THOUSANDS OF FREE BLOGGER TEMPLATES

الخميس، فبراير 12، 2009

تعمل ايه لو اتخنقت زي جورج..؟؟؟؟؟؟

اكيد كلكم هتقولولى من جورج ده ....؟؟؟؟
الحكايه هاقولكم عليها ودى حصلت فعلا فى دبى ...وبصراحه

انا عايزة رأى الرجاله قبل الستات فى الموضوع ده ....
جورج ده مهندس مصرى بيشتغل فى الشركه مع الباشا ...
وجه دبى من حوالى 9 شهور...ولسه ماجابش مراته ولا ولاده
علشان الظروف اللى مايعلم بيها الا ربنا .....
واول ماجه دبى قعد فى سكن الشركه شويه وبعد كده راح سكن
مع جماعه اصحابه فى برج حلو قوى بس كله charing
يعنى الشقه ايجارها بيتقسم على الموجودين فيها.....
على حسب ده واخد اوضه ولا سرير...فهمتم ولا لأ؟؟؟؟
المهم ان البرج شيك جدا وفى منطقه حلوة فى دبى ...
بس كل الموجودين فى البرج تقريبا عزاااب...
رجااااله و..ستااات...
يعنى تخيلوا معايا الوضع جميييييييييييل قد ايه..
المهم الراجل كان مبسوط وعايش حياته..وجاب عربيه
واموره ماشيه ...
فى يوم برد كده ..قام الصبح الساعه 6 الا ربع علشان ينزل يروح شغله
وهو جوه العربيه ...
فجاتن...
لقى مزة جامده جدا ...نازله من العماره ..تقريبا شبه عاريه
ووشها مليان دم ...وبتجرى ..وهى بتعيط ..وواحد بيجرى
شبه عارى هو كمان ...ومعاه حزام رجالى بيضربها بيه..
اخوكم جورج نزل من العربيه ...واخدها بسرعه وعدى بيها الشارع الناحيه التانيه
علشان يبعدها عن اللى بيضربها ده ....
وراح بمنتهى الشهامه قلع الجاكت بتاعه ولبسهولها...
والراجل اللى بيضربها ماعرفش يعدى الشارع علشان كان حافى ...
والراجل بص لجورج بصه جامده قوى ....معناها مستنيك لما
تيجى ....
والبت نازله عياط وبترتعش من البرد....
راح جورج طلب البوليس على الموبيل ....لانه قلق من الموقف كله..
والبنت لما سمعت انه طلب البوليس قعدت تعيط ...وعايزة تمشى
قبل البوليس مايجى ....
لان سيادتها مخالفه فى الاقامه....يعنى جت زيارة 3 شهور
وقعدت بقالها 5 شهور زياده كمان ...
احتار اخوكم جورج يعمل ايه ؟؟؟ البوليس جاى فى السكه ..
عرض عليها يوصلها ....لانها مش هتلاقى تاكسى دلوقتى
ده غير انها تقريبا من غير هدووم...
المهم وصلها لغاية البيت و.....هوب لقى البوليس بيكلمه
رجع لهم وحكى اللى حصل وقالهم على الراجل مين ..
بس ماقالش خااالص انه وصل البنت بيتها..
قالهم اخدت تاكسى....
المشكله هنا ان البوليس مش هايعرف يثبت اى حاجه على الراجل
لان البنت المضروبه مش موجوده ...
وطبعا الراجل اياه قال ...ماحصلش حاجه..وان جورج بيتبلى
عليه ....
طبعا البوليس زى ماجه ....زى ماراح ...
واخوكم جورج لبس اليله كلها ....وتانى يوم صحى الصبح ونزل
للعربيه الجديده بتاعته (لسه مادفعش ااقساطها )..
لقاها مدمرة ...كل القزاز متكسر...والاربع فرد الكوتش مقطوعين بسكينه
ومكتوب بالانجليزى على العربيه (wait for more)....
طبعا بلغ البوليس تانى وعمل محضر.....وكل سنه وانتم طيبين
مين هايثبت مين اللى عمل ده ...
اللى نفعه ان العربيه متأمن عليها ...بس برضه هيقعد اسبوع او10 ايام
من غيرها ..عقبال ماتتصلح ...
بس جورج من ساعتها اخد بعضه ودور على سكن تانى...
والمرة دى نقى عمارة هاديه ...معظمها عائلات...
وطبعا كل ده انا عرفته من الباشا ...وهو بيحكيلى سألته ...
انت لو مكان جورج هتعمل ايه ؟؟؟؟
الباشا : طبعا مش هاعمل زيه ابدا ....انا كنت هاقعد هادى فى العربيه ...
واطلب البوليس ...علشان يمسك الراجل متلبس...
انا : طب افرض البنت ماتت من كتر الضرب.......
الباشا : وانا مالى ...هى اصلا لو محترمه ايه اللى منزلها كده ..وايه
اللى وداها عنده من اصله ...دى ............(كلمه ابيحه بالانجيليزى)
انا : وافرض انها كده ...بس برضه بنى ادمه ...مش ممكن الواحد
يسيب واحده تموت ...مهما كانت ...
الباشا : بصى يامخنوقه ..لو واحده محترمه وحد عاكسها فى الشارع ..
ساعتها اه اتدخل ونص ...لكن واحده ..(نفس الكلمه الابيحه بالانجليزى برضه )
دى الواحد يتحشر ويبهدل نفسه معاها ليه ...؟؟؟؟ ده غير ان جورج اتورط اكتر لما
اداها الجاكت بتاعه.....
انا : ليه ؟؟؟امال يسيبها عريانه ....؟؟؟
الباشا : ليه ازاى يامخنوقه ؟؟ دى لو ماتت او جرى لها حاجه ولقوا عندها جاكت
جورج ...اول واحد هيتهموه هو جورج طبعا ...
انا : اه صحيح ...دى اخرة الشهامه ....
ده ياجماعه كان رأى الباشا .....
انا عايزة اعرف بأه رأيكم كلكم .....الرجاله قبل الستات...
تعملوا ايه لو كنتم مكان جورج...؟؟؟
وعايزة رأيكم بصراااحه ...من غير خنقه ...
ولا كسوووووووووووف.........
احلى تحيه من مخنوقتكم .......................مخنوقه

