THOUSANDS OF FREE BLOGGER TEMPLATES

الاثنين، نوفمبر 01، 2010

فرح ميشو الخنيييييييييييق


ميشو ده ياجماعه يبقى اخويا الصغير...الحيله الوحيد على 3 بنات...اصغر منى ب 5 سنين.............




واكيد كان ومازال دلوعة البيت كله من اول بابا الله يرحمه .....وانا واختينى الحلوين واكيد اكيد ماما...دى مش غيرة ...ده حقد بعيد عنكم




افتكر فى الايام الخوالى لما بابا (الله يرحمه ) كان بيخبى مفتاح العربيه من ميشو لما كان فى ثانوى..ويتخانق معايا انا واختى الكبيرة




لما مش بيلاقى العربيه فى الجراج....ولا بيلاقى ميشو طبعا...كان كل الخناق ناخده احنا ...والزعيق والعصبيه...واول ماميشو باشا




يوصل...تلاقى بابا ده بيشر حنيه وهدوووء ...وياحبيبى مش تقول انك اخدت العربيه...مش تخلى بالك من نفسك....مين ادالك المفتاح




اكيد واحده من اخواتك...باعتتك مشوار ..بلاش تسمع كلامهم تانى ياحبيبى ولما تعوز العربيه قولى ياحبيبى...




مش ميشو الخنيييق يقوله لا يابابا انا عامل نسخه من وراك....واخواتى مالهموش دعوة....




لا ده اعتذر بهدوء وبراءة الاطفال فى عينه...وماتزعلش يابابا...واخر مرة...وعمرها ماكانت اخر مرة ابدااااااااااااا.....




الله يرحمك يابابا.....وتمر الايام ولسه ميشو هو الدلوعه بتاعتنا




حتى فى الشغل...ماما جابتله واسطه كبيرة واشتغل فى حته كويسه قوى...وطبعا غير العربيه...ووضب شقته وديكورات وباركيه




ومطبخ امريكى...وكله...فضل بس النجف ودهان الشقه.......




كل ده وهو لسه ماخطبش اصلا ولا مرتبط اساسا .....واحنا اقنعناه ان كفايه كده




ويكمل الشقه لما يخطب علشان يخلى الغلبانه اللى هتتدبس فيه تنقى اى حاجه...يقوم يقول ..( هى هتتأمر.. اساسا دى شقتى وانا اللى




انقى كل حاجه فيها ...) خنيييييييييييييييييق مش باقلكم مخنننننننق...




ماعلينا.....بعد عدة ارتباطات فاشله....قرر انه يخطب خطوبة صالونات...




وبصراحه كان حظه حلو قوى كالعادة....البنت حلوة ومؤدبه وابوها مركزه عالى...وعيله محترمه...وفرحوا بيه ...والبنت فرحت




بيه قوى علشان الواد ميشو وسيم شويتين تلاته كده....




المهم تعدى الايام والشهور.....والواد ميشو بيأجل فى الجوااااااز....شويه الشغل وشويه خناقاااات مع خطيبته ...وشويه عايز




اغير ديكور الشقه مش عاجبنى.....وتلاكيك كده كتيرة....




وانا بصراحه مش وااااكل معايا ابدا حججه دى.....ده كان مستعجل على الجواز علشان عايز يخلف....وبيقولى كل اصحابى اتجوزوا




وخلفوا الا انا ....امال فيه ايه بقى..؟؟؟؟؟؟؟؟




المهم اخدته مرة على جنب عندى فى البيت وكلمته بصراحه علشان عايزة افهم...




انا : ايه ياميشو حكايتك بقى...بتأجل الجوازة ليه...ده حتى حماتك كلمت ماما علشان تروحوا تنقوا العفش بكره..




ميشو : لالالالالا يامخنوقه انا مش فاضى ابدا ابدا بكرة....بعدين بعدين....




انا : طب اهدى انا باضحك عليك .. لاكلمت ماما ولا حاجه...انا بابعتك بس علشان اعرف انت فيك ايه بالظبط...




