THOUSANDS OF FREE BLOGGER TEMPLATES

الثلاثاء، ديسمبر 23، 2008

بيبه الجديده ---- حلوه لكن عجيبه


انا كنت ناويه اكتب البوست ده من 5 ايام بس السيرفر بتاع النت كان فى مشكله كبيييره هنا فى دبى



معرفش اخبار النت كان عندكم فى مصر ايه؟

وبما انى باكتب لكم .......... يبقى اكيد فيه خنقه...........عادى يعنى ......بس مش من الباشا.....


يوم الاربع الى فات كنت خلاص باجهز الاولاد للنوم ..وفجاه اتصلت بيبه....


بيبه : مخنوقه هو انت لازم تروحى الشغل بكره

انا: ايوه ...ليه فى حاجه؟؟



بيبه : اصلى هاروح افك بقية الغرز بكره .. وكيمو مش فاضى يودينى وطلب من اخته تودينى


وانت عارفه انى باعتبرها فى مقام ضرتى بالضبط....

انا : طيب ياحبيبتى ماتزعليش ..انا اصلا عندى برد جامد ومش راضى يخف ممكن اخد بكره مرضى



انت عايزانى اعدى عليك الساعه كام ؟؟



بيبه : ربنا يخليك ..انا هاكون جاهزه الساعه 11 وطبعا اخت كيمو هتقابلنا هناك


انا : ماشى ياجميل هاعدى عليك بالعربيه بس مش هاطلع ...اوك


وتانى يوم اخدت اجازه .. وربنا يستر وماتتخصمش من المرتب ..وعديت على بيبه



والبرد كان مموتنى علشان كده اخدت انتى بيوتك ومالحقتش افطر ولا اى حاجه ونزلت


بسرعه لانى اتأخرت على بيبه - لقيت عربية اخت كيمو واقفه ...وانا بصراحه مش


باستلطف اخت كيمو خاالص .. بس نزلت وسلمت عليه



اخت كيمو : ازيك يامخنوقه ..انت عندك برد ولا ايه


انا : ايوه برد جامد شويه - انت عامله ايه واخبار شغلك ايه؟


اخت كيمو (بعد مابعدت عنى شويه): الحمد لله ...رنى لصاحبتك خليها تنزل هو


احنا تحت امرها ولا ايه؟


انا: طيب خلاص رنتلها ..لو انت مستعجله روحى وانا هاوديها للدكتور


اخت كيمو : لاعلى ايه بعدين تقول لكيمو اختك سابتنى وصاحبتى هى اللى وديتنى للدكتور


انا بصراحه اتخنقت منها على الصبح كده ..وطنشت كلامها التقيل قوى ده ونزلت بيبه وركبت معايا


بس انا قلتلها تركب مع اخت كيمو علشان ماتزعلش وانا هاجى وراهم


ووصلنا المستشفى كلنا وطبعا الدكتوور الرايق لسه ماجاش... وبعد ساعه وصل بسلامته والضحكه


على وشه وبيسألنا


الدكتور : اهلا اهلا انت بقالكم كتير


انا : تقريبا ساعه وشويه


الدكتور : مش كتير قوى ههههههه -- ياله يامدام بيبه علشان نشيل بقية الغرز


بيبه : مخنوقه تعالى معايا انا مش عايزه افكها لوحدى انت عارفانى جبانه


اخت كيمو : كلنا هنيجى معاك يابيبه علشان نتفرج على فك الغرز (بغلاسه متناهيه)


وطبعا كاننا رايحين حفله دخلنا اوضة الكشف مع الدكتور والنييرس وانا وبيبه واخت كيمو


(زحمه قوى)من غير مناسبه


المهم فك الغرز لبيبه وشال الشاش كله و.....بيبه مش مصدقه نفسها من الفرحه


بيبه القديمه مش موجود منها غير وشها بس..........كل حاجه تانيه اتغيرت....فعلا


عمليات التجميل دى بتعمل البدع ....بيبه مش قادره تبطل بص فى المرايه الى فى العياده


