاله.. ان شاء الله تكون بفايده.. بس بصي.. عايزك تشتغلي تاني ضروري.. مش مهم دلوقتي.. بس لازم .. عشان الباشا حيعوزك دايما
uptodate
أمنياتي لك بالسعاده والضحك...
دعوه
الأخ العزيز/او الأخت العزيزه
تحيه طيبه
برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق
صباحا عدا الجمعه
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا
وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
المدونه
http://netonradio.blogspot.com
الموقع
http://dear.to/cairo
لا تنسوا الدعاء لأختى الشهيده هديل وجميع شهداء بلدى ( عمرو ، إيمان ، هاجر ، مروه ،أحمد، أحمد)
لو كان الشعر عزيز ما كنش طلع في المعييييزززز
هع هع هع هع
اولا ربنا يعوض عليكي يارب بالاصلح لك ولاسرتك .. وبلا شغل بلا وجع قلب اقعدي في البيت والباشا بدل ما يروح يجيب مصنع مستحتراض لشعر كبيرة مغيييز بيطلع لها .. يديكي انتي الفلوس وبلا شغل بلا بتاع
ام الاخ كيمو ده .. مش عارفة وانتى بتحكي عنه تخيلتة كيمو بتاع كيمو ايس كريم .. الشكل ده اترسم قصادي وهو لابس بدله نيهههههااااااااي
وعجوزك والله عنده حق في موضوع التسويق
ربنا يسترك دنيا واخرة
مدونة عسل ومعرفش كانت غايبة عني فيييييين
يا دي الخيبة قصدي جوزك مش عجوزك والله
الكي بورد بتاعتي لدغة واسألي ستيتة
علي فكره انا بحييكي اوي علي قرار الاستقاله000قرار مظبوط
بيتك اهم ورضا جوزك اهم
وانا مع الباشا في موضوع بلاش تسويق ده واكيد الباشا شرحلك ليه
اما بالنسبه لكيمو : ف فعلا
ابلغ رد
لو كان الشعر عزيز 000ماكانش طلع تييييييييييييييييييت
تحياتي
علي فكره انا بحييكي اوي علي قرار الاستقاله000قرار مظبوط
بيتك اهم ورضا جوزك اهم
وانا مع الباشا في موضوع بلاش تسويق ده واكيد الباشا شرحلك ليه
اما بالنسبه لكيمو : ف فعلا
ابلغ رد
لو كان الشعر عزيز 000ماكانش طلع تييييييييييييييييييت
تحياتي
ههههههههههههههههههههههههههههه
مدونتك جامدة طحن يامخنوقة
والله يابنتى جوزك نسخته أحسن من النسخه اللي عندى
عالاقل نسختك جايب ولاد ومخليكى تشتغلي وبيديكى فلوس
انا جوزى بقي اكبر منى ب30 سنه وسايبنى محبوسة فالبيت وعايش مع الحجه الاولانية
ولا أقدر أخرج من شقتى ولا أقدر أقول نفسي فحاجه
أحمدى ربنا علي جوزك مهما كان
أنتى لو شفتى بلوتى هتهون عليكى بلوتك ياأوختشي
تحياتى ليكى
إرسال تعليق