ميشو : وقعتى قلبى يامخنوقه...بصراحه انا مش عايز اكمل الجوازة دى....ومش عارف انهى الخطوبه ازاى...




انا : اه ... انا قلبى كان حاسس ان فيه حاجه...خير بقى مين دى ...




ميشو : لا ياختى ظنك مش فى محله....مافيش واحده تانيه...انا مش عارف احب (نهى) خالص...ومافيش تفاهم...حاولت اقنع نفسى




بحبها....ماعرفتش...هى حلوة ومؤدبه وبنت ناس ....بس انا مش باحب اتكلم معاها ....ولا باحب اخرج معاها...ولا لي نفس اكلمها على الموبيل ونحب فى بعض وكده...ونسيت كل الكلام الحلو اللى كنت باقوله للبنات علشان اشغلهم....




وبعدين انا مش عارف اقنع نفسى ان الوضع ده هيبقى مدى الحياة لما نتجوز.....صعب قوى....ومش لاقى سبب مقنع علشان افسخ بيه




الخطوبه ...وخايف اظلمها...بس لو اتجوزتها واحنا كده ...اكيد هاظلمها...علشان كده بأجل فى الجوازة ..جايز يجى يوم ومشاعرى تتغير....انا فعلا فعلا مش عارف اعمل ايه...ومش عارف اصارح ماما .... انتى عارفه ماما نفسها اتجوز قد ايه..وكمان المشكله الاكبر انها بتحب (نهى)...وكمان منصب ابوها ..صعب قوى ماما توافق انى اسيبها...



انا : انسى منصب ابوها وانسى ماما ...وانسى كلام الناس كمان...افتكر بس انها هتبقى مراتك عمرك كله....وهتقوم من النوم هتلاقيها


جنبك كل يوم ...مش هتلاقى ماما ولا ابوها ولا منصبه ...وبعدين لما انت مشاعرك بارده من ناحيتها كده...طولت الخطوبه 5 شهور


ليه؟؟؟..........ذنبها ايه تتعلق بيك.




ميشو : انا كنت باطول الخطوبه علشان باحاول اتقرب منها جايز احبها بمرور الوقت...المشكله انها عجبتنى شكلا وعائلة....


بس مافيش اى مواضيع مشتركه بينا...مافيش حواار تقريبا بنعيد نفس الكلام ومش عارف احدد لها شخصيه...ومابحبش اطول فى القعده معاها....بازهق وبمل..مش عارف اعمل ايه...مش عارف اخد قرار فى العلاقه دى..


انا : سيبها...ايوة سيبها...هى ماتستاهلش انها تتعامل كده...اذا كنت مش قادر تحبها وبارد من ناحيتها...اكيد هى حاسه بدا...من حقها تفهمها وبلاش تعذبها ...سيبها تشوف نصيبها مع واحد تانى يحبها بجد...


ميشو : مخنوقه انا عارف انها بنت كويسه بس انا مش قصدى اعذبها خالص...انا مش عارف افتح الموضوع معاها ازاى من غير مااجرحها...ولا اضايق ماما....


انا : خليك صريح من غير تجريح...وقولها انك انت السبب فى فشل الخطوبه لأنك مش عارف تتأقلم على انك هتجوز وتفتح بيت وعيال


ومسؤووليه واستقرار والحاجات اليييييييييييييييييييع دى....


ميشو : بتتريقى يامخنوووقه...طب ايه رأيك انى هاقولها الحوااار ده فعلا....ابقى دلوعة ماما احسن من انى اجرحها....


المهم خرج من عندى وهو ماصدق لقى الحل ..........وتانى يوم ماكدبش خبر وراح فسخ الخطوبه......وطبعا مش عايزة ااقولكم ماما


زعلت قد ايه ...وعيطت كمان ...وليه وعلشان ايه واتحسدت ياحبيبى....لازم ابخرك ..هى الناس عينها وحشه كده ليه...ده انتم كنتم


فولة واتقسمت نصين....( وكل الحوار الهندى اياه ده )...


