عارفه انكم زعلانين مني قوى ....علشان بقالى اكتر من شهر مابسألش عليكم ...
وشكرا لكل الي سألوا علي....بس أنا بامر بفترة كئيبه فى حياتى ...وانا يظهر اتعودت لما اكوون متضايقه ..
مااتكلمش مع حد خاااالص... وده غلط جدا ...بس دايما باقول ان كل واحد عنده همومه ومش ناقص يشيل
هموم حد تانى ...بس انا تعبت من الوحده قوى ...وتعبت من الغربه كمان ...
الحكايه ببساطه ان البلد هنا قفلت خلاص وماعادش فيها شغل لأى حد ....وبيبه سابتنى وسافرت البحرين نهائى...
علشان جوزها نقل شغله هناك مع مديره...وفجأتن كده الباشا قرر يسافر هو كمان السعوديه تانى ..بس الرياض المرة دى...
مش عارفه ليه انا المرة دى زهقت ..اه والله العظيم زهقت...
حسيت اني بالظبط الشنطه بتاعته..من غير مايقولى ولا يفكر حتى انه يناقشنى ...ولا حتى يقولى انه بيدور على شغل تانى
لالا..اخد القرار وانا علي التنفيذ وأنا ساكته ....
بس المرة دى ماسكتش ...تخيلوا ..حتى انا استغربت من موقفى ده ....
اول مرة مابقاش سلبيه وأأقول حاضر وبس....واتخانقت معاه ..وقررت اني انزل اعيش فى مصر لوحدي...
واخد ولادى ..وهو يروح يتغرب براحته...
طبعا هو رفض الكلام ده ..واستمرت الخناقات بنا ...
جايز تقولوا انى غلطانه ..بس انتم عارفين انا غيرت كام شقه فى حياتى من يوم ماتجوزت...
تقريبا 8 شقق فى بلاد مختلفه ...وغيرت للأولاد يمكن 4 مدارس...
واشتريت عفش وبعت عفش اكتر من 5 مرات .,..
وعرفت ناس كتيرة قوى ..وبرضه سبت ناس كتيرة قوى ....
نفسي مرة احس بالأستقرار فى حياتى ..وأنى مش مضطرة اسيب الشقه تانى ..ولا ابيع العفش ..ولا اغير مدارس الاولاد ..
ولا اغير شغلي..ولا اغير اصحابي ...ولا ابدأ من جديد تانى ...
انا تعبت ...فعلا ..تعبت قوى ....
انا اتكلمت مع صبرنى يارب ..كتيير وكانت نصايحها حلوة بصراحه ...بس برضه صعب قوى تغييرى طريقة تفكير
الراجل...
يمكن هو صح ...ويمكن أنا صح ...صدقونى أنا مش عارفه مين فينا اللى غلط....
المهم ان الموضوع لسه ماتحلش...كل الحكايه انى هانزل مصر اجازة مفتوحه لغاية معاد المدارس....
يكون الباشا قرر فيها ناوى يعمل ايه ...
لانه مش مقتنع بتاتا البته انه يستقر فى مصر ....
وشايف انى خياليه ....وان الوضع فى مصر مايسرش...وانى هاتعب لوحدي هناك...
المهم انى اتكلمت معاكم ..لأنى فعلا كنت هاطق من الخنقه لوحدى ....لأن صاحبتى الوحيده سابتنى
ومشيت ...وخفت يجيلى كأبه بجد من القعده لوحدى من غير ماتكلم مع حد ....
بس انا جاتلى سدة نفس عن الكمبيوتر والنت والخرووج وكل حاجه ....
ومابقتش احب حتى اتكلم مع الباشا او اى حد ....
معلش خنقتكم ..ماتزعلوووش منى ..عارفه ان كل واحد عنده همومه ومش ناااقص....
مش تزعلوااا منى ..
مأنا مخنوقه الخنيقه ....عادى يعنى ....
71 التعليقات:
اممممممممم
الاول اقولك ازيك يا مخنوقة ؟ اتمنى تكونى بخير وافضل من احساسك اللى فى البوست دا ان شاء الله تكونى افضل كل مشكلة وليها حل
الاول من غير خناق حاولى تفهمى الباشا تأثير عدم الاستقرار على الاولاد قبل ما ياثر عليكى انتى وان كفاية غربة اكيد كل الغربة مجرد محطة قبل ما نرجع بالدنا تانى مهما طالت فافضل لو قصرنا الوقت ورجعنا بدرى مادام نقدر عشان نقدر نتاقلم ونستقر
وبعدين اشرحى له سبب قرارك دا وحاولى تشوفى سبب خوفة من مصر حتى لو هى سيئة جدا
وهو مش شايف غير دا حاولى تفهمية ان مميزتها اكتر من مساوئها وقوليلة طيب نجرب ونشوف ويعتبرها محطة فى حياتة
يعنى كل واحد يتنازل شوية من تمسكة برئية ومن غير خناق وبحوار هادى شوية ممكن توصلوا لحل
ربنا يوفقك
وان شاء الله تكونى افضل وتلاقى حل
تقبلى مرورى
مالك بس ياقمر
انا زعلانه عشانك بصضي انا مكملتش البوست انا قريت اول حبه وحاسه انك زعلانه
يارب تكوني بخير يارب وربنا يعملك اللي فيه الخير
هكمل البوست وارجعلك تاني
مضيقيش نفسك خالص
سشبيها علي الله
قدر الله وماشاء فعل
مش عارف اقولك ايه
بس بجد ربنا معاكى
لا يامخنوقه اكيد انتي بتمري بوقت صعب جدا وربنا معاكي بجد موقف وحش ومحير وكمان من مش معاكي حد ولا صحاب تفضفضي ولا تكلمي احساسك ده نفس احساس صحبتي اللي مسافره لسه مكلماني امبارح وعماله تعيط ومش قادره تتكلم مع حد ولا حتي اهلها انا زمان كنت بهزر واقول اللي مسفرين بيدلعوا ويقولوا غربه وعدم استقرار بس فعلا الواحد ميعرفش حاجه عشان مجربش ربنا يكون في عنكوا كلكوا وربنا ييسرلك امورك
بس في حاجه وانا عارفه انها هتبقي صعبه منين ميكون هو موجود لازم انتي والاولاد تكوني معاه سعوديه السودان مصر دبي المهم مش تبقي في مكان وهو في مكان ويبقي هو بالنسبالكوا بنك فلوس لا وتتحملي انتي كل هم ومشاكل الاولاد لالالا لازم يشاركك في كل حاجه ومتتحمليش المسؤليه لوحدك سواء قدرتي تقنعيه انك تنزلوا مصر او هو اقنعك انك تسافري السعوديه
هو كمان غصب عنه وعنده حق لو لاقي حاجه تريح في مصر كان قبلك نزل وعاش بس هو معذور لان اللي يعيش في مستوي اي دوله عربيه صعب ان ينزل لمستوي المعيشه اللي في مصر
استخيري ربنا وصلي صلاه استخاره واتفهمي معاه باسلوب كويس في ساعه صفا وحاولي توصلي لحل وسط بس اهم حاجه رجلك علي رجله في اي مكان يروحه بجد ده افضلك من اي وضع تاني
ربنا يعملك اللي فيه الخير
ويبعد عنك اي خنقه يارب
اللهم اصلحلك حالك
متغبيش علينا بجد بنقلق عليكي اوي وفضفضي معانا احنا اخواتك وبنعزك جداااااا ربنا يسعدك
اختك الرغايه سمكمك
عارفه وفاهمه يعني ايه كل شويه تنقلي في مكان
يعني ايه كل شويه ليك صحاب ويبعدوا وتبدأي في صداقه جديده مدومش
عارفه يعني ايه عدم استقارا في بيت واحد او شقه واحده
يعني ايه عدم استقرار الولاد خاصا