48 التعليقات:

ستيتة يقول...

اول تعليق يافرحتي
طيب سؤال لو لقيتي واحد مخبوط من عربية وممدد في الشارع وبكل شهامة وجدعنه خدتيه على المشتشهم ومفيش شهود معاكي يقولوا ان سيادتك مجرد شهامة ها يحصل ليكي ايه؟ والمصيبة لو الضحية فيص؟

فما بالك في بلاد الغربة اللي المصري فيها متهم حتى تثبت برضه ادانته

يمكن لو انا في نفس موقف سي جورج معرفش اشغل عقلي يعني اشتغل زي الأنسان الآلي واجري عليها واشتم الراجل وانصرها ووصلها

بس مؤكد بعد ما انجو من الليلة السودة دي اقعد افترض واقول لو حصل كذا كان جرالك ايه يامنيلة؟ امتى ها تعقلي لما تتمي ميت سنه؟ يعني مكنتش ها اتبسط من شهمتي .. كنت ها اخاف منها

الباشا بيتكلم وهو قاعد ع الكنبة بياكل بينأبل .. لكن متعرفيش لو كان فعلا في الشارع كان عمل ايه لأن في المواقف المفاجئة بيخرج جوهر الأنسان مش عقل ولا بطيخ

حواء يقول...

السلام عليكم
خلي الرجاله ترد ياستي
المهم بقي
جري بقي ياعسل علي المدونه بتاعتي عملالك اعلان يلي بسرعه مستنياكي دلوقتي
يلا بسرعه علشان اقوم اشوف اللي ورايا

احساس طفلة محبة للرومانسية بس واقعية يقول...