وكملتها بقى ....اوعى تزعل ياروحى...هما اللى خسرانين...ولا تشيل فى نفسك....انا هاحجزلنا اسبوع فى شرم انا وانت علشان تروق دمك....تلاقيك نفسيتك وحشه قوى ...والزعل بيوجع القلب يا روحى...لا انت لازم تغير جو النكد ده...


وطبعا ميشو بيه...براءة الاطفال...معاكى حق ياماما...انتى بس اللى فاهمانى...وحاسه بي...انا محتاج فعلا ابعد شويه....


وبعد شهرين كده......


لقيت الواد ميشو جاى لى البيت وهو مش على بعضه ...


ميشو : مخنوقه انا عايزك فى موضوع مهم...


انا : خير ياميشو....


ميشو : عايزك تشوفى واحده مع ماما فى الشغل...هاوصلك لماما كانك جايه تزوريها فى المكتب ...وبصى على السكرتيرة الجديده


وقولى لى رأيك فيها ايه...وحاولى تتكلمى معاها فى اى موضوع....


انا : ليه بقى ياسى ميشو...انت عايز منها ايه بالظبط...انا ماليش فى اللعب بتاعك ده...


ميشو : لالالالالا يامخنوقه انتى فاهمه غلط خاالص...هى عجبانى قوى بس كلامها محدود قوى...ومركزة قوى فى شغلها وبس..


انا : واضح انها بت محترمه ومش بتاعة لعب...طب انت عايز منها ايه...اوعى تكون....


ميشو : مش عارف ...احتمال..بس انا بقالى اسبوع من ساعة ماشفتها وانا اعدى على ماما فى الشغل كل يوم بأى حجه...


انا : والله بشرة خير...طب هاقوم البس واجى معاك اشوفها....


رحت عند ماما وشفتها...بصراحه اموورة فعلا...وشكلها برضه جد...وقعدت اتكلمت معاها...وكانت ظريفه ومثقفه...


بس مش عارفه ماما مش عاجبها الموضوع ليه...


ولما سألتها...عرفت انها اصغر من ميشو ب3 سنين بس...وكانت مخطوبه قبل كده.....وكمان علشان بتحضر للماجستير....


وده كله طبعا مش عاجب ماما......


طبعا كل ده بالنسبه لميشو كلام فارغ.....ولأول مرة يعترض على رأى ماما ويصر على انه يخطبها...


واول مرة يحصل كلاش حاد بينهم...وووو...يتخاصموااااا.........ههههههههه....


مش هتصدقوا فرحتى ...لما ميشو قصدنى علشان اصلح بينه وبين ماما...ياسلاااااااااام شعوور جميل جميل الحقيقه...


اخيرا ......اخيرا...ميشو بيتهزق زينا عادى...وبيتزعل منه..عادى...لا وبيتخاصم كمان....


المهم عملت اللى قدرنى عليه ربنا وصلحت بينهم...واختى الكبيرة اقنعت ماما ان ميشو اخيرا بيفكر يستقر بجد....وان كل اللى مضايقها


دى شكليات مالهاش لازمه...وان البنت محترمه واهلها ناس طيبين...وميشو مش محتاج اكتر من كده...


وفعلا ...تمت الخطوبه...وكانت حلوة قوى..وميشو كان فرحان جدا..وطبعا شعوره كان غير خااالص...مستعجل جدا على الفرح


وعايز يخلص كل حاجه بدرى...وخلاال 3 شهور....كانت الشقه جاهزة والعفش اتحجز والسجاد والنجف...ولسه من يومين نزلنا


جبناله البراويز والانتيكات ...فعلا الحب ..حاجه تانيه...


المهم الحمد لله اخيرا هايتجوز وهنخلص من دلعه....ويبقى يدلع براحته بقى على مراته....ولو انى اشك...شكلها جامده قوى..


وهى اللى هتربيه...


واهو ذنب نااااس ....بتخلصه نااااس.....


