THOUSANDS OF FREE BLOGGER TEMPLATES

الثلاثاء، ديسمبر 30، 2008

كل سنه وانتم طيبين






النهارده مفيش خنقه -هو فيه بس هاحكيلكم عليها السنه الجايه -انا حبيت اعيد عليكم بس




يارب السنه الجايه تبقى احسن من السنه اللى فاتت عليكم كلكم......................وعلى انا كمان وتكون ااقل خنقه

ويارب اللى كان مزعل حد السنه اللى فاتت يايصالحه.................يايفضها سيرة ومايوجعش دماغنا...............

تحياتى ليكم كلكم وكل سنه وانتم طيبين

HAPPY NEW YEAR

الثلاثاء، ديسمبر 23، 2008

بيبه الجديده ---- حلوه لكن عجيبه


انا كنت ناويه اكتب البوست ده من 5 ايام بس السيرفر بتاع النت كان فى مشكله كبيييره هنا فى دبى



معرفش اخبار النت كان عندكم فى مصر ايه؟

وبما انى باكتب لكم .......... يبقى اكيد فيه خنقه...........عادى يعنى ......بس مش من الباشا.....


يوم الاربع الى فات كنت خلاص باجهز الاولاد للنوم ..وفجاه اتصلت بيبه....


بيبه : مخنوقه هو انت لازم تروحى الشغل بكره

انا: ايوه ...ليه فى حاجه؟؟



بيبه : اصلى هاروح افك بقية الغرز بكره .. وكيمو مش فاضى يودينى وطلب من اخته تودينى


وانت عارفه انى باعتبرها فى مقام ضرتى بالضبط....

انا : طيب ياحبيبتى ماتزعليش ..انا اصلا عندى برد جامد ومش راضى يخف ممكن اخد بكره مرضى



انت عايزانى اعدى عليك الساعه كام ؟؟



بيبه : ربنا يخليك ..انا هاكون جاهزه الساعه 11 وطبعا اخت كيمو هتقابلنا هناك


انا : ماشى ياجميل هاعدى عليك بالعربيه بس مش هاطلع ...اوك


وتانى يوم اخدت اجازه .. وربنا يستر وماتتخصمش من المرتب ..وعديت على بيبه



والبرد كان مموتنى علشان كده اخدت انتى بيوتك ومالحقتش افطر ولا اى حاجه ونزلت


بسرعه لانى اتأخرت على بيبه - لقيت عربية اخت كيمو واقفه ...وانا بصراحه مش


باستلطف اخت كيمو خاالص .. بس نزلت وسلمت عليه



اخت كيمو : ازيك يامخنوقه ..انت عندك برد ولا ايه


انا : ايوه برد جامد شويه - انت عامله ايه واخبار شغلك ايه؟


اخت كيمو (بعد مابعدت عنى شويه): الحمد لله ...رنى لصاحبتك خليها تنزل هو


احنا تحت امرها ولا ايه؟


انا: طيب خلاص رنتلها ..لو انت مستعجله روحى وانا هاوديها للدكتور


اخت كيمو : لاعلى ايه بعدين تقول لكيمو اختك سابتنى وصاحبتى هى اللى وديتنى للدكتور


انا بصراحه اتخنقت منها على الصبح كده ..وطنشت كلامها التقيل قوى ده ونزلت بيبه وركبت معايا


بس انا قلتلها تركب مع اخت كيمو علشان ماتزعلش وانا هاجى وراهم


ووصلنا المستشفى كلنا وطبعا الدكتوور الرايق لسه ماجاش... وبعد ساعه وصل بسلامته والضحكه


على وشه وبيسألنا


الدكتور : اهلا اهلا انت بقالكم كتير


انا : تقريبا ساعه وشويه


الدكتور : مش كتير قوى ههههههه -- ياله يامدام بيبه علشان نشيل بقية الغرز


بيبه : مخنوقه تعالى معايا انا مش عايزه افكها لوحدى انت عارفانى جبانه


اخت كيمو : كلنا هنيجى معاك يابيبه علشان نتفرج على فك الغرز (بغلاسه متناهيه)


وطبعا كاننا رايحين حفله دخلنا اوضة الكشف مع الدكتور والنييرس وانا وبيبه واخت كيمو


(زحمه قوى)من غير مناسبه


المهم فك الغرز لبيبه وشال الشاش كله و.....بيبه مش مصدقه نفسها من الفرحه


بيبه القديمه مش موجود منها غير وشها بس..........كل حاجه تانيه اتغيرت....فعلا


عمليات التجميل دى بتعمل البدع ....بيبه مش قادره تبطل بص فى المرايه الى فى العياده


