THOUSANDS OF FREE BLOGGER TEMPLATES

الخميس، مارس 21، 2013

اصدقائى الاعزاء....
صحيح احنا ماتقابلناش خالص...بس تقريبا عارفين عنى حاجات اكتر من اللى بيشوفونى كل يوم...
انا حالتى النفسيه حاليا مش عارفه اسميها...
بس اكيد مش كويسه نهائى...
بس عادى...ده رد فعل طبيعي للصدمه النفسيه اللى اخدتها...
بعد عشرة 15 سنه...اكتشفت انى مغفله...ايوة...مغفله..
للاسف تعاملت مع شريك حياتى بصدق وشفافيه وثقه مبالغ فيها..
ومش ندمانه على حاجه قد سلامة نيتى معاه...
حاليا ...
انا عايشه معاه زى الممثله....بامثل عليه كل حاجه...
من كتر الكدب اللى كدبه...والحلفان اللى بيحلفه كدب..
بقيت....مش باحترمه...ولا باثق فيه...ولا حاسه معاه بالأمان...
هتقولولى طيب مكمله معاه ليه...
علشان ولادى...مالهمش ذنب فى كل اللى جرى...
وعلشان انا مش ماسكه دليل مادى...
وعلشان امى واخويا واخوه...كلهم قالولى حاولى تانى..
هاحاول تانى...
بس انا داخليا ممزقه...
هو مصر على الكدب...ومصر انى اصدق كدبه...والغى عقلى
علشان البيت مايتخربش..
بس مش عارفه ايه تعريف خراب البيوت...
يعنى انا هافضل كده لغاية امتى...هل تمثيلى هيجي على وقت
واصدقه...هل هيفيض بي واهد المعبد على اللى فيه...
او الاسوأ...
انى اضعف...وأرد له القلم قلمين...
فعلا مش عارفه...
اللى عنده حل ...ياريت يقول لي...قبل ماتجنن...

الخميس، يناير 10، 2013

رجعت تانى....ومحتجالكم



عارفه انى ماكتبتش حاجه بقالى كتييييييييييييييييييير......

وتقريبا كلكم نسيتونى.....مع انكم فعلا وحشتووونى......معلش جايز انا كنت محتاجه فترة ابعد....
بس اكيد انا محتاجه الفترة دى اتكلم مع حد....
حتى لو كنت باتكلم مع نفسي ....
صعب جدا تناقش مشاكلك الخاصه مع الاقارب...او الاصدقاء المحيطين بيك...
باحس انى باتخنق....
انا منصته جيده جدا لمشاكل الاخرين..........ورائعه فى حل مشاكلهم الشخصيه
بس اكتشفت انى فاشله تماما فى حل مشاكلى الشخصيه.....
لانى لما أتوجعت بجد....ماعرفتش اتصرف صح....ولا عارفه احل المشكله...او حتى أزيل ألم الجرح
ولا عارفه أرجع زى ماكنت.....
ولا عارفه انطق بالمشكله لحد من قرايبى ....وأكيد ولا من أصدقائى المقربين....
لأنى بالنسبه لهم حلالة المشاكل....اللى دايما مبتسمه...دايما بتضحك...
ولا حد فيهم مرة سالنى ....
دموع الضحك دى ...بسبب كترة الضحك.....
ولا فرصه لتفريغ الالم...
من غير حد ماياخد باله.....
بجد أصعب حاجه لما تحس انت قد ايه ضعيف ....ومجروووح.....وجواك ألم كبييير....
وتتصرف كأنك شخص هادئ ....رزين...متزن...
لأنك لازم تكون كده....
جوايه اه كبيره قوى....نفسي أاقولها بصوت عالى.........ومش قادرة
نفسي انهار باكيه على كتف حد....ومش قادرة
نفسي ااصرخ بصوت عالى.............

انا مخنوووووووووووووووووووووووووووووووووقه.... 

الاثنين، نوفمبر 01، 2010

فرح ميشو الخنيييييييييييق


ميشو ده ياجماعه يبقى اخويا الصغير...الحيله الوحيد على 3 بنات...اصغر منى ب 5 سنين.............




واكيد كان ومازال دلوعة البيت كله من اول بابا الله يرحمه .....وانا واختينى الحلوين واكيد اكيد ماما...دى مش غيرة ...ده حقد بعيد عنكم




افتكر فى الايام الخوالى لما بابا (الله يرحمه ) كان بيخبى مفتاح العربيه من ميشو لما كان فى ثانوى..ويتخانق معايا انا واختى الكبيرة




لما مش بيلاقى العربيه فى الجراج....ولا بيلاقى ميشو طبعا...كان كل الخناق ناخده احنا ...والزعيق والعصبيه...واول ماميشو باشا




يوصل...تلاقى بابا ده بيشر حنيه وهدوووء ...وياحبيبى مش تقول انك اخدت العربيه...مش تخلى بالك من نفسك....مين ادالك المفتاح




اكيد واحده من اخواتك...باعتتك مشوار ..بلاش تسمع كلامهم تانى ياحبيبى ولما تعوز العربيه قولى ياحبيبى...




مش ميشو الخنيييق يقوله لا يابابا انا عامل نسخه من وراك....واخواتى مالهموش دعوة....




لا ده اعتذر بهدوء وبراءة الاطفال فى عينه...وماتزعلش يابابا...واخر مرة...وعمرها ماكانت اخر مرة ابدااااااااااااا.....




الله يرحمك يابابا.....وتمر الايام ولسه ميشو هو الدلوعه بتاعتنا




حتى فى الشغل...ماما جابتله واسطه كبيرة واشتغل فى حته كويسه قوى...وطبعا غير العربيه...ووضب شقته وديكورات وباركيه




ومطبخ امريكى...وكله...فضل بس النجف ودهان الشقه.......




كل ده وهو لسه ماخطبش اصلا ولا مرتبط اساسا .....واحنا اقنعناه ان كفايه كده




ويكمل الشقه لما يخطب علشان يخلى الغلبانه اللى هتتدبس فيه تنقى اى حاجه...يقوم يقول ..( هى هتتأمر.. اساسا دى شقتى وانا اللى




انقى كل حاجه فيها ...) خنيييييييييييييييييق مش باقلكم مخنننننننق...




