THOUSANDS OF FREE BLOGGER TEMPLATES

الخميس، فبراير 26، 2009

مخنوقتكم ...بعين واحده

انتم وحشيييين وحشييييين ....انا بقالى اكتر من اسبوع مازرتش حد فيكم
طب اسألوا على.....جرى لى ايه ..مايتردش على تعليقاتنا ليه ؟؟؟
اكيد فى حاجه .....مش معقوله مش هارد على تعليقاتكم من غير سبب
الاسبوع ده كان اطول اسبوع فى حياتى.....
بجد اتخنقت فيه زياده عن اللزووووم........
نبدأ الحكايه من اولها ....من يوم السبت ....
انا اليوم ده اجازة انا والاولاد ...ودايما باخدهم افسحهم الصبح ..
المهم صحينا الساعه 9 وفطرت الاولاد وقعدت شويه على النت ...
وبعدين ابنى الكبير اصر اننا نروح مول كبيير قوى وفيه العاب كتييرة ..
لانه متفق مع صاحبه يقابله هناك ....طبعا المول ده فى حته زحمه ومكانه رخم..
بس قلت مش مشكله نروح ....واهو يوم فسحه ويعدى...
ركبنا العربيه ووصلنا بعد ساعه الا ربع معاناه فى الزحمه....
وابنى الكبير راح مع صاحبه يلفوا لوحدهم وفضلت انا مع الاتنين الصغيرين
وقعدت العبهم فى الالعاب...وفجأه ابنى الصغير وقع شنطتى كلها على الارض
ووقع منها كل حاجه ....وقعد يساعدنى فى لم اللى وقع و....طرااااخ
ضرب مفاتيح العربيه فى عينى.....
وعينكم ماتشوف الا النور .....حسيت ان المفتاح قطع عينى من جوه...
ولقيت ميه كتيرة نازله من عينى ...اتخضيت جدا وجريت على التواليت اشوف
حصلها ايه ...لقتنى مش شايفه كويس ...بس مافيش دم نازل من عينى ولا حاجه
بس عينى بتوجعنى جدا جدا ....
المهم غسلتها كويس ...وحاولت ارجع العب الاولاد تانى علشان مايتخضوش
بس بصراحه ماكنتش قادرة ...
الصداع مسك دماغى ...وبرضه عينى لسه بتوجعنى....طب هاسوق ازاى دلوقتى؟؟
كلمت الباشا ..وقلتله يسيب شغله ويجى يروحنى انا والاولاد ...
وكل ده وانا فاكره ان عينى اتطرفت وخلاص ....ودلوقتى هاتخف ...
بس الباشا لما جه وشافنى لقيت وشه قلقان ...وروح الاولاد ...وقالى نطلع على دكتور عيون
احسن علشان نطمن...لان عينى عماله تدمع....
المهم الدكتور كشف على عينى ولقى ....انى عندى جرح فى القرنيه..
والجرح ده طوله 6 ملم......والقرنيه اصلا كلها 9ملم...
والحمد لله الجرح عميق بس مش محتاج خياطه ....
وقعدت عند الدكتور اكتر من ساعتين ....كل شويه يحط قطرة شكل.....
وقعدت اعد كام مره النيرس حطيت لى قطرة خلال ساعتين....
12 مرة ....لما انا خلااااص مابقتش حاسه بعينى...
المهم الدكتور حطلى مسكن للألم ...وقفلى عينى ...وقالى ماشيلش الغطاا اللى عليها
واستحمله ..وبكره اروحله تانى ....
وروحنا البيت ....والباشا نزل جاب اكل من بره ...
وانا الوجع زاد جدا جدا وبقيت اخد بروفين علشان الألم...ومافيش فايده...
وبعد مأكلنا ....الباشا بمنتهى الخنقه ...
الباشا : انا نازل ااقعد على القهوة شويه مع كيمو ...لو عزتى حاجه كلمينى..
