مع ان بيبه جسمها حلو بس رفيعه حبتين تلاته وانا بصراحه كان نفسى ابقى رفيعه زيها - علشان كده انا مستغربه هى ليه عابزه تعمل
عملية تجميل - حاولت اقنعها ان كده حراام لانها هتغير فى خلقة ربنا - اقتنعت شويه وبعدين قعدت تلف وتسأل شيوخ فى دبى
واتنين قالولها ان العمليه تجوز تحت مبدأ ( أن الاعمال بالنيات وأن لكل امرئ مانوى )
انا برضه ماقتنعتش وقلتلها هاخلى واحده صاحبتى من ايام الدراسه فى السعوديه تسألى وفعلا طلعت العمليات دى مجازه فى السعوديه
احترت اعمل ايه علشان اقنعها ماتعملهاش - قلتلها طب كيمو رايه ايه؟؟
قالت لى ان سيادته بقى شايف نفسه قوى وبقى دايما يغيظها ويتريق عليها لانها رفيعه قوى
لاحول ولاقوة الا بالله - من امتى ؟؟ ده الرفع ميزة حلوه قوى ياريتها دامت
المهم انها قررت والموضوع انتهى المهم دلوقتى فين وامتى وبكام هتعمل العمليه - الاستاذ كيمو هو الى لف واختار المستشفى والدكتور
و....كل حاجه وانا بصراحه هاطق منه - وصعبانه على بيبه -قلت لما اكلم مامتها جايز تعقلها
برضه مفيش فايده - والدكتور حدد العمليه اول يوم العيد بالليل - سابت ولادها مع الشغاله وانا سبت ولادى مع ابوهم
ورحت معاها هى وكيمو المستشفى
مستشفى نظيفه قوى بس طبعا الدفع قبل العمليه تصوروا المبلغ كام ؟؟؟..........25 الف درهم بالتمام والكمال
بذمتكم مش حاجه تخنق لما الفلوس دى تدفعها فى عمليه مالهاش لازمه ؟؟؟
المهم ان بيبه كانت قلقانه لان دى اول عمليه تعملها فى حياتها - بس الدكتور طمنها خالص وقالها ان العمليه مش هتاخد ساعة زمن
وهتخرج حاجه تانيه خالص
مش عارفه ازاى ؟ هتدخل بيبه وتخرج وهى اليسا ؟؟ جايز
المهم ان العمليه قعدت 3 ساعات مش ساعه لدرجت انى شكيت ان جرى لبيبه حاجه - وكل شويه اسال النيرس - تقولى شويه مدام
وكيمو باشا قاعد يقرى فى البرشور بتاع المستشفى ويتفرج على المجلات - اتفرست قوى وقلتله قوم اسال فيه ايه - ليه الدكتور اتاخر كده؟
قام سال لقى الدكتور خارج وبيطمنه ان كل حاجه مشيت تمام
انا قمت جرى وقلتله فين بيبه ؟ ضحك وقالى هو انت اختها ولا ايه ؟
الرايق ابن الرايقه - لا يادكتور انا امها هى فين؟
ماتخافيش هى فى اوضتها - رحت عندها و........ شفتها كانت ياعينى متربطه زى الموميا مش باين غير وشها
واسلاك خارجه منها ومعلقين لها محلول - وطبعا لسه مفاقتش
دخل كيمو ومعاه الدكتور وطمنا وقال انه هتفوق كمان ساعه واطمنى دى بقت حاجه تانيه خالص
اه طبعا ماهو باين (بقت موميا )
المهم انها فاقت بعد ساعه ووشها اصفر قوى - ندهت للدكتور وقالها انه لازم تفضل فى السرير لغاية بكره وماتقلقش
بس هى هتموت وتشوف شكلها ايه؟
