THOUSANDS OF FREE BLOGGER TEMPLATES

الثلاثاء، ديسمبر 16، 2008

خنقة العيد --- قصدى هدية العيد

كل سنه وانتم طيبين

انا عارفه انى اتاخرت عليكم بس كان عندى برد جامد جدا - والمدارس بدأت تانى ورجعت الشغل تانى

والدنيا بقت سقعه الصبح وحر قوى الضهر وربيعى العصر وخريفى المغرب وتلج بالليل

يعنى جو جميل جداااا يخلى اى حد يجيله التهاب رئوى مش انفلونزا بس

المهم نرجع لمضوعنا وهو هدية العيد الرايقه بتاعتى - لأنها لغاية دلوقتى فى الدرج ماتلبستش غير مره واحده)

قبل العيد بأسبوع نزلت انا والباشا مع بيبه وجوزها ورحنا مول اسمه (فيستيفال سيتى ) ده مول حلو قوى

وفيه العاب ولبس اطفال - وقعدنا هناك 3 ساعات لغاية ماجبنا حاجات العيال كلها

وفجأتن الباشا اقترح ان العيال يروحوا مع بيبه وجوزها وانا وهو نفضل علشان هيجبلى هدية العيد

انا بصراحه فرحت (مش علشان الهديه - لا علشان اقترح انى انا وهو هنتمشى لوحدنا زى زمان )

والعيال بيحبو ولاد بيبه ومش هيعملوا مشاكل لغاية لما نرجع

المهم بيبه وكيمو اخدوا العيال وروحوا - وانا والباشا فضلنا فى المول بنتمشى وبنتكلم

الباشا: ايه رايك اجيبلك ساعه حلوة - المحل ده عنده ساعات حلوة قوى وكلاس

انا : اشمعنى ساعه يعنى مانا عندى ساعات كتير

الباشا : ولا واحده فيهم كلاس كلهم اى كلام وكبار قوى وفيهم استراس بيلمع كده غريب

انا : يعنى ايه مش كلاس ؟؟ انا بحب الساعات الكبيرة اللى فيها لعب شويه ايه المشكله؟؟ وبعدين انا عندى اتنين ماركة سواتش

يعنى مش اى كلام

الباشا : هى دى ماركه تتلبس؟ ياشيخه ارتقى بذوقك شويه

انا : ارتقى بذوقى (بخنقه لسه فى بدايتها ) حاضر ياحبى ورينى الساعات الكلاس علشان ارتقى بذوقى

المهم دخلنا المحل وكان بصراحه شيك قوى وكله ساعات ماركات عالميه متنوعه - انا رحت طبعا على الساعات الكبيرة

اللى فيها لعب لانى بحبها قوى - وده شافنى عملت كده راح مسكنى واخدنى عن ماركة اسمها سيكو ( ماركه قديمه قوى )

بس غاليه قوى مش عارفه ليه ؟؟ اذواقها كلاسيك زياده عن اللزوم - وكل الساعات الحريمى صغيره او شكلها

سيمبل قوى (مش النوع اللى بيعجبنى) واختار واحده غريبه كده وقالى جربيها

الباشا : ايه رايك شفتى حلوة قوى ازاى

انا : حبى هى حلوة بس انا عايزة واحده اكبر شويه دى صغيرة قوى

الباشا : انا عايز افهم صغيرة ازاى يعنى هى لازم تبقى واخده ايدك كلها علشان تبقى حلوة

انا : لا ياحبيبى بس انا مش بحب النوع الرفيع ده وبعدين دى سمبل قوى ومفيهاش اى لعب وعاديه قوى على سعرها

الباشا : مالكيش دعوه بسعرها - انا باختارلك الحاجه الكلاس الى ذوقها حلو - بلاش ذوقك البيئه ده

كل الحوار ده كان قدام الاموره الى واقفه تفرجنا الساعات وطبعا قصرت واتكتمت لما قال على ذوقى انه بيئه

والظاهر صعبت على الاموره الى بتبيع فعرضت علينا ماركات تانيه - اشكالها (فى رأى البيئه) انها احلى

بس مفيش فايده برضه مصر على الساعه الى اختارها هو - ولما لقانى ساكته ومابتكلمش اتقمص منى وقالى خلاص هاتى اللى انت عايزاه