وطبعا اخت كيمو كمان عماله تبصلها بغل شويتين كده


الدكتور : ايه رايك يامدام مخنوقه ؟؟....مش هتفكرى انت كمان تعملى حاجه


انا: لا يادكتور انا الحمد لله عجبانى خلقة ربنا


الدكتور : مقلناش حاجه ياستى بس برضه فى شوية دوفهات كده مطرح الحمل والولاده


انا ( بصيت فى المرايه وبعدين بصتله ) :الدوفهات دى عاجبانى قوى واهى برضه حاجه تدفى فى البرد


اللى ضايقنى قوى انه خلانى ابص فى المرايه وخلانى شكيت فى ثقتى فى نفسى ..دى الطريقه الى


بيصطادوا بيها الدكاتره زباين لعمليات التجميل.. لانهم بياخدو نسبه على كل عمليه يعملوها وكل


زبون يدخلوه المستشفى غير اجرة ايده وغير مرتبه (اللهم لاحسد )


الدكتور : عموما لوفكرتى انت عارفه مكانى وده الكارت بتاعى


اخت كيمو : طب وانا يادكتور انت مش شايف فى حاجه ولا ايه


الدكتور : يعنى فى شوية دوفهات هنا وهنا وشويه هنا ومحتاجه تصغيير للمناخير شويه


اخدت بيبه وخرجنا من الاوضه وسبت اخت كيمو تتفق معاه على عمرة كامله ليها...المهم ان بيبه كويسه