انا طمنتها وقلتلها ان جسمها بقى فيه مرتفعات ومنخفضات وتلال وهضاب يعنى ماتقلقش خااااااااااااااااااااااااااالص
المهم انى كان لازم ابات معاها فى المستشفى وطبعا كيمو روح علشان العيال
الصبح الساعه 5 قمت على صوت بيبه وهى بتتألم - ندهت للنيرس وسألتها على الدكتور قالتلى روح
طبعا اتخانقت معاها وقلتلها تشيل الابره من ايد بيبه لانها ورمت وتقب تغطس وتجيبلى الدكتور الرايق ده
قعدت تبرطم شويه بالفلبينى - وبعد نص ساعه جه الدكتور وهو متضايق قوى - وكشف عليها وقال خلاص مش محتاجه محلول
ممكن تاكل وممكن تروح الضهر - حضرتك عايزه حاجه تانى (بخنقه )
ايوه عايزه حضرتك تكون موجود الضهر قبل مانمشى
حاااااااااااضر خلى جوزها يكلمنى
المهم اكلت ونامت شويه وانا بصراحه مش عارفه انام من كتر القلق - لغاية كيمو ماجه الساعه 10
كيمو :هاه ايه الاخبار عامله ايه يابيبه؟
انا : تعبت شويه ياكيمو كلم الدكتور خليه يجى علشان اجهز لها حاجاته علشان تمشى
كيمو :امال الشاش ده كله هيتشال امتى ؟
انا : ابقى اسأل الدكتور لما يجى
بس وجه الدكتور وكشف عليها وخلاها تتمشى شويه قدامه - طبعا كانت تعبانه جدا - بس كتب لها خروج
كيمو خرج مع الدكتور وانا قعدت الم فى حاجات بيبه واساعدها وخلصنا وقاعدين مستنين كيمو
خرجت ادور عليه لقيته لسه عند الدكتور - بصراحه قلقت قوى - وقلت اكيد فى حاجه حصلت لبيبه ومش عايز يقولى
خرج كيمو من غير مايشوفنى ودخلت للدكتور بسرعه وسألته
انا : ايه يادكتور هو فى مضاعفات لعملية بيبه؟
الدكتور : لأ ليه؟
انا: اصل كيمو طول عندك قوى وانا قلقت تكون مخبى على حاجه
الدكتور : هههههه لأ ده كان الأستاذ كيمو بيحجز معاد استشارة علشان عمليه
انا :عملية ايه تانى هى بيبه فيها ايه
الدكتور : لأ ده الأستاذ كيمو عايز يعمل عملية زرع شعر
انا: (باسبهلال جامد ) ايه ؟ زرع ايه ؟؟؟؟ خلاص مش عايزه اعرف حاجه سلام
وسيبته وانا بضرب كف على كف وعماله اكلم نفسى ايه البشر دى؟؟ ليه الراجل لما فلوسه بتكتر عقله بيخف وبيصغر ؟؟؟؟؟
بس دى غلطتى انا وبيبه المفروض قبل مانسأل حكم عمليات التجميل ايه ....... نسأل حكم الى يتباس من اليسا ومايقولش لمراته
القتل فيه جائز ولا مكروه - والى يقولها ويولعها حريقه الساطور كفايه عليه ولا نجيب منشار كهربا احسن .....................
عرفتوا بقه ليه الخنقه المرة دى دبل ؟؟؟؟؟
اما هدية الباشا لى فى العيد ............... فدى خنقه تانيه هاقولكم عليه بعدين
كفايه عليكم الخنقه دى ............
مختوقه دبل
35 التعليقات:
من أحلى البوستات اللى قريتها مؤخرا .. مدونتك دى كانت فين من زمان ؟؟!!