انا لو مكانوا هتصل بأقرب حد اعرفوا
ممكن يجى بسرعة
ومش هتدخل لغاية لما يجى
هو كلام الباشا فى شوية صح
لانو برضو لازم يخاف على نفسوا وعليكى وعلى الاولاد
وبرضو شهامة جورج صح بس مش للدرجادى
يعنى يتصرف بشهامة فى حدود الحفاظ على نفسوا

تقلبى مرورى

غير معرف يقول...

بصراحة انا رأيى من رأى الباشا هو دخل نفسه فى موضوع هو مالوش فيه خالص


و أكيد دلوقتى رايه برضه زى رأى الباشا

صبرني يارب يقول...

لا بصي هو الباشا هنا عنده راي مش بطال بصرف النظر عن كونه فعلا الصق التهم بالبنت من غير دليل وده غلط

بس هو اتكلم بالعقل جدا انما فى الموقف ما بيبقاش الواحد حكيم اوي كده

الا انه فعلا ممكن يدخل نفسه فى مشاكل ما لهاش حد

بس يعنى ربنا بيسترها مع الغلابه يا اختي

لكن برضه هو ما قالش نسيبها ونمشي هوقال اطلب البوليس وهو يتصرف

رايه عقلاني اوي فعلا وزي ما قالت ستيته برضه احنا فى الغربه يا داليا بنمشي جنب الحيط

على فكره رضا وهوفى الصين سمع واحده بتصوت وتعيط وتصرخ فى الاوضه الى جنبه

بس ما يقدرش يروح يخبط ويقولها مالك يا ضنايا بن الهوهو ده عمل معاكي ايه

مع انه شايفه واد عربي صايد بت وداخل بها الفندق يعنى بس برضه يعنى هايعمل ايه ؟؟؟؟؟

أبو العريف يقول...

بصي يل ستي انا بقى مع الباشا هو رأيه تمام بس برضه مش بغلط جورج الراجل يشكر علي شهامته بس الواحد ما يضمنش الست دي ايه اللي وراها
احنا ف غربه يا ستي

Kiara يقول...

ههههههههههههههه

انتي قلتي راي الرجاله ومش في حد منهم رد الا واحد

الراي بقي هقولك مش عارفه لان رد الفعل ساعتها هيكون هوهو موقف جورج

عاشقه الرومانسيه يقول...

اكيد انا لو راجل وفى مكان جورج
هعمل اللى عمله بالظبط
لان دى شهامة المصرين
"هى دى مصر ياعبله"
والموقف هيفاجئنى ومش هلحق افكر
وربنا يسترها ويدى كل واحد على قد نيته
والباشا معاه جزء من الحقيقه مش الحقيقه كامله طبعا
الا وهى
اننا بقينا فى زمن اخبر
اللى يعمل خير يتقلب عليه شر

استرها علينا ياااارب

بس انا مع جورج مليون فى الميه

رجل والرجال قليلوووو

اوعدنا يارب بواحد شهم كده
بس يكون محمد
مصطفى
عتريس
اه مش جورج يعنى

تحياتى ياقمرى

mahasen saber يقول...

مش هتكلم ولاا هقول حاجه

غير انى استعير منك الخنقئه

مخنوقه ومذبهله ومجروحه ومضصدومه

شكلى قلت اهه

Unknown يقول...

بصراحه انا شايفه ان جورج معاه حق و طلع راجل فعلا

حتي لو هي ايييييه في الاخر انسانه
ماينفعش نقول لا تموت بقي ماهي تستاهل

جورج بجد رااجل جدآ في الموقف ده بس الاخ التاني الي كان بيضربها ده مريض و محتاج علاج

Kholios يقول...