وفرحانه قوى و....انا بدأت اجووع قوى..لانى ماكنتش فطرت خالص


خرجنا كلنا ورحنا مول قريب من المستشفى وفطرنا وبعدين لاحظت ان الناس بتتفرج علينا ..وعلى
بيبه بالذات وانا مش عارفه فى ايه لغاية ماخدت بالى وقلتلها فى ودنها علشان
اخت كيمو ماتسمعناش وتعملها مشكله بعد كده
انا : بيبه ياحبيبتى انت مش ملاحظه ان هدومك بقت ضيقه عليك شويه من تحت و
شويتين تلاته من فوق؟؟
بيبه : اه صحيح انا لازم اجيب هدوم جديده ...اممممممممممم دلوقتى
انا : ماشى قومى مع اخت كيمو هاتى اى حاجه دلوقتى وانا هابقى الف معاك يوم
يوم تانى احسن انا البرد تاعبنى قوى
بيبه : اوك انا معايا الكردت كارد بتاع كيمو وهاشترى بيه وانت هتعملى ايه؟
انا : انا هاقعد على النت شويه فى الكافيه لغاية ماتخلصى ....اوك
المهم قامت مع اخت كيمو وانا قعدت ارد على تعليقاتكم على البوست اللى فات ...والحمد لله البرد راح شويه وفقت حبتين
بعد ساعة ونص تقريبا لقيت بيبه راجعه وشها مقلوب و شكلها هاتطق من الغيظ وتقريبا ماشترتش غير بلوزه
ولقيت اخت كيمو بتسلم على وماشيه علشان ولادها ....وطبعا انا قعدت مع بيبه علشان اعرف فى ايه
بيبه : انا اتخنقت من الوليه دى كل مانقى حاجه تقولى غاليه او مش سنك او وحشه ...هى مالها ومالى بالضبط؟
انا : طب ماتزعليش انا هاقوم الف معاكى ..انا بقيت كويسه والحمد لله
و.....ياريتنى ماقلتلها كده ....قعدنا نلف فى المول من اوله لاخره واشترت حاجات كتيرة والساعه بقت 3
وانا ولادى بيرجعوا 3.30 يعنى يادوب الحق اروح البيت
انا : كفايه كده يابيبه علشان الاولاد زمانهم راجعين البيت ومفيش حد غيرى يفتحلهم
بيبه : طب خلاص انا عندى فكره ايه رايك نعدى نجيب ولادك وبعدين ولادى ونروح مول الامارات
انا : ايه ؟؟ ليه يابنتى ما كفايه شوبينج كده النهارده --وبعدين مول الامارات ده بعييد قوى عن هنا دى لفه
جامده قوى وزحمه كمان
بيبه : متبقيش وحشه يامخنوقه انا بصراحه عايزة اخلص ام الكرديت كارد بتاع كيمو وهاخلص يعنى هاخلصه
انا : انت عايزه تخلصى 5000 درهم فى يوم واحد ليه ؟؟؟؟؟؟؟؟؟ انت اتجننتى؟؟؟؟؟؟؟
بيبه : هاقولك بعدين لما اخلصه
انا مش عارفه الدكتور عملها العمليه فى جسمها بس ولا دخل كمان على صواميل مخها؟؟؟ البت اتجننت تماما
ومش عارفه اقنعها ...وامرى لله رحت جبت ولادى وبعدين عديت جبت ولادها والشغاله طبعا... والعربيه
ماقولكوش شكلها بقى عامل ازاى..........عربيتى صغيرة وهاتش باك -ونص عمر كمان..............
ومعايا 6 عيال وبيبه والشغاله ..(متخيلين المنظر )..ده غير السواقه فى عز الزحمه ..مع دوشة العيال
بصراحه ..العربيه صعبت عليا .....
المهم وصلنا المول بعد عذاب وطبعا العيال كانوا جعانين فغديناهم الاول وسيبناهم فى البلاى كورد مع
الشغاله ...وطبعا معاها موبيل علشان الطوارئ لان دول 6 عيال على شغاله واحده (ربنا يكون فى عونها )
ولفيت مع بيبه وبرضه نازله شوبينج كتييير ...والكارد مش راضى يخلص علشان حظها الحلو كان فيه
sale فى المول كله ...وعديت ساعتين ... وانا تعبت قوى والشغاله كلمتنا مرتين .. والبرد رجع تانى اكتر
من الاول وخلاص عينى احمرت من التعب ...وبرضه لسه بيبه بتقيس وتجرب وتلف وتشترى .....
المهم الباشا كلمنى
الباشا : انت فين ده كله ؟؟لسه مع بيبه ؟؟
انا : ايوه بس انا تعبانه قوى ..البرد مبهدلنى.. احنا فى الامارات مول
الباشا : ايه اللى وداكم هناك كده ؟؟ ده زحمه قوى ...طيب انا هاعدى على كيمو وهاقبالكم هناك
انا : ياريت بسرعه لانى خلاص تعبت وعايزه اروح
الباشا : انسى بسرعه دى ده انا قدامى ساعه عقبال ماجى انا وكيمو ...وكمان لسه هانتغدى