أنا حأضيفك عندى بعد اٍذنك .. ده أنتى مشكله :))
كل ده علشان بوسه ده عادى جدا
بس برضه بوس من اليسا تطير العقل
الصراحه
بس شفتى البوسه من اليسا مكلفه جدا
السلام عليكم
هههههههههههههههههههههه
فعلا مدونتك تحفه
انا كنت هفطس من الضحك
ربنا يهدي العاصي
مش عارفه اقولك ايه
ربنا يكون في العووووووووون
واحسن حاجه عملتيها انك موقعتيش بين صحبتك وجوزها
وتصرف جوزك علشان يعرف مرات صحبه باللي حصل تصرف ذكي موتني من الضحك
بس بسرعه عايزه اعرف ايه حكاية هدية العيد من جوزك
وبيبه اخبارها ايه دلوقتي واثر العمليه بان ولا فشنك
تحياتي
الى الاستاذ عمرو - شكرا على ذوقك وانا متشكره على اضافتى عندك - بس انا مش مشكله ولا حاجه انا انسانه بسيطه جدا - تحياتى-
استاذ بيبرس ياريت تقولى البوسه من اليسا تفرق ايه عن البوسه من اى حد تانى ؟؟ماهى بوسه وخلاص خصوصا ان صاحبتها مش هتفتكرك تانى اصلا علشان عقلك يطير -ومن ناحية مكلفه فانا شايفه انها كلفت بيبه صحتها اكتر ماكلفت كيمو فلوس لان الصحه هى المهمه مش الفلوس
حبيبتى يازوجه -ربنا يخليك -بالنسبه لهدية العيد هاقولك عليها البوست الجاى بعد مارد على تاج صبرنى - اما بيبه فالحمد لله كويسه دلوقتى بس طبعا لسه ماشفتش حاجه لانها هتشيل الشاش كله بعد اسبوع - بس اوعدك هاقولك النتيجه ايه -تحياتى ليك
السلام عليكم .. لقيتك عند حبشتكانات فلسفيه .. قلت اشوف .. وبعدين لقيت موضوع رايق قوى مع انك مخنوقه لكن الروقات كان بيان فى البوست .. بس ما قلتيش لنا بيبه شكلها بقى ايه وعملت ايه وبقت احلى من اليسا والا ايه .. تحياتى لحضرتك وكل عام وانت بخير
ايه يعنى اليسا صحيح
مافهاش اى حاجه زياده
و اكيد اكيد برضه بيبه
احلى منها
ربنا يقومها بالسلامه اهيء اهيء
كل عام وانتم بخير :)
هههه ضحكت لتدبيلة الخنقة ..
وبكيت لبوسة اليسا وما سببته من كدر :D ههه
تحياتي لقلمك المرح
كل عام وانتي بخير والجميع
بصراحه حالنا مزري
كل هذا
بس حلوة حيل الهدايا في الاعياد
مع اني اكره هاي الفنانه الماسخه
دمتي بود
عبدالله
بصي يا ستي
الأول كل سنةوانتي طيبة وعيد سعيد عليكي وعلى زوجك الكريم
انا مش عارف انتي ليه تتضايقي او تتخنقي من حاجة زي كدة
مش عيب ان الست تكون حلوة في عين جوزها والله لو جوزي عايزني إليسا ومعاه فلوس يخليني كدة وانا متقبله وعايزة يبقي ايه لمشكلة
وكمان ايه المشكلة لما الراجل يعمل عملية زرع شجر مش عب ان الأنسان يهتم بنفسه
الأنسان هيعيش مرة واحدة بس لو ماعشهاش صح ومتع نفسه ودلعها خصوصا لو كان معاه تمن دة يبقي خسر كتير قوي
ارجو انك تتقبلي رأيي
وكل سنة وانتي طيبة
- ياريت لو تشيلي تأكيدالكلمة لسهولة التعليق
استاذ فشكول تحياتى ليك على مرورك الكريم - وشكرا على رايك فى البوست بتاعى - بس انا والله مخنوقه - بالنسبه لبيبه فهى اتغيرت كتير واكيد هناك فرق -اما بالنسبه انها احلى من اليسا ولا لأ فده كيمو الى يحكم عليه مش انا -تحياتى