بس مش يمكن دي حكمه ربنا وان ده خير في الاخر
ربنا مش بيعمل حاجه وحشه
جايز يكون ابتلاء ولازم تصبري عليه عشان ربنا ان شاء الله يعوضك خير
عارفه انا ان ممكن تزهقي من كلامي وتقولي اني بقول كده عشان مش في مكان واني مش حاسه بيكي
بس والله انا زعلانه عشان عاوزاكي تبصي لنص الكوبايه المليان
وربنا هيفرج همك ان شاء الله بصي للمسأله بنظره تانيه
يارب يامخنوقه ترجعلنا ببوست كله تفأول ودمه زي العسل ذيك ياقمر
يخرب عقلللللللللك
وانا اقول البت خدت بالنصيحه واختفت ومقضايا بمب ومراجيح
شوف البت الى وش اكتئاب وخنقه
يا مخنوقه يا حياتي ما افسده دهر لا يصلحه يوما ولا شهر
الصبررررررررررررررر
ده بالنسبه للتغير من فكر وطريقة حياتكم انتم الاثنين
انما موضوع الغربه طبعا محتاج تراضي بينكم
وانا شايفه انك تقترحي على الباشا انه ينزل معاكي مصر فترة الصيف وتحاولوا تعيشوا سوا هنا وبعدها تقرري انتى وهو طبعا
وطبعا طبعا عندك حق انك عايزه تستقري
انا جربت حياة الا استقرار دي وباكرهها جدااااااااااااا
يمكن انا بنتى كانت صغيره ايامها وما كنتش مشاكلي كتير
انما اعتقد لو فى عمر ولادي ده واضطريت للتنقل كده ممكن ولادي هما نفسهم يقتلوني
ده انا حبيت اغير اللعبه الى بيدربوا عليها عملوا ثوره فى البلاد
فانتى بالراحه كده
وكلمينى على الاميل وفكي عن نفسك مش تكتأبي كده وتقفلي على نفسك
وحشتيييييييينى
ازيك يامخنوقه
والله انا راي انك مينفعش تنتقلي من النقيض للنقيض في المعامله مع زوجك
يعني مينفعش يكون متعود منك علي حاضر وطيب في كل حاجه وإذ فجئتا يلقي لا وخناق ومشاكل
يعني اولا نهدي شويه ونخرج من حالة الاكتئاب
باي طريقه
ونحاول نتفاهم باي طريقه
وبصراحه معنديش اي حل لو كنت مكانك غير انك تقنعيه ينزل معاكي مصر في فترة الاجازه
او تحاولي تقنعيه انكم زي مجربتوا حظكم في كذا بلد نعتبر مصر ديه مجرد محطه زيها زي غيرها ونجرب الحياه هنا لو لقينها ماشيه يبقي خير وبركه
ولو فيها مشكله يبقي نشوف غيرها
انا عن نفسي جربت العيشه في مكه 4 شهور فقط
وتعبت نفسيا جدا مع اني كان معايا مصريين كتير جدا وساكنين كلنا في فيلا واحده
وبعدين الحرم هناك كمان حكايه
ولكن ده مخلنيش اقبل الغربه أو احس اني مبسوطه او متعبش من بعدي عن اهلي
الغربه مره اوي حتي لو كنتي في اطهر بقاع الارض
ودايما ادعي
اللهم دبرني فإني لا احسن التدبير
ربنا يفك كربي وكربك يارب ويرزقك الخير حيث كان ويرضيكي بيه
تحياتي
والله يا مخنوقة حاجة صعبة انك تتنقلى من مكان لمكان بس هو ده دورنا اننا نكون معاه فى أى مكان يروحه انا عارفة أد ايه انك تكونى لوحدك ومش لاقية حد تتكلمى معاه وكمان بتبقى الخناقة صعبه والسكوت والاستسلام أصعب وانت شكلك يا حرام واخده كله على أعصابك وكمان الأولاد وبالذات فى المرحلة اللى هما فيها بيكونوا محتاجين للإستقرار ويكونوا صداقات كده بتبقى فرصتهم أقل فى تكوين صداقات يعنى الموضوع من كل الاتجاهات صعب يمكن محتاج انك تتناقشى مع الباشا وتوصلى له اللى تقصديه واللى ممكن يحصل وربنا يهديه
افضلى قولى "اللهم اهدى قلب من أحوجتنى إليه " افضلى قولى الدعاء ده على طول وافضلى استغفرى ربنا كتيييييييير وان شاء الله ربنا هيعديها على خير ويكون الجاى بإذن الله أحلى وربنا معاكى يارب
دمتى بكل الخير والسعادة وراحة البال
يااااااااااااااه كل دا
ربنا معاكي
بس انا شيفه انك لو عشتي في مكان وجوزك في مكان غلط هتحصل فجوه بجد كبيرة وموش هتقدري تعيشي كدا دا ممكن توصل انك تكرهيه
لازم تكوني معاه في اي مكان
اولا عيب اووي لما تقولي انك مش عاوزة تتكلمي معانا احنا هنا علشان نكون جنب بعض في الوقت اللي الدنيا حوالينا ممكن تكون ضيقة اووي علينا
تاني حاجة حكلم معاكي بصراحة ومتزعليش مني اعتبريني اختك معلش
انتي كده عملتني زي اللي عمل رز باللبن ورش علي وشه تراب
يعني تعبتي مع الباشا واتغربتي غيرتي حياتك بدل المرة 10
وجايه دلوقتي تقولي لاء اللعبة مش عجباني
انا معاكي انك اتكلمتي بسر برضو حاولي تاني مش تأخدي قرار انك تنزلي مصر وتسبيه
انا سمعت قصص وحكايات كتيير عن رجاله عاشت لوحدها في الغربة ونست اهلها وعيالها
ليه تسيبي حياتك لغيرك
خاولي معاه كمان مرة يمكن يقتنع
حاولي بالحيلة مرة وبالدلع مرة بالخناق مرة
بس متسيبهوش لوحده
الراجل زي البيبي الصغير اي حاجة تشد انتباهه
فلو سيبتيه لوحده انتي واولادك اللي حتخسرو
اي نعم حتستقرو "بس هو حيكون استقرار مكاني مش نفسي"
وحيكون كل تفكيرك مع جوزك
بصي مهما كان بيحبك ومهما كنتيب غالية عنده انتي واولاك بس البعيد عن العين بعي عن القلب
استحملي واصبري علشان تعب السنين وغربتك مترحش هدر
ويجي حد في لحظة يأس منك يشيل الجمل بما حمل
انا عارفة اني قاسية في كلامي
بس لو انا كنت مطرحك كنت حكون محتاجة اسمع الكلام ده
مش حكون محتاجة حد يطبطب عليا ويقولي انتي صح انزلي مصر لوحدك
خليكي مع جوزك لو اقتنع ونزل معاكي يبقي اهلا وسهلا مقتنعش يبقي اقعدي معاه واقسمو البلد نصين
حو وقت او جدول زمني لطموحه بمعني "لو انا سافرت معاك دلوقتي امتي حنستقر بعد سنة اتنين واتفقوا "وساعتها ارضي وعيشي مع اولادك
الزمن اللي احنا فيه صعب اوووي تربي اولادك لوحدك وهنا في مصر
اسفة مرة تانية لو كنت قاسية عليكي
بس والله كنت حقول نفس الكلام لاختي لو في مطرحك
ربنا يفك كربك وهمك ويقصر غربتك وتنوري مصر قريب
سلام
بصي.. بما انك فى مصر أو نازلة مصر
فحاولى تستمتعي بالأجازة على قد ما تقدري
بالنسبة لموضوع السفر وبعدك عن جوزك دة صعب جدا صدقينى.. وبكدة هيبقى حكم على الزواج بفجوة كبيييييرة
حاولي تفكري وتشوفي المميزات فى التنقل مع الزوج أو الاستقرار لوحدك.
