THOUSANDS OF FREE BLOGGER TEMPLATES

الاثنين، سبتمبر 27، 2010

ضريبة اللامبالااااااااااااااااااااااااااااااااااااااااااااة 2

الوحده احيانا كتيييييرة بتبقى احسن من الاحساس المستمر باالاهانه والاهمال

او الأسوأ.....الخيانه..


عارفه انى اتأخرت عليكم فى تكملة حكاية غادة...بس ظرووف المدارس ..كل سنة وانتم طيبيييبين ...انشغلت معاهم شوية...


سيبتكم لما غادة كلمتنى بعد العمليه بتلات شهور علشان تعدى علي هي وماما علشان نخرج سوااا علشان عيد ميلادى...


وماما كلمتنى علشان انزل لانها مستنيه بالعربيه هى وغادة...


نزلت تحت على اساس ان غادة مع ماما فى العربيه....كانت المفاجأه انى لقيت غادة سايقه عربيه هونداى جديدة...


انا : ازيك ياغادة ايه الحلاوة دى....عربيه جديدة ..وعمرو خلاك تسوقيها عادى كده...



غادة : لا يامخنوقه دى عربيتى انا ..

انا : ماشى ياعم عقبال عندنا مبررروك ..عمرو جابهالك امتى..؟؟


غادة : مش عمرو اللى جابهالى ..اركبى يامخنووقه انا متضايقه قوى ومش ناقصه..وعايزة اتكلم معاك...


المهم ركبت معاها ...وماما ورانا فى عربيتها..

انا : خير ياستى ادينى سيبت امى وركبت معاك في ايه..؟؟؟

غادة : عمرو بيخونى...


انا : ايه ؟؟.. مش معقوله..اكيد انتى غلطانه...استحاله عمرو يعمل كده...خصوصا دلوقتى..


غادة : انتى شايفه كده...يعنى زمان كان ممكن...لما كنت ...لكن دلوقتى مالوش حجه ...مش كده..


انا : غادة مش قصدى ..انا اسفه..انا قصدى عمرو بيحبك ولو كان زمان متضايقك من

شكلك..دلوقتى الوضع اتغير وبقيتى حاجه تانيه خااالص...


غادة : ولا حاسه بأى تغيير من ناحيته...الوضع زى ماهو ...مافيش تغيير غير انه بطل يقولى ياكرنبه وياخيمه...


لكن علاقتنا زى ماهى...تريقه وتهزيق ورخاااامه...واهمااال ..حتى فى حياتنا الخاصه...


انا : طيب نتكلم فى ده بعدين...انت عرفت منين انه بيخونك..؟؟


غادة :خالتى جت تزورنى ..وقالت لى انها شافته مع واحده فى النادى اكتر من مرة...وكذا مرة كان بيوصلها..

انا : طب لما خالتك شافته ماكلمتووش ليه وسألته مين دى...

غادة : كلمته وقالها انها قريبته...راحت خالتى مصوراها ووريتها لى...


انا : وعرفتيها..؟؟

غادة : لا ولا عمرى شفتها من قرايبه خاالص...انا مش عارفه اعمل ايه يامخنووقه...اسأله؟؟؟


انا : اه اسأليه عادى ولا كأنك مهتمه...وشوفى رد فعله ايه..؟؟ وبلاش تكون نيتك وحشه جايز قريبته من بعييد وانت ماتعرفيش..


غادة : هاضحك على نفسى يامخنوقه...انا عارفه كل قرايب عمرو...


انا : حتى لو طلعت نزوة ياستى ....مش شرط يكون الموضوع تطور للخيانه...انت ممكن تلحقى الموضوع من اوله وترجعى عمرو تانى فى حضنك...خليك واثقه فى نفسك...انت بقيت مزة جامدة والله...


غادة : عمرو محسسنى انى بقيت اوحش من الاول ...وان اثار العملية منظرها وحش ...وان وشى خس جامد وبقى شكلى اكبر منه...وشعرى وطريقة لبسى ومكياجى مش استيل نهائى بالنسبه له...


انا : ايييييييييه الكلام الفارغ ده...انتى خسيتى قوى ..حوالى 25 كيلو...وده مش شويه...وبعدين اثار العمليه لازم تاخد

وقتها...الدكتور قاله كده...وبعدين انتى اموورة اصلا ياغادة ..وان كان على استيل الشعر والمكياج واللبس...يتغير..مش مشكله
انا شايفه المشكله فى علاقتكم الخاصه اصلا...دى لازم تركزى فيها لأن دى اللى هترجع عمرو تانى ليكى...


غادة : يعنى اعمله ايه..؟؟؟ بالعافيه يعنى..؟؟؟ انا كرامتى بقت تنقح علي... وبرضه انا ست ولي حقوقى الزوجيه...

واحيانا فعلا باعانى من الحرمان العاطفى ...والله ده حرااام...انا كرهت شكلى ...


انا : غادة حبيبتى لو ماحبتيش نفسك ...ماحدش هيحبك...ولو شفتى نفسك وحشه ..ماحدش هيشوفك حلوة...لازم تثقى انك زى القمر

وامراة مثيرة كمان...وتعامليه على الاساس ده...واتدلعى عليه على قد ماتقدرى ...تعالى نجيب شوية بيبى دول حلوين كده ...

علشان يشوف انت خسيتى قد ايه...وبالمرة كمان نجيب صبغة ...ونعدى على الكوافيرة بتاعتى...انا هاروحك عروسه النهارده

مع ان النهارده عيد ميلادى بس يالله اهو كله بثوابه...