انا : انا عايزه الى انت نقتيها لى حبيبى خلاص اقتنعت بيها

الباشا : بجد ولا برضه مش عاجباكى

انا : لا عاجبانى خلاص اهو الواحد لازم يغير استايله شويه

الباشا : ايوه كده ارتقى بذوقك شويه

انا : حبى انا ارتقيت بذوقى من 12 سنه لما اتجوزتك ( وانا باحاول اكتم الخنقه الى ممزوجه بالتريقه )

الياشا : اه طبعا امال ايه

المهم اشتراها بحوالى 2000 درهم الا شويه وروحنا عند بيبه علشان ناخد العيال من عندها واول ماطلعنا راح موريهم الساعه

طبعا عجبت كيمو جدا لانه من نفس الذوق الراقى بتاع الباشا - اما بيبه راحت بصه للساعه وبعدين بصتلى وقالتلى

بيبه: حلوة الساعه يامخنوقه هو انت اللى نقتيها

الباشا : اكيد هى اللى منقياها مش هديتها

بيبه : غريبه انت من ساعة ماعرفتك عمرك مالبستى ساعه صغيرة كده

انا : انا قلت اغير الاستايل شويه يابيبه ( وانا مخنوقه جدا)

بيبه : طيب ياحبيبتى مبرووك - تعالى اما نعمل شاى فى المطبخ

المهم هى خدت بالها انى مخنوقه ودخلنا المطبخ علشان نعرف نتكلم لوحدنا وحكيت لها على اللى حصل كله

بيبه : المفروض بعد ماقالك ذوقك بيئه تسيبيه وتمشى وماتشتريش حاجه

انا : انا مش بحب النكد يابيبه وبعدين ده بيجيبلى هديه ليه ازعله - وبعدين الساعه غاليه فعلا يعنى هو مش بخيل

بيبه : انا عارفه انها غاليه بس ماتعودوش انه يتريق على ذوقك

انا : خلاص الموضوع انتهى و الساعه اشتراها خلاص وانا هابقى كويسه بكره مش مشكله

بيبه: بصى انا هاروح معاك بعد العيد لما افوق من العمليه كده ونروح نغيرها - مش الفاتورة والضمان معاك

انا: لا يابيبه كده الباشا هيزعل وانا مش ناويه اغيرها خلاص

بيبه: بلاش خيابه دى موديلها مش حلو ومش ذوقك ومش هتحبى تلبسيها - عموما فكرى براحتك ونشوف نعمل ايه بعد العيد

المهم بعدها بيومين الباشا جه وقالى اجهز نفسى الساعه 8 علشان عندنا عشاء عمل فى فندق الحياة بلازا تبع الشغل

وكل واحد معاه مراته

المهم لبست وجهزت وخلصت قبله كالعاده وبصلى وقالى : انت مش لابسه الساعه ليه؟

انا: اه صحيح نسيت البسها اصلى كنت مخلياها للعيد

الباشا : ليه البسيها النهارده وابقى البسيها فى العيد ايه المشكله ؟

المهم لبستها وبعدين ودينا العيال عند بيبه ورحنا العشاء - كان المطعم حلو قوى والقعده دمها مش تقيل -وكنت المصريه الوحيده فيهم

كانو خلطة من الاجانب على لبانين

واحنا بنتعشى لقيت مراة مديره تيم (بريطانى) لابسه ساعه شبه ساعتى قوى مع اختلاف بسيط

وطبعا نفس الماركه - قلت فى سرى ايه المصادفه الغريبه دى ؟

واحنا مروحين قلتله

انا : السهره كانت حلوه - ومرات تيم ظريفه - تخيل دى لابسه ساعه شكلها قريب قوى من ساعتى

ونفس الماركه

الباشا : شفتى بقه ذوق جوزك - انا كنت مع تيم وهو بينقيها لها - وعجبتنى قوى

انا : علشان كده جبتهالى

الباشا : ايه هى مش عاجباك ولا ايه - ده مرات مديرى لابسه زيها - علشان تعرفى انا مابستخسرش فيك حاجه

انا : عارفه ياحبيبى انت زعلت ليه انا باسأل بس - ربنا يخليك لى

بس ................... وروحت البيت وأول حاجه عملتها انى قلعت الساعه وحطيتها فى علبتها

وقفلت الدرج عليها ........................