استاذ على الملا - شكرا لمرورك الكريم - ورايك فى قلمى - بس بلاش بكاء انا مش بحب البكاء بتاتا البته -تحياتى ليك
استاذ كاتب الانثى - شكرا لمرورك الكريم وكل عام وانت بخير - وانا كمان مابقتش احبها بعد الى حصل - تحياتى ليك
استاذ مصطفى شكرا على مرورك عندى - وانا باحترم راى اى حد مادام بيحترم راى وردى على رايك موجود عندك على البوست بتاعك - وكل سنه وانت طيب - تحياتى ليك
السلام عليكم
بجد ساعات الفلوس بتهبل الناس
يعني على رأي المثل
الفقر حشمة
عمليات و يلعب في خلقة مراته و هي طبيعية مفيهاش حاجة علشان رفيعة
بجد ناس تخنق
و جوزك الله يهديه
انا بصراحة ما بحبش النفسنة
يعني تفتكري لو كان مع صاحبه و اليسا كرمت خده ببوسة اضافية تفتكري كان فتح بقه لبيبة؟؟
منتظرين نعرف نتايج العملية و مفاجأة جوزك ليكي
تحياتي
بصي يا داليا
لا هو المفروض كنتم اولى تسألوا هو الى يسمح لاليسا تبوسه اصلا ده حرام ولا حلال ده لو كان فى دماغهم اصلا الحرام والحلال
وبالنسبه لصاحبتك الهبله معلش يعني اصلها بصراحه هبله
وبالنسبه لجوزها مفروغ منه انه اساسا مخه تعبان
وبالنسبه لجوز حضرتك ؟؟؟!!!!
يعنى بما انه جوزك مش هاقول رايي فيه بصراحه
لكن ايه العقل الى يخليه يغير من صاحبه اوي ويزعل على شبابه وجماله وخفته لمجرد ان زفته اليسا باسته ؟؟؟؟
انا كنت اعذره مثلا لو غار منه على شغله ولا على اي حاجه ولو طبعا الرزق بتاع ربنا
انما عشان اليسا باسته ؟؟؟
اليسا دي تطلع تساوي كام فى سوق الحريم على راي بابا ؟؟؟
واحده نافخه ومصلحه خلقتها عند المصلحاتي ميت مره وكل حاجه عندها تركيب يحب فيها ايه طيب
واحده من وسط تسعين فى الميه منه وصل باساليب غير شريقه مع احترامي للعشره فى الميه الباقيين
واحده شكلها بقى عامل زي المسخ زيها زي اي واحده منهم مالهاش شكل ولا طعم ولا ريحه
بقوا كلهم عاملين زي مايكل جاكسون مجرد مسخ
ايه العقول دي ؟؟؟
ايه الرجاله دي ؟؟؟
وايه الست الهبله الى تفكر تخلي نفسها زي المسخ دي عشان جوزها معجب بها
ايه لما تلاقي جوزها عبيط تقوم تبقى هى كمان عبيطه ؟؟؟
هو الجواز فى اليسا يا بنتى
هو الجواز والحب محتاجين مخدةسيليكون ؟؟؟
وان كان على غير كده الرسول عليه الصلاة والسلام قال ان البضع واحد
وفعلا هو كده بس تقولي ايه على صغر المخ
وخليه يزرع شعر يمكن ساعتها يحس انه بيفهم
على اد ما بوستك دمه خفيف اوي يا داليا على اد ما انا اكتئب لوجود ناس مخها كده
وقولي لصاحبتك تعقل وتتقي ربنا فى نفسها وعيالها
وقولي لكيمو برضه يتقى ربنا وما يسمحش ان واحده تبوسه بلاش بله وعبط بقى مش ناقصه
اه نسيت اقولك
رضا بيقولك كل ده عشان بوسه
امال لو كان حاجه تانيه كان عملي ايه ؟؟؟
كان مشي يزقل فى الشارع ؟؟؟ ويجري ورا عربية الرش ؟
ههههههههههههههههههههههههه
ده كيمو يعنى
بجد انا حبيتك من اول لما شوفت ردك عند مولان
وحبيتك اكتر لما شوفت مدونتك