ما ينوب المخلص إلا تكسير عربيته.......
هو الواحد ساعات بينقح عليه عرق الشهامة بس حسب الموقف بمعنى واحدة (كلمة أبيحة بالأنجليزى) نازلة شبه عريانه الساعة 6 الصبح من بيت عزاب وأكيد جورج جارهم يعنى مش غريب عنهم وعارفهم على الأقل يعنى البنى آدمه دى تستاهل كل اللى بيحصلها.....
ولو أنا فى بلد غربة هركن شهامة المصريين على جنب وأقول نفسى ثم نفسى ثم نفسى ثم نفسسسسسسى برضو.....أنا مع الباشا كلياً و جزئياً

Che يقول...

انا من رأى الباشا و البنت دى ممكن تعتبر اللى اتعرضتله ده جزء اساسى من متاعب المهنه .. ده غير انه فى مثل مشهور أوى بيقول اللى يحب الدح مايقولش ..... ( كلمه مش عيب انى اكتبها بس برضه مش هاكتبها ) انا شايف ان جورج غلطان فى انه اتحمق للانسان الغلط

شمس النهار يقول...

السؤال ده للرجاله والا الستات ؟

بس خلاص ... يقول...

ازيك ياحبيبتى انشاء الله تكونى بخير وعديتى ازمة القلق فى العمل بصورة ترضيكى ويكون فيها استقرارك النفسى والعائلى
وبالنسبه لموقف جورج ممكن الانسان وهو بعيد ويقرا يقول رأى عقلانى وفيه تفكير زى رأى الباشا وتقريبا هو ده الصح ...ولكن الواحد تحت تأثير الموقف والمفاجأة مش بيفكر وفعلا اللى جواه هو اللى بينطبق على تصرفاته
يعنى فى الوقت ده معدنه بيبان ويظهر من غير تفكير

kalamfady يقول...

هعمل زى الباشمهندس جورج ما عمل.....لو اضطريت انى اضرب الراجل ده

فتــافيت (رحاب الخضري) يقول...

مش عارفة بجد ممكن اعمل ايه
بس هي فعلا تستاهل لفظ الباشا عليها لانها ليه اصلا تروح له .. واحسن وقعت في شر اعملها وراجل سادي طلع القديم والجديد عليها

ممكن كنت اتصل بالبوليس واصور اللي بيحصل بالموبايل .. وادي البوليس الميموري .. لكن لا جاكت ولا انزل واعمل فيها السبع رجالة .. وبرضه الله اعلم لو كنت مكانه كنت عملت ايه

اول زيارة هنا بس بجد مونة اخر حااااااااجة

واتمنى نتواصل ان شاء الله

سلام عليكم

قيس بن الملووووح يقول...

في بلادنا العربية يغيب القانون واذا وجد فهو اعرج والشهامة تكون مع اهل الشهامة ...افضل شئ هو ابلاغ البوليس لو لم يكن احد في قلب المشهد سوي انا وهم اما اذا كان فيه ناس تاني داخل المشهد ممكن التصرف يختلف لانه في الحالة الاولي ممكن ان تكون الشهامة طريق الي الاتهام .
------------

"عندما يمضي بنا قطار العمر تسقط منا الكثير من التفاصيل الصغيرة التي قد تحول حياتنا الي براكين في الوقت التي لا تتحمل فيه الهزات البسيطة"

عاشقه وغلبانه يقول...

انا رأي انها بني ادمه
ومش معني انها بتغلط يبقي نموتها
سبحان الله يمكن لسه ليها نصيب في ايام تعمل فيها حاجه كويسه
غلطها ده بينها وبين ربنا
مش انااللي احاسب
ومش هاسيبها تموت وانا في ايدي اساعدها
حتي لو اقل حاجه احميها

يمكن مابلغش البوليس علشان ماضرش حد
بس علي الاقل اخدها من قدامه


ده علي افتراض ان عندي عربيه في دبي يامخنوقه
ههههههههههههههههههههههههه


كل سنه وانتي طيبه

E73 يقول...

بسم الله الرحمن الرحيم
السلام عليكم ورحمة الله وبركاته

قرأت المدونة كلها بكل مقالاتها حقا ممتعة ورائعة سلمت يداكِ وحفظكِ الله من الخنقة
ولكن هل فعلا يمكن لواحدة أن تحتمل كل هذا؟‍!
اللهم صبرها أكثر على الحياة
صبرك على (كيمو وبيبة) أكبر من صبرك على الباشا الله يعينك

E73 يقول...