انا : انت هاتسيبنى وانا تعبانه كده ؟؟؟ انا مش عارفه اشوف اصلا بعين واحده
وبعدين مين اللى هيقعد مع الاولاد؟؟؟
انا عايزة ارتااح شويه ....ومش هاعرف اخد بالى منهم ...انا مش مركزة خااالص
الباشا : ايه يامخنوقه ...هما صغيرين ؟؟؟تحبى اكلم بيبه وأأقولها تيجى تقعد معاكى شويه؟؟؟
انا : لا طبعا ....بيبه تيجى ازاى هى واولادها ؟؟؟هو انا قادره اضايف حد ...
انا محتاجه ارتاااح وماشيلش هم الاولاد ....
الباشا : خلاص يامخنوقه ...انا مش هتأخر...نامى انت وسيبى الولاد لوحدهم..
هيحصل ايه يعنى ؟؟؟؟؟
وطبعا ..خرج ...عادى جدا ....وأياك حد يقولى ايه يعنى؟؟؟؟
انتم شفتم لما كان عيان انا عملت معاه ايه ؟؟؟؟وكان شوية برد.....
بذمتكم لى حق اتخنق منه ولا لأ.....
فعلا الحنيه مابتشحتش....وانا قررت اعامله بالمثل .....
المهم ريحت على الكنبه فى الصاله مع الولاد وانا زعلانه جدا ....ونفسى فى كباية شاى
لان دماغى كانت جايبه زيت من الصدااااع......
ومش قادره فعلا ااقوم اعمل حاجه .....
بس ابنى الكبيير ( ربنا يخليه ) باسنى وقالى ماتزعليش يامامى
وجاب المج وملاه ميه وحطه فى الميكروويف....ولما سخن حطلى باكت شاى
وورقتين نعناع ....وانا قمت جبته لانى خفت عليه بصراحه...
وقعد مع اخواته يهديهم ويلعب معاهم على الكمبيوتر علشان اعرف اريح شويه
من غير دوشه...شفتم الولد الصغير حس بأمه ازاااى ....
وابوه مش قادر يقعد يوم من غير الشيشه....والله لى ربنا ...
المهم الباشا رجه بعد ساعتين ونص ( ماتأخرش ولا حاجه )
وجاب معاه عشااا ...واتعشى هو والاولاد ...وانا سبتهم معاه ودخلت نمت..
وده مش عارف حتى ينيم ولاده...وعمال يزعق فيهم ...
بصراحه سبته يعيش شويه وطنشت خااالص ....
تانى يوم ...صحانى من غير المخده طبعا علشان عينى....وعايز يفطر..
انا : انا تعبانه ومش قادره اعمل حاجه...هاتلك اى حاجه من السوبر ماركت
وانت جاى هات معاك غدااا لانى تعبانه ومش هاطبخ ....
وبكل رخامه كملت نومى تانى من غير حتى مابصله...
لانى فعلا كنت متضايقه منه جدا جدا ....
وبعد الغداا ....نزلنا عند الدكتور ....والدكتور غير لى على الجرح...
وقفل عينى تانى وقالى اسيبها مقفوله يومين كمان ...وطبعا مافيش شغل ولاكمبيوتر
مش مشكله ...اصلا ده كان اخر اسبوع لى فى الشغل....
واحنا مروحين ..طلع معايا البيت ...وكيمو كلمه ...وقاله يعدى عليه علشان القهوة..
وبرضه رااح القهوة ...بس رجع بعد ساعه....
الباشا : اخبارك ايه يامخنوقه ؟؟؟مين اللى عملك الشاى ده ؟؟
انا : ابنك...صعبت عليه وعارف انى ممنوع ااقف قدام الفرن...فعملى الشاى ..
ربنا يخلهولى ...بيحب امه..وماهنتش عليه ...
الباشا : اه طيب ...انا نازل اجيب عشااا...
وتانى يوم زى اللى قبله ...انا باكلمه بمنتهى الرخاامه ....
وفعلا مش قادرة ااقوله ياحبى ...ودايما باندهله بأسمه بس....
وبرضه جاب الغداا من بره ....بس يومها ماراحش القهوة مع كيمو ...
وهو اللى قام بالليل وعمل ساندوتشات للأولاد ....
وتانى يوم عملت اكل خفيف علشان الاولاد صعبوا على من اكل بره
...واتغدينا وبالليل رحنا عند الدكتوور ...
وشالى الرباط اللى على عينى ....وقالى انها الحمد لله اتحسنت ...