طبعا الكلام نزل على زى الدش الساقع قوى لانى كان نفسى اروح البيت واخد البطانيه فى حضنى واناااام
بس بيبه لسه ماخلصتش ...والعيال زهقواا قوى ..
بيبه : على فكره كيمو كلمنى وقال انه جاى هو والباشا كمان ساعه ..يعنى قدامنا وقت لسه ..
انا (وصوتى مش طالع من التعب ): هو لسه فاضل حاجه فى الكارد
بيبه : ده كارد محجب مش راضى يخلص فاضل لسه الف ونص
انا : طب ياحبيبتى كفايه كده انا تعبت نكمل يوم تانى ..واوعدك انى هاوديك مول تانى يخلص على ام الكارد
بيبه : انسى انا مش مروحه غير لما اخلصه
انا : يابنتى كيمو هايزعل منك وممكن يتخانق معاكى
بيبه : ماتخافيش عليا ... وخليه يزعل شويه ..جايز يحس هو زعلنى قد ايه ...وتانى مره لما تيجى اليسا او غيرها
تبوسه يبقى يفتكر ان يقولها انه مابيتباسش غير من مراته......
مش بقولكم البت اتجننت...يعنى هو ده الى هايمنع كيمو من انه يتباس او يتنيل...لو خوفه من ربنا مامنعهوش ..
يبقى عمر الفلوس ماهتمنعه...... ربنا يهدى....
وفجاتن الباشا كلمنى...
الباشا : انا مش هاعرف ااجى لان فى حادثه على طريق الامارات فى المرواح ..لكن الرجوع سالك ارجعى لوحدك
وانا هاروح اتغدى مع كيمو وهاقبلك عند بيته ....
يانهار طحححححححححن .......هى كده كملت ...........واخدت بيبه والعيال والشغاله تانى فى العربيه ....بس المرة دى
كنت بانهار من التعب ..والعيال اتخانقوا مع بعض ...والسكه زحمهههههههههههه ............عملت غرز كتيرة بالعربيه
علشان اخلص من الزحمه واروح...برضه مافيش فايده والزحمه مابتخلصش....وفجاتن ابن بيبه عايز بيبى
شوفتوا الهنا الى انا فيه ...وطبعا خرجت برة الطريق ووقفنا علشان البيه الصغيير ...وكملنا تانى وربنا وحده يعلم انا
كنت سايقه ازاى ...لغاية ماوصلنا بيت بيبه ....
بيبه : شكرا ياجميل معلش تعبتك معايا ..اطلعى شوية اشربى حاجه انا حاسه بالذنب ..شكلك تعبان قوى
انا : لا شكرا انا عايزة اروح اخد الانتى بيوتك واناااااااااااااااام الساعة بقت 8 وكويس ان بكره الجمعه
بس بكره الغدااا عندك ..عقابا ليك على اللف ده كله ..
بس وروحت ولقيت الباشا اتغدى وروح وغير هدومه ونازل تانى مع كيمو علشان يشيشواا على القهوة
(واخر روقاان )
الباشا : انت هتنامى ولا ايه مش هتروحى تسهرى عند بيبه النهارده
انا : لالالالالا كفايه على قوى كده النهارده ...بس الغداا بكره عندهم
الباشا : بس كيمو مقليش
انا : لسه المعلومه ماوصلتلوش معلش بيبه عملاله مفاجاه
المهم نمت و...نمت كمان كتيير ورحنا اتغدينا عند بيبه ...وكانت عامله غداا sea food كتيير قوى
سمك وجمبرى وسبيط وكلامارى واستاكوزا .............ده غير السلاطات
انا : تسلم ايديك يابيبه لازمته ايه التعب ده ؟؟؟ اى حاجه وخلاص ليه ده كله؟؟انت عملت ده كله امتى؟؟
بيبه : وحياتك كله جاهز ولا عملت حاجه ..ربنا يخلى الكرديت كارد...
وتصدقى برضه لسه ماخلصش .....مش قلتلك محجب....
قولولى بقه لى حق اتخنق ولا لأ؟؟؟؟ بجد اتخنقت من مخها الى صغر قوى كده....دى محتاجه عملية ظبط زوايا للمخ
او الظاهر كهربة المخ عايزة تتغير ولا بينى انا الى هاتجنن..............
بس دى صاحبتى الى انا بحبها ...ومش ممكن ازعل منها ....والخنقه ممكن نسميها
خنقه نص نص ...........
على فكرة هى عارفه انى باكتب لكم كل حاجه ...وبتسلم عليكم وناويه تعمل لها بوست بس اول ماتشطب
الكرديت بتاع كيمو ....وعلى فلوسه كلها
حاجه تخنق مش كده........................












































































