ماعلينا.....بعد عدة ارتباطات فاشله....قرر انه يخطب خطوبة صالونات...




وبصراحه كان حظه حلو قوى كالعادة....البنت حلوة ومؤدبه وابوها مركزه عالى...وعيله محترمه...وفرحوا بيه ...والبنت فرحت




بيه قوى علشان الواد ميشو وسيم شويتين تلاته كده....




المهم تعدى الايام والشهور.....والواد ميشو بيأجل فى الجوااااااز....شويه الشغل وشويه خناقاااات مع خطيبته ...وشويه عايز




اغير ديكور الشقه مش عاجبنى.....وتلاكيك كده كتيرة....




وانا بصراحه مش وااااكل معايا ابدا حججه دى.....ده كان مستعجل على الجواز علشان عايز يخلف....وبيقولى كل اصحابى اتجوزوا




وخلفوا الا انا ....امال فيه ايه بقى..؟؟؟؟؟؟؟؟




المهم اخدته مرة على جنب عندى فى البيت وكلمته بصراحه علشان عايزة افهم...




انا : ايه ياميشو حكايتك بقى...بتأجل الجوازة ليه...ده حتى حماتك كلمت ماما علشان تروحوا تنقوا العفش بكره..




ميشو : لالالالالا يامخنوقه انا مش فاضى ابدا ابدا بكرة....بعدين بعدين....




انا : طب اهدى انا باضحك عليك .. لاكلمت ماما ولا حاجه...انا بابعتك بس علشان اعرف انت فيك ايه بالظبط...




ميشو : وقعتى قلبى يامخنوقه...بصراحه انا مش عايز اكمل الجوازة دى....ومش عارف انهى الخطوبه ازاى...




انا : اه ... انا قلبى كان حاسس ان فيه حاجه...خير بقى مين دى ...




ميشو : لا ياختى ظنك مش فى محله....مافيش واحده تانيه...انا مش عارف احب (نهى) خالص...ومافيش تفاهم...حاولت اقنع نفسى




بحبها....ماعرفتش...هى حلوة ومؤدبه وبنت ناس ....بس انا مش باحب اتكلم معاها ....ولا باحب اخرج معاها...ولا لي نفس اكلمها على الموبيل ونحب فى بعض وكده...ونسيت كل الكلام الحلو اللى كنت باقوله للبنات علشان اشغلهم....




وبعدين انا مش عارف اقنع نفسى ان الوضع ده هيبقى مدى الحياة لما نتجوز.....صعب قوى....ومش لاقى سبب مقنع علشان افسخ بيه




الخطوبه ...وخايف اظلمها...بس لو اتجوزتها واحنا كده ...اكيد هاظلمها...علشان كده بأجل فى الجوازة ..جايز يجى يوم ومشاعرى تتغير....انا فعلا فعلا مش عارف اعمل ايه...ومش عارف اصارح ماما .... انتى عارفه ماما نفسها اتجوز قد ايه..وكمان المشكله الاكبر انها بتحب (نهى)...وكمان منصب ابوها ..صعب قوى ماما توافق انى اسيبها...



انا : انسى منصب ابوها وانسى ماما ...وانسى كلام الناس كمان...افتكر بس انها هتبقى مراتك عمرك كله....وهتقوم من النوم هتلاقيها


جنبك كل يوم ...مش هتلاقى ماما ولا ابوها ولا منصبه ...وبعدين لما انت مشاعرك بارده من ناحيتها كده...طولت الخطوبه 5 شهور


ليه؟؟؟..........ذنبها ايه تتعلق بيك.




ميشو : انا كنت باطول الخطوبه علشان باحاول اتقرب منها جايز احبها بمرور الوقت...المشكله انها عجبتنى شكلا وعائلة....


بس مافيش اى مواضيع مشتركه بينا...مافيش حواار تقريبا بنعيد نفس الكلام ومش عارف احدد لها شخصيه...ومابحبش اطول فى القعده معاها....بازهق وبمل..مش عارف اعمل ايه...مش عارف اخد قرار فى العلاقه دى..


انا : سيبها...ايوة سيبها...هى ماتستاهلش انها تتعامل كده...اذا كنت مش قادر تحبها وبارد من ناحيتها...اكيد هى حاسه بدا...من حقها تفهمها وبلاش تعذبها ...سيبها تشوف نصيبها مع واحد تانى يحبها بجد...


ميشو : مخنوقه انا عارف انها بنت كويسه بس انا مش قصدى اعذبها خالص...انا مش عارف افتح الموضوع معاها ازاى من غير مااجرحها...ولا اضايق ماما....


انا : خليك صريح من غير تجريح...وقولها انك انت السبب فى فشل الخطوبه لأنك مش عارف تتأقلم على انك هتجوز وتفتح بيت وعيال


ومسؤووليه واستقرار والحاجات اليييييييييييييييييييع دى....


ميشو : بتتريقى يامخنوووقه...طب ايه رأيك انى هاقولها الحوااار ده فعلا....ابقى دلوعة ماما احسن من انى اجرحها....


المهم خرج من عندى وهو ماصدق لقى الحل ..........وتانى يوم ماكدبش خبر وراح فسخ الخطوبه......وطبعا مش عايزة ااقولكم ماما


زعلت قد ايه ...وعيطت كمان ...وليه وعلشان ايه واتحسدت ياحبيبى....لازم ابخرك ..هى الناس عينها وحشه كده ليه...ده انتم كنتم


فولة واتقسمت نصين....( وكل الحوار الهندى اياه ده )...


وكملتها بقى ....اوعى تزعل ياروحى...هما اللى خسرانين...ولا تشيل فى نفسك....انا هاحجزلنا اسبوع فى شرم انا وانت علشان تروق دمك....تلاقيك نفسيتك وحشه قوى ...والزعل بيوجع القلب يا روحى...لا انت لازم تغير جو النكد ده...


وطبعا ميشو بيه...براءة الاطفال...معاكى حق ياماما...انتى بس اللى فاهمانى...وحاسه بي...انا محتاج فعلا ابعد شويه....


وبعد شهرين كده......


لقيت الواد ميشو جاى لى البيت وهو مش على بعضه ...