وادعي لربنا كتييييييير يقدملك اللى فيه الخير ويريح قلبك ليه.. وان شاء الله ربنا يقدملك اللى فيه الخير.
وبعدين متغيبيش تاني وفضفضى معانا يا قمر.
بسم الله الرحمن الرحيم
بقالى كتير مرضيتش رد جد ف مدونة كله هزار ، انا طبعا جديدة و ما اعرفكيش بس انا هقولك اللى كنت هعمله لو ف مكانك و هنصحك بما يرضى الله
اولا
انا مش عاجبنى اسم مخنوقه ، مش بيقولوا ان الناس ليها نصيب من اساميها ؟ انا حاسة انك حتى لو داخلة رايقة كلمة مخنوقه هتأثر عليكى و دى نقطة تبان فريعة بس صدقينى مهمه
ثانيا
انا مش مع جوزك ف انه يخبى عليكى هو بيعمل ايه و بيفكر ازاى و خصوصا ان ده قرار مصيرى هيغير حياته هو و حياة اسره كامله بس ف نفس الوقت هو عمل ده ليه ؟
1 - ممكن يكون كان مستنى يلاقى فرصه فعلا عشان عارف اللى هيحصل فمش هيفتح على نفسه فتحة ع الفاضى
2 - تكونى انتى من الناس اللى بتتعلقى بالشئ او بتبالغى ف ردود افعالك فيكون مش عايز يقول حاجه قبل ما كل شئ يبقى حقيقى
3 - يكون بناءا على انك اتنقلتى معاه كتير فهو مش متخيل اصلا انك هترفضى
4 - ان رأيك مش مهم اصلا و موافقه مش موافقه هو موقفه ثابت
معتقدش هيبقى فيه سبب خامس
المهم انتى من حقك تقفى وقفة هنا ، و من حقك تقولى ان حياتكم شركة هو مش معاه توكيل منك لكن ربنا عرفوه بالعقل انا رأيى الصراحة ان مهما كان السبب و مهما كان حجم المعاناة مفيش اسرة يتفك شملها سواء بقى هتعيشى فى مصر - و اللى حالها فعلا مايسرش حد - او ف السعودية - اللى منفسيش اعيش فيها - او دبى - اللى صاحبتك مشيت منها و ملكيش شغل هناك - ايا كان الحال واحد
بصى يا حبيبتى لو بقيتى ف مكان انتى و عيالك و جوزك ف مكان
1 - هتحسى بوحدة فظيعة ، هتحسى بعدم الامان ، هتفتقدى جوزك و حياتك الزوجية و نفسيتك هتتأثر و ه هينعكس على علاقتك بكل الناس سواء عيالك او اهلك او جوزك
2 - عيالك نفسهم هيتأثروا و يتشتتوا و متفتكريش ان لما ييجوا مصر مش هيحسوا بغربة ف الاول و ممكن يبقوا ناقمين عليكى انتى و ابوهم اللى خلوتوهم مشتتين
3 - ابوهم هيبقى بالنسبة لهم مصدر للفلوس و علاقتهم بيه هتقل يوم بعد يوم و مش هيبقوا عايزينه ينزل لانه مجرد بنك
4 - لو رجع بعد غياب طويل هيبقى فيه مشاكل كتير لانك هتكونى اتعودتى تبقى الام و الاب و عيالك بياخدوا منك انتى الاذن و هو ع الهامش
انا ضد التفرقه دى و لو نصيبك تتغربى مع جوزك يبقى لازم تقبلى مش عشان انتى الجارية اللى امه جابتهاله لكن عشان هى دى حياة الاسرة
الحل الوحيد بالنسبة لى انك تقعدى معاه فعلا بهدوء و بعقل و من غير انفعالات او اى اساءة و تتناقشوا ما بين الحال هنا او هناك و تقولى انا معنديش استعداد للتفاوض يا دبى مثلا يا مصر هو يقولك يا السعودية يا دبى فتختاروا دبى ايا كان تتناقشوا و تشوفوا مصلحة اولادكم و مصلحة العيلة كلها لان فى نظرى مصلحة الاسرة بصحة كل افرادها مش اطراف دون اطراف
انا طولت و اتدخلت و قلت رأى يمكن ميعجبكيش بس سمى و صلى صلاة استخارة انتى و جوزك و اتوضوا و اقعدوا اتناقشوا مع بعض بهدوء و مش عيب تتناقشوا مرة تانية و تسمعوا فيها رأى اولادكم لو هم ف سن يسمح لهم بالاستيعاب فعلا
ربنا يكرمك و يوفقك
أزيك يا مخنوقة؟؟
الله يكون فى عونك
الموقف صعف
وطالما انتى كدا كدا فى غربة وكدا كدا هو فى الرياض وانتى فى دبى يبقى ارجعى مصر أحسن.. واهو تبقى فى وسط اهلك.. انا حاسة بيكى وبحالة عدم الاستقرار دى وبوحدتك كمان.. حاولى تكلميه وتقنعيه برأيك
ازيك يا مخنوقه عامله ايه والله انا قولت يمكن مش بتدخلى علشان الامتحانات
بس الموضوع طلع اكبر من كده
بصى نصيحه من اختك الصغيره
كلنا بطبيعتنا الستات غيورين جدا على الناس اللى بنحبهم ما بالك ده جوزك وابو ولادك مينفعش تسبيه لوحده فى مكان وانتى فى مكان تانى وفى نوع من الستات مينفعش راجل يعدى من تحت اديهم
وفى مثل بيقول اللى بعيد عن العين بعيد عن القلب
بلاش تسيبى الباشا لوحده خليه معاه واستحملى علشان ولادك وعلشان تحافظى على بيتك حتى لو البيت ده احواله مش مستفره
ويارب يفك خنقتك يا حبيبتى
تحياتى
ازيك مخنوقه اخبارك ايه
اوعى اوعى ثم اوعى تسيبى الباشا لوحده انتى فاكره يوم المطعم يوم الساعه ايو الله ينور عليكى يوم الساعه وكنتى معاه امال بقى لو مشى معاه عارفين ان الغربه زفت ونيله وقطران بس هنعمل ايه وبعدين حتته تستقرو فى مصر ترجه اولا الى وظيفه الباشا فى وضائف فى مصر ليها شغل ومهن تانيه بح .... ثانيا هل الخميرة اللى معاه ربنا يزيده طبعا تقدر تسند فى المعيشه ولا لأ ...... بس تسبيه لوحده ممنوووووووووووع واتكلمى معاه وناقشيه بس بدون خناااااااااااق وفهميه وجهه نظرك فى الاستقرار وكده وبعدين ياستى تعلو الرياض مالها الرياض حتى نبقى جيران مش انا مش زماااااااااااان بقولك يبقى تعالوا ههههههه لفت ورجعت لى تانى اهو ودعواتى ليك بالتوفيق