وبالنسبة لاليسا فهي مش مطربة لو سمعتيها بتغني في حفلة هيجيلك غثيان من كتر خروجها عن اللحن لكن اليسا شكل جميل تتشاف في كليب او تتسمع في كاسيت او رنة للتليفون كده يعني والرجالة مش فاهمين انها بتلبس كده علشان تداري على صوتها النشاز اللي مش بيتظبط الا بأستوديو وبس
الف مبروك ع المدونة وسعيدة اني عرفتها في بدايتها
ربنا يسعدك
استاذ احمد شرفت المدونه انت وزوجه - وكل عام وانت بخير - طبعا لو الباشا جوزى كان معاه واخد بوسه هو كمان مكانش حد عرف خاااالص وكان الموضوع هيبقى فى طى الكتمان - بس اعتقد ان كيمو لاحظ ان الباشا بينفسن واكيد هياخده معاه فى البوسه الجايه -اما بالنسبه لبيبه فزى ماقلت هناك فرق كبير -وهدية الباشا حالا هقولكم عليها- تحياتى ليك ولزوجه
حبيبتى ياصبرنى انا بحب تعليقاتك قوى- بحس انك عاقله جدا غير الستات الى بشوفهم هنا - انا عارفه طبعا ان صاحبتى هبله انها تعرض روحها لخطر العمليه لان ببساطه لو جرى لها حاجه -كيمو هيتجوز تانى وواحده تانيه هتربى ولادها-وحاولت اقنعها كتيير - لكن انت عارفه الحب بيعمى الناس - اما بالنسبه لجوزى انا عارفه انه غيرته من كيمو مالهاش لازمه وضايقتنى قوى - بس انا تعبت من المناقشه معاه لانه مابيقتنعش انه غلطان-مهما حاولت مفيش فايده - انا الى كبرت مخى من زمااان وربنا يهديه -اما كيمو فهو متخيل انه هيصغر 10 سنين لما يزرع شعر وجايز ساعتها اليسا تبوسه على الخد التانى - ربنا يهدى الجميع
صبرنى ياحبيبتى بلغى الاستاذ رضا تحياتى وكل سنه وهو طيب - وانا مش عارفه لو اليسا كانت باسته 3 بوسات مش واحده كان عمل ايه؟؟؟جايز كان عمل شفط دهون او راح عمل اللحميه -ربنا يهدى -تحياتى
حبيبتى ليدى -انا مبسوطه انك حبيتينى من ردى عند مولان مع انى اول مره ادخل عندها
ربنا يكرمك وانا ان شاء الله هازورك فى مدونتك ياجميل
بالنسبه لااليسا انا ماسمعتهاش لايف قبل كده - بس طبيعى انها تلبس كده لان معظم الناس بيروحوا علشان يتفرجوا مش يسمعوا
وربنا يهدى الجميع - تحياتى ليك وكل سنه وانت طيبه ودايما زورينى
انا جيت
ههههههههههههههههههههه
انتى عفريتة
انا طول ما انا بقرا و انا بضحك
هههههههههههههههه
على فكرة بقى انتى تاخدى ميعاد لجوزك بكرامتك
هههههههههههههههه
بدل ما تلاقيه راح لوحدة
هههههههههههههه
يا بنتى الرجالة اتهبلت و الستات كمان و حياتك
و النبي تبقى تكمليلنا حكايات بيبة و كيمو
باين عليهم كبل مسخرة
يتعمل عليهم حكايات لبكرة
هههههههههههههههههه
طيب انتى كنتى عملتيلها طبقين مفتأة و تاخدي انتى ال 25 الف درهم دول
هههههههههههههههههه
مستنية اعرف لما تشيل الشاش حتلاقى ايه
هههههههههههههههههه
سلام و كل سنة و انتى طيبة و سعيدة و عيلتك طيبة
و بيبة طيبة و كيمو طيب
اه نسيت
انما جوزك محروق اوي
علشان مش اتباس عاوز يولعها حريقة
ياخرابي على الرجالة
ههههههههههههههههههههههه
سلامو عليكم
اليسا اليسا اليسا تاني
على كده فعلا هما السبب في كتير من حالات الطلاق بس الحمد لله واضح ان كيمو رايق شوية فما وصلتش للدرجة ده !