وطبعا اخت كيمو كمان عماله تبصلها بغل شويتين كده


الدكتور : ايه رايك يامدام مخنوقه ؟؟....مش هتفكرى انت كمان تعملى حاجه


انا: لا يادكتور انا الحمد لله عجبانى خلقة ربنا


الدكتور : مقلناش حاجه ياستى بس برضه فى شوية دوفهات كده مطرح الحمل والولاده


انا ( بصيت فى المرايه وبعدين بصتله ) :الدوفهات دى عاجبانى قوى واهى برضه حاجه تدفى فى البرد


اللى ضايقنى قوى انه خلانى ابص فى المرايه وخلانى شكيت فى ثقتى فى نفسى ..دى الطريقه الى


بيصطادوا بيها الدكاتره زباين لعمليات التجميل.. لانهم بياخدو نسبه على كل عمليه يعملوها وكل


زبون يدخلوه المستشفى غير اجرة ايده وغير مرتبه (اللهم لاحسد )


الدكتور : عموما لوفكرتى انت عارفه مكانى وده الكارت بتاعى


اخت كيمو : طب وانا يادكتور انت مش شايف فى حاجه ولا ايه


الدكتور : يعنى فى شوية دوفهات هنا وهنا وشويه هنا ومحتاجه تصغيير للمناخير شويه


اخدت بيبه وخرجنا من الاوضه وسبت اخت كيمو تتفق معاه على عمرة كامله ليها...المهم ان بيبه كويسه