ومانمتش طول الليل من التفكير - ياربى انا مخنوقه ليه الساعه غاليه وهو مش بخيل و فى رجاله غيره

كتير مابيجبوش لمراتتهم حاجه اصلا فى العيد - وبعدين هو فعلا مابيستخسرش فى حاجه -

بس ليه انا كل لما ابص للساعه احس انها مش بتاعتى

المهم انا من ساعتها مالبستهاش وهو ماخدش باله انى مالبستهاش فى العيد وبعده ولغاية النهارده برضه ماخدش باله

ان الساعه لسها فى علبتها من يوم العشاء اياه

بذمتكم مش حاجه تخنق............................

مخنوقه جدا










































































































































































34 التعليقات:

صبرني يارب يقول...

يا داليا حرام عليكى

يا بنتى انا شايله المراره من خمس سنين مش حمل كده على فكره

اولا انا مش باشتري ساعات خالص الحمد لله
هههههههههههههههههه

مش باحبهم لكن عندي ساعه ومش بالبسها
ومش ماركه ولا كلام فارغ من ده ولا اساسا باجيب ماركات بصراحه باستحرم احط فيها فلوس

مش بخل والله اعلم لكن ما بجينيش قبل وبعدين ابقى اقولكم ليه

الحاجه الوحيده الى اشتريتها ماركه غير البارفانات الخاتم الالماظ عشان يبقى معايا سارتيفيكيت وكده يعنى

المهم
اولا انا شايفه ان اجمل حاجه فى الهديه انه هو يجيبها فعلا على ذوقه ويعملها لك مفجأه

فى الحاله دي انتى ممكن تقبليها حتى لو كانت قرد

انا عن نفسي باحب كده

وبالنسبه لساعة مرات المدير فقولي لجوزك حسبنا الله ونعم الوكيل

خليه يعيش حياته من غير ما يفكر يقلد غيره ويبص لاي حد من وجهة نظره انه اعلى منه ويحاول يبقى نسخه منه فى الهيافه فقط

مديره اشترى ساعه لمراته اسعدتها يمكن هو ما خدش من الموقف كله الا انه قلده فى شرا ساعه غاليه ما اسعدكيش بيها

ولغرض فى نفس الباشا راح كع تمن ساعه غاليه لاثبات حاجه مش عارفه هي ايه لكن هى حاجه اكيد اكيد ما تزعليش مني هايفه

وبعدين ياريت تفهمي جوزك الى مش بيئه ان الساعه دي حسب اللبس لو انتى بتلبسي كاجوال تجيبى ساعات كاجوال

وبقى فى ساعات كاجوال ماركات والله وغاليه وياااااااما شوفت فواتير كده من بتاعة الشيوخ

ولو لبسك كلاسيك تلبسي ساعه كلاسيك

وبعدين مني ليكى كلمه بقى الراجل ده انا عايزاكي تترسمي عليه

ايووووووه انا عارفه النوع ده كويس

كل ما تترسمي عليه يبقى زي الفل ويمشي حلو اوي

انتى اصغر منه صح انقحي عليه دايما بالحته دي اوووووووووك

ولما يقولك تاني زوقك بيئه قوليله انت الى اووووووولد اوي مش واخد على الذوق الروش والفري الجديد

قشطه كده ؟؟؟
ههههههههههههههههههههههه

وابقى قوليلى حصل ايه لما قولتيله كده

عمرو يقول...

أزيك يا مخنوقه
يعنى ما نجيبش هدايا تزعلوا نجيب هدايا تتخنقوا !!
يا ستى يعنى كفايه البيه طلع ذوق معاكى و صمم يجيب لك الهديه غاليه و حاجه هو شايفها حلوه أو بيقلد مديره يعنى يشكر على كل الأحوال ما هو كان ممكن يطنش و يعدى العيد و خلاص و يبقى عيد حلو برضو و العيال فرحانين بحاجتهم الجديده و كله تمام
سايق عليكى النبى يا مخنوقه ما تشغلى دماغك كتير بالتفاصيل اللى مش ليها لازمه لأن الحاجات دى بيبقى ليها مردود مش حلو على الراجل و بيوصل لمرحله يقول فيها جبت ما جبتش النقار موجود يبقى أجيب ليييييييييه ؟؟؟؟
صيرنى يا رب
و بعدييييييييين ؟؟؟!!!!