ماقولتليش بقه منين العربيه؟؟

غادة : المقدم بتاعها من بابا والقسط هادفعه من مصروفى ...لما عمرو هايتخنق مني...
انا : ليه هو محتاج الفلوس دي ؟؟؟
غادة : لا بس استخسار...ليه اجيب عربيه..؟؟ مع انها فلوس بابا ...ومصروفى ده من بابا برضه...
انا : انت قلتيله دى فلوس بابا..؟؟؟ مش تقيله قوى دى ياغادة..؟؟؟
غادة : بافك عن نفسي شويه..ايه يعنى لما يزعل... ماهو دايما مزعلنى...ده انا مش فاكرة امتى قالى كلمه حلوة...
ياخد حبه من القرف اللى انا شايفاه...
انا : ربنا يهديكم انتم الاتنين...
المهم عملتلها كل اللى قلناه وجبنا لبس حلو لينا احنا الاتنين...ورحنا الكوافير ورجعت البيت ..بصراحه امورة قوى..
ونسيت الموضوع وانشغلت بولادى...
وبعدها بحوالى شهر وشويه...باكلمها عادى زى كل يوم لقيتها بتعيط وعايزانى اجيلها دلوقتى...
رحت لها ...لقيتها ر اجعه من عند الدكتور... ووشها احمر جدا ....بطريقه تخض...
انا : خير ياغادة مالك..؟؟؟ ومال وشك..؟؟؟
غادة : فى شوية شرايين صغيرة انفجرت من كتر العصبية والخناق..اصلى اتخانقت مع عمرو وشتمنا بعض..
انا : ايه؟؟؟؟؟؟؟ ليه كده.؟؟؟؟؟؟ وقدام الاولاد..؟؟؟؟؟؟؟
غادة : ماقدرتش استحمل يامخنوقه....اعصابى فلتت... حرااام اللى بيحصل لي والله ده ...(عيااااط جامد )
انا : طب اهدى واحكيلى ...ايه اللى حصل...
غادة : البيه كان نايم وانا باذاكر للاولاد ...ونسى الموبيل فى الصاله...وجاتله رساله...قمت فتحتها..الاقى رساله من
رقم مش متسجل...وقريتها...رساله قذرة زى صاحبتها...
انا : اه بتقول ايه يعنى....؟؟؟؟
غادة : بتقول...(وقريت لي الرساله )...( صعب قوى انى احكى الرساله فيها ايه...بس كلام ماتقولوش غير زوجه لزوجها بس )
انا : وعملتى ايه..؟؟؟
غادة : اتصلت بالرقم من موبيلي ...لقيت واحده بترد علي...وقلتلها ازاى تبعتى رساله زى دى لجوزى...تقوم البجحة تقولى اسأليه انا مين بدل ماتتخانقى معايا..وقفلت السكه فى وشي...
قومته من النوم واتخانقنا ...وقالى وانتى مالك انا راجل وحر اعمل اللى انا عايزه....فشتمته وقلتله اطلع بره بيتى...
...........................................................................................................
فضلت ساكته خااالص ...مش عارفه ارد وأأقولها ايه ...بجد..لو انا مكانها مش هاعمل غير كده...بس فى حالتى هاخد ولادى وهاسيب له البيت.....

انا : وهو عمرو فين دلوقتى..؟؟

غادة : مش عارفه ومش عايزة اعرف....انا كلمت ماما وبابا ...وزمانهم جايين...(وعياااااااط جاااامد )

المهم فضلت قاعدة معاها لغاية ماابوها وامها وصلوا ...وروحت لولادى...

كلمتها تانى يوم .....

انا : غادة حبيبتى ....طمنينى ايه الاخبار..؟؟؟ عمرو رجع..؟؟

غادة : لا بسلامته مكلم الاولاد بيطمن عليهم.... الظاهر مستنينى اعتذر له واتحايل عليه علشان يرجع...ده كااان زمااان

دلوقتى انا بصراحه مش شايفه انه يستاهل حتى انى ازعل عليه....

انا : يعنى ناويه على ايه..؟؟؟

غادة : بابا هيرفع لي قضية خلع...انا ماعدتش عايزاااه خلااااص....

انا : بلاش تسرع ياغادة...ان عندك 5 عيال...هتربيهم لوحدك...؟؟؟لازم ابوهم يكون معاهم....

غادة : ده مش تسرع ....ده متأخر قوى يامخنووقه....وولادى هاربيهم ..وهايشوفوا ابوهم ...بس مش شرط انى اكمل بقية

عمرى مع انسان أنانى وجاحد ومش شايف غير نفسه بس....ونسى كل حاجه كانت بينا...وماراعاش العشرة ولا انا ضحيت

قد ايه علشان خاطره.....ولا كنت باعمل ايه علشان ارضيه....ده كرهنى فى شكلى ومنظرى ...ده خلانى واحده تانيه غير غاده

انا بقيت اخد ادوية مهدئه ومنومة علشان اعرف انام من كتر التفكير...

انا : طب حبيبتى اهدى وبلاش تسرع وخدي وقتك ....وبلاش انتى تكلميه خلي باباكي اللى يكلمه....ويشوف هيوصل معاه لأيه..

المهم كنت باكلمها كل يوم تقريبا....وعمرو باشا مافكرش حتى يرد على باباها....وفضل كده شهر بحاله....لغاية لما باباها قرر يرفع

قضية خلع....

وفعلا رفع القضيه ...

والظاهر ان عمرو ماكانش متوقع كده نهائى....وراح لباباها علشان عايز يصلح....وطبعا ابوها رفض....وراح لمامتها...

وبقى يلف على قرايبها علشان حد يتدخل ويصلح...برضه مافيش فايده....

لغاية ماقررت ان هى تقابله...وقابلته ...وكلمته بمنتهى الهدوووء ....فى تفاصيل الطلااااق وحضانة الاولاد...والنفقه وغيره..

وحاول عمرو كتيير بالكلام الحلو والاعتذار ...انه يرجعها...مافيش فايدة...

بعدها راح لماما ...وخلى ماما تكلمنى علشان اروح لها واكلمه عندها.....فرحت لماما...

انا : اهلا ياعمرو ....خير..عايز ايه...؟؟

عمرو : مخنووقه انا عايزك تكلمى غادة وتقنعيها نرجع لبعض...غادة اتغيرت ..بقت واحدة تانيه..وانتى السبب فى ده..

انا : نعم ؟؟؟؟ انا المسؤووله انك خنتها..؟؟؟

عمرو : غلطه ...اى راجل بيضعف وبيغلط...انتى غيرتيها...بقت أنانيه وبتحب نفسها ونسيت ان بينا اولاد ولازم يتربوا مع امهم

وابوهم ...وهى لازم تسامح وتفوت عادى يعنى ...هو انا موتها..؟؟؟؟

انا : لا بجد انت شايف انك ماعملتش حاجه..؟؟؟دى كارثه انت متخيل ايه يعنى؟؟؟تزعقلك وتقولك ماتعملش كده تانى...

عمرو : لا انا اول راجل ولا اخر راجل بيعمل كده....انا مش مصدق هى ازاى تتنازل عنى بالسهولة دى...انتى السبب

انتى اللى خلتيها واحدة تانيه ....دى مش طايقه تقعد تتكلم معايا تانى...وغيرت رقم الموبيل...انتى المسؤوله انك ترجعيها

غادة مراتى اللى انا باحبها....غير غادة اللى بقت واحدة تانيه من ساعة مارجعتى فى حياتها....

انا : هو انت هتحملنى نتيجة اخطائك ومصايبك...؟؟؟ انا اللى قلتلك اهملها...انا اللى قلتلك تهينها وتتريق عليها....