أما بالنسبة لجورج فأعتقد إن الصدق نجاة
هو لا يعرف تفاصيل الموضوع ما قام به كان صحيحًا
ولكن من يفعل الصواب يتمه للنهاية
كان يجب أن يخبر الشرطة بكل ما حدث
لأن أقصى عقوبة لهذه الفتاة أنهم سوف يبعثوا بها على سفارة بلدها وبالتالي ترسل على بلدها على نفقة السفارة
هكذا هو في ورطة أكبر

MaNoOoSh يقول...

بصراحة مقدرش اقول ممكن اعمل ايه لان اللى ايدة فى المية مش زى اللى ايدة فى النار ابدا.. وانفعالنا فى الموقف نفسة هو اللى بيدفعنا ناخد رد فعل على حسب الموقف..
يعنى اكيد هيبقى نفسى انقذ انسانة فى كرب مهما كانت بس فى نفس الوقت هبقى متغربة وهخاف على نفسى بردو.
تحياتى

محمد عتلم يقول...

هاى مخنوقه ازيك وكل سنه وانتى طيبه
انا لو مكان جورج هاعمل زيه واوصل البنت للبيت وخلاص ومكانش ليه داعى للبوليس وللشوشره مانتى عارفه االبوليس فى البلاد دى زى اختنا الصغيره الغلبانه طيب وعلى نياته ومش فاضى للكلام الكبير ده

Unknown يقول...

أقولك يا ستي رأيي
لو كنت مكان جورج ومعايا عربية الأكيد الي هعمله بدون تفكير اني هآخدها بعيد عن الضرب بعدين أبقى افهمن منها ايه الوضع خاصة انها مضروبة ودمها سايل يعني مش رايحة هناك بإرادتها وعلى حسب الموضوع نقرر وربنا ستر في الباقي ماهو حتى لو اتورطت فيها هأطلع منها أكيد ربنا مش بيبلي حد بيساعد حد الا ويقف معاه وينجيه ولا ايه
ربنا يستر علينا وعلى أعراضنا ويحمينا من بطش الظلمة ويلطف بكل مسلم كان
مودتي

من غير عنـــوان يقول...

سؤال صعب بس اجابته واضحة...
الشهامة والمرؤة من صفات الإسلام والتحضر.. وإتقاذ الملهوف.. والحساب عند خالق الكون... ختى وإن طال المنقذ بعض الأذى.. ولكن ليس بالضرورة أن نرمي بأنفسنا للتهلكة...

قيل أن مسيلمة الكذاب أسر اثنين.. وسألهما... من رسول الله... الأول قال محمد عليه الصلاة والسلام... والثاني قال به أنت يا مسيلمع في حين أن يبطن بقلبه أن الرسول هو محمد عليه الصلاة والسلام.. فقتل الأول وأطلق سراح الثاني...
وفي الأثر أنه الأول تمسك بالحق فاستشهد فدخل الجنه... وأما الثاني فأخذ برخصة الله فنجا...

ولكل اختياره.. ودفع الضرر أولى من جلب المنفعه..

وقد يتغير التصرف بتغير المكان ... أو بمعنى أدق في الغربه عن الوطن...

وهذا لا يعفي ولا يدين أي تصرف..

لأنها نسبيه ولا يكلف الله نفسا إلا وسعها...

_____________
أنا جيت مخصوص عشان انت طلبت رأيي...

أمنياتي

فشكووول يقول...