وفرحه ان شاء الله رابع يوم العيد.....وطبعا شاغلنا كلنا بطلباته اللى مابتخلصش...وانا بصراحه اتخنقت ...ومش عارفه العيد اتاخر ليه


عموما انا تقريبا لسه مااستقريتش على فستان علشان الفرح...عارفه هتقولوا اتأخرت قوى...بس انا محتارة بين 3 فساتين...


1- الاحمر...اه..بامووت فى اللون ده...بس الفستان محتاج رتووش كتيرة علشان ينفع يتلبس....مش عارفه الفساتين الايام دى دايما القماش مقصر معاهم اما من فوق ....او من تحت.....


2 - البنفسجى الغامق...اغمق من لون المدونه بشويه...مريح للعين والاعصاب...بس مش عاجب ماما وبتقول انه كئيب..


3 - الاسود ...ملك الالوان بس الشغل فيه بالسلفر..وحاسه انه over شويه...


عموما انا صورت ال3 فساتين للباشا وبعتهم ايميل ليه...ومستنيه قرار سيادته ...


وياريت تقولولى رايكم انتم كمان.....


احلى تحية من مخنوقتكم .........








23 التعليقات:

Mona Abo - Elso3od يقول...

السلام عليكم
اولا مبروك للسيد ميشو و ان شاء الله الدلع اللي ادلعه هيطلع عليه :)
ثانيا بتغيبي اوي كل مرة علينا ياريت متتأخريش تاني

اما عن اختار الفساتين ف تستني رأي الاستاذ بدل ما تحصل خناقة يوم الفرح و يخنقك اكتر :(
تحياتي لك

عندما تكون ميمى وحاجات كتير مع بعضها كده يقول...

ضحكتنى اوى بجد اصل اخويا نفس النظام كده ده اصلا فى اولى كلية وعايز يخطب علشان مرتبط ويقول لماما ماتقوليلش اخواتى البنات انا ماليش دعوة بحد ههههههههههههههههههههههههههههه

sony2000 يقول...

هههههههههه
هههههههههههههه
الف مليووووووووووون مبرووووووووووك
وربنا يتمملو علي خير يااااااارب
وكل حاجه عملها بني ااااااااادم
بتطلع عليه بعدييييييييييييييييين:))
تحياتي

E73 يقول...

لولولولولولييييييييييي

مليون مبارك لميشو وربنا يتمملهم على خير ويسعدهم

عارفة أنا إحساسك دا ربنا يخليكم لبعض يا رب

أنا من رأيي سيبك من الأحمر أنا برضه بواجه نفس المشكلة مش فاهمة اللي بيفصلو الفساتين دول فاكرين ان اللي هتلبسها رقاصة ولا ايه؟

أنا عن نفسي محبش أجيب حاجة وأفضل أعدل فيها هي تتجاب كدا وتتلبس كدا الواحد مش ناقص وجع دماغ

من رأيي البتنجاني هيبقى حلو بس لو ماما بتتضايق من اللون دا فخلاص بقى خليكي في الأسود وأوفر أوفر بقى مانتي أخت العريس :D

أحــوال الهـوي يقول...

مبروووك
و يارب يتمم بخير

صدقيني ان شاء الله هينصلح حاله و يشيل المسئوليه ربنا يقدرة و يسعد زوجته و يعيش في هنا و رضا

ربنا يخليكي الاخت الكبيرة الحنينه الناصحه اللي دايما يثق في رايها و تكون عون له في حياته الجديده اكيد هيحتاجك كتير

مبروووك

تحياتي

ستيتة حسب الله الحمش يقول...

مبروك ليه يا دولي
عقبال الولاد
قصة حياة خالي بالنص بس هو كان له ست بنات وربنا يخليهم كلهم ههههههههههههههههههههههههههههه

إلبسي الموف لو تفصيلته حلوة
ولو بيضاااااااااااااااااااا
لأن الأسود كل مصر بتلبسه في الأفراح

وكل هذا يروح كرأي استشاري للباشا علشان في الأخر هو فعلا ها يقول لك انهي لون بيبقى احلى عليكي

الفين مبروك كمان مرة وربنا يتمم له بخير

شمس النهار يقول...