ناقص تقولى انا الل قلتلك تخونها ....سيبت كل ده ...ومتضايق انى نصحتها انها تغير من شكلها..؟؟

عمرو : ايوة بدأنا بالشكل ....وبالتدريج اتغيرت كلها...واتغيرت من ناحيتى..دى ماكانتش بتتحمل ازعل دقيقه ...تقوم تسيبنى..؟؟

انا الدم غلي عندى على الاخر ...ولسه هارد واهزق...لقيت ماما بترد بمنتهى الهدوووووء...

ماما : عمرو يابنى ... الرسول عليه الصلاة والسلام قال ( رفقا بالقوارير ) وشبه الستات بالقوارير علشان رقيقه وسهلة

الكسر ....وانت كسرت القارورة بتاعتك ....عايزنا بقه نلمها لك ونلزقهالك ...ونقولك معلش بس ابقى خلى بالك المرة الجايه؟؟؟

في حاجات يابنى لما بتتكسر مابتتصلحش تانى.... وانت بدأت تصلح متاخر قوى...بعد ماتكسرت ميت حته....

وبعدين بنتى مالهاش اى علاقه باللى بتقوله ده....وفر كلامك لصاحبة الشأن ...شرفت...

ومشي عمرو ....وانا فعلا اتضايقت جدا ...وقعدت أفكر ...هل انا فعلا السبب انى غيرت غادة....هل لو هى كانت عرفت انه بيخونها

قبل ماتتغير شكلا ....كانت هتفوت له...وتقول معذور....من حقه ....اصل انا اهملت فى حقه ..وتدور له على اعذار...وتقول اكبر

دماغى ...واهو راجل زى بقية الرجااله...وضل راااجل ولا ضل حيطه.....

ولغاية النهارده ..القضيه شغاله ...وباكلم غادة عادى ....واعصابها بقت احسن....ولسه على موقفها....مش عايزة عمرو نهائى

تانى.....وبتعتبره مرحلة وانتهت من حياتها....

ايه رأيكم...؟؟؟؟ تفتكروا فعلا انا السبب زى مابيقول عمرو..؟؟؟

او كنت من شوية الاسباب اللى وصلت الموضوع للمرحلة دى؟؟؟؟

انا باكره خراااب البيوت...... واكيد باكره انى اكون احد الاسباب......

ياريت بقى تعلقوا وتقولوا رأيكم .... بس من غير خنقه ....انتم عارفين....انا مش ناقصه....

مخنوقتكم .............مخنوقه ....وعندى برد جامد....

سلااااااااااااااااااااااااااااااااااااااااااااام



49 التعليقات:

ستيتة حسب الله الحمش يقول...

سلامتك من البرد يا قمر
عودا حميدا والصفحة دي وحشتني خالص
مشفتش البوست اللي فات
ازاي؟
معرفش
قرأتهم الإتنين دلوقت
وكتبت تعليق انفعالي
لا يجوز
لما نعود من العمل بعون الله نكتب تعليق مش انفعالي :)
وربنا يصلح لها ولنا كلنا حالنا ويهدي الرجالة يا اوختشي
تحياتي

Mona Abo - Elso3od يقول...

انا لسه قاريه مدونتك النهاردة
طبعا لسه ما قريتهاش كلها بس اللي قريته عجبني اوي شوفت الحوار اللي تقريبا بيدور بيني انا و معظم اصحابي كل يوم .
شك و اهمال و خنقه ربنا يصبرنا عليهم
عندي مدونه صغيرة علي قدي لسه بتحبي
يا ريت الزيارة و ابداء الرأي
http://3aklwqalb.blogspot.com/

حنعيش يعنى حنعيش يقول...

المشكله مش فى الشكل والتخن وعمليات التجميل ... المشكله فى الشخصيه نفسها هيه اللى كانت عايزة عمليه تجميل ... انا مش مع الراجل ...بس مش مع الست ... وقبل مانقول ليه عمل كدة ... نسال نفسنا احنا عملنا ايه خلاه يعمل كدة .... الدنيا كلها حتتغير لو احنا اتغيرنا ... حديكى مثال صغير وقع من الزوجة فى الكلام ... فلوس العربيه دفعها بابا ... ما وراء الكلام ... ولا الحوجة ليك ... وفيه من دة كتير بس ما بيتقلش واحنا بنشتكى .... لاننا عمرنا ما حنجيب الغلط على نفسنا ... وكلنا عايزين اللى قدمنا هوه اللى يتغير مش احنا ... حاسبوا نفسكوا قبل ماتحاسبوا اللى قدامكوا ... القصة ان الزبون اتملى واللى بيتملى لازم يفور ...راجعى حساباتك يابت الناس ... وشوفى ايه اللى عجبه فى التانيه حتلاقى انك مابتعمليهوش ... وسيبك من حكاية الكرامه وعزة النفس وبلاش خيبه وحافظى على جوزك الخلع مش حل

الزهرة البرية يقول...

أولا ألف سلامة عليكى من البرد ياحبيبتى وإن شاء الله ديما معانا ومنورانا ومش تغيبى عننا وربنا يوفق الأولاد وتكون سنة دراسية سعيدة عليهم

ثانيا بقى بالنسبة لسؤالك وإنك السبب بجد اللى أنا شوفته من المرة اللى فاتت إنك حاولتى مع صاحبتك إنها تصلح حياتها وبصراحة مش أخطأتى ده بجد ومن غير أى مجاملة كونك إنك تساعديها تبقى حلوة فى عين زوجها ده مش حاجة بسيطة ومش يعملها أى حد غير صديقة بتحب صديقتها ومش تحسى بالذنب لأن بجد إنتى فعلا مش غلطى وكون إنه بيرمى أخطاءه عليكى فده ضعف منه هو وعدم قدرة على حل مشاكله وخطأه من البداية اقفى مع صديقتك للنهاية ولو فى نصيب إنهم يرجعوا لبعض أكيد ربنا هيصلح بإذن الله وأرجو من الله إن الحال يتصلح ويوصلوا لحل يرضى جميع الأطراف

دمتى بكل الخير والحب والسعادة
Joudy

ستيتة حسب الله الحمش يقول...