39 التعليقات:

عمرو يقول...

أنا متغاظ لكيمو بصراحه
يعنى حتة بوسه زغنونه لا راحت و لا جات و لا جابت و لا ودت تكلفه 5000 درهم ؟؟!!
عموما سلامتك يا مخنوقه و النت هنا برضو كان عطلان و من كل 5 مصريين فيهم 6 عندهم برد
5000 درهم فى بوووووسه !!!

محمد عتلم يقول...

لالالالا 5000 درهم + 25000 فى العمليه ويعنى كمان 2000 نثريات فى النص يعنى كد حوالى تلاتين اتنين وتلاتين الف فى البوسه الواحده ده غير تعبك يا مخنوقه وحرقة دمك الى لاتقدر بمال وكمان كانت بوسة وداع امال لو كانت بوسة استقبال وعليها حضن صغنن مثلا كان ايه الى حصل ؟؟ وكانت تقف بكام ؟؟
يعنى البوسه تلاتين والحضن قولى كمان ...نمشيها تلاتين برضه ده مع الدسكاوند عشان فيه Sale مش حرام ده ؟؟ صحيح كل حاجه غليت اوى حتى كمان البوس . لالالا بجد خنقتينى

صبرني يارب يقول...

يا بت يا مخنوقه مش انا قلتلك ان انا شايله المراره ؟؟؟

مش عيب الى انتى بتعمليه فينا ده ؟؟؟

بس 5000 درهم فى دبي ما يخلصوش

ليه كده انتم كنتم فى دبي البلد ولا ايه

طيب كنتم اندهولي وانا كنت وضبتكم

بيت يا مخنوقه خنقتينى منك لله

بس على فكره ده عادي

ما دام الحكايه دخلت فى هبل من الاول وعمليات تجميل يبقى هي خلاص ناويه تعيش الهبل

اها قوليلها نيابة عني الى معاه قرش محيره يجيب حمام ويطيره

على فكره الدكتور قالي ان طلعلي مراره جديده بس لسه صغيره لانها عباره عن الشريان المراري اساسا

بس حذرني من الفاقعه عشان مش هاتستحمل معايا كتير

الرحمه حلوه بقى

Mafrousa يقول...

انتى حكاياتك تفرس
مش تخنق
انصحي صحبتك لو بتحبيها
و الصراحة ان اخت جوزها لازم هيه اللى تتخنق منها
يالله انا اتفرست عندك للمرة التانيه
هههههههههههههههه
تالت مرة حنفرسيني حفرسك
ههههههههههههه
و سلامتك الف سلامه

فشكووول يقول...

أنا بقى حاستعير اسم صبرنى يارب حوالى 40 الف درهم عشان بوسة اليسا .. والله هى تستاهل 100000درهم كمان ولا يهمه كيمو هو فيه حد يبوس اليسا حتى لو دفع دم قلبه .. بس قولى لى بتتكلمى جد ان بيبه شكلها اتغير للاحسن .. قولى لى فين الدكتور ده عشان اودى الحاجه بتاعتى له.

حاسوباتيه يقول...

ههههههههههه كيمو يستاهل هي الرجاله ماتجيش غير بكده هههههههههه

عاشقه وغلبانه يقول...

مش عارفين تخلصوا 5000 درهم ليييييييييه صغيرين ولا حاجه
كنت اندهي بس واحنا نخلص ابوهم
هههههههههههههههههههههه
وبعدين حلو كده تخلص علي فلوسه ليها ولولادها طالما هو من النوع ده
وطالما بيبص بره يبقي هي وولادها احق بفلوسه لحد مايبقاش معاه حاجه يتبصلها
هههههههههههههههههه

خنقتني وفرستيني
اهي اهي

تحياتي والف سلامه من البرد

hager يقول...

علي فكره طريقتك في الكتابه لذيذه اووي
مستنيه البوست الجاي :)

kochia يقول...