أحمد (زوج مخنوق ). يقول...

ازيك يا مخنوقة
هو كونه يجيب هدية في حد ذاته شئ حلو قوي و جميل
اهو على الاقل أحسن من اللى ما بيجيبش
و حاولي تفهمي الفرق بين الراجل و الست في التفكير
مش لازم يبقى طريقة تفكيرهم زي بعض ؟
يعني هو شايف انه لما يجيب ساعة صغيرة هتبقى هدية حلوة
مع انك انتي شايفة انها لو كبيرة و فيها حركات هتبقى أحلى
مش معنى كده ان فى حد منكم غلط
لا
بس معنى كده انكم في أختلاف في طريقة تفكيركم
و ده الطبيعي
كان في كتاب أسمه الرجال من المريخ و النساء من الزهرة بيتكلم عن اننا ازاي كأزواج و زوجات نتقبل تفكير الطرف الاخر مع أختلافه عن تفكيرنا

عموما
تقبلي زوجك بتفكيره أحسن ما تتكبري عليه
و لا أيه؟؟؟؟

تحياتي

أحمد (زوج مخنوق ). يقول...

اه صحيح
ما قلتلناش بيبة عاملة ازاي بعد التعديل؟؟؟

حاسوباتيه يقول...

بصراحه انا اول مره ادخل عندك وقرات الي انتي فيه بالزات اول بوست بجد انا اتعقدت انا هجوز بعد كام شهر بس اتعقدت قبل ما اجوز يارب استرها بقى معلش الجواز شر لابد منه وهو اكبر مقلب في الحياه

من غير عنـــوان يقول...

أولا اسلوبك الساخر لذيذ....
وكل عيد وأنتم بخير
... متهيألي أول مره أزور مدونتك...
أنا دخلت من عند صديقي عمرو...

طبعا موضوع الرجال من المريخ و النساء من الزهرة ... ده بجد...
أنا بقالي 28 سنة متزوج...وبطلت أجيب هدايا على ذوقي( اللي بيجب كل الناس - بكل نواضع- لأن شغلتي لها علاقه بالموضوع، وكمان بأعمل ديكورات - الحمد لله ناجحة- لناس كتير) المهم بطلت أجيب هدايا وبقيت أدي فلوس ، ودي حاجه بأكرهها جددددددا

ابنتي...
حلي دنيا جوزك... حسسيه ان دي أجمل هديه.. البسيها معاه... وفي خروجاتك انتي .. ان شا الله تلبسي منبه... انت حرة

معظم الرجاله اللي مش محتكين بالسوق والموضه.. شايفيين انهم كده عملوا اللي عليهم... وكتر خيرهم...

سؤال بدون خبث: ياتري هو بيقول ايه على هداياك له؟؟؟

ربنا يسعدكم ويوفقكم...
وخلي شوية عليكي وشويه عليه

أمنياتي

عاشقه وغلبانه يقول...

ماتزعليش روحك يامخنوقه
كلنا مخنوقين وغلابه والله
عموما شئ كويس انه فكر يجيبلك هديه
ده يفرحك
واختارلك حاجه خديها وخلاص
حتي لو مش هاتلبسيها
بس قوليله مش يكلمك وحش قصاد الناس
ده عيب في حقه قبل منك
ربنا يهديه وينسي حكايه العيله المالكه دي
احنا معاكي اهو نتخنق سوا سوا
تحياتي

Unknown يقول...

هههههههههههه
على فكره انا بضحك من الصبح على البوست ده وبوست عملية التجميل واليسا اكتر
والله يا داليا انتي جميله
ومش عاوزاكي تتخنقي بالعكس
لو مكانك تتفرجي على المواقف دي وتقعي من الضحك
على فكره جوزك مش وحش صدقيني بس طريقة تعبيره عن حبه ليكي بتخدعه وبتخونه
كل سنه وانتي طيبه يا ست الكل
وعاوزه ادوق البروفيترول

آسو الحياة يقول...