ميشو : مخنوقه انا عايزك فى موضوع مهم...


انا : خير ياميشو....


ميشو : عايزك تشوفى واحده مع ماما فى الشغل...هاوصلك لماما كانك جايه تزوريها فى المكتب ...وبصى على السكرتيرة الجديده


وقولى لى رأيك فيها ايه...وحاولى تتكلمى معاها فى اى موضوع....


انا : ليه بقى ياسى ميشو...انت عايز منها ايه بالظبط...انا ماليش فى اللعب بتاعك ده...


ميشو : لالالالالا يامخنوقه انتى فاهمه غلط خاالص...هى عجبانى قوى بس كلامها محدود قوى...ومركزة قوى فى شغلها وبس..


انا : واضح انها بت محترمه ومش بتاعة لعب...طب انت عايز منها ايه...اوعى تكون....


ميشو : مش عارف ...احتمال..بس انا بقالى اسبوع من ساعة ماشفتها وانا اعدى على ماما فى الشغل كل يوم بأى حجه...


انا : والله بشرة خير...طب هاقوم البس واجى معاك اشوفها....


رحت عند ماما وشفتها...بصراحه اموورة فعلا...وشكلها برضه جد...وقعدت اتكلمت معاها...وكانت ظريفه ومثقفه...


بس مش عارفه ماما مش عاجبها الموضوع ليه...


ولما سألتها...عرفت انها اصغر من ميشو ب3 سنين بس...وكانت مخطوبه قبل كده.....وكمان علشان بتحضر للماجستير....


وده كله طبعا مش عاجب ماما......


طبعا كل ده بالنسبه لميشو كلام فارغ.....ولأول مرة يعترض على رأى ماما ويصر على انه يخطبها...


واول مرة يحصل كلاش حاد بينهم...وووو...يتخاصموااااا.........ههههههههه....


مش هتصدقوا فرحتى ...لما ميشو قصدنى علشان اصلح بينه وبين ماما...ياسلاااااااااام شعوور جميل جميل الحقيقه...


اخيرا ......اخيرا...ميشو بيتهزق زينا عادى...وبيتزعل منه..عادى...لا وبيتخاصم كمان....


المهم عملت اللى قدرنى عليه ربنا وصلحت بينهم...واختى الكبيرة اقنعت ماما ان ميشو اخيرا بيفكر يستقر بجد....وان كل اللى مضايقها


دى شكليات مالهاش لازمه...وان البنت محترمه واهلها ناس طيبين...وميشو مش محتاج اكتر من كده...


وفعلا ...تمت الخطوبه...وكانت حلوة قوى..وميشو كان فرحان جدا..وطبعا شعوره كان غير خااالص...مستعجل جدا على الفرح


وعايز يخلص كل حاجه بدرى...وخلاال 3 شهور....كانت الشقه جاهزة والعفش اتحجز والسجاد والنجف...ولسه من يومين نزلنا


جبناله البراويز والانتيكات ...فعلا الحب ..حاجه تانيه...


المهم الحمد لله اخيرا هايتجوز وهنخلص من دلعه....ويبقى يدلع براحته بقى على مراته....ولو انى اشك...شكلها جامده قوى..


وهى اللى هتربيه...


واهو ذنب نااااس ....بتخلصه نااااس.....


وفرحه ان شاء الله رابع يوم العيد.....وطبعا شاغلنا كلنا بطلباته اللى مابتخلصش...وانا بصراحه اتخنقت ...ومش عارفه العيد اتاخر ليه


عموما انا تقريبا لسه مااستقريتش على فستان علشان الفرح...عارفه هتقولوا اتأخرت قوى...بس انا محتارة بين 3 فساتين...


1- الاحمر...اه..بامووت فى اللون ده...بس الفستان محتاج رتووش كتيرة علشان ينفع يتلبس....مش عارفه الفساتين الايام دى دايما القماش مقصر معاهم اما من فوق ....او من تحت.....


2 - البنفسجى الغامق...اغمق من لون المدونه بشويه...مريح للعين والاعصاب...بس مش عاجب ماما وبتقول انه كئيب..


3 - الاسود ...ملك الالوان بس الشغل فيه بالسلفر..وحاسه انه over شويه...


عموما انا صورت ال3 فساتين للباشا وبعتهم ايميل ليه...ومستنيه قرار سيادته ...


وياريت تقولولى رايكم انتم كمان.....


احلى تحية من مخنوقتكم .........








الاثنين، سبتمبر 27، 2010

ضريبة اللامبالااااااااااااااااااااااااااااااااااااااااااااة 2

الوحده احيانا كتيييييرة بتبقى احسن من الاحساس المستمر باالاهانه والاهمال

او الأسوأ.....الخيانه..


عارفه انى اتأخرت عليكم فى تكملة حكاية غادة...بس ظرووف المدارس ..كل سنة وانتم طيبيييبين ...انشغلت معاهم شوية...


سيبتكم لما غادة كلمتنى بعد العمليه بتلات شهور علشان تعدى علي هي وماما علشان نخرج سوااا علشان عيد ميلادى...


وماما كلمتنى علشان انزل لانها مستنيه بالعربيه هى وغادة...


نزلت تحت على اساس ان غادة مع ماما فى العربيه....كانت المفاجأه انى لقيت غادة سايقه عربيه هونداى جديدة...


انا : ازيك ياغادة ايه الحلاوة دى....عربيه جديدة ..وعمرو خلاك تسوقيها عادى كده...



غادة : لا يامخنوقه دى عربيتى انا ..

انا : ماشى ياعم عقبال عندنا مبررروك ..عمرو جابهالك امتى..؟؟


غادة : مش عمرو اللى جابهالى ..اركبى يامخنووقه انا متضايقه قوى ومش ناقصه..وعايزة اتكلم معاك...


المهم ركبت معاها ...وماما ورانا فى عربيتها..

انا : خير ياستى ادينى سيبت امى وركبت معاك في ايه..؟؟؟

غادة : عمرو بيخونى...


انا : ايه ؟؟.. مش معقوله..اكيد انتى غلطانه...استحاله عمرو يعمل كده...خصوصا دلوقتى..


غادة : انتى شايفه كده...يعنى زمان كان ممكن...لما كنت ...لكن دلوقتى مالوش حجه ...مش كده..