وممكن ماقفلهاش ...بس لازم ابعد عن الشمس واى حاجه سخنه ..
وطبعا ماينفعش كمبيوتر خاالص...
يعنى مافيش مرواااح الشغل....
الباشا : انت وراكى حاجه فى البيت دلوقتى ؟؟؟عندك مذاكره للولاد ؟؟؟
انا : لأ ليه ؟؟؟
الباشا : طيب تعالى معايا ..انا عايز اشرب شيشه ...تعالى نقعد فى اى كافتيريا
انا : ليه هو كيمو عنده شغل ولا ايه ؟؟
الباشا : لا يامخنوقه ...انا شايفك متضايقه بقالك كام يوم من عينك ....فقلت اخرجك شويه
انا : انا ماكنتش متضايقه علشان عينى ...انا كنت متضايقه منك ....علشان سيبتنى وانا تعبانه وخرجت مع كيمو ...انا عمرى ماعملتها معاك .....ليه المعامله دى ..
الباشا : يعنى بعد اللى عملته ده كله ..ومتضايقه منى ...ايه اللى حصل لما سيبتك ورحت قعدت نص ساعه شيشت فيها ؟؟؟مانا سيبت شغلى ورحت جبتك من المول ووديتك للدكتور وقعدت معاكى لغاية ماطمنت عليكى ...
وبقالى كام يوم بناكل بره ..وانا اللى بانيم الولاد ...وعملتلهم عشااا امبارح كمان ..
وكل ده ومش عاجبك ....
انا : كتر خيرك ياباشا ...هو انا باقعد اعدلك عملتلك ايه لما بتكون تعبان ؟؟؟
تحب ااقعد ااعدلك كده ....انت مش شايف انك مقصر معايا خاالص؟؟؟
الباشا : افففففففففف....جايز قصرت شويه ...خلاااص كفايه نكد بقى ؟؟؟؟
انتى عارفه انى مش باعرف اتصرف مع الولاد ..ولا باعرف اعمل اكل
ولا حتى باعمل كبايه شاى لنفسى ...ده اللى باعرف اعمله ...
خلاص كفايه زعل ....انزلى وصلنا الكافتيريا ..
انا : انت مش واخد بالك ان الدكتور قالى ابعد عن اى حاجه فيها سخونه ..
وانت جايبنا علشان تشرب شيشه.......
اعمل فيك ايه ؟؟؟؟؟
الباشا : طيب خلاص يالا نروح ...ماتزعليش...
انا : خلاص ممكن نقعد بره فى الهواا ...وانا هاقعد بعيد عن الشيشه ..
وخلاااص مش زعلانه ...
وروحنا ..بس مش عارفه ليه برضه حاسه بخنقه منه ...
يمكن علشان الستات مابيسامحوش بسهوله ...او حتى طريقته فى الاعتذار كانت رخمه ..
او جايز انا اللى عينى لسه بتوجعنى......
المهم انى النهارده بس عملت له فطاار ...وهاعمله غدااا...
وانى النهارده بس اول يوم مسموح لى فيه ااقعد على الكمبيوتر...
ومانجيلكوش فى حاجه وحشه ....
مخنوقتكم ....مخنوقه بعين واحده ....


الخميس، فبراير 12، 2009

تعمل ايه لو اتخنقت زي جورج..؟؟؟؟؟؟

اكيد كلكم هتقولولى من جورج ده ....؟؟؟؟
الحكايه هاقولكم عليها ودى حصلت فعلا فى دبى ...وبصراحه

انا عايزة رأى الرجاله قبل الستات فى الموضوع ده ....
جورج ده مهندس مصرى بيشتغل فى الشركه مع الباشا ...
وجه دبى من حوالى 9 شهور...ولسه ماجابش مراته ولا ولاده
علشان الظروف اللى مايعلم بيها الا ربنا .....
واول ماجه دبى قعد فى سكن الشركه شويه وبعد كده راح سكن
مع جماعه اصحابه فى برج حلو قوى بس كله charing
يعنى الشقه ايجارها بيتقسم على الموجودين فيها.....
على حسب ده واخد اوضه ولا سرير...فهمتم ولا لأ؟؟؟؟
المهم ان البرج شيك جدا وفى منطقه حلوة فى دبى ...