ع فكره مدونتك كتير لذيذة وواضح انك عسولة اوى 000بس كده انتى هاتعقدينى فى الزواج اكتر مانا متعقده0000ودمتى متفائله دائما

mostafa rayan يقول...

كل سنةوانتي طيبة
بصي لو اللي انتي بتحكيه دة اللي حصل فانا عايز اقولك ان دي حياتك انتي وجوزك وماتخليش حد يتدخل فيها ابدا حتى لو كانت صاحبتك
انتي لوكنتي غيرتيها كنتي هتعملي نكد كبير
واضح جدا انه بيحبك وعايز يجبلك احلى واجمل حاجة وحتى لو ذوقك مختلف عنه
مايمنعش ابدا تكون عندك الصغيرة والكبيرة
صدقيني اكتر حاجة تفرح الراجل انه يحس ان مراته طوعه وبتسمع كلامه ساعتها هيدلها عنيه لو طلبت
ربنا يخليكو لبعض دايما

mostafa rayan يقول...

على فكرة صبرني اكيد بتهزر معاكي لما بتقولك اترسمي عليه
مافيش راجل بيحب كدة
وخصوصا لوكان متدلع قوي زي جوزك
لوعملتي كدة هيضايقك وهتعملي مشاكل من غير لزوم
__________________

صحيح ماقولتلناش بيبة عملت ايه بعد العملية

بس خلاص ... يقول...

انا لى رأى فى الموضوع ده ...
اولا كويس انك ماسمعتيش كلام بيبة وغيرتى الساعة لان ده ..كان هيبقى غلطه كبيرة جدا ..لانها هديه .... حتى لو كانت مش عجباكى ... وطبعا انا مع الرأى اللىبيقول انك لازم تكونى الى حد ما ايجابيه فى التعبير عن رأيك لكن بأسلوب غير مباشر يعنى مثلا تفهمى جوزك ان قبلتى الهديه دى بس علشان هى زوقه وان هو اللى اهداها لك ... وكمان مش لازم نقلد الناس فى كل حاجة وانه لازم يكون لينا زوقنا وشخصيتنا ..كده يعنى
تمنياتى لكى بكل السعاده والحب

Manal يقول...

متاخرة
لكن بردو


كل عام وانت بخير
:)

والله اسم المدونة شيء غريب

بس مش على الزوجات

في بعض الاحيان

:)

والموضوع
تحفة

يحصل بين اي زوجين

بس مقطع

انا ارتقيت من 14 سنة من يوم تجوزنا

كان شي مو طبيعي

ضحكني كتيييير الصراحة

مبدعة بالكتابة

تقبلي زيارتي الاولى

:)

بنت الغربة يقول...

حبيبتى ياصبرنى -انت عارفه لو كان راح اشترى الهديه لوحده وادهالى ماكنتش هازعل انه مش ذوقى
بالعكس عملها العيد الى فات وجابلى موبيل حديث - وكنت فرحانه جدا والله
لكن الى خنقنى ان الساعه مش على ذوقه لا دى على ذوق المدير بتاعه
والى ضايقنى اكتر انه ماخدش باله انى مالبستهاش فى العيد ولغاية دلوقت
اما انى اترسم عليه فانا مش بعرف اصلا اترسم على حد خالص
ده طبعى ومش باعرف اغيره وغير كده ياصبرنى انا بحبه ومش بحب ازعله - ربنا يهديه وشكرا ليك ياقمر

بنت الغربة يقول...

استاذ عمرو شكرا لتعليق الجميل - انا عارفه ان الهديه مش فى قيمتها -بس كان نفسى هو الى يختارها مش يمشى على ذوق المدير
لانه حسسنى انه جايب الساعه علشان الناس تشوفها مش علشان انا افرح بيها
وبعدين مين النقار ده ؟؟
ده الستات اغلب من الغلب
تحياتى ليك

بنت الغربة يقول...