وفرحانه قوى و....انا بدأت اجووع قوى..لانى ماكنتش فطرت خالص


خرجنا كلنا ورحنا مول قريب من المستشفى وفطرنا وبعدين لاحظت ان الناس بتتفرج علينا ..وعلى
بيبه بالذات وانا مش عارفه فى ايه لغاية ماخدت بالى وقلتلها فى ودنها علشان
اخت كيمو ماتسمعناش وتعملها مشكله بعد كده
انا : بيبه ياحبيبتى انت مش ملاحظه ان هدومك بقت ضيقه عليك شويه من تحت و
شويتين تلاته من فوق؟؟
بيبه : اه صحيح انا لازم اجيب هدوم جديده ...اممممممممممم دلوقتى
انا : ماشى قومى مع اخت كيمو هاتى اى حاجه دلوقتى وانا هابقى الف معاك يوم
يوم تانى احسن انا البرد تاعبنى قوى
بيبه : اوك انا معايا الكردت كارد بتاع كيمو وهاشترى بيه وانت هتعملى ايه؟
انا : انا هاقعد على النت شويه فى الكافيه لغاية ماتخلصى ....اوك
المهم قامت مع اخت كيمو وانا قعدت ارد على تعليقاتكم على البوست اللى فات ...والحمد لله البرد راح شويه وفقت حبتين
بعد ساعة ونص تقريبا لقيت بيبه راجعه وشها مقلوب و شكلها هاتطق من الغيظ وتقريبا ماشترتش غير بلوزه
ولقيت اخت كيمو بتسلم على وماشيه علشان ولادها ....وطبعا انا قعدت مع بيبه علشان اعرف فى ايه
بيبه : انا اتخنقت من الوليه دى كل مانقى حاجه تقولى غاليه او مش سنك او وحشه ...هى مالها ومالى بالضبط؟
انا : طب ماتزعليش انا هاقوم الف معاكى ..انا بقيت كويسه والحمد لله
و.....ياريتنى ماقلتلها كده ....قعدنا نلف فى المول من اوله لاخره واشترت حاجات كتيرة والساعه بقت 3
وانا ولادى بيرجعوا 3.30 يعنى يادوب الحق اروح البيت
انا : كفايه كده يابيبه علشان الاولاد زمانهم راجعين البيت ومفيش حد غيرى يفتحلهم
بيبه : طب خلاص انا عندى فكره ايه رايك نعدى نجيب ولادك وبعدين ولادى ونروح مول الامارات
انا : ايه ؟؟ ليه يابنتى ما كفايه شوبينج كده النهارده --وبعدين مول الامارات ده بعييد قوى عن هنا دى لفه
جامده قوى وزحمه كمان
بيبه : متبقيش وحشه يامخنوقه انا بصراحه عايزة اخلص ام الكرديت كارد بتاع كيمو وهاخلص يعنى هاخلصه
انا : انت عايزه تخلصى 5000 درهم فى يوم واحد ليه ؟؟؟؟؟؟؟؟؟ انت اتجننتى؟؟؟؟؟؟؟
بيبه : هاقولك بعدين لما اخلصه
انا مش عارفه الدكتور عملها العمليه فى جسمها بس ولا دخل كمان على صواميل مخها؟؟؟ البت اتجننت تماما
ومش عارفه اقنعها ...وامرى لله رحت جبت ولادى وبعدين عديت جبت ولادها والشغاله طبعا... والعربيه
ماقولكوش شكلها بقى عامل ازاى..........عربيتى صغيرة وهاتش باك -ونص عمر كمان..............
ومعايا 6 عيال وبيبه والشغاله ..(متخيلين المنظر )..ده غير السواقه فى عز الزحمه ..مع دوشة العيال
بصراحه ..العربيه صعبت عليا .....
المهم وصلنا المول بعد عذاب وطبعا العيال كانوا جعانين فغديناهم الاول وسيبناهم فى البلاى كورد مع
الشغاله ...وطبعا معاها موبيل علشان الطوارئ لان دول 6 عيال على شغاله واحده (ربنا يكون فى عونها )
ولفيت مع بيبه وبرضه نازله شوبينج كتييير ...والكارد مش راضى يخلص علشان حظها الحلو كان فيه
sale فى المول كله ...وعديت ساعتين ... وانا تعبت قوى والشغاله كلمتنا مرتين .. والبرد رجع تانى اكتر
من الاول وخلاص عينى احمرت من التعب ...وبرضه لسه بيبه بتقيس وتجرب وتلف وتشترى .....
المهم الباشا كلمنى
الباشا : انت فين ده كله ؟؟لسه مع بيبه ؟؟
انا : ايوه بس انا تعبانه قوى ..البرد مبهدلنى.. احنا فى الامارات مول
الباشا : ايه اللى وداكم هناك كده ؟؟ ده زحمه قوى ...طيب انا هاعدى على كيمو وهاقبالكم هناك
انا : ياريت بسرعه لانى خلاص تعبت وعايزه اروح
الباشا : انسى بسرعه دى ده انا قدامى ساعه عقبال ماجى انا وكيمو ...وكمان لسه هانتغدى
طبعا الكلام نزل على زى الدش الساقع قوى لانى كان نفسى اروح البيت واخد البطانيه فى حضنى واناااام
بس بيبه لسه ماخلصتش ...والعيال زهقواا قوى ..
بيبه : على فكره كيمو كلمنى وقال انه جاى هو والباشا كمان ساعه ..يعنى قدامنا وقت لسه ..
انا (وصوتى مش طالع من التعب ): هو لسه فاضل حاجه فى الكارد
بيبه : ده كارد محجب مش راضى يخلص فاضل لسه الف ونص
انا : طب ياحبيبتى كفايه كده انا تعبت نكمل يوم تانى ..واوعدك انى هاوديك مول تانى يخلص على ام الكارد
بيبه : انسى انا مش مروحه غير لما اخلصه
انا : يابنتى كيمو هايزعل منك وممكن يتخانق معاكى
بيبه : ماتخافيش عليا ... وخليه يزعل شويه ..جايز يحس هو زعلنى قد ايه ...وتانى مره لما تيجى اليسا او غيرها
تبوسه يبقى يفتكر ان يقولها انه مابيتباسش غير من مراته......
مش بقولكم البت اتجننت...يعنى هو ده الى هايمنع كيمو من انه يتباس او يتنيل...لو خوفه من ربنا مامنعهوش ..
يبقى عمر الفلوس ماهتمنعه...... ربنا يهدى....
وفجاتن الباشا كلمنى...
الباشا : انا مش هاعرف ااجى لان فى حادثه على طريق الامارات فى المرواح ..لكن الرجوع سالك ارجعى لوحدك
وانا هاروح اتغدى مع كيمو وهاقبلك عند بيته ....
يانهار طحححححححححن .......هى كده كملت ...........واخدت بيبه والعيال والشغاله تانى فى العربيه ....بس المرة دى
كنت بانهار من التعب ..والعيال اتخانقوا مع بعض ...والسكه زحمهههههههههههه ............عملت غرز كتيرة بالعربيه
علشان اخلص من الزحمه واروح...برضه مافيش فايده والزحمه مابتخلصش....وفجاتن ابن بيبه عايز بيبى
شوفتوا الهنا الى انا فيه ...وطبعا خرجت برة الطريق ووقفنا علشان البيه الصغيير ...وكملنا تانى وربنا وحده يعلم انا
كنت سايقه ازاى ...لغاية ماوصلنا بيت بيبه ....
بيبه : شكرا ياجميل معلش تعبتك معايا ..اطلعى شوية اشربى حاجه انا حاسه بالذنب ..شكلك تعبان قوى
انا : لا شكرا انا عايزة اروح اخد الانتى بيوتك واناااااااااااااااام الساعة بقت 8 وكويس ان بكره الجمعه
بس بكره الغدااا عندك ..عقابا ليك على اللف ده كله ..
بس وروحت ولقيت الباشا اتغدى وروح وغير هدومه ونازل تانى مع كيمو علشان يشيشواا على القهوة
(واخر روقاان )
الباشا : انت هتنامى ولا ايه مش هتروحى تسهرى عند بيبه النهارده
انا : لالالالالا كفايه على قوى كده النهارده ...بس الغداا بكره عندهم
الباشا : بس كيمو مقليش
انا : لسه المعلومه ماوصلتلوش معلش بيبه عملاله مفاجاه
المهم نمت و...نمت كمان كتيير ورحنا اتغدينا عند بيبه ...وكانت عامله غداا sea food كتيير قوى
سمك وجمبرى وسبيط وكلامارى واستاكوزا .............ده غير السلاطات
انا : تسلم ايديك يابيبه لازمته ايه التعب ده ؟؟؟ اى حاجه وخلاص ليه ده كله؟؟انت عملت ده كله امتى؟؟
بيبه : وحياتك كله جاهز ولا عملت حاجه ..ربنا يخلى الكرديت كارد...
وتصدقى برضه لسه ماخلصش .....مش قلتلك محجب....
قولولى بقه لى حق اتخنق ولا لأ؟؟؟؟ بجد اتخنقت من مخها الى صغر قوى كده....دى محتاجه عملية ظبط زوايا للمخ
او الظاهر كهربة المخ عايزة تتغير ولا بينى انا الى هاتجنن..............
بس دى صاحبتى الى انا بحبها ...ومش ممكن ازعل منها ....والخنقه ممكن نسميها
خنقه نص نص ...........
على فكرة هى عارفه انى باكتب لكم كل حاجه ...وبتسلم عليكم وناويه تعمل لها بوست بس اول ماتشطب
الكرديت بتاع كيمو ....وعلى فلوسه كلها
حاجه تخنق مش كده........................












































































