عارفة يا دولي لو هي مخلفة أقل من قبيلة
كان كل الناس
اللي يعرفوها واللي ميعرفوهاش قالوا لها ده عشرته حزن
ده عشرته حرام
بس دي خلفت منه خمسة في عشر سنوات
ارنبة متنقلة
قصة اصله كان عاوز عيال كتير دي غير مقنعة بالمرة
وانه فجأة إنقلب لشخص كريه لا يجيد إلا السخرية والكذب وقلة الأدب والدناءة برضه غير مقنعة بالمرة
هو كده من زمان
من زمان رجل خطر على الصحة العامة
ومع هذا سمحت لنفسها انها تستمريء الكذب على نفسها وتحاول المحاولة الفاكسة القديمة بتاعة
ألا أربطيه جنبك يا هبلة بالعيال

النهاردة ومع تطور حالته حتى نهاية منحناها
فيه حلول
مش حلول علشان يتغير
اللي زي ده مش بيتغير
ومحدش بعد ما بقى في الثلاثينات بيغيره شيء غير زلزال يهديه أو يهده
الحلول علشان الخمس ارواح اللي في رقابتهم هم الإتنين يعيشوا بين أب وأم

1- تستمر فترة محترمة منشفة طريق ريقه
ماهو هي دي الضربة اللي في ايدها لكل السفالة المتكررة سنوات عجاف طوال
2- قاعدة مطولة بينهما بعد محايلة عليها وكأنها الليدي ديانا
والقاعدة دي تكون هي محددة فيها مواضيع غاية في الأهمية لمناقشتها
أ- فلوس من ابوها نو
خالص
الصرف عليها وعلى العيال من التنبل
لأن سعادتها لما بتجيب من بابي
بتوفر للدنيء ده احد ادوات المتعة الحرام
وهي فاكرة نفسها بتقول له انا مستغنية
بس لأنه دنيء فهو مستمريء الإستغناء ده
يبقى احد وسائل تعذيبه اجباره على الصرف
وبما انه ماركة ليفة وهباب حلل
يبقى ببساطة الستات بتموت في دباديبه علشان الجيب
ها تعيش حياتها في خناقة فلوس كبيرة مع التنبل البخيل
فليكن
وما الحياة إلا دفع ثمن اختيارات

ستيتة حسب الله الحمش يقول...

ب- إنت عاوز ترجع ليه؟
علشان ولادك؟
هم عايشين معايا أحسن عيشة وكده كده أنا اللي بذاكر وبحمي وبطبخ وبلبس وانت كده كده يا دوب - حاضر غايب - محفظة فلوس
عاوز ولادك يبقى تدفع من صحتك في تربيتهم
مش لاب توب وعامل لي نفسه ملك الفيس بوك وملك الفياجرا
عاوز ترجع علشان التكية؟
قفلنا التكية
نو دادي إني مور
عاوزني أنا؟
بأمارة إيه؟
هات لي أمارة تقول انك افتقدتني
وده مصطلح يختلف تماما عن انك افتقدت الخدامة اللي ببلاش
هذه المرأة البشعة الوحشة اللي كرم ربنا ان سعادتك شفتها وخلفت منها

ج- أي وسيلة تثبت لي مرة اخرى ان الزوجة اخر من تعلم يبقى كل اللي احنا قعدنا اتكلمنا فيه ده تبله وتشرب ميته
لن اسمح بإهانة كرامتي اكتر من كده
ومفيش ست احسن مني وغصب عنك
"يا دولي عيب دي اسمها غادة شوية ثقة بالنفس تناسب الإسم يا بنتي :)"
مين ها تجيب لك خمس قرود
لأ وتربيهم
لأ وتصرف على جسمها علشان تعدله من توابع زلزال عيالك
لأ وكمان قلة ادب وسخافة ولا كلمة تشجيع واحدة

من الأخر نتفق او نختلف
لازم ترجع لأنها ها يطلع بظابيظها في خمس عيال وها تدفع تمن غلطة كبيرة بجواز الراجل ده والخلف منه بإفراط لوحدهاااااااااااااااااااااا

طيب عمل نفسه قنصل الوز
قلة من منطقة ريفية يمكن تكون بخمسة عشرة جنيه ووراه على طول
ويبقى جزرة وقطمها جحش بمعنى الكلمة

ربنا معاها
تحياتي

بصي يا مخنوقة ياختي
لو صمد مع هذا

Tears يقول...

اول مرة اجى مدونتك و بصراحه اسمها شدنى و لما جيت و شفتها شدتنى اكتر

رائعه و متـالقة


دمتى بخير

أحــوال الهـوي يقول...

لن ادخل في تفاصيل ولا كلام مسهب او تبريرات

وواضح ان نصايحك لم تكن الا لراب الصدع و اصلاح ذات البين
و لانه يعشق التملص من افعاله فراي ان يلقي اللوم كله عليك حتي يشعرك بالذنب و تنجحي باقناع صديقتك علي التراجع
و الموضع الاهم الاولاد
كيف ستستطيع العناية بهم و رعايتهم وتوفير مصاريفهم الان و غدا ؟؟
هل الرجوع بكرامه سوف يردعه اشك

الوحيد الذي سوف يقرر هي فقط صاحبة المشكله
تحياتي

كيــــــــــــارا يقول...

انا شايفة كلام دكتورة ستيته صح جدا

غير معرف يقول...

شوفى يا مخنوقه انا اتخنقت اكتر منك
انا غير معروفه اللى قلت لك المره اللى فاتت انه راجل عارف انه ميسواش
طب ليه بيرمى عليكى اللوم لانه راجل فاشل زى ما كان بيرمى عليها اللوم فى عدم سعادته فاشل و بيدور على شماعه لفشله و لما المدام فاقت و عرفت انه مش امله ولا حاجه طبعا كرامته وجعته ده غير انه هيفقد الميغه اللى كان عايش فيها واحد بخيل زى ده هيلاقى فين جوازه ببلاش و لأ و اب بيصرف على بنته فى بيتها
فعلا زمن عز فيه الرجال
و اللى زى ده مش هينصلح حاله خليها تخلعه و تلتفت لعيالها و تربيهم باعصاب هاديه بدل ما يتربو فى جو مشحون و غير محترم يطلع اولاد غير اسوياء
تحياتى

E73 يقول...
أزال المؤلف هذا التعليق.
E73 يقول...

سوري بقى يا مخنوقة

رجعت بعد ما جرعة النرفزة قلت شوية

وقريت كلام ستيتة بجد حل عملي جدا 100% وأهم حاجة فيه نوو دادي إني موووووووووور بمعنى الكلمة

الأفواه والأرانب هو اللي هيصرف عليها

ان كان منطقها زمان اربطيه بالعيال فلازم منطقها دلوقتي يبقى قصقصي ريشه قبل ما يلوف على غيرك

وكله بثوابه بجد لما نشوف آخرتها وساعتها بجد هيبان على حقيقته بدل ما يدور يرمي بلاويه على الناس

غير معرف يقول...

الأمارات ضحية عملية نصب عالمية !

الأمارات تتعاقد مع كوريا الجنوبية لبناء 4 مفاعلات نووية ب 20 مليار دولار بالأمارات!!!!!!!!!!!!!!!!!!