استاذ احمد انا معاك انه لما يجيب هديه دى فى حد ذاتها حاجه حلوة -وانا بحبها اكتر من انه يدينى فلوس
بس الى ضايقنى ان بعد السنين دى كلها لسه مش عارف ذوقى ؟؟
ليه انا عارفه ذوقه كويس والماركات الى بيحبها والمحلات الى بيشترى منها
ولما بجبله هديه بابقى عارفه ايه الى ناقصه او الى نفسه فيه
ده حتى نوع البرفانات الى بيجبها انا حفظاها
وانا عايزه ااقرا الكتاب الى بتقول عليه فلو عندك موقع ليه على النت رجاء ابعتهولى
اما بالنسبه لبيبه انا هاقولكم حصل ايه بكره ان شاء الله
لانى حاليا معها فى المول وهى نازله شراء وانا قاعده على النت فى الكافيه
وتحياتى لزوجه وربنا معاها

بنت الغربة يقول...

حبيبتى ياحاسوباتيه زعلتينى من نفسى
اول مره تدخلى عندى واتعقدتى ياحبيبتى
معلش حقك على انا بس بحب افضفض من الخنقه
لكن ان شاء الله حظك يطلع احسن من حظى
اتكلى على الله واتجوزى ياقمر (شر ولابد منه ) تحياتى ليك ودايما زورينى

بنت الغربة يقول...

استاذ محمد البنا شكرا لانك شرفتنى -
انا عجبنى رايك قوى بس لى تعليق معقوله الراجل بعد العشرة دى كلها لسه مش عارف مراته بتحب تلبس ايه ؟
وذوقها ايه ؟؟
اشمعنى انا عارفه ذوقه فى كل حاجه وعلى فكره كل الهدايا الى باجيبهاله
بتعجبه لانى بااراعى هو ناقصه ايه او نفسه فى ايه
وده لانى حافظه كل الماركات الى بيحبها وكل المحلات الى بيروحها
شرفتنى ودايما زورنى

بنت الغربة يقول...

حبيبتى عاشقه وغلبانه - انت نورتينى ياجميل انا عارفه ان تقريبا كل الستات مخنوقين بس ادينى بافضفض معاكم- وانا بصراحه غلبت افهم الباشا انه مايتكلمش بالطريقه دى معايا قدام الناس
برضه للاسف لما بيبدا يتعصب بينسى نفسه وكانى باشتغل عنده مش مراته
ربنا يهديه
ودايما زورينى ياقمر

بنت الغربة يقول...

حبيبتى يالاماضه كويس انى ضحكتك
انا والله احيانا بحس انه بيحبنى بس طريقته فى التعبير دااايما متعجرفه وخنيقه
وانا بسيطه جدا ومش بحب اللف والدوران
وان شاء الله اول مانزل مصر هاجيبلك البريفترول لحد عندك
نورتينى ياقمر

بنت الغربة يقول...

حبيبتى اشوو الحياه - شرفتينى ونورتينى
وماتزعليش منى اذا كنت زعلتك من الجواز - شوفى تجاربى وحاولى تطلعى منها بحاجه مفيده
شكرا لزيارتك ودايما كرريها

بنت الغربة يقول...

استاذ مصطفى
كل سنه وانت طيب انت كمان
الى حصل ده فعلا صحيح والا ماكنتش اتخنقت قوى كده
وانا مابدخلش حد فى مشاكلى مع الباشا حتى ماما ماتعرفش اى حاجه
بس بيبه صاحبتى الوحيده فى الغربه والواحد محتاج حد يفضفضله
وانا عارفه ان فكرة تغيير الساعه غلط وهتضايق الباشا جدا لانها لو اتعملت فى انا اكيييد هازعل قوى
وموضوع انه بحبنى .... نفسى احسه من غير مايخنقنى او يزعلنى قدام الناس
اما بالنسبه لكلام صبرنى فانا رديت عليه
وهو انى انا مابعرفش اترسم على حد اصلا - واكيد مش هاعملها مع الى بحبه
وبيبه هتسمعوا اخبارها بكره ان شاء الله
تحياتى ليك ودايما شرفنى بزيارتك

بنت الغربة يقول...

حبيبتى بس خلاص انا معاك ان تغيير الساعه غلط علشان كده ماعملتوش
وانا هاحاول افهمه بالراحه كده ان الواحد لازم يبقى ليه ذوق مختلف عن التانى لان ربنا مخلقناش كلنا زى بعض
تحياتى ليك ياجميل ودايما زورينى

بنت الغربة يقول...