الف الف مبروك

واللون الاسود طبعا خطير في السواريه بس لو الشغل رقيق مش مأفور

البساطه جميلة حتي في السواريه

وبالنسبه لأخوكي مش هترتاحوا منه
وبدل ما كان هو لوحده هيبقا هو وملحقاته
هو الاخ الاصغر دايما كده

وعلي فكرة لما يخلف شعورك انك عمه شعور خطييييير

الف الف مبروك

حاجات جوايا يقول...

الف مبروووووووك
ربنا يتمم له على خير يارب
ويهديهم لبعض
بارك الله لهما وبارك عليهما وجمع بينهما فى خير ان شاء الله
عقبال اولادك يا قمر يارب
:)

بالنسبة للفستان انا من محبى ومشجعى الموف
تقريبا كل ما انزل اجيب هدوم يبقى درجة من درجات الموف والبنفسجى والبنك وخلافه ههههههه
لو ماما حاسة انه كئيب الفتى نظرها انك هتدخلى درجات معاه فى الطرحة .. والاكسسوار والميكب مش هيبان انه غامق خالص بالعكس

لو كنتى نزلتى الصور كنت قدرت افيدك اكتر

ربنا يتمم بخير يا قمر

موناليزا يقول...

ألف مبروك
وربنا يتمم بخير
وعقبال أولادك:)

البنفسجى لون كويس بالمقارنة بالاحمر والاسود لا هو فاقع أوى ولا هو غامق اوى

Bondoka يقول...

الف الف مبروك لميشو
ومبروك ليكى تخلصى من دلعه
ههههههههههه

بس انتى نسيتى حاجه مهمة جدا
وهى

انك تعزمينا على الفرح يا هانم
(;

عاشقه الرومانسيه يقول...

مبروك لميشو يامخنوقه
فين بقى صور الفستان علشان نختار لك واحد؟؟

eng_semsem يقول...

الف مبروك لميشو باشا ويارب الدلع اللي شافه قبل كده يكون نقطه في بحر الدلع اللي هيشوفه بعد كده ويملى ايامه فرح لاني متاكد ان طول ما هو فرحان هيبقى برده فرح ليكم وربنا يخلي مامته ليه واحلى اخوات في الدنيا يبقى جنبه على طووول

واحد من العمال يقول...

السلام عليكم

سعدت لمرورى العفوى من هنا
وقدرتك على الوصف والحكى رائعه
أجبرتنى على تكمله البوست الحدوته
وألف مبروك لميشوا

وكل عام وأنتِ بخير حال وبحكى

ابراهيم رزق يقول...

الف مبروك و ربنا يتمم بخير
كلنا كنا رميشو وبعدين بقينا و الا بلاش احسن المدام قاعدة جنبى وبينى بينك ايديها جامده شوية
تحياتى ابراهيم رزق

ندى الياسمين يقول...

طب يعنى تبعتي الصور للباشا وانا لا

اخس عليكى اخس

انا عايزه صور الفساتين وجواهم الحشو عشان اقولك راي هههههههههههههه

اممممممممم اخوكي عنده حق انه ساب البنت على فكره

حقيقى مالوش لازمه يعيشوا يتعذبوا هما الاثنين

انا عملت كده مع اختي الصغيره برضه

بعد ست شهور خطوبه والبت خلاص لقيتها بتفرفر فى ادينا وقالت مش قاااااااااادره احبه يا ناس ولقيته هو عيل خنيق اصلا وفعلا تبقى حماره الى تحبه هههههههههههههههه

قلتلها سبيه يا بت بلاش قرف بقى

اذا كان احنا بنحب اجوزنا بس اوقات بنبقى عايزين نرميهم من البلكونه امال هاتعملي انتى ايه بعد كده
هههههههههههههههه

يلا مستنيه الصوووووووور

Wise يقول...