انا : غادة مش قصدى ..انا اسفه..انا قصدى عمرو بيحبك ولو كان زمان متضايقك من

شكلك..دلوقتى الوضع اتغير وبقيتى حاجه تانيه خااالص...


غادة : ولا حاسه بأى تغيير من ناحيته...الوضع زى ماهو ...مافيش تغيير غير انه بطل يقولى ياكرنبه وياخيمه...


لكن علاقتنا زى ماهى...تريقه وتهزيق ورخاااامه...واهمااال ..حتى فى حياتنا الخاصه...


انا : طيب نتكلم فى ده بعدين...انت عرفت منين انه بيخونك..؟؟


غادة :خالتى جت تزورنى ..وقالت لى انها شافته مع واحده فى النادى اكتر من مرة...وكذا مرة كان بيوصلها..

انا : طب لما خالتك شافته ماكلمتووش ليه وسألته مين دى...

غادة : كلمته وقالها انها قريبته...راحت خالتى مصوراها ووريتها لى...


انا : وعرفتيها..؟؟

غادة : لا ولا عمرى شفتها من قرايبه خاالص...انا مش عارفه اعمل ايه يامخنووقه...اسأله؟؟؟


انا : اه اسأليه عادى ولا كأنك مهتمه...وشوفى رد فعله ايه..؟؟ وبلاش تكون نيتك وحشه جايز قريبته من بعييد وانت ماتعرفيش..


غادة : هاضحك على نفسى يامخنوقه...انا عارفه كل قرايب عمرو...


انا : حتى لو طلعت نزوة ياستى ....مش شرط يكون الموضوع تطور للخيانه...انت ممكن تلحقى الموضوع من اوله وترجعى عمرو تانى فى حضنك...خليك واثقه فى نفسك...انت بقيت مزة جامدة والله...


غادة : عمرو محسسنى انى بقيت اوحش من الاول ...وان اثار العملية منظرها وحش ...وان وشى خس جامد وبقى شكلى اكبر منه...وشعرى وطريقة لبسى ومكياجى مش استيل نهائى بالنسبه له...


انا : ايييييييييه الكلام الفارغ ده...انتى خسيتى قوى ..حوالى 25 كيلو...وده مش شويه...وبعدين اثار العمليه لازم تاخد

وقتها...الدكتور قاله كده...وبعدين انتى اموورة اصلا ياغادة ..وان كان على استيل الشعر والمكياج واللبس...يتغير..مش مشكله
انا شايفه المشكله فى علاقتكم الخاصه اصلا...دى لازم تركزى فيها لأن دى اللى هترجع عمرو تانى ليكى...


غادة : يعنى اعمله ايه..؟؟؟ بالعافيه يعنى..؟؟؟ انا كرامتى بقت تنقح علي... وبرضه انا ست ولي حقوقى الزوجيه...

واحيانا فعلا باعانى من الحرمان العاطفى ...والله ده حرااام...انا كرهت شكلى ...


انا : غادة حبيبتى لو ماحبتيش نفسك ...ماحدش هيحبك...ولو شفتى نفسك وحشه ..ماحدش هيشوفك حلوة...لازم تثقى انك زى القمر

وامراة مثيرة كمان...وتعامليه على الاساس ده...واتدلعى عليه على قد ماتقدرى ...تعالى نجيب شوية بيبى دول حلوين كده ...

علشان يشوف انت خسيتى قد ايه...وبالمرة كمان نجيب صبغة ...ونعدى على الكوافيرة بتاعتى...انا هاروحك عروسه النهارده

مع ان النهارده عيد ميلادى بس يالله اهو كله بثوابه...

ماقولتليش بقه منين العربيه؟؟

غادة : المقدم بتاعها من بابا والقسط هادفعه من مصروفى ...لما عمرو هايتخنق مني...
انا : ليه هو محتاج الفلوس دي ؟؟؟
غادة : لا بس استخسار...ليه اجيب عربيه..؟؟ مع انها فلوس بابا ...ومصروفى ده من بابا برضه...
انا : انت قلتيله دى فلوس بابا..؟؟؟ مش تقيله قوى دى ياغادة..؟؟؟
غادة : بافك عن نفسي شويه..ايه يعنى لما يزعل... ماهو دايما مزعلنى...ده انا مش فاكرة امتى قالى كلمه حلوة...
ياخد حبه من القرف اللى انا شايفاه...
انا : ربنا يهديكم انتم الاتنين...
المهم عملتلها كل اللى قلناه وجبنا لبس حلو لينا احنا الاتنين...ورحنا الكوافير ورجعت البيت ..بصراحه امورة قوى..
ونسيت الموضوع وانشغلت بولادى...
وبعدها بحوالى شهر وشويه...باكلمها عادى زى كل يوم لقيتها بتعيط وعايزانى اجيلها دلوقتى...
رحت لها ...لقيتها ر اجعه من عند الدكتور... ووشها احمر جدا ....بطريقه تخض...
انا : خير ياغادة مالك..؟؟؟ ومال وشك..؟؟؟
غادة : فى شوية شرايين صغيرة انفجرت من كتر العصبية والخناق..اصلى اتخانقت مع عمرو وشتمنا بعض..
انا : ايه؟؟؟؟؟؟؟ ليه كده.؟؟؟؟؟؟ وقدام الاولاد..؟؟؟؟؟؟؟
غادة : ماقدرتش استحمل يامخنوقه....اعصابى فلتت... حرااام اللى بيحصل لي والله ده ...(عيااااط جامد )
انا : طب اهدى واحكيلى ...ايه اللى حصل...
غادة : البيه كان نايم وانا باذاكر للاولاد ...ونسى الموبيل فى الصاله...وجاتله رساله...قمت فتحتها..الاقى رساله من
رقم مش متسجل...وقريتها...رساله قذرة زى صاحبتها...
انا : اه بتقول ايه يعنى....؟؟؟؟
غادة : بتقول...(وقريت لي الرساله )...( صعب قوى انى احكى الرساله فيها ايه...بس كلام ماتقولوش غير زوجه لزوجها بس )
انا : وعملتى ايه..؟؟؟
غادة : اتصلت بالرقم من موبيلي ...لقيت واحده بترد علي...وقلتلها ازاى تبعتى رساله زى دى لجوزى...تقوم البجحة تقولى اسأليه انا مين بدل ماتتخانقى معايا..وقفلت السكه فى وشي...
قومته من النوم واتخانقنا ...وقالى وانتى مالك انا راجل وحر اعمل اللى انا عايزه....فشتمته وقلتله اطلع بره بيتى...
...........................................................................................................
فضلت ساكته خااالص ...مش عارفه ارد وأأقولها ايه ...بجد..لو انا مكانها مش هاعمل غير كده...بس فى حالتى هاخد ولادى وهاسيب له البيت.....