معلش يا مخنوقة ، الدنيا كده وانا شايف كل التعليقات تقريبا للستات وكلهم شايفين انه لازم تكوني مع الباشا في اي مكان ، طبعاً العقل بيقول كده ، ممكن تنظرى لها من ناحية تانية انك بتسافرى مصر كل سنة وكل سنة بفرحة جديدة واشتياق جديد وقصص جديدة عن الغربة ، وبنحاول نعيش ونقضي الايام ، ربنا يوفقك 0
(من غير حد ما يسمع:ممكن تقولى لي المطعم اللي في الدور 25 اللي بيلف فين بالضبط في دبي) وحياتك يا مخنوقة نفسي اروحه قبل ما ارجع مصر ، اضحكى بقى 0
السلام عليكم:أنا أول مرة اعلق عندك علي فكرة بس لأن الموضوع مسني بشدة لأني مثل حالتك بالظبط بس اتي سبقاني بكزا خطوة أنا غيرت 3 شقق لحد دلوقت وبغير للولاد السنادى بردة تالت مدرسة ووكنت في الكويت وبعدين جيت جدة الفارق كان رهيب طبعا بين الكويت وجدة اول سنة اكتئاب عادى وفرق في العيشة وكل شيء وفي انتظار تغير البلد للمرة التالتة عادى بس فعلا نفسية الولاد بتبقي سيئة مع عدم الاستقرار اكيد بس اتي في حالتك الاختيار صعباولا لان مش هتقدرى تقعدى في مصر لوحدك لان وجود الزوج بيشيل المسئولية شوية وان الدراسة في مصر مختلفة تماما عن الخليج مهما كان المستوى وفي نفس الوقت احب اقلك العيشة فى الرياض مختلفة عن دبي تماما انتي مش هيجيلك اكتئاب وبس هيجيلك شلل رعاش اولا هناك الزى الرسمي العباية السودا وتغطية الوش ممنوع السواقة لستات الخروج مش براحتك او لوحدك زى دبي مع الاخز في البال انتى هتتعملي مع ناس عقليتهم مختلفة عن الشفتية قبل كدةواخيرا لازم يكون في حل وسط واتفاق ياما تقعدوا في مصر انتوا الاتنين يااما تروحي معاة الرياض وتستحملي شوية لحد ما تتاقلمى وتبدائي من الاول ربنا يكتبلك الأصلح ودمتي بخير وطمنينا عليكي ديما
أرق والذ زوجة مخنوقة في الدنيا
انا قرات مدونتك كلها من اول بوست لاخر بوست
وبصراحة عجبني اسلوبك الجميل والبسيط اوي وحكاويكي الجميلة
ربنا يسعدك ويفك ازمتك وتستقري في حياتك ان شاء الله
ويسعدني اوي انك تشرفيني بالزيارة لمدونتي الجديدة
http://awrakelward.blogspot.com
بسم الله الرحمن الرحيم الاجابة هى
مصر هيا امى
بنت الغربة بجد وحشتيني جدا
حاسه بيكي اوي
حاولي تقعدي مع الباشا وتتكلمو بهدوء من غير خناق وتتوصلو لحل
وعايزة اقولك ان قرار نزولك لمصر لوحدك هيبقى قرار صعب عليكي ده غير ان الدراسة والمدارس في مصر مختلفه عن دبي طبعا
ربنا ييسرلك اللي فيه الخير وبطلي خنقه علشان تعرفي تفكري كويس
الموضوع بسيط حتى لو كنتى شايفاه معقد . مكانك مكان جوزك عشان نفسية ولادك ونفسيتك وسيبيه هو يتحمل نتيجة تصرفاته انما فكرة انك تسيبيه او ترجعى مصر لوحدك فكرة مرفوضة . فهميع بالراحة ان الحياة مش فلوس وبس وان الاولاد عمرهم ما هيكون ليهم صحاب طول ما هم بيتنقلوا من بلد لبلد كدة . وبعدين مالها مصر ؟
مخنوقه يا حبيبتى انا عارفه ومقدره اليى بتقوليه من عدم الاستقرار وقد ايه الاحساس ده وحش
وده يمكن لاننا اتنقلنا شويه واحنا صغيرين
بس هقولك حاجه ومن قلبى
صدقينى طول ما انتى مع جوزك واولادكم حواليكم بكامل صحتهم دى الدنيا الحقيقيه يا جميله
انما لو عشتى فى فيلا فى قلب النيل فى مصر وانتى واولادك بعاد عن جوزك صدقينى هتحسيها سجن
الخنئه دى هتاخد وقت وهتروح لحالها ان شاء الله
وفكرى فى الجانب الايجابى هو بيسعى للنقل لمكان تانى ليه متغربه هو كمان عن قرايبه ليه مهو عشان ولادكوا يتربوا كويس ويعملهم مستقبل
يعنى مثلا مش متجوز واحده تانيه وبيصرف عليها مش بيعرف ستات وواكلين مخه فهمه جمع الفلوس عشان يقدر يرضيهم
فهمتى انا ااقصد اوضخلك ايه
ابوس ايدك اعقلى وبلاش نغمة كرامتى فى الخله دى كرامه عن كرامه تفرق يعنى مقمش عملك كفته يا مخنئوه وبهدلك فنقول كرامتى
ولاا هزئك قدام حد فنقول كرامتى
ولاا قل بيكى قدام ولادكوا فنقول كرامتى
مااخدش رأيك فى السفر وتغيير مكان الشغل اعتبريها هفوه يا ستى او واثق من حبك ليه وللبيت وانه لو قالك يلهنهاجر المريخ ومفيش اوكسجين هناك هتقولى ماشى وتجرى تقطعى انتى التذاكر
اعقلى ابوس ايدك وبلاش تهور
اسهل حاجه فى الدنيا هدم البيوت وخرابها بتبقى فى لخظه فى فنتو ثانيه وااقل
انما بنيانها والمحافظه عليها قدام مشاكل ومنغصات الحياه صدقينى صعب قوى
اتمنى يكون كلامى فادك او هيفيدك بحاجه
يا ريت كانت الخلافات الزوجيهكلها كانت من النوعيه دى يا مخنوئه صدقينى مكنش فيه ولاا بيت اتخرب
ربنا يطمنا عليكى ان شاء الله
وتطمنينا عليكوا زى ما قلقتينا كده
وسلميلى على اختك حبيبتى جامد
مهما كانت الغربه صعبه... وضيقه... لكن تفضل أحسن بكتير من العيش في الوطن والزوج بعيد... والأطفال بعيدين عن والدهم...