الطاقة النووية السلمية أصبح موضوع قديم عفى عليه الزمن ومحفوف بالمخاطرومعظم الدول المتقدمة بدأت تستعمل بدائل أخرى سلمية للطاقة أقل تكلفة وأقل خطرا وتحقق نفس النتائج .. فلماذا لانبدأ من حيث انتهى الأخرون؟ لماذا نشترى دائما التكنولوجيا القديمة سواء فى المجال العسكرى أو السلمى؟.

ايطاليا والمانيا يعتبران من أكبر الدول الصناعية فى العالم .. الأولى لا تستخدم الطاقة النووية والثانية ستتوقف عن انتاجها واستخدامها فى سنة 2020 وحاليا تستورد الطاقة الشمسية من أسبانيا وفى المستقبل القريب من الجزائر.

الإمارات يستطيعون تغطية كل احتياجاتهم الكهربائيه وكذلك تحلية مياه البحر من الطاقة الشمسية و طاقة الرياح و أستغلال النفايات فى أنتاج الطاقة .

هناك 5 مقالات هامة عن هذا الموضوع و هى النووى كمان و كمان ـ كارت أحمر ـ كارت أخضر ـ الأشعة الذهبية - ألوان‏.

وهناك دراسة علمية تتوقع غرق 6 % من مساحة الإمارات أجرتها هيئة البيئة في أبوظبي أن شواطئ الإمارات عموما وأبوظبي خصوصاً، ستتأثر بالتغييرات المناخية التي تؤثر في الكرة الارضية، وتنبأت بتعرض 85 % من سكان الدولة المتركزين في المناطق الساحلية التي تضم نحو 90 % من البنية التحتية للدولة ـ القائمة الحالية والمخطط لها - لخطر ارتفاع مستويات البحر.وستكون أبوظبي الأكثر تأثرا، إذ تراوح المساحة المتوقع تأثرها بالغمر بين 712 و3904 كيلومترات مربعة.

و حل هذة المشكلة بالتفصيل فى مقال الحل أسمه هولندا.

أرجو من كل من يقرأ هذا أن يزور مقالات ثقافة الهزيمة بالموقع التالى www.ouregypt.us

ندى الياسمين يقول...

منوره يا مخنوقتي الجميله

ايه ده يابنتى
حرام عليكىده انا قريت البوستين امبارح وما نمتش بسببهم يا شيخه

كنت متغاظه اوي وربنا ونفسي اجي اخد ابن ستين تيت ده قلمين او بوكسين

دى سفاله وقلة ادب يا شيخه

وطبعا ده راجع للهبله الى كان متجوزها وعمال يستهبل فيها

وراجع للمجتمع الغبي المتخلف الى مخلي الست دايما حاسه انها معيوبه

بصي يا ستى رايي فى الموضوع

انتى مش غلطانه خالص خالص خالص
وحتى لو كنتىانتى السبب انها ادته بالجزمه فده كويس اوي وهايعدل الموازينالمقلوبه


بس نصيحتى لها انها تغير من نهجها هى دلوقتي تخلصت من عقدها من حكاية شكل جسمها
لازم تثق فى نفسها بقى شويه وتهتم بنفسها عشان نفسها مش عشان تعجب جوزها بس

وبالنسبه لجوزها انا شايفه انها ترجعله بس بشروط تقطم فيها رقابته ومناخيره الى طالعه على قلة فايده

تبعد فى حربها معاه عن قصة فلوس بابا الى فى الغالب خلته يحاول اذلالها

لانه بطبعه انسان مادي وشايف ان دي حته ناقصاه فكان بيدمرها من ناحيه تانيه
مصروفها وفلوس ابوها دي تحوشها بعيد تماما وما تصرفهمش فى البيت

وما تلوحش بيهم كل شويه وتاخد منه هو فلوس لطلبات البيت وطلباتها هى كمان
ومسؤلية العيال بينه وبينها بالنص تشيل على قفاه مش تشيل هى كل حاجه لواحدها وتسيبه هو يتفرغ نزواته بن ستين تيت ده

تحسسه كمان انها هاترجعله مش عشان العيال بس انما عشان تبقى ادتله اخر فرصه فى حياته يا اما يحافظ عليها يا اما يغور

انا شايفه انه ممكن الميزان يتعدل بعد ما حس انها مش حاجه مضمونه وعمرهاما هاتتمرد عليه

من الاخر لو هاترجعه ترجعله بصفحه جديده لها قوانين جديده غير قوانين باحبه يا بابا الى هى اتجوزت بها

وده كله عشان بينهم عيال وعشان هما بدأوا غلط
فيدوا لنفسهم فرصه يبداوا تاني صح

بس خلاص

متغاظه اوي هاكملك على الاميل

ندى الياسمين يقول...
أزال المؤلف هذا التعليق.
ندى الياسمين يقول...
أزال المؤلف هذا التعليق.
ندى الياسمين يقول...
أزال المؤلف هذا التعليق.
ندى الياسمين يقول...
أزال المؤلف هذا التعليق.
ندى الياسمين يقول...
أزال المؤلف هذا التعليق.
ندى الياسمين يقول...
أزال المؤلف هذا التعليق.
ندى الياسمين يقول...
أزال المؤلف هذا التعليق.
ندى الياسمين يقول...

معلش يا مخنوقه حصل ايه مش عارفه فى الاكونت اتنشر التعليق اكتر من مره ومسحتهم

ندى الياسمين يقول...

دكتور اسلام

رايك مش عادل ابدا

هو الى بدأ مش هي

لازم هى تلاقي سكه توجعه بيها

وبعدين معلش يعنى العربيه هىالىوجعته؟؟

طب والشقه الى فى القاهره ؟؟

طب والمصروف الى اد كده كل شهر من يوم ما اتجوزت ؟؟؟

واكيد فى غيره

بص هو الى حاسس معاها بالنقص من ناحية الفلوس

بالتالي بيحاول اذلالها من ناحيه تانيه
لانه باختصار واطي

هاتعصبوني اهو واغلط وكده

هو دور على غيرها عندها حاجتين

اولا هو الى بيصرف عليها
ثانيا بتبعتله رسايل زي الى شافتها مراته

ما علينا ده موضوع يطول الكلام فيه

بصراحه يا دوك حاسه انك ظلمتها برايك

ومن عندي انا طز فيه وفى الى هو بيدور عليه وطزين فى الجواز الى يبقى كده
ومليون طز فى المجتمع الظالم

ندى الياسمين يقول...

ستييييييييته حياتي

طول عمري اقول ستيته توأم روحي يا ولاد

بالظببببببببببببببببببببط كده

احلام جوليا يقول...