الثلاثاء، ديسمبر 16، 2008

خنقة العيد --- قصدى هدية العيد

كل سنه وانتم طيبين

انا عارفه انى اتاخرت عليكم بس كان عندى برد جامد جدا - والمدارس بدأت تانى ورجعت الشغل تانى

والدنيا بقت سقعه الصبح وحر قوى الضهر وربيعى العصر وخريفى المغرب وتلج بالليل

يعنى جو جميل جداااا يخلى اى حد يجيله التهاب رئوى مش انفلونزا بس

المهم نرجع لمضوعنا وهو هدية العيد الرايقه بتاعتى - لأنها لغاية دلوقتى فى الدرج ماتلبستش غير مره واحده)

قبل العيد بأسبوع نزلت انا والباشا مع بيبه وجوزها ورحنا مول اسمه (فيستيفال سيتى ) ده مول حلو قوى

وفيه العاب ولبس اطفال - وقعدنا هناك 3 ساعات لغاية ماجبنا حاجات العيال كلها

وفجأتن الباشا اقترح ان العيال يروحوا مع بيبه وجوزها وانا وهو نفضل علشان هيجبلى هدية العيد

انا بصراحه فرحت (مش علشان الهديه - لا علشان اقترح انى انا وهو هنتمشى لوحدنا زى زمان )

والعيال بيحبو ولاد بيبه ومش هيعملوا مشاكل لغاية لما نرجع

المهم بيبه وكيمو اخدوا العيال وروحوا - وانا والباشا فضلنا فى المول بنتمشى وبنتكلم

الباشا: ايه رايك اجيبلك ساعه حلوة - المحل ده عنده ساعات حلوة قوى وكلاس

انا : اشمعنى ساعه يعنى مانا عندى ساعات كتير

الباشا : ولا واحده فيهم كلاس كلهم اى كلام وكبار قوى وفيهم استراس بيلمع كده غريب

انا : يعنى ايه مش كلاس ؟؟ انا بحب الساعات الكبيرة اللى فيها لعب شويه ايه المشكله؟؟ وبعدين انا عندى اتنين ماركة سواتش

يعنى مش اى كلام

الباشا : هى دى ماركه تتلبس؟ ياشيخه ارتقى بذوقك شويه

انا : ارتقى بذوقى (بخنقه لسه فى بدايتها ) حاضر ياحبى ورينى الساعات الكلاس علشان ارتقى بذوقى

المهم دخلنا المحل وكان بصراحه شيك قوى وكله ساعات ماركات عالميه متنوعه - انا رحت طبعا على الساعات الكبيرة

اللى فيها لعب لانى بحبها قوى - وده شافنى عملت كده راح مسكنى واخدنى عن ماركة اسمها سيكو ( ماركه قديمه قوى )