مادام انتي زهقتي اوي كدة ليه ماخدتيش قرار بالانسحاب فورا
--------------------------------------
انا مروحة جاية معايا ولا اروح انا والعيال
وانتهينا
--------------------------------------
لكن افضل قرفانة يوم بطوله من تصرفات واحدة وتاني يوم اروح اتغدي عندها ..
لا

ساعات الواحد بيكون هو نفسه من ضمن اسباب خنقته
اسعدي نفسك
وابعدي عن اسباب اتعاس نفسك
هتلاقي نفسك احسن بكتير

وجربي وقوليلي

من غير عنـــوان يقول...

قصة مسلية
اسلوب انتقام المرأه دايما في الآخر بيجي على جوزها


تحياتي

Empress appy يقول...

سورى يا حبيبتى اولا اهلا بيكى عندى بس حبيت اوضح لكى المعلومه اللى انتى قولتيها وممكن تقرى وتشيلى التعليق

اقول تانى المشكله حتى لو زى ما بتقولى سلبى مع انه بيجيب نتيجه والحكومه بتسمع فى البلاد التانيه مش بتكلم عن مصر عموما
بس فيه حاجه اسمها مسانده معنويه بنحتاجها كلنا وبندور عليها بلاش نستكتر على بعض حتى اننا نتجمع على كلمه واحده حتى لهدف صغير والنبته الصغيره بتكتبر وبتعمل شجر كتير
نورتى وتنورينى على طول

بجد ميرسى ليكى

حاجات جوايا يقول...

ههههههههههههه
والله انتى عسل انتى وبيبه صاحبتك
ربنا يخليكوا لبعض
ويهديلك الباشا
ويهديلها كيمو ويبطل يتباس من اليسا
ههههههههه

أسعدنى مرورى بمدونتك اللذيذة

سالى

أحمد (زوج مخنوق ). يقول...

5000 درهم مش عارفين تخلصوهم في دبي؟؟؟؟؟؟؟؟؟؟؟؟؟!!!!!!!!!!

اولا كيمو يستاهل بجد
و زي ما بيقولوا
الغاوي ينقط بطاقيته

و ثانيا الف سلامة عليكي من البرد
شافاكي الله و عافاكي

تحياتي

maha zein يقول...

لا سلامتك
اكيد بقيتي احسن في فرق الاليام ده
انا اول مرة ازور مدونتك
بس عبني اسلوبك
وطريقة حكاويكي
ربنا يكون في عونك ويرجعك من الغربة
ما فيش ليا استاكوزاية كده ولا حاجة
ولا كله اتنسف
ينفع كده

:: Salma Emad :: يقول...

ازيك يا مخنوقه

اسلوبك في الكتابه لذيذ جدااا

كيمو يستاهل اكتر من كده كمان ..علشان يحرم يبوس حد تاني

بس انتوا ازاي مش عرفتوا تخلصوا 5000 في دبي

دي الخروجه الواحده هناك يا دوب من غير شري هدوم او حاجه يا دوب 2000 او 3000

يلااااااااا ياستي

بس الف سلامه عليكي من البرد

و اتمني زيارتك

غير معرف يقول...

ايه الجمال ده حدوته جميله اوى و مليانه عبر عموما
الف حمدالله على السلامه و
انا رأى ان الهدوم القديمه هاتبقي احلى بعد العمليه بلاش ترميهم

بنت الغربة يقول...

استاذ عمرو ماتتغاظش ولا حاجه كيمو يستاهل كل اللى يجلرى له
لان البوسه بوسه سواء زغنونه ولاكبيره
والله يسلمك

بنت الغربة يقول...

محمد عتلم
معلش اذا كنت خنقتك مانا مخنوقه خلقه
وماتقعدش تحسبها لكيمو علشان هو اللى بدأ والبادى اظلم
تحياتى

آسو الحياة يقول...

ازيك يا بنت الغربة اسمحيلى احاكى معاكى بيه عن المخنوقة
كيف احوالك وكيفها بيبه سلميلى عليها شكلى حبيتها
وقوليلها تخف شويه ع الراجال اللى معها عشلن الصنف مضروب فى السوق ودى اخر الاحصائيات عنهم احسن يروح يدور ع حدا ياخد باله من فلوسه 0000ماشى 00والف سلامه عليكى000ودمتى بخير دائما

بنت الغربة يقول...