انا : وهو عمرو فين دلوقتى..؟؟

غادة : مش عارفه ومش عايزة اعرف....انا كلمت ماما وبابا ...وزمانهم جايين...(وعياااااااط جاااامد )

المهم فضلت قاعدة معاها لغاية ماابوها وامها وصلوا ...وروحت لولادى...

كلمتها تانى يوم .....

انا : غادة حبيبتى ....طمنينى ايه الاخبار..؟؟؟ عمرو رجع..؟؟

غادة : لا بسلامته مكلم الاولاد بيطمن عليهم.... الظاهر مستنينى اعتذر له واتحايل عليه علشان يرجع...ده كااان زمااان

دلوقتى انا بصراحه مش شايفه انه يستاهل حتى انى ازعل عليه....

انا : يعنى ناويه على ايه..؟؟؟

غادة : بابا هيرفع لي قضية خلع...انا ماعدتش عايزاااه خلااااص....

انا : بلاش تسرع ياغادة...ان عندك 5 عيال...هتربيهم لوحدك...؟؟؟لازم ابوهم يكون معاهم....

غادة : ده مش تسرع ....ده متأخر قوى يامخنووقه....وولادى هاربيهم ..وهايشوفوا ابوهم ...بس مش شرط انى اكمل بقية

عمرى مع انسان أنانى وجاحد ومش شايف غير نفسه بس....ونسى كل حاجه كانت بينا...وماراعاش العشرة ولا انا ضحيت

قد ايه علشان خاطره.....ولا كنت باعمل ايه علشان ارضيه....ده كرهنى فى شكلى ومنظرى ...ده خلانى واحده تانيه غير غاده

انا بقيت اخد ادوية مهدئه ومنومة علشان اعرف انام من كتر التفكير...

انا : طب حبيبتى اهدى وبلاش تسرع وخدي وقتك ....وبلاش انتى تكلميه خلي باباكي اللى يكلمه....ويشوف هيوصل معاه لأيه..

المهم كنت باكلمها كل يوم تقريبا....وعمرو باشا مافكرش حتى يرد على باباها....وفضل كده شهر بحاله....لغاية لما باباها قرر يرفع

قضية خلع....

وفعلا رفع القضيه ...

والظاهر ان عمرو ماكانش متوقع كده نهائى....وراح لباباها علشان عايز يصلح....وطبعا ابوها رفض....وراح لمامتها...

وبقى يلف على قرايبها علشان حد يتدخل ويصلح...برضه مافيش فايده....

لغاية ماقررت ان هى تقابله...وقابلته ...وكلمته بمنتهى الهدوووء ....فى تفاصيل الطلااااق وحضانة الاولاد...والنفقه وغيره..

وحاول عمرو كتيير بالكلام الحلو والاعتذار ...انه يرجعها...مافيش فايدة...

بعدها راح لماما ...وخلى ماما تكلمنى علشان اروح لها واكلمه عندها.....فرحت لماما...

انا : اهلا ياعمرو ....خير..عايز ايه...؟؟

عمرو : مخنووقه انا عايزك تكلمى غادة وتقنعيها نرجع لبعض...غادة اتغيرت ..بقت واحدة تانيه..وانتى السبب فى ده..

انا : نعم ؟؟؟؟ انا المسؤووله انك خنتها..؟؟؟

عمرو : غلطه ...اى راجل بيضعف وبيغلط...انتى غيرتيها...بقت أنانيه وبتحب نفسها ونسيت ان بينا اولاد ولازم يتربوا مع امهم

وابوهم ...وهى لازم تسامح وتفوت عادى يعنى ...هو انا موتها..؟؟؟؟

انا : لا بجد انت شايف انك ماعملتش حاجه..؟؟؟دى كارثه انت متخيل ايه يعنى؟؟؟تزعقلك وتقولك ماتعملش كده تانى...

عمرو : لا انا اول راجل ولا اخر راجل بيعمل كده....انا مش مصدق هى ازاى تتنازل عنى بالسهولة دى...انتى السبب

انتى اللى خلتيها واحدة تانيه ....دى مش طايقه تقعد تتكلم معايا تانى...وغيرت رقم الموبيل...انتى المسؤوله انك ترجعيها

غادة مراتى اللى انا باحبها....غير غادة اللى بقت واحدة تانيه من ساعة مارجعتى فى حياتها....

انا : هو انت هتحملنى نتيجة اخطائك ومصايبك...؟؟؟ انا اللى قلتلك اهملها...انا اللى قلتلك تهينها وتتريق عليها....

ناقص تقولى انا الل قلتلك تخونها ....سيبت كل ده ...ومتضايق انى نصحتها انها تغير من شكلها..؟؟

عمرو : ايوة بدأنا بالشكل ....وبالتدريج اتغيرت كلها...واتغيرت من ناحيتى..دى ماكانتش بتتحمل ازعل دقيقه ...تقوم تسيبنى..؟؟

انا الدم غلي عندى على الاخر ...ولسه هارد واهزق...لقيت ماما بترد بمنتهى الهدوووووء...

ماما : عمرو يابنى ... الرسول عليه الصلاة والسلام قال ( رفقا بالقوارير ) وشبه الستات بالقوارير علشان رقيقه وسهلة

الكسر ....وانت كسرت القارورة بتاعتك ....عايزنا بقه نلمها لك ونلزقهالك ...ونقولك معلش بس ابقى خلى بالك المرة الجايه؟؟؟

في حاجات يابنى لما بتتكسر مابتتصلحش تانى.... وانت بدأت تصلح متاخر قوى...بعد ماتكسرت ميت حته....