الف حمد لله على سلامتك يا مخنوقة
لا انت مش السبب كونك رجعتي لغادة ثقتها بنفسها ده ممتاز بصراحة بس الخطأ فيما حدث بعد ذلك غادة نفسها على الرغم من سوء زوجها فمجتمعنا حيحملها الخطأ كعادة الرجال جميعا الخطأ دائما من الست وعلشان نعمل لغادة توازن كان لازم نعمل لها تجميل في عقلها اولا : تبطل تعايرة بفلوس بابا وتوازن في كلامها معاه
ثانيا : تتحلى بهدوء الاعصاب وده بقرأه القرآن كل يوم
ثالثاً : تبدأ تضع بعض السحر على شخصيتها بممارسة الغموض النسائي على زوجها تبتسم بميعاد وتتكلم بثقل زي ما كانت مع زوجها وهي لسه في قصه الحب الاولى
رابعا تهتم بالي بتلبسه في البيت وتوطي صوتها مع الولاد وتحاول تبقى جذابه تضحك وتهزر مع ولادها قدامه يعني تخليه يسال نفسه ايه الي حصلها هي كانت كده ولا اتغيرت تحاول تجمل حياتها وتجذب انتباه
خامساً واهم شئ ضبط النفس متقولش ليه انها اكتشفت خيانته لانها كده حتضطر تواجهه وهي لسه مش جاهزة ودي النصيحة الخاطئة الوحيدة من وجهه نظري يا مخنوقة ومتزعليش مني
سادسا : تحاول تعرف مين دي وتبقى ايه لجوزها وتلاعبها بصحيح تعرف عنها كل حاجة وتحاول تفسد لها حياتها علشان تخسر جذبها لجوزها وطبعا حتقولي جبتي الكلام ده منين حقولك في موقع مخصوص على النت بيساعد الستات الي زي غادة صاحبتك وواحدة متخصصه وحكايات بالالوف عن كيف تتصرف الست التي تعرضت للخيانة الموقع اسمه منتدى بلقيس والموقع ده اظن مفيد لمعظم الستات ازاي تبقى انثى وكمان تبقى قوية بتدون تناقض وده الي كانت غادة محتاجاه واظن لسه محتاجاه وطالما وصلت للخلع راي الخاص ساعديها انها تاخذ استشارة من الدكتورة المسئولة عن الموقع ويمكن تلاقي لها حل ترجع جوزها وتدي له درس وهي كمان تتغير لان برضه ده هي محتاجاه لاستقرارها ارجو مكنش زعلتك وانا مقدرة للي عملتيه وتعبك مع صاحبتك وطبعا لا لوم عليك وانت مش غلطانة انت ساعدتيها وقطعت معاها نص المسافة للاصلاح لان ده اول كلام كانت حتقوله لها الدكتورة تغير شكلها الاول بس فاضل النص التاني وده اظن هي محتاجاه وبسرعة

احلام جوليا يقول...
أزال المؤلف هذا التعليق.
احلام جوليا يقول...
أزال المؤلف هذا التعليق.
بنت الغربة يقول...

ستيته حبيبتى
معلش اتاخرت فى الرد على التعليقات علشان غادة كانت عايزة تقراا كل التعليقات وتشوف ردود افعال الناس..
رأيك صحيح تماما وأنا قلتلها قبل كده كتيير انها ماتدخلش فلوس باباها فى حياتها الا للضرورة القصوة..
اما بالنسبه انها تفكر ترجع له او لأ..
فده يرجع لها لوحدها ..لأنها هى اللى
هتعاشره وهاتعيش معاه..وده يرجع لاحتمالها وقدرتها على المسامحه والنسيان..واولا واخيرا راجع لعمرو اتغير ولا لأ..

وهل هى هتصدق التغيير ده ولا هيبقى وقتى وترجع ريمه لعادتها القديمه..
عموما الايام هى اللى هتبين سوا داوت الجرح او زاد اتساع الهوة بينهم..
ومن الاخر انا صعبان علي الاولاد بس..
وربنا يقدم اللى فيه الخير
وتحياتى ياقمر وشكرا لمتابعتك ياروح قلبى....وشكر خاص من غاده كمان..
تحياتى

بنت الغربة يقول...

منى بو السعود
انا رديت الزيارة اهو.مدونتك رقيقه قوى..وتصميمها حلو..
وانا معاك كل الرجاااله خنيييييييقه
وللأسف كلهم زى بعض..
بس بلوة عن بلوة بتفرق..وربنا يصبر الجمييع..
تحياتى

بنت الغربة يقول...

هنعيش يعنى هنعيش
اولا يادكتور اسلام ..( انا عرفت اسمك من تعليق ندى الياسمين)..
انا هارد على جزئية (سيبك من الكرامه وعزت النفس)..لانها استفزتنى اخر حاجه الحقيقه..هو الراجل بس هو اللى عنده كرامه وعزت نفس.؟؟؟بمعنى لو الموضوع عكسى وكانت هى اللى خانته..
كان هيسامحها وطظ فى كرامته وعزة نفسه..ولا ربنا وقع عقوبة الزنا على الستات بس والرجاله لأ..؟؟؟
على اساس ان الست كائن هلامى ليس له كينونه ولا شخصيه ولا كرامه..؟؟؟

اما بالنسبه لغادة..
فهى ردت عليك وانا باسجل ردها مش اكتر...
هى بتسأل سؤال واحد..
ربنا ادى الحق للزوج انه يتزوج زوجه تانيه لو زوجته الاولى قصرت فى الحقوق الزوجيه..وده علشان مايقعش فى الحراام..طيب تعمل ايه الزوجه لما زوجها يحرمها من حقوقها الزوجيه وهو نااايم جنبها..مع احساسها دائما انها ااقل من انها تاخد الحقوق دى..
تفتكر تعمل ايه..؟؟؟
وبتقولك كمان انت معاك حق ..اللى بيتملى لازم يفووور...وهى اتملت على الاخر..وانفجرت..
ده ردها على حضرتك...والاختلاف فى الراى لايفسد للود قضيه..
تحياتى

eng_semsem يقول...

مش معنى ان في راجل وحش يبقى كل الرجاله وحشين والستات برده مش ملايكه انا ما بكرهش حد ولا ضدهم لان ده اختي وامي وبنتي وان شاء الله مراتي يبقى ازاي هكرهم بس انا شايف الراجل والست بشر معرضين للخطا ده بيغلط وده بيغلط المهم اللي يحاول يصلح الغلط وبانسبه لموضوعي للحديث بقيه مش ده نهايتي انا عمري ما قفلت بابي غير عشان اجمع نفسي وارجع من تاني

بنت الغربة يقول...