بس كل الموجودين فى البرج تقريبا عزاااب...
رجااااله و..ستااات...
يعنى تخيلوا معايا الوضع جميييييييييييل قد ايه..
المهم الراجل كان مبسوط وعايش حياته..وجاب عربيه
واموره ماشيه ...
فى يوم برد كده ..قام الصبح الساعه 6 الا ربع علشان ينزل يروح شغله
وهو جوه العربيه ...
فجاتن...
لقى مزة جامده جدا ...نازله من العماره ..تقريبا شبه عاريه
ووشها مليان دم ...وبتجرى ..وهى بتعيط ..وواحد بيجرى
شبه عارى هو كمان ...ومعاه حزام رجالى بيضربها بيه..
اخوكم جورج نزل من العربيه ...واخدها بسرعه وعدى بيها الشارع الناحيه التانيه
علشان يبعدها عن اللى بيضربها ده ....
وراح بمنتهى الشهامه قلع الجاكت بتاعه ولبسهولها...
والراجل اللى بيضربها ماعرفش يعدى الشارع علشان كان حافى ...
والراجل بص لجورج بصه جامده قوى ....معناها مستنيك لما
تيجى ....
والبت نازله عياط وبترتعش من البرد....
راح جورج طلب البوليس على الموبيل ....لانه قلق من الموقف كله..
والبنت لما سمعت انه طلب البوليس قعدت تعيط ...وعايزة تمشى
قبل البوليس مايجى ....
لان سيادتها مخالفه فى الاقامه....يعنى جت زيارة 3 شهور
وقعدت بقالها 5 شهور زياده كمان ...
احتار اخوكم جورج يعمل ايه ؟؟؟ البوليس جاى فى السكه ..
عرض عليها يوصلها ....لانها مش هتلاقى تاكسى دلوقتى
ده غير انها تقريبا من غير هدووم...
المهم وصلها لغاية البيت و.....هوب لقى البوليس بيكلمه
رجع لهم وحكى اللى حصل وقالهم على الراجل مين ..
بس ماقالش خااالص انه وصل البنت بيتها..
قالهم اخدت تاكسى....
المشكله هنا ان البوليس مش هايعرف يثبت اى حاجه على الراجل
لان البنت المضروبه مش موجوده ...
وطبعا الراجل اياه قال ...ماحصلش حاجه..وان جورج بيتبلى
عليه ....
طبعا البوليس زى ماجه ....زى ماراح ...
واخوكم جورج لبس اليله كلها ....وتانى يوم صحى الصبح ونزل
للعربيه الجديده بتاعته (لسه مادفعش ااقساطها )..
لقاها مدمرة ...كل القزاز متكسر...والاربع فرد الكوتش مقطوعين بسكينه
ومكتوب بالانجليزى على العربيه (wait for more)....
طبعا بلغ البوليس تانى وعمل محضر.....وكل سنه وانتم طيبين
مين هايثبت مين اللى عمل ده ...
اللى نفعه ان العربيه متأمن عليها ...بس برضه هيقعد اسبوع او10 ايام
من غيرها ..عقبال ماتتصلح ...
بس جورج من ساعتها اخد بعضه ودور على سكن تانى...
والمرة دى نقى عمارة هاديه ...معظمها عائلات...
وطبعا كل ده انا عرفته من الباشا ...وهو بيحكيلى سألته ...
انت لو مكان جورج هتعمل ايه ؟؟؟؟
الباشا : طبعا مش هاعمل زيه ابدا ....انا كنت هاقعد هادى فى العربيه ...
واطلب البوليس ...علشان يمسك الراجل متلبس...
انا : طب افرض البنت ماتت من كتر الضرب.......
الباشا : وانا مالى ...هى اصلا لو محترمه ايه اللى منزلها كده ..وايه
اللى وداها عنده من اصله ...دى ............(كلمه ابيحه بالانجيليزى)
انا : وافرض انها كده ...بس برضه بنى ادمه ...مش ممكن الواحد
يسيب واحده تموت ...مهما كانت ...
الباشا : بصى يامخنوقه ..لو واحده محترمه وحد عاكسها فى الشارع ..