السلام عليكم يامخنوقه هانم ..تحياتى
اعتذر للتأخير
طب وانت عايزه رأي فى ايه .. والله كلام الباشا معقول وصحيح .. بس والله اعلم ايه اللى بين الراجل اللى لابس ما فيش حاجه والبنت اللى برضه لابسه ما فيش حاجه ..
هو موقف صعب وجورج الله يكون فى عونه .. المثل بيقول ابعد عن الشر وغنى له ..
هى البنت اصلا كانت عنده ليه ..
شوفى بقى يا مخنوقه .. انت مخنوقه .. ما تخنقيناش معاكى عشان الحكايه دى بصراحه خنقتنى
تحياتى وسلامى الى الباشا

مسدس صغير يقول...

يا جماعة اللى يعمل حاجه زى دى لازم يتحمل العواقب عشان ياخد الاجر لان طبعا الغُنْم بالغرم..فاللى يعمل كده ميندمش وربنا هيعوضه خير ويجازيه كل خير..
دا رأيى.

أحــوال الهـوي يقول...

بصراحة التصرف وليد اللحظه و اعتقد ان اللي حضرتك و صفتيه انه كان انقاذ حياة فتصرفه صحيح و لكن لابد ان يكمل الوضع باتصاله بالبوليس و التحفظ علي البنت و الموضوع يتحل بالقانون

اعتقد ان ده تصرفي دون اعتبار بموضوع الاقامة او غيره
و لاني مقيم في السعوديه ... كنت ساصبح سلبيا و يولعوا في بعض لان القانون هنا مختلف كل من شاهد او شارك او فكر يشاهد .....الخ يوضع في السجن الي ان يثبت صحة وضعه

تحياتي

الشموع البيضاء يقول...

اول مره ازورك لانى كان بقالى فتره منقطعه شويه مش هعلق على موضوع جورج ونشوف الرجاله هيقولوا ايه
بس بجد تحياتى على مدونتك واسلوبك

Hanan Elshafey يقول...

بصراحه جدا
الباشا عنده حق
هابي فالنتين
كل سنه وانتي طبيه ومش مخنوقه

الجواز و سنينه يقول...

اولا ازيك يا مخنوقه و الله بتوحشينى جدااااااااا
ثانيا كل واحد بيتصرف فى المواقف الجامده باللى بييجى فى باله من غير ما يفكر
اسعدنى اوى تصرف جورج حتى لو جابله مشاكل لانه اللى زيه بيخلى الواحد يحس ان لسه فى الدنيا امان
بس تصرفه برضوا كان فى غير محله يعنى رأى الباشا فيه كتير من الصواب هو جاب لنفسه مشاكل و كان ممكن يتورط اكتر من كده
يعنى اللى عارف الدنيا صح هايتصرف زى الباشا و يولعوا همه الاتنين
يعنى الشهامه مطلوبه بس للى يستاهلها
اوافق الباشا و ارفعله الشابوه كمان

moustapha achraf يقول...

السلام عليكم
بصراحة انا رأيى من رأى الباشا هو دخل نفسه فى موضوع هو مالوش فيه خالص بس خلاص مدام الى حصل حصل
انا اركبها معايا بس اسلمها اعتقد ان دة حيبقى احسنلها علشان الى كان بيضربها كدة كدة حبيجبها تانى فتتسلم احسنلها من ان هى تفضل مطاردة كدة

barbie girl يقول...

أ،ا شايفه أن جورج أتصرف صح .. تصرف كله شهامة ورجولة .. بس مش مشكلته ان الموقف نفسه كان ملخبط

غير معرف يقول...

بصي من غير زعل انا رأيي من رأي الباشا ان دي لا مؤاخذة واحدة لا مؤاخذة وانا مش هشبه نفسي معاها
بدليل انها رفضتن انه يبلغ البوليس قديما قالوا ( تموت الحرة ولا تأكل بثدييها )
سلامي ليكي وللباشا

بنت عرب يقول...

والله يا مخنوقه الباشا عمل زي الناس اللي انا عايشه معاهم هنا في بلاد الخواجات لندن تلاقي الواحد بيموت قدامهم وهما مطنشين عادي. لكن نحن مش كده ...انا مع جورج كنت هساعدها..مهما يكون دي واحده ست..وربنا الوحيد العالم ما في النفوس ..الرجوله والشهامه تحتم علينا ذالك ماذا والا على الدنيا السلام.