بس غاليه قوى مش عارفه ليه ؟؟ اذواقها كلاسيك زياده عن اللزوم - وكل الساعات الحريمى صغيره او شكلها

سيمبل قوى (مش النوع اللى بيعجبنى) واختار واحده غريبه كده وقالى جربيها

الباشا : ايه رايك شفتى حلوة قوى ازاى

انا : حبى هى حلوة بس انا عايزة واحده اكبر شويه دى صغيرة قوى

الباشا : انا عايز افهم صغيرة ازاى يعنى هى لازم تبقى واخده ايدك كلها علشان تبقى حلوة

انا : لا ياحبيبى بس انا مش بحب النوع الرفيع ده وبعدين دى سمبل قوى ومفيهاش اى لعب وعاديه قوى على سعرها

الباشا : مالكيش دعوه بسعرها - انا باختارلك الحاجه الكلاس الى ذوقها حلو - بلاش ذوقك البيئه ده

كل الحوار ده كان قدام الاموره الى واقفه تفرجنا الساعات وطبعا قصرت واتكتمت لما قال على ذوقى انه بيئه

والظاهر صعبت على الاموره الى بتبيع فعرضت علينا ماركات تانيه - اشكالها (فى رأى البيئه) انها احلى

بس مفيش فايده برضه مصر على الساعه الى اختارها هو - ولما لقانى ساكته ومابتكلمش اتقمص منى وقالى خلاص هاتى اللى انت عايزاه

انا : انا عايزه الى انت نقتيها لى حبيبى خلاص اقتنعت بيها

الباشا : بجد ولا برضه مش عاجباكى

انا : لا عاجبانى خلاص اهو الواحد لازم يغير استايله شويه

الباشا : ايوه كده ارتقى بذوقك شويه

انا : حبى انا ارتقيت بذوقى من 12 سنه لما اتجوزتك ( وانا باحاول اكتم الخنقه الى ممزوجه بالتريقه )

الياشا : اه طبعا امال ايه

المهم اشتراها بحوالى 2000 درهم الا شويه وروحنا عند بيبه علشان ناخد العيال من عندها واول ماطلعنا راح موريهم الساعه

طبعا عجبت كيمو جدا لانه من نفس الذوق الراقى بتاع الباشا - اما بيبه راحت بصه للساعه وبعدين بصتلى وقالتلى

بيبه: حلوة الساعه يامخنوقه هو انت اللى نقتيها

الباشا : اكيد هى اللى منقياها مش هديتها

بيبه : غريبه انت من ساعة ماعرفتك عمرك مالبستى ساعه صغيرة كده

انا : انا قلت اغير الاستايل شويه يابيبه ( وانا مخنوقه جدا)

بيبه : طيب ياحبيبتى مبرووك - تعالى اما نعمل شاى فى المطبخ

المهم هى خدت بالها انى مخنوقه ودخلنا المطبخ علشان نعرف نتكلم لوحدنا وحكيت لها على اللى حصل كله

بيبه : المفروض بعد ماقالك ذوقك بيئه تسيبيه وتمشى وماتشتريش حاجه

انا : انا مش بحب النكد يابيبه وبعدين ده بيجيبلى هديه ليه ازعله - وبعدين الساعه غاليه فعلا يعنى هو مش بخيل

بيبه : انا عارفه انها غاليه بس ماتعودوش انه يتريق على ذوقك

انا : خلاص الموضوع انتهى و الساعه اشتراها خلاص وانا هابقى كويسه بكره مش مشكله

بيبه: بصى انا هاروح معاك بعد العيد لما افوق من العمليه كده ونروح نغيرها - مش الفاتورة والضمان معاك

انا: لا يابيبه كده الباشا هيزعل وانا مش ناويه اغيرها خلاص

بيبه: بلاش خيابه دى موديلها مش حلو ومش ذوقك ومش هتحبى تلبسيها - عموما فكرى براحتك ونشوف نعمل ايه بعد العيد

المهم بعدها بيومين الباشا جه وقالى اجهز نفسى الساعه 8 علشان عندنا عشاء عمل فى فندق الحياة بلازا تبع الشغل

وكل واحد معاه مراته

المهم لبست وجهزت وخلصت قبله كالعاده وبصلى وقالى : انت مش لابسه الساعه ليه؟

انا: اه صحيح نسيت البسها اصلى كنت مخلياها للعيد

الباشا : ليه البسيها النهارده وابقى البسيها فى العيد ايه المشكله ؟

المهم لبستها وبعدين ودينا العيال عند بيبه ورحنا العشاء - كان المطعم حلو قوى والقعده دمها مش تقيل -وكنت المصريه الوحيده فيهم