لو رجعتي مصر لوحدك... وعلى مر الوقت... حتفقدي كل مشاعرك تجاه زوجك... وهو كمان تجاهك وتجاه اولاده...
حاولي تلاقي حل لموضوع الشعور بالوحده(وحتلاقي لو فكرتي)... لكن ترك زوجك لا أنصحك ابدا ابدا...
انا عندي ثلاث اخوات مغتربات... كل وحده في بلد... ومالهومش حد في الغربه خاااالص... و وحده منهم متغربه هي والاطفال زوجها مش معاها (الموضوع مش سهل ابدا)...
يعني كان الله في عون الجميع...
توكلي على الله اختي... وماتسيبيش جوزك ابداً...
مخنوقه
مفيش حد فى الدنيا مش مخنوق الفتره دى
سياسه متوتره .. اقتصاد فى النازل .. مجتمع خايف من بكره .. مدارس غاليه اوى .. اكل مش صحى .. غلاء فاحش فى كل مكان .. كل حاجه فى الدنيا مهببه ومنيله بستين نيله
وبعد كل ده اكيد مش هيكون فيه شغل كويس فى مكان كويس .. لازم فعلا تراعى ظروف الباشا مع انه استعمل الطريقه الغلط فى توصيل المعلومه ليكى بس عاجلا او آجلا وبأى طريقه تانيه سواء حلوه او وحشه كده كده هوا اللى متحمل مسؤلية البيت والعيال ومسؤليتك انتى شخصيا من كل النواحى .. واكيد لازم يكون هوا صاحب القرار فى كل الامور المتعلقه بالمسؤليه اللى على كتفه .. ينظمها زى ماهو عايز . المهم انكم فى الاخر تعيشو عيشه كويشه سواء كان فى مصر او دبى او حتى فى الصومال
وبعدين الرزق بتاع ربنا ولو ليكى رزق فى الهند هتروحى تاخديه
اكيد الباشا هوا كمان مش مبسوط بالتغيرات اللى بتحصل واكيد هوا بيتعب منها جدا على الاقل نفسيا
التمسيله العذر من ناحية ظروف شغله وهوا ادرى بيه ومن ناحية كبريائه ومستوى معيشته اللى اتعود عليها ومعندوش استعداد انه ينزل لمستوى اقل ... الناس بترتفع مش بتنخفض يا مخنوقه بس نعمل ايه الدنيا ملاهى يا اختى ..
احنا كلنا فى الغربه على كف عفريت وانتى عارفه كده كويس .
عموما اهلا بيكى فى السعوديه فى اى وقت .. الرياض جميله وهتلاقى شغل ليكى انتى كمان انشاء الله .. مازالت الفرص متوفره فى مجالك عشان المجال ده هنا يعتبر جديد مبقالوش كام سنه ..
سيبى كل حاجه تمشى لوحدها وسيبيها على الله
انتى ازيك وعامله ايه ؟؟
مهما كان الاختيار
اوعي تسيبي جوزك
اوعي تعيشي في حته وهو في حته
اوعي تفرقي العيله
عيشي مكان ماجوزك يعيش
مش صديقتك هي كمان انتقلت مع جوزها
انت كمان انتقلي مع جوزك واديكي بتشوفي ناس جديده وعيشه جديده
ولو اجبرتيه علي العيشه في مصر ومالقاش شغل والا اشتغل في مكان ماعجبوش والا تعب فيه هتكوني انتي السبب ويحصل خلافات
ريحيه هو كمان عشان يقدر يشتغل
اكيد هو كمان مش مزاجه التنقل بس بيدور علي العمل الافضل اللي يوفر لكم الحياه الكريمه
ربنا معاكم
حاجتين ضد بعض ومهمين جدا
** ألم تكن أرض الله واسعة فتهاجروا فيها
** الراضي له الرضا والساخظ له السخط والعياذ بالله
**********
حاولي توسطني نفسك بين الحتتين دول
ولادك جنبك إنت وجوزك 9 شهور في السنه ماشي
نرضى بعربيه متوسطه بدل المرسيدس وماله
إنما عمر هذا الدنيا ما حيزت لأحد كلها.. إلا لو كان يملك قوت يومه وأهله في أمان بجواره
ربنا يهدي سركم
صحيح دبى قفلت شوية بس اللى هيصبر هيلاقى خير واللى هيهرب الحين هيندم
تمهلى شوى واقنعى الباشا الامور هتصير خير انشاء الله
تحياتى
والله أنا مش عارف أقولك أيه
بس أنتي معاكي حق
وبرده هو معاه حق
هو عايز الخير لكم والرخاء
وأنتي عايزة الاستقرار
ده هو تفكير الرجل وبرده ده هو تفكير المرأة
محتاجيت تتفهما مع بعض بصورة اهدى عشان مستقبل الأولاد
ويبقى التواصل
اللى يشوف خنقات الناس تهون عليه خنقته
والله يا مخنوقة أنت معاك الغربة صعبة جداً و على فكرة أنت لما تيجى مصر هتحسى أنك فى غربة برضو و المشكلة أن أولادك هتكون دى المشكلة عندهم هيحسو دايماً بالغربة لأن مفيش بلد أستقرو فيها
فنصيحة ليكى حاولو تستقرو فى أى بلد أياً كانت البلد دى خصوصاً علشان الأولاد
وربنا يهدى النفوس
تــــحياتــى
الغالية جدا علينا مخنوقة
هدي اعصابك شوية وفكري بمنطق انا معك لك كل الحق تزعلي منه انه اخد القرار لوحده لانه اولا مش من حقه يعمل كده لازم يناقشك حتى لو القرار النهائي له انتم في مركب واحده ولازم تجدفوا سوا وراي الخاص ان الي عاش في بلد مفتوح زي الامارات صعب قوي يعيش بالسعودية وخصوصا زوجك يمكن انت بالنسبة لك اهون منه لانك عشت سنين بالسعودية وعارفة المجتمع السعودي اكثر منه وفي الغالب جوزك حيندم على انه اخد القرار ده
بس انت كمان حتتعبي وتندمي لو سبتيه وعشتي بولادك في مصر صدقيني انا فكرت اعمل زيك من فترة كده كنت مخنوقة قوي من الغربة ومن الحياه هنا وفكرت اني اخد ولادي وانزل مصر ولما قعدت مع نفسي شوية لقيت انه قرار مش صح لاني لوحدي بالولاد من غير ابوهم حيبقى صعب علي ولن اكون سعيدة ابدا بدونه وكمان الولاد حيتحرموا من ابوهم ويشوفوه مرة كل قد ايه كل كم شهر صعب قوي وحرام علي انا اكون كده بعاقبهم هم وهم ملهمش ذنب وهو مهما كان مش حيغلب حيتأقلم على عيشة العاذب لكن انا وولادي حندفع الثمن مضاعف والاسرة كلها حتبقى فعلا تعيسة متحكميش على ولادك ونفسك بكده