الزهرة البريه
جودى
حبيبتى شكرا قوى لمتابعتك..وكلامك الرقيق..وصدقينى انا حاولت كتيير اصلح بينهم..
بس للأسف غادة مش قادرة تنسى ولا قادرة تتخيل نفسها معاه تانى..بعد ماخانها..
وعموما ربنا يهدى الجميع..ويصلح لهم الاحوال..
تحياتى ياقمر

بنت الغربة يقول...

Tears
شكرا ياستى على الزيارة الجميله دى وكلامك الرقيق..
وكان نفسى اعرف رأيك فى الموضوع ده..
عموما ياريت ماتبقاش الزيارة الاخيرة..
دمتى بكل الود ياجمييل
تحياتى

بنت الغربة يقول...

احوال الهوى
شكرا لتعليقك غير المتحيز للرجاله..
ومحاولة تبرير اخطائهم..
وربنا يشهد انا حاولت قد ايه اصلح بينهم لكن اثر الخيانه صعب جدا ازالته..
ومعاك حق ان قرار العودة ده فى ايد غادة بس ..لأنها هى اللى هاتعاشره وتعيش معاه..
ربنا يصلح الاحوال للجميع
تحياتى

بنت الغربة يقول...

كيارا
حبيبتى ازيك ..
فينك من زماان..وانا معاك ان كلام ستيته عقلانى جدا ومنطقى للغايه..ومعاها حق تفكر فى الاولاد قبل كل حاجه..
بس كل ده يرجع اولا واخيرا لتقبل غادة فكرة المسامحه والرجوع لعمرو تانى ونسيان الخيانه..
وده مش سهل ابدا..
وربنا يهدى الجميع..
تحياتى

بنت الغربة يقول...

غير معرفه
تحياتى ليكى اولا ياستى..
وانا معاكى فى كل كلمه قلتيها..
العمر فيه قد ايه علشان الواحده تعيشه من غير كرامه وفى جو مشحوون بالخيانه والاهانه والاهمال..؟؟
وليه؟؟ هى تاخد حقها منه من نفقه ومؤخر وتربى ولاها وربنا يعوضها خير فيهم باذن الله..الحياة ابدا ابدا مابتقفش عند رحيل الرجل..
وربنا موجود يحميها ويهون عليها ..
تحياتى ياجميل

Mona Abo - Elso3od يقول...

شكرا لزيارتك وصل الواجب
ومستنيه البلوة الجاية .....قصدي البوست الجاي :))

بنت الغربة يقول...

E73
شكرا ياحبيبتى على متابعتك الدايمه للمدونه..وانا معاك ان رأى ستيته حل عملى وعقلانى جدا ..بس غادة حاليا مش قادرة تفكر اصلا فى الرجوع اليه تانى ورافضه الفكرة من اصلها..
جايز مع الايام الجراح تتداوى...
وجايز عمرو يتغير وهى تحس بالتغيير ده فتفكر فى الرجوع..
كل ده تحدده هى غادة وحدها ..هى قرت كل التعليقات وهى اللى تقرر..
وربنا يصلح لها الحال..
تحياتى

بنت الغربة يقول...

غير معرف بتاع الامارات
اولا انا سيبت الامارات من سنه..
تانيا ..ده علاقته ايه بالبوست..
تالتا وده الاهم ....وانا ماااااااالى

بنت الغربة يقول...

حبيبتى ندى الياسمين
انا معاك ياقمر فى كل اللى قولتيه..
وغادة قرات كل تعليقاتك ..وهى مقتنعه ان فلوس باباها كانت غلطه من الاول بس للاسف بتقول ان ده اللى كان بيحسسها انها متميزة عنده..
عموما موضوع رجوعها ولا لأ هى اللى تحدده ..
وجايز الايام هى اللى تداوى الجرح..
وده يرجع اولا واخيرا لنفسيتها وقدرتها على المسامحه وعلى النسباان
وربنا معاها..
وبالنسبه للدكتور اسلام ..الحقيقه غادة هى اللى ردت وانا كنت باكتب بس..
تحياتى ياقمر..ودايما منورانى

بنت الغربة يقول...

احلام جوليا
منورانى ياجميل وشكرا لمتابعتك للمدونه..وانا بصراحه متشكرة جدا على النصايح اللى قولتيها وكمان على اسم الموقع وغادة بتشكرك كمان..وهى اخدت اسم الموقع واتوقع انها هتدخل عليه وتشوفه وتقراا فيه قبل ماتقرر انها تناقش مشكلتها مع الدكتورة المسؤوله عن الموقع..وياحبيبتى خااالص مش زعلانه..انتى معاك حق كان لازم تستنى قبل ماتفجر موضوع خيانته فى وشه وقدام الاولاد كمان..
بس انا نصايحى على قدى ..انا مش متخصصه..انا اللى قدرت عليه عملته
وحاليا انا عرضت مشكلتها على نطاق اوسع وهى قرت ارا الناس المختلفه..
وهى اللى فى ايديها القرار..
وربنا معاها ويصلح لها الحال..
تحياتى ياجميل

بنت الغربة يقول...

eng semsem
اولا شكرا على الزيارة
تانيا انا معاك كلنا بشر وبنغلط..ستات ورجاله..المهم نتعلم ومانكررش الغلط..وماناخدش الحبيب امر مسلم بيه...
اما بالنسبه لموضوع باباك المقفول ..
فانا هاتابع بقية الحديث ان شاء الله
تحياتى

قوس قزح يقول...

انتى مش غلطانة لان ببساطة نيتك كانت خير
و كانت فرصة له انه يتمتع بشكلها الجميل الجديد
بس عمر ما كان الشكل هو السبب
دى حجة بيلاقها الراجل علشان يبرر خيانته
محدش بيحب حد علشان شكله حلو بس

السبب الاغلب فى البحث عن علاقة بره الجواز ..هو الملل و حب التغيير و من اول وجديد يعيش حالة الحب الافلاطونى و مفيش مانع يبقى حب شهوانى كمان

مشكلة الازواج ..سوا الراجل او الست
انهم بيفتكروا ان شريك الحياة ده بقى خلاص ضامن انه مهما حصل هيكمل و يستحمل
و علشان كده بيكون مش مستوعب لما الطرف التانى يقوله خلاص مش عايزاك

انا عجبنى راى دكتورة ستيته
مش الحل الطلاق
الحل انها تغلبه و تعرفه قيمتها و تخليه يبقى شخص مسئول بجد و معندوش وقت يبص بره
و فى حاجة كمان
لازم يفهم انها ممكن جدا تسيب له الولاد يدبس فيهم و يشوف مين هتستحمله بخمس ولاد
انا عارفة انه صعب عليها
بس لازم يفهم ان بالطلاق مش هيطلع منها زى ما دخل بطوله ..لا .. الولاد فى رقبته هو كمان و لو على الاقل فى اجازته يقعد بهم

و ربنا معها و يرشدها للحل الصح

الجواز و سنينه يقول...