السلام عليكم ورحمة الله وبركاته
شدنى جدا اسم مدونتك
وعجبنى اسلوبك فيها
اما عن اختيار الفستان فمتهيالى ما فيش وقت للاحمر يبقى انتى حددتى الخيار يا اسود يا بنفسجى

بس اعملى قرعه بينهم
ومش عارفه ليه واضح ماشاء الله ماشاء الله
انك بتحبى اخوكى جداااااااا
واضح
الف مبروك له ولاسرتك كلها
بس واضح ان ميشو متكرر فى اغلب الاسر
ان ما كانش كلها

barbie girl يقول...

مبروك لاخوكى يا مخنوقة ويارب تكونى احترتى الفستان الاحمر عشان بحب الاحمر اووووووى

فراوله يقول...

السلام عليكم
تقبلى مرورى لاول مره فى مدونتك الرائعه دى
وفعلا ما شاء الله اسلوبك رائع فى الكتابه
والف مبروك لاخو حضرتك

غير معرف يقول...

لاول مره اجد نفسى مشدود للرد ممكن لانك لمستى حاجات كتير جوايا دا غير الاسلوب الرائع غير المتكلف على الاطلاق لدرجه خليننى اقرأ البوست للنهايه1-بشعر بنفس الاحساس مرتبط ببنت ما شاء الله جميله وهاديه وطيبه بس نفس احساس ميشو بيه مش قادر احس انها شدتنى او اقول ان هى دى شريكة حياتى ساعات بقول اهى عيشة والسلام انا عاوز ايه اكتر من كدا ووقت تانى اقول لا دى مش نهايتى الحب بيخليكى تحس انك فرحان دايما منطلق عاوز تخرج وتتمشى مع اللى بتحبه احساس بالنشوى غير عادى بدون سبب لمجرد انك معاه 2- بطمنك على ميشو اللى قدر ياخد القرار انه ينفصل رغم الضغوط والاحساس بالذنب قادر انه يكمل حياته بسعاده ان شاء الله واخيرا عذراً على الإطاله ويسر لنا جميعا ما فيه الخيرA.S

aMr saYed يقول...

النهاردة داخل اقول

ارجعوا لبلوجاتكم يرحمكم الله

غير معرف يقول...

ثقافة الهزيمة .. عصابة البقرة الضاحكة‏ 2

فى مارينا مصيف الصفوة السياسية يقول أحد أفراد الأمن بالمنطقة أول فيلا هنا أتبنت كانت لإبراهيم سليمان وزير الأسكان السابق بعدها حدد الناس اللى تسكن المكان، خصوصا أنه أهدى علاء وجمال أبناء الرئيس السابق قصرين على بعد خطوات من فيلته، ثمن الواحد منهم يعدى الـ 40 مليون جنية ( حوالى 7 مليون دولار ) ومسجلين بأسماء هايدى وخديجة زوجاتهم.

و أستطرد: فى لسان الوزراء يسكن إيضا أحمد شفيق رئيس الوزراء السابق وهو عضو فى أتحاد الشاغلين بمارينا، والوحيد من الوزراء السابقين الذى جاء بعد الثورة إلى مارينا، و له فيلا يقدر ثمنها الآن من 15 إلى 20 مليون جنية ( حوالى 3 مليون دولار ) ونفس السعر لفيلا نائب رئيس الجمهورية السابق عمر سليمان .

باقى المقال ضمن مجموعة مقالات ثقافة الهزيمة ( بقلم غريب المنسى ) بالرابط التالى www.ouregypt.us


مصر كلها تتساءل لماذا لم يتم للأن التحقيق مع أحمد شفيق و عمر سليمان بشأن ممتلكاتهم؟

mostafa behiry يقول...

السلام عليكم ورحمة الله وبركاته
مدونتك جميلة جدا
وأعجبتنى جدا
ونفسى مدونتى تبقى زى مدونتك رجاء مساعدتى
وده رابط المدونه
http://mostafabehiry.blogspot.com/

ibrahim zakaria يقول...

omg i'm realy don't know that i can image to see like this artical thxx so much for this special artical افلام عربى