شوفي ممكن تنزلي اجازة فترة ترتاحي وتريحي اعصابك وتشوفي مصر بمنظور جديد يعني فكري كده تقدري تعيشي من غيره بولادك واكيد حتوصلي لقرار انه لا وانا معك ان عدم الاستقرار مرهق لاعصابك ولاولادك بس صدقيني الاطفال افضل مننا في التأقلم وكتير من الناس بتعيش رحالة من بلد لبلد واولادهم بيطلعوا عندهم ثقافات متعدده والسفر له 7 فوايد راجعي جوزك وعاتبيه انه مخدش رايك بس ايا كان القرار الي حتخدوه لاتتركيه لتعيشي وحدك ابدا وربنا معك يارب ويبعد عنك الغمة دي ويهدي لك زوجك ويسخره لك يارب
بصي يا مخنوقة انا هقولك على الصح اللي تفكرى فيه كويس قوى
لو اي حد قالك اي حاجة غير انك تكونى مع جوزك فين مايكون يبقي غلطان وتبقي غلطانة لو سمعتى كلامه
ان شاالله تغيرى العفش والشققق والجيران الف مرة مش اربع ولا خمس مرات ماتسبيش جوزك لوحده
هو مش عايز يستقر فى مصر دلوقتى اوك انت معاه فين مايكون هو مش هيقعد فى البلد وهي مافهاش شغل والناس بتتصفي
اما موضوع مدارس العيال فين ماتكون يقدمو فى البلد اللي هتعيشو فيها
بلاش تسيبى جوزك لوحده يا مخنوقة
مافيش حاجة اسمها اجازة مفتوحة والعيال معايا
لان بصراحة دة كدة اسمه كلام فارغ وعواقبه ممكن ماترضكيش الست مطرح ماجوزها يكون
ربنا يهدي سرك
بصي ممكن تنزلي مصر شهر ولا حاجة تشوفى عائلتك وتغيري جو لكن بعدها لازم تسافرى لجوزك بقولك تانى وعاشر ومليون ماينفعش ابدا يكون هوفى حتةوانتي فى حتة
بسم الله الرحمن الرحيم
السلام عليكم ورحمة الله وبركاته
حبيبتي مخنوقة بجد ربنا يهدي سرك ويهديلك العاصي ويصبرك
بس بجد انا عوزة اقولك رسالة واقول للباشا رسالة
رسالتك:
*********
انا عارفة انك صبورة وبتستحملي واستحملتي كتير لكن برضه مش يوم ما تتكلمي تتكلمي في حاجة مش بإيد الباشا كلنا بشر يا مخنوقة وانتي فكرك انه هو مبسوط قوي انه عمال يلف من بلد لبلد علشان يوفر حياة كريمة لأسرته؟! أكيد هو كمان جواه خنقة مايعلم بيها الا ربنا وخاصة انه متحمل وعلى كتفه مسئولية أسرة بحالها حاولي متهاجميهوش حاولي تاخدي وتدي معاه مش على اساس انه متجاهلك لأ على اساس انه مغروز زيك في نفس المشاعر المتضاربة والمخنوقة دي
رسالتي ليه:
*************
عوزة أقولك يا باشا ان رزق البني آدم ربنا كاتبه عنده من قبل ما نتولد ومحدش بياخد أكتر من نصيبه أيوة ربنا قال اسعى يا عبد وانا اسعى معاك لكن مش معنى كدة اننا نفقد الامل في ربنا اعقلها وتوكل متخليش ولادك وانت ومراتك تتشحطتوا في الغربة ومن بلد لبد بجد اسأل متخصص أثرها ايه على نفسية الاولاد وبحكم اني خريجة تربية بأكدلك ان كتر التنقل ده أثره وحش قوي على الاولاد وبأكدلك مش كلام وهمي ولا من دماغك اللي بيخوفك من العيشة في مصر ده انسان سلبي واتكالي
مصر مش زي مانت متخيل ابدا مصر فيها كمية استثمارات للي دماغه نضيفة وبيعرف يخطط ويشتغل صح لكن اللي مستني الحاجة تجيله لحد عنده مش هتجيله عمرها لا في مصر ولا في غيرها
عوزة أقولك ان رب هنا رب هنا واللي مكتوبلك هتاخده سواء هنا او هناك خلي ايمانك بربنا كبير وصلي استخارة واستشير اللي حوليك
ماخاب من استخار ولا خسر من استشار ده مش كلامي ده كلام الرسول عليه الصلاة والسلام
وعموما ربنا يقدملكم اللي فيه الخير ويهديلكم العاصي يا رب
طمنينا عليك يا مخنوقة انا فعلا قلقانة عليك موقفك يشبهه موقفي وخاصة اليومين دول اعتقد اني ماشية على نفس طريقك ربنا يستر يا مخنوقة بس الفرق اني متوقعة من زوجي هو الي يقترح ده مش انا الي اقترحه
ازيك يا مخنوقه
الله يكون فى عونك على تغيير الشقق وتغيير الاصحاب وتغير المدارس وتغيير كل حاجه
بس جوزك عنده حق وهو صح
كمان انت صح ... امال مين الغلطان
الغلطان بلدنا اللى قافله باب الرزق قدام ولادها وبتاكلهم زى القطط .. ماهى لو كانت بلد زى الناس ما كانش حد من ولادها اتغرب ولا غير مدارس ولا شقق ولا حاجه ابدا
وعلى رأى الباشا واللى هو عنده حق ان مصر الان لا تسر عدو ولا حبيب وكل مصر عايزه تهج منها وتروح لبلاد واق الواق احسن من القعده فى البلد دى
اوعى تعملى حاجه تندمى عليها بعد كدا والا انت حره بقى خليك مع نفسك مخنوقه وبلاش تخنقينا احنا كمان
تحياتى
ازيك
غبت عن التدوين فترة و رحعت لقيتك بقيت جارتنا في الرياض
علي العموم انا هانقل لك تجربتي مع الغربه و نفس ظروفك تقريبا بس الفرق انا لوحدي وولادي و زجتي في مصر
و نصيحتي اوعي تمري بالتجربه دي
حليك مع زوجك و اسرتك مهما حصل لان الوضع هيبقي تشتيت للاسرة و حياتك الطبيعيه انت و الاولاد هتبقي شهر ف السنه
و ضع ماسوي للجميع
هتبقي مسئوله عن كل شئ الاولاد التعليم العيشه و هتحول الزوج لمكنة فلوس و يصبح ابعد ما يكون عن اولاده و قد يصبح هو ايضا ابعد عنكم
حياة اقرب الي الضياع
تحياتي
حبيبتى بنت الغربة ,,
الاول واحشانى جدا
تانى حاجة ..