حبيبتى منال نورتينى بزيارتك
وكويس انى ضحكتك بس انا متجوزه من 12 سنه مش 14
يارب يكملو 14 من غير مايجرالى حاجه من الخنقه
انا ضفت مدونتك عندى بعد اذنك وان شاء الله هازورك قريب
شكرا لزيارتك وكرريها يامنال

غير معرف يقول...

ازيك كل سنة وانتي بالف صحة وسلامة وخير بس هقولك بقى ايه سبب الخنقة ان الانسان مش بيحب شي مفروض عليه ويمكن هو ده الي محسسك بالخنقة بس في الغالب احلى هدية الي بتيجي من الحبيب والزوج وربنا يهنيكي وفكي كده ياقمرية

Lady E يقول...

مبروك عليكي الهدية يا قمرايا

وعلى فكرة انا وماما ساعاتنا سيكو هي ماركة مش وحشة
وعارفة انا بحالات ساعات بحب الحاجات السيمبل وساعات بحب الحاجات الكبيرة على حسب المناسبة يعني لو هروح الكلية تبقى الساعة كبيرة ولو رايحة فرح مثلا تبقى الساعة صغنونة

ربنا يهنيكي وبصي للساعة بحب ومتتخنقيش لانها هدية جوزك ليكي ومتنسيش تجيبيلوا هدية
او اعرفي مين البورفل تيرول ده :) واعمليه هدية ليه

محمد عتلم يقول...

والله ليكى حق تتخنقى ....اوى

Mafrousa يقول...

بصي يا مخنوقة هانم
كونه انه يجيب هديه ديه فى حد ذاته حدث نحسدك عليه جميعا
و نقول جتنا نيله فى حظنا الهباب
ههههههههههههههههه
و ش بيضحك و مطلع لسانه
ههههههههههههههههههههههه
بصي يا ست داليا و ده الاسم اللى قالته الاخت صبرني
حالك احسن من حالى
على الاقل جوزك جابلك هدية زي بتاعة مرات المدير
عرف ينقى اصلا اللى يجيب زييه

انا بقا و بلا فخر يا اوختى
واحد موظف عادى كده
بيوري جوزي بارفانات رجالى على حريمي
و بيقوله مش عاوز؟؟؟
قام جوزي افتكر ...و ياريته ما افتكر انى بحب البارفانات
قوم الراجل يقوله ده انا جايبهم من السوق الحرة
و طبعا بما ان جوزي يجهل انواع البارفانات الحريمي..و جودتها
اشتري واحدة
و لاقيته فى مرة داخللى بهدية
فرحت و فتحتها
و ياريتنى ما فتحتها
لاقيتها ايسنس إف بلأوييييييييييي
و لا تصلح اصلا تعطر اي شيء
و طبعا بان عليا
و لاقيت نظرة حسرة فى عنيه
ايه مش عجبتك؟؟
قلتله لا يا حبيبي حلوة اوي
بس ياريتت المرة اللى جاية تديني الفلوس انا اشتري..علشان الانواع مش تكرر عندي
و من يومها باخد حقى ناشف

مش تقوليل ساعة زي بتاعة مرات المدير
ياختى اعتبري انها هيه اللى قلدتك
ديه ستات تفرس

Mafrousa يقول...

انا قريت البوست تاني
علشان الفرسة تبقى دوبل
الصراحة فرستيني يا مخنوقة
تصدقى انا اللى مخنوقة منك
هههههههههههههههههههههههه
ابقى ظبطي المسافى البضا الكبييييييرة اللى تحت البوست
تعبت من المشي
ههههههههههههههه
حكاياتك ظريفة
و تخنق
هههههه
و تفرس

kochia يقول...

طبعا الهدية وعدم البخل في حد ذاتهم ميزة ومش موجودة عند ناس كتير

اعرفي مداخله عشان تعرفي تتعاملي معاه
مش ممكن تكوني لسة مش عارفاها مثلا
او زهقانة ؤمن حاجة

اللي حكيتيه يخنق صحيح بس مش اوي اوي يعني
يخنق خنقة صغنونة

صبرني يارب يقول...