وبعدين بنتى مالهاش اى علاقه باللى بتقوله ده....وفر كلامك لصاحبة الشأن ...شرفت...

ومشي عمرو ....وانا فعلا اتضايقت جدا ...وقعدت أفكر ...هل انا فعلا السبب انى غيرت غادة....هل لو هى كانت عرفت انه بيخونها

قبل ماتتغير شكلا ....كانت هتفوت له...وتقول معذور....من حقه ....اصل انا اهملت فى حقه ..وتدور له على اعذار...وتقول اكبر

دماغى ...واهو راجل زى بقية الرجااله...وضل راااجل ولا ضل حيطه.....

ولغاية النهارده ..القضيه شغاله ...وباكلم غادة عادى ....واعصابها بقت احسن....ولسه على موقفها....مش عايزة عمرو نهائى

تانى.....وبتعتبره مرحلة وانتهت من حياتها....

ايه رأيكم...؟؟؟؟ تفتكروا فعلا انا السبب زى مابيقول عمرو..؟؟؟

او كنت من شوية الاسباب اللى وصلت الموضوع للمرحلة دى؟؟؟؟

انا باكره خراااب البيوت...... واكيد باكره انى اكون احد الاسباب......

ياريت بقى تعلقوا وتقولوا رأيكم .... بس من غير خنقه ....انتم عارفين....انا مش ناقصه....

مخنوقتكم .............مخنوقه ....وعندى برد جامد....

سلااااااااااااااااااااااااااااااااااااااااااااام



الاثنين، أغسطس 02، 2010

ضريبة اللامبالاااااااااااااااااااااااااااااااااه

حاجتين اساسيتين ممكن يدمروا اى حب ......واكيد اى ست مهما كانت قوتها


وهما بالترتيب.....الخيانــــــــــــــــــه..............واللامبالاه فى المشاعر..........وطبعا توابعهم من الاستهزاء والاحباط

لشكلها كأنثى..............


هتقولوا طبعا مخنوقه بتغييب وتغييب وبترجع تانى تخنقنا...طب اعمل ايه؟؟؟


موضوع شائك ....للأسف كنت طرف من اطرافه ومش عارفه اذا كانت نصحيتى اتسببت فى انه يتطور بالصورة

دى.......

ومش عارفه اذا كان لسه في حد بيقرا لى ولا لأ.....بس ياريت اللى يدخل عندى يقولى رأيه بصراحه....وبلاش يمشى

من غير تعليق...........

الحكاية بدأت من 10 شهور تقريبا كنت لسه راجعه مصر بقالى شهرين كده وظبطت ولادى

فى المدرسه....وعديت على ماما...قالت لى ان غاده صاحبتى من ايام الجامعه عرفت انى فى مصر وكلمتنى عند ماما

والحت انى ازورها...خصوصا انها نقلت جنب ماما...فرحت قوى بصراحه لأنى ماكانش لي اصحاب فى مصر غير

اخواتى...بحكم الغربه

المهم رحت زرتها فى بيتها لوحدى الاول من غير ولادى علشان دوشتهم............

وكانت دى اول مرة اشوفها من 10 سنين تقريبا.....من يوم فرحها......(طبعا هتقولوا مخنوقه دى سيئه مع اصحابها)

وده غصب عنى......

لأن اجازاتى كلها محصورة مع الباشا وعيلته...بس كنا دايما بنكلم بعض فى التلفون وكمان لأنها كانت ساكنه فى الاقاليم....

المهم انى فرحت قوى لما قابلتها....وشفت ولادها......صحيح شكلها اتغير شويه .....بس 5 اطفال فى 10 سنين يغيروا اى ست....

غادة : مخنووقه ازيك يابت وحشتينى قوى من زمان ماشفتكيش.....ادينى سكنت جنب طنط اهو ...مالكيش حجه...

انا : حبيبتى ماتزعليش منى بس انت اكتر واحده عارفه ظروفى وعارفه الباشا...ماينفعش اتحرك فى حته من غيره...


غاده : اه يااختى عارفه ......هو دايما كده...حتى ايام الخطوبه ماكناش بنروح حته من غيره....عامله ايه معاه؟؟؟


انا : الحمد لله ......شويه كده وشويتين خنقه...واهى ماشيه.....


غاده : انتى هتقوليلى...الرجاله دول اصلهم و لاد تيييييييييييييييييييييييييت........يفضلوا يجروا وراكى لغاية

مايتجوزوا...وبعد كده تبقى تسليتهم ازاى يذلوكى بتريقتهم ويخنقوكى بأهمالهم...


انا : ايه ياغاده مش عمرو ده اللى قعدتى تحبيه 5 سنين ايام الجامعه.....واتخانقتى مع باباكى علشان تتجوزيه....ولما

سافر بعد كتب الكتاب المانيا سافرتى وراه من غير فرح ومن غير موافقة باباكى كمان ......


غاده : كنت غبيه...مافيش احسن من اللى تتجوز بعقلها وتقفل على قلبها...انا استحاله هاخلى بناتى يعملوا زى

ماعملت..وبعد كده يكتشفوا انهم اخدوا اكبر مقلب فى حياتهم......



انا : طب ياغادة طولى بالك كل الرجاله كده بيخنقوا بس ماتوصلش لدرجة المقلب يعنى...هو عمرو مغلبك ولا ايه؟؟



غاده : مغلبنى دى شويه يامخنوقه....ده دايما بره البيت ودايما معاه اللاب توب ..وكل ماسأله لازمته ايه يقولى بيسلينى وانا قاعد
على القهوة...وبرضه لما يرجع البيت نفس القصه لغاية الفجر..ولما اتكلم يقولى انتى اصلك نكديه ..انا عندى شغل عليه..



انا : طب ماتحاولى تسليه انتى فى البيت وهو يسيب ام اللاب توب خالص....



غاده : قلبك ابيض ياختى المواضيع دى بقت نادرة جدا يمكن لو فى الشهر مرة يبقى كويس...