بصى ياجميل مش تتضايقى نفسك والله مافيش حاجة مستهلة الضيق
خدى الامور كلها بلعله خيير
انا عارفة انها حاجة تخنق وتتضايق جدا ان حياتك كلها تتغير فجأة ..
بس صدقينى خديها دايما تدابير ربنا وان اكيد الخير فى اى تغيير
وانا الصراحة مش مرجحة حكاية انك تسيبى زوجك
تسيبيه لمين ؟؟
الست مالهاش غير جوزها ومالراجل الهولش غير مراته
والصراحة انا اخاف على اى رجل من الغربة لوحده ما تضمنيش الظروف المحيطة بيه تبقى ايه حتى لو فى السعودسة
وكمان علشان الاولاد يبقوا جنب باباهم
ربنا يكتبلك الخير يارب
وما تتضايقى ابدا
دمتِ بخير ..
انتي فين
عملتي ايه ياحبيبتي
طمنيني عليكي
وربنا يهدي الحال
السلام عليكم ورحمة
الله تعالى وبركاته
فعلاً حسيت بكل كلمة قولتيها
حست بغربتك وبشحططتك فى كل بلد
عارفة انا ما أتغربت الا سنتين اتنين
لكن كنت عارفة ومتأكدة انى لو نزلت
اجازة ولو بعد شهر واحد مش حأرجع ومن اجل كده خدت السنتين (جرعة
واحدة )وخلصت ورجعت.قلبى عندى
ربنا يعملك اللى فيه الخير
لكن نصيحة :الاولاد محتاجين
اب وام الاتنين مع بعض
ما ينفعش واحد بس
ابـــــــــــداً
مخنوقة طمنينا عليكى أخبارك ايه يارب تكون المشاكل اتحلت وترجع لك ابتسامتك وراحة البال يارب
دمتى بكل الخير والحب والسعادة
مخنوقه
انا شوفت ليكي تعليق عند حاسوباتيه يعني بتدخلي النت
ياريت تطمنينا عليكي وعلي حالك ودنيتك
يعني لو ملكيش نفس تتكلمي او مش عايزه حد يسئلك
ادخلي هنا واكتبي انك بخير وبــــــس
يلا سلام في انتظارك
من يوم ما دخلت عند حضرتك وانا حاسة بكمية ياس وانعدام للامل و فقدان للنظرة الهبلة بتاعت بكرة احسن
طيب سؤال
فيها ايه مصر ؟اللي فيها مش عايشين؟؟؟
سؤال ليكي وللباشا
ولاهلي انا كمان
ما احنا اخرنا راجعين اصلا ف ليه ده كلة؟؟
على العموم انبسطوا دلوقتي بالاجازة
وان شاء الله خير
ربنا معاكى
بس مهما حصل متسبيش جوزك .. مش علشان حكاية ميبصش لغيرك ولا الكلام ده اللى هيقوله كتير
بس لان فى حاجات كتير الاسرة بتخسرها بسبب غياب الاب
ابسطهم علاقة الاولاد به ..هيتعودا على غيابه و هيكون غريب بينكم لما يرجع .. حتى انتى هتتعودى على انك تبقى صاحبة القرار و وجوده هتحسى انه بيخنقك
صدقنى ده مش جواز
بلاش ترتبطى بأى مكان عاطفيا و كونى دايما حطة فى بالك انه مؤقت ..ارتباطك يكون بس بجوزك و اولادك
ربنا يعينك على الاختيار الصح و يرضيكى به
انا شفت البوست ده قبل كده
لكن مش علقت عليه لانى وقتها كان عندى ظروف تخنق برضه
والنهارده جيت علشان اسئل عليكى
واكتشفت انى مش علقت قبل كده
ازيك يابنت الغربه
وحشتينى
مش بتكتبى حاجه ليه
لو مش هتطلعى خنقتك معانا
هتطلعيها مع مين
بجد وحشتييييييينى
مخنوقة
انتي فييييييييييين
بجد وحشتينا
ومش بتنزلي جديد ولا حتي موجودة
يارب تطمنينا عليك
وكل سنة وانتي طيبة بمناسبة الاسراء والمعراج
ربنا معاكي
سلام
ربنا معاكى اختى بنت الغربة
كلامك فهمته جدا وحسيته جدا جدا
ربنا يعينك ويهيىء لك كل خير
تحياتى واحترامى
فينك؟
يارب تكوني بخير
وكله تمام
كل سنه وانتي طيبه احنا دخلين علي ايام مفترجه اهو
وادعي كتير ربنا يصلح حالك وان شاء الله تكوني عديتي المحنه دي علي خير
طمنينا عليكي
ظروف الحياه احيانا
تضطرنا لعمل ما لا نحب
فرج الله همك
وهم كل مهموم
اللهم امين
بانتظار عودتك لطبيعتك
كما عهدناك :)
فيك يا مخنوقه من زمان
شكلك كده سافرتي ونسيتيا خلاااااص
ربنا يفك كربك ويرزقك السعاده دايما
في أمان الله
ليس كل ما يتمناه المرء يدركه
انا مثلا اعشق الاستقرار واموت في الحياة الاسرية المستقره لكن الدخل المادي لا يكفي تطلعات الاسره ويتمنوا اني اسافر للعمل بالخارج للحصول علي العمله الصعبه لمواجهة الحياة الصعبه ...تفتكري لو سافرت وسبتهم واتغربت وحدي وانا في السن ده هيكونوا سعداء وللا مخنوقين
أنا هبة ظروفي شبه ظروفك الى حد ما .. وعايشة في دبي لو تحبي نتعرف راسليني على ايميلي ..heba_mino@hotmail.com
كل سنة وانتي طيبة يا مخنوقة
نفسي اعرف انتي فين
يارب تكون اخبارك بخير
رمضان كريم
سلام
كل سنه وانتى طيبه بمناسبة شهر رمضان الكريم
ياتري فين ارضيكي يا قطه؟؟؟؟
اتمني تكوني بخير يارب
جايه اقلك
كل سنه وانتي طيبه ويارب ربنا يسعدك ويلعد عنك كل هم ويجعل رمضان ده عليكي احلي رمضان وربنا يتقبل دعائك ويتقبل منك صالح الاعمال
رمضان كريم يا جميل
ازيك
انا جيت اسلم عليكي
واقول لك كل سنه وانت طيبه وبخير وصحه وسعاده
لا طبعا انتى غلطتى
لماتكونى مخنوقةوزعلانة المفروض تكتبي صدقينى هترتاحى ويمكن تخلينااحناننسي همومنا فى مشكلتك
اكيدله اساب الموضوع محتاج لهدوء وحوار
انتى صح. فى موضوع التنقل الكتير لانه بيعمل عند الاولاد عدم استقرار نفسى ، وعدم انتماء لاى شئ.
وهو صح ، فى ان مصر ........تييييييت .......... وتيييت كمان.