ساعتها اه اتدخل ونص ...لكن واحده ..(نفس الكلمه الابيحه بالانجليزى برضه )
دى الواحد يتحشر ويبهدل نفسه معاها ليه ...؟؟؟؟ ده غير ان جورج اتورط اكتر لما
اداها الجاكت بتاعه.....
انا : ليه ؟؟؟امال يسيبها عريانه ....؟؟؟
الباشا : ليه ازاى يامخنوقه ؟؟ دى لو ماتت او جرى لها حاجه ولقوا عندها جاكت
جورج ...اول واحد هيتهموه هو جورج طبعا ...
انا : اه صحيح ...دى اخرة الشهامه ....
ده ياجماعه كان رأى الباشا .....
انا عايزة اعرف بأه رأيكم كلكم .....الرجاله قبل الستات...
تعملوا ايه لو كنتم مكان جورج...؟؟؟
وعايزة رأيكم بصراااحه ...من غير خنقه ...
ولا كسوووووووووووف.........
احلى تحيه من مخنوقتكم .......................مخنوقه

الخميس، فبراير 05، 2009

هم ييخنق ....وهم يضحك

ازيكم كلكم ...وحشتونى قوى قوى...انا دايما متاخره اليومين دول...
معلش اعذورونى ...باظبط احوالى الملخبطه ...بس والله باحاول الاقى وقت
ازوركم واعلق عندكم...
المهم ان تعليقاتكم فى البوست اللى فات كانت اكتر من رائعه وانا فعلا
متشكرة جدا لنصايحكم وأرائكم الجميله...
وبالنسبه لأحوالى دلوقتى ف.........
انا قدمت استقـــــــــــــــــــــــــاله
الحكايه جت بعد ماعملت بنصيحة صبرنى...وصليت استخاره
ورحت الشغل بعدها بيومين...وحصل ..الاتى...
المدير : مخنوقه النهارده هتروحى مع ميار (الاخت الاموره بتاعت التسويق)
تلفى معاها علشان تعرفى العملاء بتوعنا وهتلفى معاها كمان علشان تعرفى
تستلمى شغلها....
انا : يافندم حضرتك اديتنى مهله علشان افكر...وانا بصراحه مش عايزة اشتغل فى التسويق
لانه مش بافهم فيه وكمان ده مش شغلى...وغير كده انا باروح بدرى وحضرتك عارف كده
علشان ولادى...يعنى مش هاينفع...انا اسفه..
المدير : الوضع الحالى للشركه ماينفعش فيه التفكير يامخنوقه ...واذا كان على عدم المعرفه بالتسويق ...فميار هتساعدك لغاية لما تتعلمى ..ويبقى جون (الاخ الفلبينى)
يخلص الشغل المتأخر بتاعك ...وموضوع انك تروحى بدرى ده تنسيه الفترة دى..
انا : انا اسفه يافندم ...انا مقدرش اروح الساعه 5 ....وحضرتك عارف كده
وحضرتك قبلتنى من سنتين كده...وانا عمرى ماقصرت فى الشغل ..ده غير ان الساعتين الفرق دول بيتخصموا من المرتب...
المدير : ماشى ااقعديهم وخدى مرتبك كامل ....انا حتى ماقكرتش انى امشيكى او ااقلل مرتبك فى الوضع الحالى...مع ان معظم الشركات بتعمل كده....بس علشان انت معانا من زمان ..انا مش عايز اخسرك....
انا : انا اسفه يافندم ....ظروفى ماتسمحش...حضرتك ممكن تخلى جون فى التسويق بدالى...
هو ظروفه احسن منى ..
المدير : جون ماينفعش فى التسويق.....وبعدين أنا اللى أقرر مين اللى ينفع ومين اللى ماينفعش فى التسويق...
انا : صح حضرتك معاك حق ....وانا برضه اللى اقرر اذا كانت ظروفى تسمح ولا لأ
بعد اذنك انا هاقدم أستقاله.....
المدير : انت حرة يامخنوقه ...بس خلى بالك انت كده بتخسري وظيفه كويسه
ومش هتلاقى شركه تشغلك فى الوضع الحالى ...