كانو خلطة من الاجانب على لبانين

واحنا بنتعشى لقيت مراة مديره تيم (بريطانى) لابسه ساعه شبه ساعتى قوى مع اختلاف بسيط

وطبعا نفس الماركه - قلت فى سرى ايه المصادفه الغريبه دى ؟

واحنا مروحين قلتله

انا : السهره كانت حلوه - ومرات تيم ظريفه - تخيل دى لابسه ساعه شكلها قريب قوى من ساعتى

ونفس الماركه

الباشا : شفتى بقه ذوق جوزك - انا كنت مع تيم وهو بينقيها لها - وعجبتنى قوى

انا : علشان كده جبتهالى

الباشا : ايه هى مش عاجباك ولا ايه - ده مرات مديرى لابسه زيها - علشان تعرفى انا مابستخسرش فيك حاجه

انا : عارفه ياحبيبى انت زعلت ليه انا باسأل بس - ربنا يخليك لى

بس ................... وروحت البيت وأول حاجه عملتها انى قلعت الساعه وحطيتها فى علبتها

وقفلت الدرج عليها ........................

ومانمتش طول الليل من التفكير - ياربى انا مخنوقه ليه الساعه غاليه وهو مش بخيل و فى رجاله غيره

كتير مابيجبوش لمراتتهم حاجه اصلا فى العيد - وبعدين هو فعلا مابيستخسرش فى حاجه -

بس ليه انا كل لما ابص للساعه احس انها مش بتاعتى

المهم انا من ساعتها مالبستهاش وهو ماخدش باله انى مالبستهاش فى العيد وبعده ولغاية النهارده برضه ماخدش باله

ان الساعه لسها فى علبتها من يوم العشاء اياه

بذمتكم مش حاجه تخنق............................

مخنوقه جدا










































































































































































الأربعاء، ديسمبر 10، 2008

هدية العيد ----- عملية تجميل



انا النهارده مخنوقه دبل بس مش من الباشا بس لالالالالا ده من صاحبه الانتيم كمان يعنى الخنقه دبل








طبعا العنوان يخض وهتقولوا هى عملت عملية تجمبل اكييييد لالالالا لسه ماتخنقتش ولا اتجننت للدرجه دى








الحكايه انى انا والباشا لينا اصحاب انتيم هما كيمو ومراته بيبه ونعرفهم بقالنا اربع سنين








كيمو بيشتغل مدير حسابات لرجل اعمال تقيل فى دبى ومن حوالى سنه خلص له عمليه كسب منها الراجل مبلغ كبير








فأنعم على كيمو بترقيه وخلاه مدير اعماله - يعنى ينظم له شغله ويتابع شركاته ويعمله حفلاته يعتى يقابل المطربين شخصيا ويتعاقد معاهم








ويسلمهم اجورهم و...........كده








وطبعا نقل سكنه من الشارقه لدبى وفى شقه كبيره (يعنى ايجار فلكى ) يعنى ربنا فرجها عليه من وسع والحمد لله








هتقولولى ايه المشكله ااقولكم ان الانسان لما فلوسه بتكتر عقله بيخف ويصغر








من حوالى 6 شهور كان رجل الاعمال عامل حفله فى برج العرب وكان جايب الاخت الامورة أليسا وكان المسؤول فى شرف استقبالها من






المطار








هو كيمو - والاخ كيمو وصلها الفندق ودردش معاها لما صدعها واداها رقم موبيله علشان لو احتاجت حاجه -( قال يعنى الواد جدع قوى )








المهم بعد الحفله ماخلصت تانى يوم وصل الاخت أليسا المطار وهى بتسلم عليه راحت طبعت بوسه على خده








بس وخد عندك كيمو انشكح بنفسه قوى وافتكر نفسه الواد وائل كفورى وطبعا قال لنفسه لما انا واد محصلتش كده ليه متجوز بيبه








وطبعا اول واحد عرف الى حصل هو الباشا جوزى -مش متخيلين جه البيت ازاى وهو ودانه محمره من الفرسه من كيمو - وعمال يحكيلى








وهو متغاظ قوى لانه طبعا احلى من كيمو ميت مره لكن الدنيا حظوظ - انا كتمت فرستى وضحكت وقلتله ان الى عملته ده عادى








الباشا : عادى ازاى يعنى








انا: اليسا دى فنانه لبنانيه واصلا كل اللبنانين بيبوسوا الرجاله عادى عندهم زى الاجانب - انا عارفاهم كويس بحكم الغربه الى من زمان