Unknown يقول...

الصراحه يا مخنوقه انا المره دي مع راي الباشا
عيش ندل تموت مستور
ههههههههههه
ايوه صحيح واحده كده
ادخل ليه
دي حلال فيها الي اتعمل معاها
دي فكرتني بالبنات الي بيجوا المستشفى وواخدين سم عشان يموتوا نفسهم ومبهدلين اهاليهم وراهم
بحس اني هنفجر وابهدلهم وبمسك نفسي بس بفتكر اني دكتورة والمفروض اكون رقيقه وقلبي رحيم عليهم واكلمهم بعقل
لكن هما يستاهلوا لا مؤاخذه ضرب ....

ragel keber يقول...

على فكرةانا عايش في دبي وعايش الجو وبصراحة يا مخنوقة اللى حصل فجأتن ده يخلى الواحد يجرى ويقف قدام المتهور اللى ضربها ومش بعيد يعمل معاه مشكلة لأنه حصل فجأتن لأن الواحد مش بيفكر دى مين وده مين بالنسبة لها في الظروف دى ، لكن اللى بعيد وبيفكر بهدوء يقول زى الباشا والحقيقة هى تستاهل اكتر من كده 0

بنت عرب يقول...

مشكوره يااختي وما تقصري والله اسعدني تعليقك ومرورك الجميل وسيشرفني لو نبقى اصحاب... على الاقل عندنا عامل مشترك (الغربه). وبتأكيد سأداوم على قرأت كل جديدك ...مدونتك خفيفه على القلب واسلوبك مرح وجميل وهذا ما شدني ليها.
منتظره جديده...وبتوفيق انشاالله

"يارب..يارب استجيب لدعوة المخنوقه....وابعث...امين"

أميرة الجنة يقول...

هو غلط لما اداها الجاكت بس رايى انه راجل شهم وعمل الواجب
ده رايى
وربنا يسترها معانا
تقبلى تحياتى
مدونتك مخنوقة ممتعة ورائعة جدا
دمتى بخير

حاسوباتيه يقول...

بصي انا مع راي جوزك بصراحه لان فعلا الناس دي ماتعرفيش يتفكر ازاى او ناويه تعمل ايه انا لو مكانه هسوق عربيتي وامشي وممكن ابلغ البوليس بس مادخلش لان واحده زي ده او دي ممكن يلبسوا الواحد قضيه في بلد غريب كمان عارفه لو في مصر كنت اقولك ماشي لكن في دبي لا

Don_Lochy يقول...

تقريبا انا كده الرجل الوحيد هنا اللي هيخالف الباشا
انا طبعا مش مع الباشا مع كامل احترامي لرأيه
بس انا مش مع فكره يا قاعدين يكفيكوا شر الجايين
احنا في زمن فيه بنات اشتغلت"نفس الكلمه القبيحه الانجليزى"بسبب ظروف
فيه اللى سابت البيت لسبب ماوجربت تعيش بشرف معرفتش في دنيا ال يالا نفسي

انا طبعا مش معاها في ده ومش بدافع
والحره تموت ولا تأكل بجسدها
بس انا قاصد ان نسيب الحساب لله هو ادري مننا سبحانه وتعالي
واحنا في الحاله دي امام موقف انساني يستدعي المروءة ومالناش هي مين ولا كانت بتعمل ايه
الله اعلم مايمكن مراته وهو مريض نفسيا لدرجه انه يعمل كده

انا مع جورج وياريت هو مايندمش ومايتغيرش

ELMASRYA - MOSLEMA LELLAH يقول...

انا رأيي من رأي جوزك يا مخنوقه

يتصل بالبوليس وخلاص

اللي عمله جورج ده غلط

ماينفعش ناس تغلط وناس تشيل ذنبها

خالص مودتي وتحياتي

غروب يقول...