بس وخرجت ومارديتش عليه ....بس كنت مخنوقه جدا....مش علشان ان الباشا
قالى التسويق لأ..بس ...علشان كمان موضوع انى اروح الساعه 5 ده ....
كده حياتى كلها هتتلخبط...
المهم رحت المكتب وقعدت اكتب الاستقاله على الكمبيوتر ....وبعدين الباشا اتصل..
الباشا : ها يامخنوقه عملتى ايه ؟؟؟؟
حكيتله على اللى حصل ولسه ماكملتش انى باكتب الاستقاله ....لقيته هب فى زى المدفع...
الباشا : (بزعيق جامد ) انت مستنيه ايه تانى ؟؟؟دلوقتى حالا تقدمى استقاله
ويعنى ايه انت اللى تنفعى فى التسويق وجون لأ؟؟؟؟؟ده مدير .......(لفظ ابيح )
انا : طيب اهدى ووطى صوتك ....انا باكتب الاستقاله دلوقتى...وهاقدمها حالا..
لو صبرت شويه كنت هاقولك...
الباشا : طيب ...انت قدميها النهارده وخدى موافقه علشان يبقى تاريخها من النهارده وقدامك شهر بس انذار علشان تعرفى تاخدى مستحقاتك ....بس خلال الشهر ده ..تعملى شغلك وبس
مافيش خروج مع ال....... بتاعة التسويق دى ...ولا فى كلام كتير تانى مع المدير ال .....
ده ...مفهوم ..اه وترجعى فى معادك ويتحرقوا ...مفهوم ..
انا : حبى ده اللى هايحصل من غير عصبيه ...الله يخليك انا مش ناقصه ...انك انت كمان تتعصب على ...خلاص الموضوع انتهى...سلام
وبس ..قفلت معاه حتى قبل مايرد على ..لانى فعلا كنت جايبه اخرى ...ومش متحمله كلمه زياده من اى حد ...ومضيت الاستقاله وخلصت شغلى وروحت وانا فعلا متضايقه جدا
لان بحب شغلى قوى ...بس قدر الله وماشاء فعل ...
وربنا يسهل والاقى شغل تانى ....
تانى يوم كلمتنى البت بيبه ...
بيبه : مخنوقه ..لما ترجعى النهارده ماتعمليش غدااا ...كيمو جايب معاه دعوة ل4 اشخاص على العشاا فى الشيراتون ...اجهزى الساعه 7 ماشى ..واكلى العيال اى حاجه لغاية العشاا
انا : يابنتى انا ولادى مابيعرفوش ياكلوا كويس فى الاماكن دى ...انا هاغديهم عادى
علشان اعرف ااقعد هناك براحتى ....وااكل براحتى...
بيبه : وماتجيش منكده ...انا مش عايزه نكد ...يتحرق الشغل واللى فيه..انا مش
عارفه انتى واجعه قلبك ليه وعايزة تشتغلى ؟؟؟
مانا قاعده اهو من غير شغل وااخر روقااان ...واللى انا عايزاه باجيبه ..غصب عن عين ام كيمو ...امال انا متجوزاه ليه؟؟؟
..انا : طيب يارايقه ...ادينى هاقعد خلاص ...ونبقى نتعلم حاجه من سيادتك .
المهم انى غديت العيال ورحنا عند بيت كيمو نستناهم لما ينزلوا ....
الباشا : مخنوقه انا بقولك اهو من اولها ....بلاش ضحك لما كيمو ينزل...
انا : ليه ياحبى ؟؟؟هو كيمو فيه ايه يضحك؟؟؟
الباشا : اصل عمليه زرع الشعر دى كانت مؤلمه بالنسبه له ...فركب شعر بطريقه جديده
وبصراحه هو مش باين خالص انه متركب ...بس مش لايق خالص عليه ..
انا : هههههههههههه لا ياراجل ماتقولش ...ولزقه بغراا عادى ولاسوبر جلو ..
وياترى دفع فيه كام ؟؟؟؟ وامتى حصل ده ؟؟؟
الباشا : بلاش تريقه يامخنوقه ....ده نوع جديد من التركيب ومابيتخلعش خالص وكمان يقدر ياخد شور بيه عادى....