بس مش عارف اقول ايه بصراحه
ربنا يصلح الحال
الرضا نعمااااااااااااه
ههههههههههههههههههههههههه
بجد ليكى حق
بس انتى كدا هاتموتى بدرى يا بنتى:))
دولي
الحمد لله يا ربي لما رضا حكيتله على البوست بتاعك قالي هى اليسا دي مين فيهم
الحمد لله يا ربي على نعمة العقل
بس وريته الصوره الى انتى حاطاها وقلتله هى دي اليسا قالي اه عرفتها ده ذوقه وحش اوي
ههههههههههههههههههههههههه
بس فى ناس تانين هو حافظهم ما تقلقيش اصل انا جوزي قديم حبه ههههههههههههههههههههههه
حبيبتى يامفروسه انا لايمكن اعمل عمليه من غير سبب - انا عايزه اربى ولادى - واللى عاجبه الكحل يتكحل واللى مش عاجبه عنا يرحل -(مثل قديم شويه )المهم انت نورتينى يامفروسه ياقمر وكنت غايبه ليه من زمان - وحشتينى قوى
استاذ طارق (كوارث)شكرا لمرورك عندى - انا عارفه ان الرضا نعمه ربنا يدومها على وعلينا كلنا - وكيمو الحمد لله عنده شوية عقل علشان كده مطلقش بيبه ولا اتجوز عليها - تحياتى ليك
استاذ عمرو(نيو واف)شكرا لمرورك عندى وكل سنه وانت طيب -بس بنتى ايه ياعم عمرو انا اكبر منك -وربنا يستر وماموتش بدرى - تحياتى
حبيبتى ياصسرنى ربنا يخلليك استاذ رضا ودايما يهديهولك كده - وربنا يهدى الباشا اللى عندى - تحياتى ليكم
انا تعبت حرام عليكي
تجمل ايه وبتاع ايه
لا رفيع عاجب ولا تخين عاجب
انا ماشيه بالمقاس ياختي
رفعتي اتخني شويه نقوم ناكل
تخنتي ارفعي شويه نقوم نعمل رجيم
وكل ده في 65 كيلو
ههههههههههههههههههههه
صبري روحك وصبريني معاكي واهو بناخد بالاسباب
انا قربت اتجنن
دولى ...بجد بجد انت من الناس اللى حبيتهم جدا وحسيت ان فى تواصل روحى بينا ونفس الاحساس حسيته مع مفروسه وصبرنى يارب ...حاسه انكم كده زى كوكتيل فاكهة متنوعة بس لذيذه
بالنسبه للموضوع ده مش عارفه اقول ايه.. بس هو ده الواقع ان هناك عقليات بهذه التفاهه سواء من ستات او رجاله ..ولكنها ياعزيزتى الدراهم الكثيرة التى تعمى العين وتشوه العقل ... حكايتك دى برضه صوره من صور الابتذال والسفه زى حكاية ام حسين ... لكن للاسف مش عارفين مين الغلطان
حواء ولا ادم ...
بس اهم من ده كله انتى ست بألف برطمان عسل ........
عندك حق فى الخنقة... دول عايزين عملية فى المخ عشان يعقلوا شوية دمتى بحب ومودة
إرسال تعليق