لا بصي ما هو انا ما قلتلكيش ما تحبيهوش

لكن لو تعرفي اد ايه فى مصلحته انك تترسمي عليه شويه

هايبقى سعيد جداااااااااا

صدقينى انا عارفه الناس دي كويس

هو اساسا بيحب كده

اسمعي الكلام جربي مش هاتخسري حاجه

صبرني يارب يقول...

انتى صحيح مختفيه فين بقالك كام يوم انا عملتلك الكول سلو يلا تعالي

Diyaa' يقول...

بعد السلام عليكم
مقصدش أخنق طبعاً
عاجبني أسلوبك ودي أول مرة أدخل هنا
بس عن طريق تعليقك في مدونة نوران
بتاع الهونجا بونجا ده
المهم

عايز أوضح حاجة بس ..أولاً الأمومة شرف مش عبء تقيل فمش معني إن الزوج مش مقدر تعبها يبقي هيا مطحونة ومتبهدلة
مفيش حاجة ببلاش

وربنا من اسمائه العدل..كل البشر عمرهم ما هيدولك حقك مهما عملتي
لكن لو عندك قناعة وإيمان إن عدل ربنا هيشملك ..مش هتحسي بالإحساس ده
وبعدين معلش.ليه إنسانة عندها 3 أطفال تشتغل ؟ الجنة تحت أقدام الأمهات
أكبر فخر لإنسانة إنها تكون أم
ده مش معناه إنها متعملش حاجة تاني
بس مش تعملها بشكل إلزامي
الوظايف دلوقتي مش بترحم
وبتستهلك الإنسان لأقصي درجة
وكل ده عشان إيه قرش ؟ شوية نجاح وظيفي ورفاهية ممكن الإستغناء عن أغلبها ؟ إحساس وهمي بإننا نجحنا ووصلنا ؟ وفي الآخر بنيجي أخر العمر نقول ليه الأولاد بينسونا وليه الأولاد فيهم عيوب في شخصيتهم وليه بعاد عننا ؟ لأننا كنا بعاد عنهم في الأول ومركزين في اللي مش بيدوملنا


ثانياً لو الشغل هيكون مرهق والزوج معندهوش المقدرة علي إنه يقوم بجزء من دورك أو الأولاد لسه صغيرين..مش مهم الشغل للدرجة اللي تبقي بتموتي نفسك عشانه ..ال8 ساعات دول مهما كانوا بيجيبوا من فلوس..مش هيعوضوا غيابك عن أولادك ساعة
الشغل بس في حالة لو بتقومي بدور إنساني وميقدرش حد غيرك يقوم بيه.أو لو كنتي خايفة من الإنفصال وبالتالي عايزة تعرفي تصرفي علي نفسك ومتبقيش خايفة ومرعوبة لحسن جوزك يقطع عنك المصاريف ..لا قدر الله
أو لو مكانش في أطفال وفي ملل
غير كده.معلش ده إنتحار.وبإرادة الزوجة في أحيان كتيرة
اه الزوج عليه دور
بس عمره ما هيكون زي الأم
وبالتالي لما الأم بإرادتها الحرة تغيب 8 ساعات عن البيت عشان ترضي وهم النجاح الوظيفي ومن غير مبررات بتبرر بعدها عن أسرتها ..مترجعش تتخنق من الزوج .مهما كان غلطه .الخروج للعمل مع وجود أطفال بيخلي درجة تحمل الأم أقل وبيرهق أعصابها بشكل بشع

وفهمت إن موهبتك في التصميم ..موهبة زي دي ممكن تبقي هواية في البيت .ممكن تبقي شغل حر .مش شغل إلزامي يعني لازم أصحي عشان أنزل الساعة كذا وأرجع الساعة كذا وأخلص شغل قبل يوم كذا
وأحل مشاكل في الشغل النهاردة قبل بكرة وهكذا ..ليه الإرهاق الإضافي ده طالما مش إجباري ؟

الإختلاف في الرأي لا يفسد للود قضية :)

جسر الى الحياة يقول...

بجد بجد انا اللى مخنوقة منك.. اللهم لا حسد ربنا يخليه ويشتريلك كمان مش ده احسن من اللى مبيعبركيش اصلا... لاء وممكن يداينك بحاجة ممكن تشتريها وانتى معاه لانك مستقلة ماديا يعنى معاكى فلوس شفتى بقى... وعلى فكرة الرجالة بيشتروا عدوى