حبيبتى ياصبرنى انا اسفه انى خنقتك ياحبيبتى وانا كمان شايله المراره والزايده كمان
بس اعمل ايه ده اللى حصل ولازم اخنقكم زى مانا اتخنقت
وبعدين احنا مش عارفين نخلص الكارت علشان مش نازلين نشترى غبر لبس بس ومن نوعية (لايشف ولايصف )ودى نوعيه صعب قوى تلاقيها فى دبى
لكن لو هانشترى برفانات ولامكياج ولاشنط كان زمانه خلص من زماااااااااان قوى
تحياتى ليك ياقمر

بنت الغربة يقول...

حبيبتى يامفروسه
ماعاش ولا كان اللى يفرسك ياقمر
انا بس حبيت اوضح لكم نوع الخنقه
ومين سببها وبعدين اصمدى لسه الخنقاات كتيره
وبلا تفرسينى كفايه انى مخنوقه
هابقى مخنوقه ومفروسه ؟؟؟
كده كتييير
تحياتى ياقمر

بنت الغربة يقول...

ياستاذ فشكوول
حرام عليك زعلتنى منك
بقى اليسا تستاهل 1000000 بوسه ومرات كيمو الى تعبت معاه واستحملته لغاية ماوصل للى هو فيه ماتستاهلش 400000 ؟؟؟؟؟؟؟؟؟؟؟؟؟؟؟؟
ده انا باتريق على كيمو
الظاهلر كل الرجاله كده
عموما بيبه بقت مززززززه ولو عايز عنوان الدكتور ورقم التليفون تحت امرك- بس خلى بالك اسعاره حراقه قوى
وتحياتى للحاجه

بنت الغربة يقول...

حاسوباتيه ياحبيبتى
فعلا كل الرجاله يستاهلوا كده واكتر من كده
وماتقوليش ان انا الى قلتلك
تحياتى ياقمر

بنت الغربة يقول...

حبيبتى ياعاشقه وغلبانه
معلش انى خنقتك وفرستك -حقك عليا واصمدى لسه فيه خنقاات كتيرة
وبيبه مصره انها تخلص على فلوسه وترجعه تانى زى ماكان
بس انا نصحتها انها تاخد الفلوس وتعينها علشان ولادها
تحياتى ليك ياقمر

بنت الغربة يقول...

حبيبتى ياهاجر
شكرا لتشريفك المدونه
ورايك الجميل
ودايما منورانى

بنت الغربة يقول...

حبيبتى كوشيا
صعب قوى فى غبه زى الى انا فيها انا وبيبه انى اتخنق منها وابيعا واسيبها واروح
لانى باعتبرها زى اختى ......ومش معقوله انى لما اتخنق من اختى انى اسيبها وامشى
احنا عدت علينا ظروف صعبه كتيير
عمرها ماسابتنى ولا انا سيبتها
مش معنى كده انا موافقه على تصرفاتها
لالالا...معناه انى مش هاسيبها فى اى الاحوال لوحدها لانها عمرها ماسابتنى
وانا فى أسوأ احوالى
صعب قوى فى الزمن ده وخصوصا فى الغربه تلاقى حد قلبه عليك
كله بيدور على مصلحته - صدقينى انا شفت كتيير قوى فى الغربه دى
وتحياتى ليك ياجميل ودايما زورينى

بنت الغربة يقول...

باشمهندس محمد البنا
دايما باحب رايك
طبعا انتقام المرأه لازم يجى على دماغ جوزها
لانه الى بدأ والبادى أظلم
تحياتى

بنت الغربة يقول...

حبيبتى ياابى
شكرا لتشريفك مدونتى وانا اكيد مش هاشيل تعليقك
وانت وضحتى وجهة نظرك
وانا فهمتها
تحياتى ليك

بنت الغربة يقول...