قوى - يعنى مش قصدها حاجه خاااااالص واراهنك لو افتكرت اسمه لما تروح








الباشا : بس انت لازم تعرفى بيبه الكلام ده علشان كيمو مش هيقولها






انا: ليه؟؟؟ ااقولها ليه الموضوع مش مستاهل - وبعدين انا مالى دى حاجه خاصه






الباشا : انت مش صاحبتها ؟ وقلبك عليها ؟ المفروض تقوليلها






انا :انت عايز تنكد عليها ليه؟ طب هى ماتعرفش اللبنانين وعوايدهم زى واكيد هتفهم غلط وتبقى خناقه






وبعدين الموضوع مش مستاهل يكبر يعنى هى اليسا هتنطس فى نظرها وتبص لكيمو الى بيلمع من فوق






الباشا : الراجل مش بشكله






انا : يعنى هو كيمو يحلم بربع الى مع اليسا ده مرتبه مايجيش ربع الى خدته فى حفله مدتها ساعتين






قول بقه انك عايز تنكد على كيمو وتعمله خناقه - انسى انا مش هاقولها حاجه






المهم اتقابلنا كلنا تانى يوم واحنا عندهم قام قال لكيمو






الباشا : هوانت غسلت وشك ولا لسه ياكيمو






كيمو : ليه هو وشى فيه ايه






الباشا :يعنى من مطرح بوسة اليسا امبارح






وطبعا بيبه سمعت الحوار الهابط ده وبقت خناااقه جامده بسبب المولعاتى بتاعى - ومن يومها والموضوع ماهديش بين بيبه وكيمو






وزعلانه منى علشان مقلتلهش حاجه - حاولت افهمها ان الموضوع مش مستاهل والله لان مش معقوله ان اليسا هتبص لكيمو بتاعها






لان اكيد نفسها مش حلوة للدرجه دى - ومش هتسيب رجل الاعمال وتبص لمدير اعماله






ومن ساعتها وبيبه مصرة اصرار غريب انها تعمل عملية تجميل علشان يبقى جسمها زى اليسا














مع ان بيبه جسمها حلو بس رفيعه حبتين تلاته وانا بصراحه كان نفسى ابقى رفيعه زيها - علشان كده انا مستغربه هى ليه عابزه تعمل


عملية تجميل - حاولت اقنعها ان كده حراام لانها هتغير فى خلقة ربنا - اقتنعت شويه وبعدين قعدت تلف وتسأل شيوخ فى دبى


واتنين قالولها ان العمليه تجوز تحت مبدأ ( أن الاعمال بالنيات وأن لكل امرئ مانوى )


انا برضه ماقتنعتش وقلتلها هاخلى واحده صاحبتى من ايام الدراسه فى السعوديه تسألى وفعلا طلعت العمليات دى مجازه فى السعوديه


احترت اعمل ايه علشان اقنعها ماتعملهاش - قلتلها طب كيمو رايه ايه؟؟


قالت لى ان سيادته بقى شايف نفسه قوى وبقى دايما يغيظها ويتريق عليها لانها رفيعه قوى


لاحول ولاقوة الا بالله - من امتى ؟؟ ده الرفع ميزة حلوه قوى ياريتها دامت


المهم انها قررت والموضوع انتهى المهم دلوقتى فين وامتى وبكام هتعمل العمليه - الاستاذ كيمو هو الى لف واختار المستشفى والدكتور


و....كل حاجه وانا بصراحه هاطق منه - وصعبانه على بيبه -قلت لما اكلم مامتها جايز تعقلها

برضه مفيش فايده - والدكتور حدد العمليه اول يوم العيد بالليل - سابت ولادها مع الشغاله وانا سبت ولادى مع ابوهم

ورحت معاها هى وكيمو المستشفى

مستشفى نظيفه قوى بس طبعا الدفع قبل العمليه تصوروا المبلغ كام ؟؟؟..........25 الف درهم بالتمام والكمال

بذمتكم مش حاجه تخنق لما الفلوس دى تدفعها فى عمليه مالهاش لازمه ؟؟؟

المهم ان بيبه كانت قلقانه لان دى اول عمليه تعملها فى حياتها - بس الدكتور طمنها خالص وقالها ان العمليه مش هتاخد ساعة زمن

وهتخرج حاجه تانيه خالص

مش عارفه ازاى ؟ هتدخل بيبه وتخرج وهى اليسا ؟؟ جايز

المهم ان العمليه قعدت 3 ساعات مش ساعه لدرجت انى شكيت ان جرى لبيبه حاجه - وكل شويه اسال النيرس - تقولى شويه مدام