ههههههههههههههه

انا لو مكانه هسيبها بصراحه ومتفقه جدا مع الباشا

هى لو محترمه مش هتعمل كده لكن دى ( نفس الكلمه الابيحه بالانجليزى) وتستاهل اللى جرالها واكتر

غير معرف يقول...

انا متفق تماما مع جورج
و اتصرف بما يمليه عليا ضميري و هو انقاذ الملهوف

طالما ان الواحد بيراعى ربنا اكيد ربنا مش هايخذله

غير معرف يقول...

موقف صعب جدا

بس مهما كان لازم يحمي البنت

مينفعش يسبها تموت قدام عينه

والحمد لله ربنا ستر

أم فريده يقول...

انتى مش واخدة بالك من حاجات كتير

جميل اننا نساعد الناس ونقف جمبهم بس

تفتكرى لو احنا ساعدنا حد والمساعدة دى دمرت حياتنا
يعنى اللى حصل لجورج دة يعتبر حاجة بسيطة والحمد لله تعدى

لكن انا عايزاكى قبل ما تسألى اى حد فى الدنيا على رأيه فى اللى حصل لجورج


أسألي جورج نفسة لو الحكاية دى اتكررت تانى هيعمل اللى عمله ولا هيريح دماغة ويقول وانا مالى؟

ارجو الاجابة


تحياتى وليا عودة مرة اخرى
واقولك رأيي انا


سلام

بنت الغربة يقول...

انا متشكرة ليكم كلكم على تعليقكم عندى ورأيكم الجميل اللى بصراحه عجبنى مع اختلافه
انا بقى لو كنت مكان جورج ..
وبما انى عمرى ماهاقدر اضرب الراجل اللى كان بيضرب الست دى ..
كنت هاعمل زى جورج واخدها فى عربيتى واجرى من وش الراجل ده بسرعه..
بس صدقونى كنت هاخدها على البوليس (رضيت او لأ)لانى مش مستعده اتحمل ذنبها لو جرى لها حاجه ....
وكنت هافضل ورا الراجل ده لغاية لما يسجنوه..لان النوعيه دى حتى لو ربنا هداهم واتجوزوا ..عمرهم ماهيبطلوا ضرب فى الستات....لان ده مرض ..
وده بنى ادم مش طبيعى ولازم يتعاقب..
ومعلش انا مكنتش قادره ارد على تعليقاتكم لظروفى الصحيه..
وهاحكيلكم عليها فى البوست الجاى ان شاء الله...
شكرا تانى لكل اللى علق عندى...
تحياتى ليكم
سلااااااااااااام

سمكه واحده يقول...

مش ينكن تكون مراته ومتجوزها في السر هه مش ينكن ولا مش ينكن يعني وتلقيها معملتش الفطار ولا البطاطس ناقصه ملح قام بالحزام وخد عندك وهي بقي من الضرب تلاقيها مستحملتش حاجه تحطها علي جدتها قامت شالت اللبس كله وهو لما الضرب سخن شويه قام هو كمان شال الللبس عشان يعرف يضرب كويس مش عارفه الناس ليه ديما ظنها يئ كده!

بالنسبه للموقف نفسه يا مخنوقه نص صح مع جورج ونص التاني صح مع الباشا
النص اللي صح مع جورج لان دي شهامه وعلي افتراض محدش عارف الصح فين احنا بنعمل حاجه كواجب انساني والباقي رب العباد اللي يحاسب عليه بس عشان نحس بالامان في الدنيا وانها لسه بخير

النص اللي مع الباشا فيه علي افتراض انه عقاب رباني وانها لو حد كويس اكيد كان هيبقي موقفه غير كده وهي تستاهل كنوع من متاعب المهنه
بس في الاخر محدش يعرف يقول رد فعله غير وقت الفعل نفسه لان سعتها بيختلف بيكون بدون تفكير ولا ترتيب
تحياتي
جيت ارغي اهو

غير معرف يقول...

انا مع جروج وهو عما الصح بس المفروض انا كان سلام البنت الى البليس