حاجات جوايا
انا الى اسعدنى مرورك الجميل بمدونتى
وربنا يهدى الرجاله كلها
وربنا يخليك ياقمر
ودايما زورينى

بنت الغربة يقول...

استاذ احمد
اولا تحياتى لزوجه (اخبارها ايه فى الامتحانات )
تانيا احنا مش عارفين نخلص 5000 درهم علشان احنا كنا بنشترى لبس بس
ونوعية الهدوم هى نوعية (لاتشف ولاتصف ) ودى نوعيه صعب قوى وجودها فى دبى لان الطلب عليها شبه معدووم
لكن لو بنشترى برفانات او مكياج او شنط او موبيلات ....مكانش الكارد كفى نص الحاجات دى
تحياتى

بنت الغربة يقول...

حبيبتى يامها
انا مبسوطه انك زورتينى
وانا الحمد لله بقيت كويسه
وتعالى زورينى دايما وانا اجيبلك شادر استاكوزا بحاله
تحياتى ليك ياقمر

بنت الغربة يقول...

حبيبتى ام يوسف
اهلا بيك فى المدونه انت شرفتينى
ومين قالك ان الخروجه الواحده فى دبى تكلف ده كله؟؟؟؟
امال الناس عايشه ازاى
لالالا طبعا مش كده خالص
الحياه هنا صعبه ومكلفه مش سهل الواحد يفرتك كل يوم المبلغ ده
وبعدين لبس بيبه لبس محجبات يعنى صعب تلاقيه فى اى حته فى دبى
مش زى مصر يعنى
تحياتى ليك وان شاء الله هازورك

بنت الغربة يقول...

نورتنى اخيرا ياستاذ بيبرس
كويس ان الحكايه عجبتك ماخنقتكش
وهدوم بيبه ماعدتش تصلح الا للأستعمال المنزلى بس....
ماينفعش يتخرج بيها خاااالص
وتحياتى

بنت الغربة يقول...

حبيبتى ااشوا الحياه
شكرا ياجميل على زيارتك الحلوة
وهابلغ بيبه تحياتك
وربنا يهدى لها كيمو وكل الرجاله
وصدقينى هم انضربوا فى السوق من زماان قوى
تحياتى ليك ياقمر

:: Salma Emad :: يقول...
أزال المؤلف هذا التعليق.
Kiara يقول...

يالهوووووووووووووووي ربنا معاكي ده انتي كنتي بتموتي
بس برده مش مع بيبه انها تخلص الكرديت كدا

غير معرف يقول...

روحى استلمى اللوحه من المدونه
عندى
على الله تعجبك انهارده

hasona يقول...

مصائب قوم عن القوم التانين مكاسب -
ابقي خدي الكرديت كارد بتاع كيمو - لفة - و لكل واحد لفة صغيرة بقي
،،،
شوفتي تعبك والبرد بيروح لما بتكوني معانا علي النت ازاي - وخصوصا وانت بتردي علي التعليقات اللي بتخنقك أكتر وأكتر
،،،
والنت في مصر منيل ينلة أكتر وأكتر- وبيبحثوا علي سمكة القرش اللي قطعت الكابلات الستة- مش عارف كانت عايزة توصل لأيه بقي

،،،
انا لو عارف أعرف الناس بتفكر ازاي- يعني الفلوس هي اللي هتخليه مش يبوس نانسي ولا اليسيا- أظن ولا حبل المشنقة نفسه - الا اذا كان الوازع داخلي والخوف من ربنا أكبر من كل شئ


تحياتي
وكل سنة وانت بكل خير

غير معرف يقول...

I loved as much as you'll receive carried out right here. The sketch is tasteful, your authored subject matter stylish. nonetheless, you command get got an impatience over that you wish be delivering the following. unwell unquestionably come more formerly again as exactly the same nearly very often inside case you shield this increase.

My blog post :: longchamp borsa