انا : ليه كده ياغادة انتم لسه صغيرين على الكلام ده؟؟



غاده : مش عارفه يامخنوقه باحس انه مالوش رغبه في..ودايما بيعايرنى انى تخنت ...وشكلى بقى عامل زى الخيمه فى



قمصان النوم...طب مكل ده بسبب الحمل والولاده....مش هو اللى كان عايز ولاد كتيير...



انا : ربنا يخليهمولك ياغاده..بس ممكن تعملى دايت وكمان تلعبى رياضه..



غاده : مش نافع معايا حاجه يامخنوقه...حاولت كتيير وكنت باخس بس بطنى بتفضل كبيرة زى ماهى وباتعقد اكتر...



ده حتى الاولاد بقم يتريقوا علي بسبب كلام ابوهم اللى بيسم بدنى بيه طول اليوم...



انا : طولى بالك ياغاده فى حلول تانيه بس ماتسبيش نفسك كده ابدا.....بس فهميه يبطل تريقه عليك وان ده بيضايقك...



وخصوصا قدام الاولاد...



غاده : انا خلاص كرهت شكلى يامخنوقه...عمرو وصلنى لمرحلة الاحباط...ده غير الغيرة المرة اللى حاسه بيها



كل لما اشوف عينه وهى بتزوغ على البنات فى الشارع...وبكل بجاحه يقولى بصى واتعقدى....



انا : ياسلااااااام ليه ان شاء الله يعنى هو اللى ماحصلش ....معلش ياغاده هو جوزك اه بس انا اتخنقت ...هو انت

ياحبيبتى شايله المرايات من البيت..ده شعره هينضفلك المواعين احسن من السلكه...وهو صحيح الراجل الاسمر جذاب

بس الاسمر مش البتنجانى....هو مش شايف نفسه ولا ايه ..؟؟؟

غاده : هو شايف نفسه ماحصلش ياستى وانا ماستهلهوش....وبيحدف كلاااام علشان عايز يتجوز تانى...



انا : جواز تانى فى عينه....امال الخمس عيال دول بتوع مين....ولا هتقعدى انتى تربيله العيال وهو يعيش حياته...



غاده : انا قرفت وقلتله عايز تجوز اتجوز بس سيبلى ولادى وانت مع السلامه...



انا : ايه الجمال ده طب ده انتى ريحتيه على الاخر اهو.....انا لو مكانه اتجوز امبارح مش بكرة...



غاده : طب اعمل ايه يامخنووقه بجد انا نفسيتى وحشه جدا ...



انا : اعملى عملية تجميل وشيلى بطنك واشفطى وظبطى جسمك....وغيرى لون شعرك وجربى اللنسز.....اعملى نيو لوك..



غاده : ايه ؟؟؟؟ بس دى مش خطر يامخنوقه ؟؟؟ تفتكرى عمرو يوافق؟؟؟



انا : من ناحية خطر هى مغامرة خطر ... بس صاحبتى جربتها من سنتين كده...بس حالتها غير حالتك تماما وكنت

معارضاها بس لما لقيت قد اي نفسيتها اتحسنت وثقتها فى نفسها زادت بعدها....عرفت ان المغامرة احيانا بتبقى

ضرورية ...وبتغير حياة البنى ادم 180 درجه...وهى حياتها الخاصه مع جوزها اتغيرت كتييير للأحسن بعدها....



غاده : انتى هتخلينى افكر جديا فى الموضوع ده... وهاحاول اقنع عمرو بيه...بس الاول ندور على دكتوور كويس...



انا : فكرى الاول ياغاده وقولى لعمرو....وانا مستعده ندور على الدكتور سواا واسألك على مستشفى محترمه...



بس والكلام ده عدى عليه حوالى اسبوعين كده ولقيتها متصله بي وهى بتعيط


انا : ايه ياغاده مالك ؟؟؟ بتعيطى ليه؟؟؟


غاده : خلاااااص يامخنوقه جبت اخرى....البيه مش مقتنع بالعمليه وهارينى تريقه
وبيقولى هو الدكتور هيصلح ايه ولا
ايه انت عايزة تتنسفى مش تتصلحى...احمدى ربنا انك متجوزة وخليك قاعده
ساكته....وربى عيالك...هى خسارة فلوس
على الفاضى انا مش هارمى فلوسى فى الارض ....عايزة تعملى حاجه زى دى ادفعى
انتى.....وابقى قابلينى لو نفعت..
انا : طب ياغاده اهدى وفهمينى هو معترض علشان الفلوس ولا علشان خايف
عليك...؟؟؟
غاده : خايف علي؟؟؟؟ هو انا اهمه من اصله ولا حتى بيفكر في ...ده خايف على
فلوسه ....وعلى عياله من هيربيهم
مش اكتر ....بس انا هاخد فلوس من بابا وهاعمل العمليه.. مش عايزة منه حاجه...
انا : لا ياغاده كده غلط ...لازم يوافق حتى لو مش فلوسه... انتى مراته...حاولى معاه
بالراحه وفهميه انك هاتخدى
فلوس من باباكى...وانك كمان هتعملى دايت قبل وبعد العمليه...وهتلعبى رياضه
كمان ...علشان يقتنع انك مش هترجعى كده تانى...
غاده : انا زهقت يامخنوقه وحاسه انى ماعدتش قادرة ابص فى وشه تانى...انا بالنسبه
له امر مفروووغ منه...بالنسبه له ام العيال اللى بتخلف وتربى وتذاكر وتطبخ
وتنظف.....لكن ست لا والف لا.....ده مش بيغير نهائى عليا....
انا : بيتهيألك مش معقوله مافيش راجل مابيغيرش على مراته....هو بس بيثق فيك
وعارف انك ست محترمه....
غاده : انتى بتدافعى عنه كده ليه.... انتى ماتعرفيش حاجه ...انتى مش عايشه
معايا....دى الشقه اللى احنا فيها بابا اللى جايبها لى علشان عايزة ااقعد فى مصر وعمرو
حط فلوسه كلها فى مكتب الدعاية بتاعه.....ومديه كل اهتمامه...وماعرفش عنه حاجه.
انا : غاده حبيبتى كل راجل وليه طبعه....مانا الباشا مروقنى خنقه وعصبيه...بس
باتحمله وربنا بيمشيها بالتفاهم...
حاولى تتفاهمى معاه بهدووووء .... وانا ممكن اجى معاكم عند الدكتور واتكلم مع عمرو
كمان لو عايزة...
غاده : بجد يامخنوقه ؟؟ ربنا يخليكى انا هاحدد معاد مع الدكتوور وهاقولك.......
وفعلا حددت معاد مع الدكتوور ورحت معاها هى وجوزها....والله وقتها حمدت ربنا
قوى على الباشا...فعلا اللى يشوف بلوة غيره تهون عليه بلوته....عمرو مش عصبى
نهائى بس تخصص حرق دم على الهادى..............
واعتقد ان عم دهب _اللى فى مجلة ميكى _ اتعلم البخل من عمرو...يعنى بيناقش
الدكتوور فى تفاصيل الفلووس بالجنيه ........
وبيفاصل معاه كأنه فى سوق الخضار....مع ان الفلوووس كلها دافعها ابو غادة....كل ده
وانا مستنيه يسأله على الاثار الجانبيه للعمليه...او على خطورة العمليه او هاتقعد قد ايه
تعبانه.....مافيش...نهائى...لما انا اتفرست بجد منه....
ولما خلاص وصل مع الدكتور للسعر من الاخر بعد ماعصروا بعض....حددوا معاد
العمليه...ويوم العمليه رحت مع غاده انا وباباها ومامتها...وعمرو وصلنا
ومشى...علشان عنده شغل...تخيلوا...انا اخدت ولادها وروحت وكنت باطمن عليها
بالموبيل ..ومش عايزة ااقول لكم 8 اطفال فى البيت يعنى ايه...
المهم عملت العمليه...وقعدت يومين فى المستشفى...وولادها طبعا عندى...وعمرو
بيطمن عليهم بالموبيل...
ولما خرجت كانت صحيح لسه مليانه ....بس نهائى مش زى الاول خاااالص....والدكتور
كتبلها على نظام غذائى وتمارين تمشى عليها....وبصراحه غادة التزمت جامد وعملت كل
اللى قاله الدكتوور....وفعلا تعبت قوى فى العمليه وبعدها...