بس المشكله انه مش لايق عليه خااالص...وانا ماحبتش ااقوله علشان مايزعلش
بس بلاش ضحك فاهمه ....
انا : حاضر مش هاضحك ....بس هاضحك فى البيت ..ماشى ..
بس ونزلوا ....وشفت كيمو ....بصراحه ماعرفتوش ...شكله متغير تماما
طول بعرض ....بكرش ...مع شعر بقصه...تركيبه صعبه قوى....
طيب لما تنقى حاجه نقيها مناسبه لسنك وشكلك ....لازمتها ايه القصه الطويله دى؟؟؟؟
بصراحه شكله يضحك جدااااااااااا .....
بس زى ماوعدت الباشا ...كتمت الضحكه لغاية لما وصلنا المطعم ...ومش قادره ابص لكيمو حتى علشان ماضحكش.....
بيبه : (فى ودنى ) شفتى كيمو المنيل عامل ايه ؟؟؟؟شفتى الشعر الجديد بتاعه ؟؟
انا (كاتمه الضحكه بالعافيه ): ايه ياعنى يابيبه ؟؟؟من نفسه اشمعنى انت ؟؟؟
بيبه : مخنوقه انا مش ناقصاكى ...يعنى ده منظر ..لازمتها ايه القصه دى ؟؟
ماكنش ينفع يعمل شعر عادى وخلاص؟؟؟
انا : كبرى دماغك ...بس انت ليه ماقلتلوش ..خليه يقص الشعر ده شويه وهو هيبقى احسن
بس من غير ماتزعليه...بالراحه كده
كيمو : ايه رايك يامخنوقه ...مش ملاحظه ان الباشا شعره بدأ يبقى فيه ابيض كتيبر
ده غير انه بدأ يخف من قدام ...
انا : نعم .؟؟ايه يعنى ..ده احلى حاجه فى الباشا شعره ..وخصوصا شوية الشعر الابيض دول ...عاملين زى الهاى لايت ومنورين وشه ...وبعدين مافيش شعر بيقع ولا حاجه
ده شعره ااتقل من شعرى....
انا مش عارفه كيمو ده ايه ؟؟؟؟عايز يولع الدنيا ليه ؟؟؟هو مابيبصش لنفسه فى المرايه ولا ايه ؟؟؟؟
وليه الرجاله شاغله نفسها بموضوع الشعر ده قوى ؟؟؟؟
المهم تانى يوم لقيت الباشا رجع ومعاه شنطه مليانه مستحضرات خاصه بالشعر
معظمها انا عمرى ماستعملتهاش ...
انا : ايه ياحبى ..كل ده علشانى ؟؟؟شكرا ياجميل
الباشا : لاطبعا يامخنوقه ...ده علشانى انا ...ماشفتيش كيمو لاحظ ازاى ان شعرى بيقع
انا : ياعم ده غيران منك ...انت صدقت ولا ايه ؟؟؟
وبعدين ايه كل ده ....
1-لوريال لتثبيت الشعر
2- لوريال مصل للشعر
3- زيت تونيك للشعر
4- سبراى مش عارفه ايه
5- بخاخ للكثافه
6- موووس للتثبيت
7- حاجه اسمها ليفون مع فيتامين E
8-ده غير شامبو مثبت للون
9- وبلسم مكثف
10-وكريم مغذى ومرطب
ايه ده كله ....دا انا عمرى ماستعملت الحاجات دى ...
الباشا : انت حره ...انا لازم احافظ على مظهرى ...وبعدين زعلانه ليه
استعمليهم معايا ..
سيبته وخرجت من الاوضه وانا بصراحه مش عارفه اضحك عليه ولا على سعيد صالح
لما قال :
(هو اللى بنعمله فى الناس هيطلع علينا ..ولا ايه )
فعلا ماكانش لازم اتريق على كيمو ....اهو طلع على فى الاخر...
فى مثل بيتقال على الشعر بس مثل ابيح شويتين ...انا هاقول اوله وانتم كملوه
لو كان الشعر عزيز ......مكانش ...............................
سورى ياجماعه ...بس الخنقه قلبت معايا بضحك .......
سورى مره تانيه
هههههههههههههههههههههههههههههههههههههههههههههه
مخنوقتكم ..........مش مخنوقه قوى