وكيمو باشا قاعد يقرى فى البرشور بتاع المستشفى ويتفرج على المجلات - اتفرست قوى وقلتله قوم اسال فيه ايه - ليه الدكتور اتاخر كده؟

قام سال لقى الدكتور خارج وبيطمنه ان كل حاجه مشيت تمام

انا قمت جرى وقلتله فين بيبه ؟ ضحك وقالى هو انت اختها ولا ايه ؟

الرايق ابن الرايقه - لا يادكتور انا امها هى فين؟

ماتخافيش هى فى اوضتها - رحت عندها و........ شفتها كانت ياعينى متربطه زى الموميا مش باين غير وشها

واسلاك خارجه منها ومعلقين لها محلول - وطبعا لسه مفاقتش

دخل كيمو ومعاه الدكتور وطمنا وقال انه هتفوق كمان ساعه واطمنى دى بقت حاجه تانيه خالص

اه طبعا ماهو باين (بقت موميا )

المهم انها فاقت بعد ساعه ووشها اصفر قوى - ندهت للدكتور وقالها انه لازم تفضل فى السرير لغاية بكره وماتقلقش

بس هى هتموت وتشوف شكلها ايه؟

انا طمنتها وقلتلها ان جسمها بقى فيه مرتفعات ومنخفضات وتلال وهضاب يعنى ماتقلقش خااااااااااااااااااااااااااالص

المهم انى كان لازم ابات معاها فى المستشفى وطبعا كيمو روح علشان العيال

الصبح الساعه 5 قمت على صوت بيبه وهى بتتألم - ندهت للنيرس وسألتها على الدكتور قالتلى روح

طبعا اتخانقت معاها وقلتلها تشيل الابره من ايد بيبه لانها ورمت وتقب تغطس وتجيبلى الدكتور الرايق ده

قعدت تبرطم شويه بالفلبينى - وبعد نص ساعه جه الدكتور وهو متضايق قوى - وكشف عليها وقال خلاص مش محتاجه محلول

ممكن تاكل وممكن تروح الضهر - حضرتك عايزه حاجه تانى (بخنقه )

ايوه عايزه حضرتك تكون موجود الضهر قبل مانمشى

حاااااااااااضر خلى جوزها يكلمنى

المهم اكلت ونامت شويه وانا بصراحه مش عارفه انام من كتر القلق - لغاية كيمو ماجه الساعه 10

كيمو :هاه ايه الاخبار عامله ايه يابيبه؟

انا : تعبت شويه ياكيمو كلم الدكتور خليه يجى علشان اجهز لها حاجاته علشان تمشى

كيمو :امال الشاش ده كله هيتشال امتى ؟

انا : ابقى اسأل الدكتور لما يجى

بس وجه الدكتور وكشف عليها وخلاها تتمشى شويه قدامه - طبعا كانت تعبانه جدا - بس كتب لها خروج

كيمو خرج مع الدكتور وانا قعدت الم فى حاجات بيبه واساعدها وخلصنا وقاعدين مستنين كيمو

خرجت ادور عليه لقيته لسه عند الدكتور - بصراحه قلقت قوى - وقلت اكيد فى حاجه حصلت لبيبه ومش عايز يقولى

خرج كيمو من غير مايشوفنى ودخلت للدكتور بسرعه وسألته

انا : ايه يادكتور هو فى مضاعفات لعملية بيبه؟

الدكتور : لأ ليه؟

انا: اصل كيمو طول عندك قوى وانا قلقت تكون مخبى على حاجه

الدكتور : هههههه لأ ده كان الأستاذ كيمو بيحجز معاد استشارة علشان عمليه

انا :عملية ايه تانى هى بيبه فيها ايه

الدكتور : لأ ده الأستاذ كيمو عايز يعمل عملية زرع شعر

انا: (باسبهلال جامد ) ايه ؟ زرع ايه ؟؟؟؟ خلاص مش عايزه اعرف حاجه سلام

وسيبته وانا بضرب كف على كف وعماله اكلم نفسى ايه البشر دى؟؟ ليه الراجل لما فلوسه بتكتر عقله بيخف وبيصغر ؟؟؟؟؟

بس دى غلطتى انا وبيبه المفروض قبل مانسأل حكم عمليات التجميل ايه ....... نسأل حكم الى يتباس من اليسا ومايقولش لمراته

القتل فيه جائز ولا مكروه - والى يقولها ويولعها حريقه الساطور كفايه عليه ولا نجيب منشار كهربا احسن .....................

عرفتوا بقه ليه الخنقه المرة دى دبل ؟؟؟؟؟

اما هدية الباشا لى فى العيد ............... فدى خنقه تانيه هاقولكم عليه بعدين

كفايه عليكم الخنقه دى ............

مختوقه دبل