هتقولولى ايه المشكله ....وايه الوضع الصعب اللى اتحطيت فيه..؟؟؟

المشكله بد ات بعد العمليه ب 3 شهووور......كانت غادة بقت واحده تانيه

خاااااااالص......

هااحكيلكم عليها بقى البوست الجاى ....وصدقونى مش هاتاخر خلااااص تانى

عليكم...... لأنى قررت انى ابطل اعزل نفسى

وابطل اعيش وحيدة تانى..... ولو اتخنقت جامد هاكتب خنقتى فى البوست

وخلااااص....بدل ماتخنق لوحدى....

مخنوقتكم رجعت تانى .....يارب ماتكونوش نسيتونى...

الخميس، ديسمبر 31، 2009

كل سنه جديده وانتم طيبين





عيد سعيد وسنه جديده يارب تكون احسن من اللى فاتت...عليكم كلكم
وحشتونى كلكم وصدقونى متباعكم كلكم والله ...بس انا مش لاقيه حاجه اكتبها من ساعة ماجيت مصر....




انا لقيتنى بقيت فى غربه اكتر....واتخنقت اكتر واكتر...وحسيت انى فى سجن..




مش عايزة حد يزعل منى ..بس انا مش حاسه بالأنتماء هنا بتاتا البته......




بس انا قررت انى مش هاسافر نهائى لأجل غير مسمى...لغاية ماعرف انا هويتى ايه بالظبط....




ليه انا مش طايقه ااقعد هنا ...؟؟؟ وليه مش قادرة اتأقلم على الناس والحياة هنا ؟؟؟




لدرجة ان ولادى اتأقلموا اكتر منى ...خصوصا مع اهلى واهل الباشا ...




جايز علشان هم لسه صغيرين ...جايز....




أبنى الكبير قالى كلمه وجعتنى قوى ...انتى جنسيتك ايه ياماما ...




مش مصريه برضه ؟؟؟؟؟؟؟




معرفتش ارد وأأقول ايه..ايوة فى البطاقه والبسبور مصريه...




لكن فى القلب ايه ..؟؟؟؟فراااااغ كبير قوى...




علشان كده انا مش هاسافر تانى لأجل غير مسمى زى ماقلتلكم




جايز ..الفراااغ ده يتملى بحاجه مع الاياااام...




معلش برضه خنقتكم بمشاكلى ....بس حبيت اعيد عليكم كلكم




كل سنه وانت طيبين ..




وسنه جديده سعيده على الكل بأذن الله..








الأحد، سبتمبر 20، 2009

كل سنه وانتم طيبيييييين

انا اللى عملت ده كلللللللله








وحشتووونى قوى قوى




عارفه انى مقصرة جدا معاكم كلكم ....بس احوالى كلها كانت ملخبطه




ولأول مرة فى حياتى ..ابقى مش عارفه اعمل ايه...




بس انا اخدت قرار ونفذته وباتحمل توابعه..




على قد ماهو قرار صعب قوى ..بس حاسه انه القرار الصح على الأقل دلوقتى




وهو انى استقريت فى مصر حاليا وباسجل ولادى فى المدارس هنا




والباشا رفض العرض بتاع الرياض لانى مش عايزة ارجع السعوديه تانى..




صحيح انا عشت فيها نص عمرى تقريبا..واتولدت فيها..




بس كفايه غربه علي كده ..انا تعبت...




والباشا حاليا لسه فى دبى ومش عايز يرجع مصر ..




ومدينى السنه دى اجرب فيها العيشه فى مصر..




وهيقرر هو بعد السنه دى يرجع ولا لأ...




يعنى انا قاعده معاكم السنه دى ...وهاتحسوا بيها قوى لما تلاقوا مصر بقت خنقه اكتر ماهى مخنوووقه




وده طبعا واكيد علشان مخنوووقه الخنيييقه وصلت




وقاعده سنه بحااالها




وبعد كده




الله وحده اللى يعلم هاروح فين




عموما ده موجز لأخبارى الخنيقه والتفاصيل هتيجى فى البوستات اللى جايه




ان شاء الله




وكل سنه وانتم طيييبيين علشان العيد




ويارب يعود عليكم الايام بخير




مخنوقتكم ....رجعت تانى