مخنوقه يا قمر
منوره مصر و الله طبعا
و بعدين يا قمر انا بجد نفسى آخد الميل بتاعك او اديكى بتاعى بس مش على الهوا كده
انا عامله اشراف لو تحبى تبقى تسيبيلى الميل

اما بقى بخصوص صاحبتك
فاولا انا احييكى انك كنتى انسانه إيجابيه فى حياه صحبتك
يعنى هى تخينه و مش عاجبها حالها غيرتيها و وقفتى جنبها
لو كان هو ده مشكله جوزها كان زمانه حاله اتصلح و شكرك على اللى عملتيه
لكن مشكله الرئيسيه انه خاين و مكانش تخنها هو سبب بعده
لاء هو اتعود انها راضيه بكل شيئ و مش هاتفتح بقها لان العيب فيها زى ما هو مفهمها
بس انا كمان لازم الوم كل واحد مراته اتبهدلت بعد الجواز لان هو كمان ليه دور فى كده
اما انه عايز يرجعلها
فده اولا حاجه ترجعلها
بس لو فرض و رجعت لازم تتحط النقط على الحروف
لازم يحترم آداميتها و مشاعرها
كمان حكايه فلوس باباها
لو عايزه تاخد فى الخباثه هى حره
بس مش تقوله هو اللى مفروض يلبى كل طلباتها هى و الاولاد
لازم ترجع بشروط حتى لو كان منها انه يكتبها حاجه بأسمها
رغم انى مش بحب الاسلوب ده
بس فى ناس ماينفعش معاها غير كده
ده طبعا اوبشن غير ملزم باتاتا

اما بقى الاولاد فاكيد يستاهلوا منها انها تييجى على نفسها حبتين و متهيألى انها لو لقت منه تحسن هى كمان هاتبقى احسنلها من مسؤليه كل الاولاد دى لوحدها

ربنا يهديها لما يحب و يرضى و يصلح حال الجميع

سمكه واحده يقول...

اذيك ياجميل
انتي اللي وحشاني اوي اوي والله بجد مش مجامله او مبالغه او حبه تدوين كده
لكن انا دخلت كتير عندك وقريت بس مش عارفه اعلق لان دي حاجه محيره في كتير من الامثال السيئه للرجاله دي اولا انتي مغلطتيش في حاجه ابدا اصلي انا ذيك كده بعمل كده مع صحابي اهم حاجه او اول لما بيكون في مشكله تلاقينا ندور علي الاهتمام بالنفس والشكل والمنظر وحبه رومانسيه يمكن يكون الزوج مفتقدها لكن كونها عملت كل ده وهو زي ما هو يبقي طبع وحش في الراجل بس من المفروض اي زوجه متسبش نفسها لحد الزوج ما ياخد باله منها ويوجها بس والله عارفه بيبقي غصب عن الزنوجه كفايه حجات كتير عليها وشايله الهم
انا مش عارفه اقول ترجعله ولا تفضل في قرارها عاوزها ترجعله عشان الاطفال مش ذنبهم يعيشوا حياه مش سويه وعشان كمان يبقي في استقرار اسري وفي نفس الوقت عاوزها مترجعلوش لانه ميستهلش لانه فكر في خراب بيت مش في غيرها اصلها نزوه وعبط رجاله بعيد عنك يعني كل واحد وواحده يتقي الله كده في زوجه او مراته ويفكر ويراجع نفسه وميبقاش اناني لان هو كده مش مسؤل عن نفسه بس ده بيت واسره واطفال يعني هو يرضي باللي ربنا قسمهوله ويقعد مع مراته ويشوف ايه اللي عاوزه منها او تغيره وهي لو مش عجبه حاجه فيه طلما في اولاد لازم الاتنين يضحوا بس انا من راي ترجع لو هو ممكن يتعدل بس بشروط وحجات كتير وتحفظ كرمتها وربنا يصلح لهم الحال
معلش طولت اصلي والله خراب البيوت مش سهل لكن واضح ان دلوقتي الرجاله مش فاهمه كده واسهل حاجه يعيش حياته ويسيب بيته ومراته
ربنا يرحمنا

هوووبا♥ يقول...

أنا أول مرة أزور مدونتك يامخنوقة حلوة قوي بجد.. انتي مش غلطانة وأي واحدة مكانك كانت عملت كده .. ماتحرقيش دمك على الفاضي وهو زي ما غادة قالت عليه واحد ما يستاهلش انسفي من دماغك صورة وصوت واحد اسمه عمرو..كأنه مش موجود في الحياة اصلاً ووالدتك ردت عليه الرد اللي هو وانا لو من صاحبتك أصر اكتر على موقفي والحل اللي عرضته الدكتورة ستيته كويس لكن الطبع بيغلب التطبع يعني لو وافق على ده كله شوية بعدها طبعه حايغلبه ويرجع اسوأ من الأول واهي حرقة دم تانية... ربنا يعوضها عنه خير إن شاء الله في أولادها

ismaeel saad يقول...

انا من رايى انك مش مسؤله عن خطا غيرك فريحى بالك انتى ومتفكريش اصلا فى كلامه لانه غلط غلطه ومن حقها كمان متسمحوش على الغلطه دى وكمان بجح لانه بيحملك انتى المسؤليه وانتى ملكيش اى ذنب ولا يهمك انتى نيتك خير وكنتى بتنصحى صاحبتك نصائح فى صالحها عشان ترتاح فى حياتها ولا يهمك ومتزعلش ...اسماعيل
https://www.facebook.com/lawyerismaeel.aboelmagd

ismaeel saad يقول...

انا من رايى انك مش مسؤله عن خطا غيرك فريحى بالك انتى ومتفكريش اصلا فى كلامه لانه غلط غلطه ومن حقها كمان متسمحوش على الغلطه دى وكمان بجح لانه بيحملك انتى المسؤليه وانتى ملكيش اى ذنب ولا يهمك انتى نيتك خير وكنتى بتنصحى صاحبتك نصائح فى صالحها عشان ترتاح فى حياتها ولا يهمك ومتزعلش ...اسماعيل
https://www.facebook.com/lawyerismaeel.aboelmagd

Uouo Uo يقول...


thx

كشف تسربات المياة
غسيل خزانات
شركة نظافة عامة