كل سنة وانتى طيبة يا مخنوقة رمضان كريم يارب تكونى بخير وفى أحسن حال والمشاكل كلها تكون اتحلت يارب
دمتى بكل الخير والسعادة
السلام عليكم مخنوقه هانم
بتقلبى علينا المواجع ليه يا مخنوقه
وليه اصلا احنا بنسيب بلدنا ونتغرب على الرغم من ان بلدنا فيها من الخيرات ما يفوق الدول اللى بنروحها ... ياخسارة بلدنا اللى مبهدلانا معاها وبترمينا فى كل حته شويه
بيستخسروا فينا خيرات بلدنا عشان كدا سايبينا نتشحطط هنا وهناك ومن شغل لشغل ومن بلد لبلد ومن شقه لشقه ومدرسه لمدرسه
اوعى يا مخنوقه تفكرى ترجعى البلد دى تانى لان كل اللى هنا عايزين يهجوا ويسيبوها لننوس عين ابوه يبهدل فيها زى ما هو عايز ... حتبقى غلطة عمرك
انت بطبعك مخنوقه يعنى ما فيش جديد ... خليكى مخنوقه على طول وخلاص
تحياتى
السلام عليكم
كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه
وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم
وارزقنا العفاف والرضا - والمحبة واهدينا يا عظيم
وأعنا علي القيام والصيام والصلاة والارتقاءالي جنة الفردوس
واجعلها لنا ميراث خير وسعادة
واجعلنا من عتقاءك في هذا الشهر يا معطي يا وهاب
وارزقنا حلاوة القرآن و حسن تلاوته
وتدبر معانيه وفهمها علي النحو الصحيح
ورطب ألسنتنا بذكرك يا الله
عايز أقول اننا في أيام مباركة ويجب استثمارها في الخير والتقرب من الله
سلامه قلبك !! انشالله الله يهونها عليكي رمضان كريم :)
اتمنى ان تتقبلي مروري
مخنوقه
وحشتينى
كل سنه وانتى طيبه
دى علشان العيد
اصل بتاعه رمضان اتاخرت
لان رمضان فات نصه
بحبك
اموووووووووووه
انتى عامله ايه الايام دى يا رب بركة الشهر الكريم تكون صابتك وتكون خنقتك وحزنك اتفك شويه
يا ريت تطمنينى عليكى يا حبيبتى
كل رمضان وشهر كريم وانتى واسرتك وكل من تحبين بكل خير وصحه وسلام
يا رب كل ايامك مباركه ان شاء الله تعالى
فعلا المشكلة صعبة
وانا كمان مش عارفة احدد مين فيكو الغلطان
عموما ان شاء الله تلاقوا شغلانة حلوة كدة وتستقروا كدة هو
وتعشوا احسن من دلوقتي
اتمنى تشرفيني ف مدونتي المتواضعة
السلام عليكم ورحمة الله وبركاته
رمضان كريم وصوما مقبولا وافطارا شهيا
كل عام وانتم بخير ويعيد الله عليكم هذه الايام بالخير واليمن والبركات
وتحياتى وكل سنه وانتم طيبون
امال تقولو ايه فى اللى باعت نفسها لزوجها باسم الحب يعنى لا اصحاب ولااهل ولا جيران ولا حبايب ولا شغل ولا رأى ولو زعلته اكون نكدية ولو عمل حاجة زعلتنى وزعلت اكون برده نكدية اعتبرونى المخنوقة2 بس الفرق انك ليكى اصحاب او حد تحكى له لكن انا الوحيدة المخنوقة
السلام عليكم ورحمة الله وبركاته
اهلا يا مخنوقة ..
يمكن دي اول مرة أقرأ لك المدونة .. وما عايشت كل الظروف اللي مريتي بيها
بس انا عندي الحل
ايوه عندي الحل .. يالغالية اولاً غيري اسمك لانه انتي لو مش مخنوقة وحد ناداكي كده هتبقي فعلاً مخنوقة .. ثانياً ... انتي بنفسك قلتي اللي يشوف مصيبة غيره تهون عليه مصيبته .. ممكن تقعدي مع نفسك وحطي ورقة بيضا واقسميها نصين ايجابيات وسلبيات .. وادخلي جوجل واكتبي كلمة اممممم مثلاً كلمة مرض جلدي .. او مرض عيون للأطفال بعد الشر على عيالك طبعاً
واذا الصحة موجودة احمدي الله واكتبيها في الايجابيات ... شوفي ايجابيات وسلبيات جوزك ..
ثالثاً والاهم ... واضح من طرحك انك رقيقة وحساسة بس ذكية كمان وصاحبة إرادة .. ليه ما تعمليش شغل خاص بيكي يشغلك عن جوزك وتستغلي السفر ده في نشر بضاعتك والتسويق لها او يا ستي بلاش تسويق استغلي السفر في شراء حاجات لشغلك مثلا نفترض هتصنعي كفارات او اغطية للهواتف النقالة من كل بلد تقدري تشتري حاجة ...
نصيحتي ليكي والله خديها مني انا مجربة
كنت بتخانق مع جوزي وكأننا في حرب لغاية مالقيت حاجة تشغلني انا موظفة وبكمل ماجستير الحمد والفضل لله وحده وعندي مشاريع خاصة صغيرة فاشلة ههههه تخيلي عملت مشروع تفصيل ملابس لكن ما بعتش ولا حته ومع ذلك مازعلتش اتبرعت فيهم !!
حطي خطة لحياتك وهدف ... وثقي في الله انه اي حاجة عاوزاها هيحققها لك ثقي في الله .. انه قادر على كل شيء قادر انه يخلي جوزك يكره السفر قادر سبحانه وتعالى بس احنا ما بنلجأ له واذا لجأنا كنا بندعي بدون ثقة بالإيجابة وده خطأ
الحل ... الثقة بالله
الله يجمعنا في الجنة يالحبيبة وهقولك انا امل اللي قالت لك الحل هو الثقة بالله
يا اخوانى واخواتى احنا بنجرب كل الحلول الا ربنا
الى كل مهموم مهمومه اقراوا افضال سورة البقره على الرزق والبقره اقرأوا عن الاستغفار واثاره على الرزق
اسمعوا محاضرة عبدالمحسن الاحمد سوف تنسى همومك-قسما بالله -هل سوف تخاف بعد ذلك
يا جماعه كل حلول مشاكلنا بتحلها الاشياء اللى قلتها لكم احنا بنقعد ف المنتديات نشتكى لكن لو قعدنا مع ربنا هيحللنا كل حاجه
يا اخوانى واخواتى احنا بنجرب كل الحلول الا ربنا
الى كل مهموم مهمومه اقراوا افضال سورة البقره على الرزق والبقره اقرأوا عن الاستغفار واثاره على الرزق
اسمعوا محاضرة عبدالمحسن الاحمد سوف تنسى همومك-قسما بالله -هل سوف تخاف بعد ذلك
يا جماعه كل حلول مشاكلنا بتحلها الاشياء اللى قلتها لكم احنا بنقعد ف المنتديات نشتكى لكن لو قعدنا مع ربنا هيحللنا كل حاجه
thx
شركه تنظيف
احمدى ربنا انا ربنا انه بيشتغل عوزاه ينزل مصر يعكل فيها ايه مش هيلاقى شغل خالص ولمه فلوسك تخلص هتندمى
إرسال تعليق